ಉಪೇಂದ್ರ ಮತ್ತು ಆರ್ ಚಂದ್ರು ಕಾಂಬಿನೇಶನ್‌ನ 'ಕಬ್ಜ' ಚಿತ್ರದ ಈವರೆಗಿನ ಕಲೆಕ್ಷನ್ ವಿವರ ಇಲ್ಲಿದೆ.

ರಿಯಲ್ ಸ್ಟಾರ್ ಉಪೇಂದ್ರ ಹಾಗೂ ಆರ್ ಚಂದ್ರು ಕಾಂಬಿನೇಷನ್ ಕಬ್ಜ ಸಿನಿಮಾ ಎರಡನೇ ದಿನಕ್ಕೆ 100 ಕೋಟಿ ಕ್ಲಬ್ ಸೇರಿದೆ. ಈ ಕುರಿತು ಚಿತ್ರತಂಡ ಅಧಿಕೃತವಾಗಿಯೇ ಮಾಹಿತಿ ಹಂಚಿಕೊಂಡಿದೆ. ವೀಕೆಂಡ್ ನಲ್ಲಿ ಚಿತ್ರಮಂದಿರಗಳು ಹೌಸ್ ಫುಲ್ ಪ್ರದರ್ಶನ ಕಂಡಿದ್ದು, ಒಳ್ಳೆಯ ಕಲೆಕ್ಷನ್ ಮಾಡಿದೆ ಎನ್ನಲಾಗುತ್ತಿದೆ. ಆದರೆ, ಭಾನುವಾರದ ಕಲೆಕ್ಷನ್ ಕುರಿತು ಅಧಿಕೃತ ಮಾಹಿತಿ ಹೊರಬಿದ್ದಿಲ್ಲ. ಸಿನಿಮಾ ಯಶಸ್ಸಿನ ಕುರಿತು ಕುರಿತು ಪ್ರತಿಕ್ರಿಯಿಸಿದ ಉಪೇಂದ್ರ ಅವರು, ಒಂದು ಸಿನಿಮಾ ಗೆದ್ದರೆ, ಉದ್ಯಮ ಉಸಿರಾಡುತ್ತದೆ ಎಂದಿದ್ದಾರೆ. 

ಕಬ್ಜ ಸಿನಿಮಾಗೆ ಮೊದಲ ದಿನವೇ ಸಿನಿರಸಿಕರಿಂದ ಒಳ್ಳೆಯ ಪ್ರತಿಕ್ರಿಯೆ ದೊರೆತ್ತಿತ್ತು. ಹೀಗಾಗಿ ಮೊದಲ ದಿನ ಕಬ್ಜ ಚಿತ್ರ ವಿಶ್ವದಾದ್ಯಂತ ಎಲ್ಲಾ ಭಾಷೆಗಳಲ್ಲಿ 54 ಕೋಟಿ ರೂ. ಗಳಿಸಿತ್ತು. ಕರ್ನಾಟಕದಲ್ಲಿಯೇ 26 ಕೋಟಿ ಕಲೆಕ್ಷನ್ ಮಾಡಿದ್ದು, ಎರಡನೇ ದಿನವೇ 100 ಕೋಟಿ ಕ್ಲಬ್ ಸೇರಿದೆ. ಭಾನುವಾರ ಇನ್ನೂ ಹೆಚ್ಚಿನ ಗಳಿಕೆ ಕಂಡಿದೆ ಎನ್ನುವ ಲೆಕ್ಕಾಚಾರವಿದೆ.    

