ಬೆಳ್ಳಿತೆರೆಯಾಚೆಗಿನ ಹೀರೋಗಳು: ಸ್ಯಾಂಡಲ್‌ವುಡ್ ಸ್ಟಾರ್ ನಟರ ಈ ಸಮಾಜ ಸೇವೆಗಳ ಬಗ್ಗೆ ನಿಮಗೆ ಗೊತ್ತಾ?

ರಾಕಿಂಗ್ ಸ್ಟಾರ್ ಯಶ್ ಇಂದು ಎಷ್ಟೇ ಎತ್ತರಕ್ಕೆ ಬೆಳೆದಿದ್ದರೂ ಹತ್ತಿದ ಏಣಿಯನ್ನು ಮರೆತ್ತಿಲ್ಲ. ಯಶೋಮಾರ್ಗ ಎಂಬ ಸಂಸ್ಥೆಯನ್ನು ಸ್ಥಾಪಿಕ ಅನೇಕ ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಕೊಂಡಿದ್ದಾರೆ. ರೈತರು, ಬಡವರು ಸೇರಿದಂತೆ ಕಷ್ಟದಲ್ಲಿರುವ ಅನೇಕರಿಗೆ ಈ ಸಂಸ್ಥೆ ನೆರವು ನೀಡುತ್ತಾ ಬಂದಿದೆ. ಬೇಸಿಗೆ ಬರುತ್ತಿದ್ದಂತೆ ಉತ್ತರ ಕರ್ನಾಟಕದ ಬಹುತೇಕ ಹಳ್ಳಿಯ ಜನರು ನೀರಿಲ್ಲದೇ ಪರದಾಡುವುದು ಸಾಮಾನ್ಯ. ಅಂತಹ ಹಳ್ಳಿಗಳ ಕೆರೆಗಳಿಗೆ ಕಾಯಕಲ್ಪ ಮಾಡುವ ಕೆಲಸವನ್ನು ಯಶೋಮಾರ್ಗ ಸಂಸ್ಥೆ ಮಾಡ್ತಿದೆ. ಜೊತೆಗೆ ಗದಗ, ಹುಬ್ಬಳ್ಳಿ, ಧಾರಾವಾಡ, ರಾಯಚೂರು, ಬೀದರ್, ಧಾರಾವಾಡ, ಕಲಬುರಗಿ ಸೇರಿದಂತೆ ನಾನಾ ಜಿಲ್ಲೆಗಳಿಗೆ ಪ್ರತಿವರ್ಷವೂ ಕುಡಿಯುವ ನೀರು ಸರಬರಾಜು ಮಾಡುವ ಕಾರ್ಯ ಮಾಡ್ತಿದೆ. ಜೊತೆಗೆ 4 ಕೋಟಿ ವೆಚ್ಚ ಮಾಡಿ ಕೊಪ್ಪಳ ನಗರ ಕೆರೆಯ ಹೂಳೆತ್ತಿಸಿ, ಕೊಪ್ಪಳ ಜನತೆಯ ನೀರಿನ ಸಮಸ್ಯೆಗೆ ಶಾಶ್ವತ ಪರಿಹಾರ ಒದಗಿಸಿದ್ದಾರೆ. ಇಷ್ಟೇ ಅಲ್ಲದೇ ಹಲವು ಸಾಮಾಜಿಕ ಕಾರ್ಯಗಳಲ್ಲಿ ಯಶ್ ತೊಡಗಿಸಿಕೊಂಡಿದ್ದಾರೆ. ಯಶ್ ಜೊತೆ ಅವರ ಅಭಿಮಾನಿಗಳು ಕೈಜೋಡಿಸಿದ್ದಾರೆ.

