ಸಾಫ್ಟ್‌ವೇರ್ ಟು ಸ್ಯಾಂಡಲ್‌ವುಡ್: ಡಾಲಿ ಧನಂಜಯ್ ಕುರಿತ ಇಂಟರೆಸ್ಟಿಂಗ್ ವಿಷಯಗಳು ಇಲ್ಲಿವೆ..

ಡಾಲಿ ಧನಂಜಯ್ ಪೂರ್ತಿ ಹೆಸರು ಕಲ್ಲೇನಹಳ್ಳಿ ಅಡವಿಸ್ವಾಮಿ ಧನಂಜಯ್. ಇವರು ಹಾಸನ ಜಿಲ್ಲೆಯ ಅರಸೀಕೆರೆಯ ಕಲ್ಲೇನಹಳ್ಳಿಯಲ್ಲಿ ಜನಿಸಿದರು. ಧನಂಜಯ್ ತಂದೆ ಪ್ರಾಥಮಿಕ ಶಾಲಾ ಶಿಕ್ಷಕರು. ಶಾಲೆಯಲ್ಲಿರುವಾಗಲೇ ನಾಟಕ, ಏಕಪಾತ್ರಾಭಿನಯ ಸೇರಿದಂತೆ ಇನ್ನಿತರ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿ ಅವರು ಭಾಗವಹಿಸುತ್ತಿದ್ದರು. ವಿಧ್ಯಾಭ್ಯಾಸದಲ್ಲಿ ಚುರುಕಾಗಿದ್ದ ಧನಂಜಯ ಹತ್ತನೇ ತರಗತಿ ಪರೀಕ್ಷೆಯಲ್ಲಿ 90ಕ್ಕೂ ಹೆಚ್ಚು ಪ್ರತಿಶತ ಅಂಕ ಪಡೆದು ಜಿಲ್ಲೆಗೆ ಪ್ರಥಮ ಬಂದಿದ್ದರು. ಮೈಸೂರಿನ ಜಯಚಾಮರಾಜೆಂದ್ರ ಕಾಲೇಜಿನಲ್ಲಿ ಇಂಜಿನಿಯರಿಂಗ್ ಮುಗಿಸಿದ ಇವರು, ಇನ್ಫೋಸಿಸ್‌ನಲ್ಲಿ  ಉದ್ಯೋಗ ಗಿಟ್ಟಿಸಿಕೊಂಡಿದ್ದರು.  

ಚಿಕ್ಕ ವಯಸ್ಸಿನಲ್ಲೇ ಡಾ.ರಾಜ್​ಕುಮಾರ್ ಅವರನ್ನು ನೋಡಿ ಸಿನಿಮಾದತ್ತ ಆಸಕ್ತಿ ಬೆಳೆಸಿಕೊಂಡಿದ್ದ ಧನಂಜಯ್, ಇನ್ಫೋಸಿಸ್‌ನಲ್ಲಿ ಉದ್ಯೋಗ ನಿರಾಕರಿಸಿ, ಮೈಸೂರಿನ ರಂಗಾಯಣ ಸೇರಿದರು. ನಟನೆಯನ್ನು ಕಲಿಯಲು ಮೈಸೂರಿನ ಮೈಮ್ ರಮೇಶ್ ಅವರ ನಾಟಕ ಗುಂಪನ್ನು ಸೇರಿಕೊಂಡರು. 
 

ರಾಮಾ ರಾಮಾರೇ ಸಿನಿಮಾ ನಿರ್ದೇಶಕ ಸತ್ಯಪ್ರಕಾಶ್ ಹಾಗೂ ಧನಂಜಯ್ `ಜಯನಗರ 4th ಬ್ಲಾಕ್' ಎಂಬ ಕಿರುಚಿತ್ರ ಮಾಡಿದರು. ಧನಂಜಯ್ ನಟಿಸಿದ ಕಿರುಚಿತ್ರ `ಜಯನಗರ 4th ಬ್ಲಾಕ್'ಗೆ ಒಳ್ಳೆಯ ಪ್ರತಿಕ್ರಿಯೆ ಸಿಕ್ಕಿತು. ಯೌಟ್ಯೂಬ್ ನಲ್ಲಿ ಒಳ್ಳೆಯ ವೀವ್ಸ್ ಪಡೆಯಿತು.  

ನಾಟಕಗಳಲ್ಲಿ ಅಭಿನಯಿಸುತ್ತಿದ್ದ ಸಮಯದಲ್ಲಿ ನಿರ್ದೇಶಕ ಗುರುಪ್ರಸಾದ್‌ ಕಣ್ಣಿಗೆ ಬಿದ್ದ ಧನಂಜಯ್‌ಗೆ ಸಿನಿಮಾದಲ್ಲಿ ಅವಕಾಶ ದೊರೆಯಿತು. ನಂತರ ಗುರುಪ್ರಸಾದ್ ನಿರ್ದೇಶನದ `ಡೈರೆಕ್ಟರ್ ಸ್ಪೆಷಲ್' ಸಿನಿಮಾದಲ್ಲಿ ನಾಯಕನಾಗಿ ನಟಿಸುವ ಮೂಲಕ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟರು. ಈ ಸಿನಿಮಾಗಾಗಿ ಬೆಸ್ಟ್ ಆಕ್ಟರ್ ಇನ್ ಡೆಬ್ಯು ಸೈಮಾ ಪ್ರಶಸ್ತಿ ಪಡೆದರು.  