ಕಲರ್ಸ್ ಕನ್ನಡ ವಾಹಿನಿ ಕಬ್ಜ ಸಿನಿಮಾದ ಟಿವಿ ಹಕ್ಕನ್ನು ತನ್ನದಾಗಿಸಿಕೊಂಡಿದೆ. ಓಟಿಟಿ ವೇದಿಕೆಯಾದ ಅಮೇಜಾನ್ ಪ್ರೈಮ್ ವಿಡಿಯೋ 'ಕಬ್ಜ' ಪ್ರಸಾರದ ಹಕ್ಕನ್ನು ಖರೀದಿಸಿದ್ದು, ಇದನ್ನು ಖರೀದಿಸುವ ಮುನ್ನವೇ ಅವರು ಸಿನಿಮಾ ನೋಡಿದ್ದಾರಂತೆ. ಹೀಗಾಗಿ ಅವರು ಒಳ್ಳೆಯ ಬೆಲೆ ಕೊಟ್ಟು ಸಿನಿಮಾ ಪ್ರಸಾರದ ಹಕ್ಕನ್ನು ಖರೀದಿ ಮಾಡಿರುವುದಾಗಿ ನಿರ್ದೇಶಕ ಆರ್.ಚಂದ್ರು ಹೇಳಿಕೊಂಡಿದ್ದಾರೆ.   

ಕಬ್ಜ ಸಿನಿಮಾವನ್ನು 120 ಕೋಟಿ ರೂಪಾಯಿ ವೆಚ್ಚದಲ್ಲಿ ನಿರ್ಮಾಣ ಮಾಡಲಾಗಿತ್ತು. ಆದರೆ, ಸಿನಿಮಾದ ಟಿವಿ ಮತ್ತು ಓಟಿಟಿ ಹಕ್ಕು ಬಹಳ ದೊಡ್ಡ ಬೆಲೆಗೆ ಮಾರಾಟವಾಗಿರುವುದರಿಂದ ನಾನು ಹಾಕಿರುವ ಹಣವನ್ನು ಈಗಾಗಲೇ ಗೆದ್ದಿದ್ದೇನೆ. ಸಿನಿಮಾ ಕಲೆಕ್ಷನ್ ಮೂಲಕ ಬರುವ ಹಣವೆಲ್ಲವೂ ಲಾಭ ಎಂದು ಆರ್.ಚಂದ್ರು ತಿಳಿಸಿದ್ದಾರೆ.  

ಕಬ್ಜ ಸಿನಿಮಾದಲ್ಲಿ 1945ರ ಸ್ವಾತಂತ್ರ್ಯ ಪೂರ್ವಕ್ಕೂ ಮುನ್ನ ಅರ್ಕೇಶ್ವರನ ಚರಿತ್ರೆಗೆ ನಾಂದಿ ಹಾಡಲಾಗಿದೆ. ಅರ್ಕೇಶ್ವರ ಅಲಿಯಾಸ್ ಅರ್ಕ ಅಂಡರ್‌ವರ್ಲ್ಡ್‌ಗೆ ಎಂಟ್ರಿಕೊಡುವವರೆಗೂ ಫಸ್ಟ್ ಹಾಫ್ ಮುಗಿದಿರುತ್ತೆ. ಅಸಲಿಗೆ ಇಂಟರ್‌ವಲ್‌ನಿಂದಲೇ ಕಬ್ಜ ಚಿತ್ರದ ನಿಜವಾದ ಆರಂಭ. ಅಣ್ಣನ ಕೊಲೆ ಮಾಡಿದವರ ನಾಶ ಮಾಡಲು ಹೋರಾಟ ಅರ್ಕೇಶ್ವರ ಸೆಕೆಂಡ್ ಹಾಫ್‌ನಲ್ಲಿ  ಭೂಗತಲೋಕವನ್ನೇ 'ಕಬ್ಜ' ಮಾಡಿರುತ್ತಾನೆ. ಇಲ್ಲಿಂದ ಮುಂದೆ ಅರ್ಕೇಶ್ವರ ಏನಾದ? ಅವನ ಭವಿಷ್ಯ ಏನಾಯ್ತು? ಮಕ್ಕಳು ಪತ್ನಿ ಏನಾದ್ರು? ಎಂಬುದೇ ಸಿನಿಮಾ ಹೈಲೈಟ್.