1998ರಲ್ಲಿ ನಿರಾಶ್ರಿತ ಅಬಲೆಯರಿಗಾಗಿ ಡಾ.ರಾಜ್‌ಕುಮಾರ್ ಹಾಗೂ ಪಾರ್ವತಮ್ಮ ಆರಂಭಿಸಿದ್ದ 'ಶಕ್ತಿಧಾಮ'ವನ್ನು ಮುಂದೆ ಅವರ ಮಕ್ಕಳಾದ ಪುನೀತ್ ಹಾಗೂ ಶಿವಣ್ಣ ಮುನ್ನೆಡಿಸಿಕೊಂಡು ಹೋಗುತ್ತಿದ್ದರು. ಪುನೀತ್ ತಾವು ಪಡೆಯುತ್ತಿದ್ದ ಸಂಭಾನೆಯಲ್ಲಿ ಒಂದಿಷ್ಟು ಹಣವನ್ನು ಈ ಟ್ರಸ್ಟ್‌ಗೆ ನೀಡುತ್ತಿದ್ದರು. ಜೊತೆಗೆ ತಾವು ಸಿನಿಮಾ ಹಾಡಿಗಾಗಿ ಪಡೆದ ಸಂಭಾವನೆಯನ್ನು ಸಂಪೂರ್ಣವಾಗಿ ಶಕ್ತಿಧಾಮಕ್ಕೆ ನೀಡುತ್ತಿದ್ದರು. ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡ್ತಿದ್ದ ಪುನೀತ್, ಪ್ರತಿ ವರ್ಷ ಅಸಂಖ್ಯಾತ ಮಕ್ಕಳ ಶಾಲಾ ಶುಲ್ಕವನ್ನು ಭರಿಸುತ್ತಿದ್ದರು. ಅಪ್ಪು ನಿಧನ ಬಳಿಕ ಶಕ್ತಿಧಾಮವನ್ನು ಶಿವ ರಾಜ್‌ಕುಮಾರ್ ಹಾಗೂ ಅವರ ಪತ್ನಿ ಗೀತಾ ನಡೆಸಿಕೊಂಡು ಹೋಗುತ್ತಿದ್ದಾರೆ.  ಇದುವರೆಗೆ 4 ಸಾವಿರ ಹೆಣ್ಣು ಮಕ್ಕಳು ಈ ಆಶ್ರಮದ ಪ್ರಯೋಜನ ಪಡೆದುಕೊಂಡಿದ್ದಾರೆ. ಡಾ.ರಾಜ್‌ಕುಮಾರ್ ಟ್ರಸ್ಟ್‌ಗಳ ಮೂಲಕ ಗಡಿನಾಡಿನ ಶಾಲೆಗಳಿಗೂ ಸಹಾಯ ಮಾಡಿದ್ದಾರೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಕೂಡ ಇಷ್ಟು ಎತ್ತರಕ್ಕೆ ಬೆಳೆದು ನಿಂತರೂ ಕೂಡ ತಮ್ಮ ಆರಂಭಿಕ ಹಾಗೂ ಕಷ್ಟದ ದಿನಗಳನ್ನು ಮರೆತಿಲ್ಲ. ಕಷ್ಟ ಅಂತ ಮನೆ ಬಾಗಿಲಿಗೆ ಬಂದವರನ್ನು ದರ್ಶನ್ ಎಂದಿಗೂ ಹಾಗೆಯೇ ಕಲಿಸುವುದಿಲ್ಲ. ಚಿತ್ರರಂಗದವರೇ ಆಗಿರಲಿ, ಅಭಿಮಾನಿಗಳೇ ಆಗಿರಲಿ ಅಥವಾ ಸಾಮಾನ್ಯ ಜನರೇ ಆಗಿರಲಿ ದರ್ಶನ್ ಎಲ್ಲರಿಗೂ ಆರ್ಥಿಕ ಸಹಾಯ ಮಾಡಿದ್ದಾರೆ. ದರ್ಶನ್ ಈ ಗುಣವನ್ನು ಮೆಚ್ಚಿಕೊಂಡವರು ಅನೇಕ ಜನರಿದ್ದಾರೆ. ದರ್ಶನ್ ಆಪ್ತರು ಹೇಳುವಂತೆ, ಪ್ರತಿವರ್ಷ ಸಹಾಯ ಮಾಡಲೆಂದೇ ಲಕ್ಷಾಂತರ ರೂಪಾಯಿ ಖರ್ಚು ಮಾಡ್ತಾರಂತೆ. ಸರಳವಾಗಿ ಬರ್ತಡೇ ಆಚರಿಸಿಕೊಳ್ಳುವ ದಾಸ, ಅಭಿಮಾನಿಗಳಿಗೆ ಕೇಕು ಹಾರದ ಬದಲು ಅಕ್ಕಿ, ಬೆಳೆ ತರಲು ಹೇಳುತ್ತಾರೆ. ಅದನ್ನು ಸಿದ್ದಗಂಗಾ ಮಠ ಹಾಗೂ ಕೆಲ ಅನಾಥಶ್ರಮಗಳಿಗೆ ಕಳುಹಿಸುತ್ತಾರೆ. ಜೊತೆಗೆ ನೂರಾರು ವಿದ್ಯಾರ್ಥಿಗಳ ಫೀಸ್ ಕಟ್ಟುತ್ತಾರೆ. ಮೈಸೂರು ಮೃಗಾಲಯದ ಪ್ರಾಣಿಗಳನ್ನು ದತ್ತು ಪಡೆದಿದ್ದಾರೆ.