ನಂತರ ರಾಟೆ, ಬಾಕ್ಸರ್‌, ಜೆಸ್ಸಿ, ಅಲ್ಲಮ, ಹ್ಯಾಪಿ ನ್ಯೂ ಇಯರ್‌ ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ಧನಂಜಯ್‌ ನಟಿಸಿದರು. ಧನಂಜಯ 2017ರಲ್ಲಿ ನಟಿಸಿದ ಐತಿಹಾಸಿಕ ಚಿತ್ರ `ಅಲ್ಲಮ'ಕ್ಕಾಗಿ ಫಿಲ್ಮ ಫೇರ್ ವಿಮರ್ಶಕರ ಅತ್ತ್ಯುತ್ತಮ ನಟ ಪ್ರಶಸ್ತಿ ಪಡೆದರು.  

2018ರಲ್ಲಿ ತೆರೆಕಂಡ ದುನಿಯಾ ಸೂರಿ ನಿರ್ದೇಶನದ ,ಹ್ಯಾಟ್ರಿಕ್ ಹೀರೋ ಶಿವಣ್ಣ ಅಭಿನಯದ `ಟಗರು' ಚಿತ್ರದಲ್ಲಿ ಡಾಲಿಯಾಗಿ ಖಳನಟನ ಪಾತ್ರದಲ್ಲಿ ಮಿಂಚಿದರು. ಈ ಚಿತ್ರದಲ್ಲಿನ ಇವರ ಅಭಿನಯಕ್ಕೆ ಪ್ರೇಕ್ಷಕರು ಸಂಪೂರ್ಣವಾಗಿ ಫಿದಾ ಆದರು. ಈ ಸಿನಿಮಾದಿಂದ  ಧನಂಜಯ ಆಗಿದ್ದವರು ಡಾಲಿ ಧನಂಜಯ್ ಆದರು. ಡಾಲಿ ಪಾತ್ರದ ಮೂಲಕ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ ಅವರು, ನಂತರ ಸಾಲು-ಸಾಲು ಸಿನಿಮಾಗಳಲ್ಲಿ ನಾಯಕನಾಗಿ ನಟಿಸಿದರು. 

'ಟಗರು' ಚಿತ್ರದ ನಂತರ ಧನಂಜಯ್‌ಗೆ ಪರಭಾಷೆಗಳಿಂದಲೂ ಆಫರ್‌ ಬಂತು. ಕನ್ನಡ, ತೆಲುಗು ಎರಡೂ ಭಾಷೆಗಳಲ್ಲಿ ತಯಾರಾದ ರಾಮ್‌ ಗೋಪಾಲ್‌ ವರ್ಮಾ ಕಥೆ ಬರೆದು ನಿರ್ಮಿಸಿದ್ದ 'ಭೈರವ ಗೀತಾ' ಚಿತ್ರದಲ್ಲಿ ಧನಂಜಯ್‌ ಟಾಲಿವುಡ್‌ಗೆ ಕೂಡ ಎಂಟ್ರಿ ಕೊಟ್ಟರು. ತೆಲುಗಿನ ಪುಷ್ಪ, ಪುಷ್ಪ 2, ತಮಿಳಿನ ಪಾಯಮ್‌ ಒಲಿ ನೀ ಎನಕ್ಕು, ಮಲಯಾಳಂನ 21 ಅವರ್ಸ್ ಸಿನಿಮಾಗಳಲ್ಲಿ ಪಾತ್ರವನ್ನು ನಿರ್ವಹಿಸಿದ್ದಾರೆ. 

ನಟ ಧನಂಜಯ್ ತಮ್ಮ ಹೋಮ್ ಬ್ಯಾನರ್ ಆರಂಭಿಸಿದ್ದು, ಅದಕ್ಕೆ ಡಾಲಿ ಪಿಚ್ಚರ್ ಎಂದು ಹೆಸರಿಟಿದ್ದರು. ಜೊತೆಗೆ ಡಾಲಿ ಪಿಕ್ಚರ್ಸ್ ವತಿಯಿಂದ ಪ್ರತಿ ವರ್ಷ ಕನಿಷ್ಠ 2 ಸಿನಿಮಾ ನಿರ್ಮಿಸುವ ಭರವಸೆ ನೀಡಿದ್ದಾರೆ. ಪ್ರಮುಖವಾಗಿ 2 ಸಿನಿಮಾಗಳಲ್ಲಿ ಒಂದು ಸಿನಿಮಾ ಹೊಸ ಪ್ರತಿಭೆಗಳಿಗೆ ಮೀಸಲಿಡುವುದಾಗಿ ಹೇಳಿದ್ದಾರೆ. 

ನಾಯಕ ನಟ, ವಿಲನ್‌ ಆಗಿ ತಮ್ಮ ಪ್ರತಿಭೆ ಸಾಬೀತುಪಡಿಸಿರುವ ಧನಂಜಯ್‌, ಬಡವ ರಾಸ್ಕಲ್‌ ಹಾಗೂ ಹೆಡ್ ಬುಷ್ ಚಿತ್ರದ ಮೂಲಕ ನಿರ್ಮಾಪಕರಾಗಿ ಕೂಡಾ ಗುರುತಿಸಿಕೊಂಡಿದ್ದಾರೆ.