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅವರು ನಟನೆ ಮಾತ್ರವಲ್ಲ, ಸಮಾಜಸೇವೆಯಲ್ಲೂ ಸದಾ ಮುಂದು. ಸುದೀಪ್ ಚಾರಿಟಬಲ್ ಟ್ರಸ್ಟ್ ಮೂಲಕ ಹಲವು ಜನರ ಕಷ್ಟಕ್ಕೆ ಸ್ಪಂದಿಸಿದ್ದಾರೆ. ಬಡಮಕ್ಕಳಿಗೆ ಶಿಕ್ಷಣ ನೀಡುವ ಸಲುವಾಗಿ ಕಿಚ್ಚ ಸಹ ಕೆಲ ಸರ್ಕಾರಿ ಶಾಲೆಗಳನ್ನು ದತ್ತು ಪಡೆದಿದ್ದಾರೆ. ಬರ್ತಡೇ, ಹಬ್ಬ ಹರಿದಿನಗಳಲ್ಲಿ ಮಾಡುವ ಖರ್ಚನ್ನು ಟ್ರಸ್ಟ್‌ಗಳಿಗೆ ನೀಡುತ್ತಾರೆ. ಅಭಿಮಾನಿಗಳು ತಮಗೆ ಕೊಟ್ಟ  ಬೆಲೆಬಾಳುವ ಉಡುಗೊರೆಗಳನ್ನು ನಿರಾಶ್ರಿತರ ಆಶ್ರಯಧಾಮಗಳಿಗೆ ನೀಡುತ್ತಾರೆ. ಸುದೀಪ್ ಕೂಡ ತಮ್ಮ ಬರ್ತಡೇಗೆ ಕೇಕು-ಹಾರ ತರಬೇಡಿ, ಆ ಹಣವನ್ನು ಅನಾಥಾಸ್ರಮಗಳಿಗೆ ನೀಡಿ ಎಂದು ಕೋರಿದ್ದರು. ಅವರ ಅಭಿಮಾನಿಗಳು ಈ ಕೆಲಸವನ್ನು ಮಾಡುತ್ತಾ ಬಂದಿದ್ದಾರೆ.

ಬಡತನದಲ್ಲಿಯೇ ಬೆಳೆದು ಬಂದ ದುನಿಯಾ ವಿಜಯ್, ಸದಾ ಜನರ ಕಷ್ಟಕ್ಕೆ ಮಿಡಿಯುತ್ತಾರೆ. ಇವರು ಸಹಾಯ ಮಾಡುವ ರೀತಿ ವಿಭಿನ್ನವಾಗಿರುತ್ತದೆ. ಪ್ರತಿವರ್ಷ ತಮ್ಮ ಹುಟ್ಟುಹಬ್ಬವನ್ನು ಸರಳವಾಗಿ ಆಚರಿಸಿಕೊಳ್ಳುವ ವಿಜಿ, ಆ ಹಣದಲ್ಲಿ ಅಶಕ್ತರಿಗೆ ಆಟೋ ಕೊಡಿಸುತ್ತಾರೆ. ಆಟೋ ಓಡಿಸುವವರ ಮಕ್ಕಳ ಶಿಕ್ಷಣಕ್ಕೆ ನೆರವಾಗುತ್ತಾರೆ. ದಂಡ ಕಟ್ಟಲಾಗದೇ ಜೈಲಿನಲ್ಲಿಯೇ ದಿನಗಳನ್ನು ಕಳೆಯುತ್ತಿರುವ ಖೈದಿಗಳಿಗೆ ಧನ ಸಹಾಯ ಮಾಡಿದ್ದಾರೆ. ಬಡವರ ಚಿಕಿತ್ಸಾ ವೆಚ್ಚ ಭರಿಸುತ್ತಾರೆ. ತಾಳಿ ಒತ್ತಯಿಟ್ಟು ಪರಿತಪಿಸುವ ಎಷ್ಟೋ ತಾಯಂದಿರಿಗೆ ಹಣ ನೀಡಿ, ಒತ್ತೆಯಿಟ್ಟ ತಾಳಿಯನ್ನು ಬಿಡಿಸಿಕೊಟ್ಟಿದ್ದಾರೆ. ಹೀಗೆ ನಾನಾ ರೀತಿಯ ಕೆಲಸ ಮಾಡುತ್ತಿರುತ್ತಾರೆ.

ಸ್ಯಾಂಡಲ್‌ವುಡ್ ಗೋಲ್ಡನ್ ಸ್ಟಾರ್ ಗಣೇಶ್ ಪ್ರತಿವರ್ಷವೂ ತಪ್ಪದೇ ಬೆಂಗಳೂರು ಹಾಗೂ ಮೈಸೂರಿನ ಕೆಲ ವೃದ್ಧಾಶ್ರಮಗಳಿಗೆ ಹಾಗೂ ಅನಾಥಾಶ್ರಮಗಳಿಗೆ ಆರ್ಥಿಕ ಸಹಾಯ ಮಾಡುತ್ತಾರೆ. ಅಲ್ಲದೇ ಕೊಡಗು ಸಂತ್ರಸ್ತರಿಗೂ ಇವರು ಧನಸಹಾಯ ಮಾಡಿದ್ದರು. ಅಭಿಮಾನಿಗಳ ಜೊತೆಯಾಗಿ ಮರಗಳನ್ನು ನೆಡುವುದು, ನಗರವನ್ನು ಸ್ವಚ್ಛವಾಗಿಡುವಂತಹ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುತ್ತಿರುತ್ತಾರೆ.