ಸಪ್ತ ಸಾಗರದಾಚೆ ಎಲ್ಲೋ ಸೈಡ್ ಬಿ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಸೇರಿದಂತೆ ಇತರ ಮಾಹಿತಿ ಇಲ್ಲಿದೆ.

ಸಪ್ತ ಸಾಗರದಾಚೆ ಎಲ್ಲೋ ಸೈಡ್ ಬಿ 2021ರಿಂದ ಶರುವಾಗುತ್ತೆ ಅಂದರೆ ಸೈಡ್ ಎ ಎಲ್ಲಿ ಕೊನೆಯಾಗಿತ್ತೋ ಅಲ್ಲಿಂದಲೇ ಆರಂಭವಾಗುತ್ತೆ. ಸಿನಿಮಾದ ಹೀರೋ ಜೈಲಿನಿಂದ ಹೊರಬರುತ್ತಾನೆ. ಪ್ರಿಯಾಳ ನೆನಪಿನಲ್ಲೇ ಇದ್ದ ಮನು ಆಗಾಗ ಅವಳು ಆಡಿದ ಮಾತುಗಳ ಆಡಿಯೋವನ್ನು ಕೇಳಿಸಿಕೊಳ್ಳುತ್ತಲೇ ಇರುತ್ತಾನೆ. ಹೀಗಿರುವಾಗ ಮನುಗೆ ಪ್ರಿಯಾಳನ್ನು ನೋಡಬೇಕು ಅಂತ ಅನಿಸುತ್ತದೆ. ಪ್ರಿಯಾಗೆ ಆದಾಗಲೇ ಮದುವೆಯಾಗಿ ಮಗು ಇರುತ್ತೆ. ಜೊತೆಗೆ ಕೋವಿಡ್‌ನಿಂದಾಗಿ ಅವರ ಜೀವನ ಕೆಳ ಮಧ್ಯಮ ವರ್ಗಕ್ಕೆ ಬಂದು ನಿಂತಿರುತ್ತೆ. ಇದನ್ನೆಲ್ಲಾ ನೋಡಿದ ಮನು ಆಕೆಯ ಬದುಕನ್ನು ಹೇಗೆ ಬದಲಾಯಿಸುತ್ತಾನೆ? ಮುಂದೆ ಮನು ಕಥೆ ಏನಾಗುತ್ತೆ? ಅನ್ನೋದೆ ಸೈಡ್ ಬಿ ಒನ್‌ಲೈನ್ ಕಥೆ.   

ಸಪ್ತ ಸಾಗರದಾಚೆ ಎಲ್ಲೋ ಸೈಡ್ ಬಿಯಲ್ಲಿ ಮನು ಮತ್ತು ಸುರಭಿ (ಚೈತ್ರಾ ಆಚಾರ್‌) ಪಾತ್ರಗಳು ಹೈಲೈಟ್. ಚಿತ್ರದಲ್ಲಿ ಮನು ತನ್ನ ಹಳೆಯ ಪ್ರೇಯಸಿ ಪ್ರಿಯಾಳನ್ನು ಸುರಭಿಯಲ್ಲಿ ಕಾಣುತ್ತಾನೆ. ಹೀಗಾಗಿ ಸೈಡ್‌ ಬಿಯಲ್ಲಿ ಇವರಿಬ್ಬರ ನಡುವಿನ ದೃಶ್ಯಗಳೇ ಹೈಲೈಟ್ ಅನಿಸುತ್ತವೆ. ನಿರ್ದೇಶಕರು ಇವರಿಬ್ಬ ಪಾತ್ರವನ್ನು ತುಂಬಾನೇ ಅದ್ಭುತವಾಗಿ ತೆಗೆದುಕೊಂಡು ಹೋಗಿದ್ದಾರೆ.

ಸಪ್ತ ಸಾಗರದಾಚೆ ಎಲ್ಲೋ ಸೈಡ್ ಎ ನೋಡಿದ ಬಹುತೇಕರು ಸೈಡ್‌ ಬಿಯಲ್ಲಿ ಒಂದು ರಿವೇಂಜ್ ಸ್ಟೋರಿ ಇರಬಹುದು ಎಂದು ಊಹಿಸಿದ್ದರು. ಸೈಡ್ ಬಿ ರಿವೇಂಜ್ ಎಪಿಸೋಡ್ ಇದ್ದರೂ, ಅದು ಹೀಗೆ ಬಂದು ಹಾಗೇ ಹೋಗುತ್ತೆ. ಆದರೆ, ಇಲ್ಲಿ ಭಾವನೆಗಳು ಹಾಗೂ ಪ್ರೀತಿ ಜಾಸ್ತಿಯಿದೆ. ಒಬ್ಬ ನಿಜವಾದ ಪ್ರೇಮಿ ತಮ್ಮ ಪ್ರೇಯಸಿಗಾಗಿ ಏನೆಲ್ಲ ಮಾಡುತ್ತಾನೆ ಅನ್ನೋದನ್ನು ಬಹಳ ಅದ್ಭುತವಾಗಿ ತೋರಿಸಿದ್ದಾರೆ. 

ರಕ್ಷಿತ್ ಶೆಟ್ಟಿ, ರುಕ್ಮಿಣಿ ವಸಂತ್ ಹಾಗೂ ಚೈತ್ರಾ ಆಚಾರ್ ಸೇರಿದಂತೆ ಸಿನಿಮಾದಲ್ಲಿ ಬರೋ ಎಲ್ಲಾ ಪಾತ್ರಧಾರಿಗಳು ಕೂಡ ಅದ್ಭುತವಾಗಿ ಅಭಿನಯಿಸಿದ್ದಾರೆ. ಸೈಡ್ ಎ ವಿಲನ್ (ರಮೇಶ್ ಇಂದಿರಾ) ಸೈಡ್‌ ಬಿನಲ್ಲೂ ತಮ್ಮ ಪಾತ್ರವನ್ನು ತಿಂದು ಹಾಕಿದ್ದಾರೆ. ಚರಣ್ ರಾಜ್ ಹಿನ್ನೆಲೆ ಸಂಗೀತ ಸಿನಿಮಾದ ಪ್ಲಸ್ ಪಾಯಿಂಟ್‌ಗಳಲ್ಲೊಂದು. ಹಾಗೆಯೇ ದೃಶ್ಯಗಳಲ್ಲಿ ಹೇಮಂತ್ ರಾವ್ ನಿರ್ದೇಶನ ಎದ್ದು ಕಾಣುತ್ತೆ. ಇದೊಂದು ಲವ್ ಕಮ್ ಎಮೋಷನಲ್ ಸಿನಿಮಾ ಆಗಿದ್ದರೂ, ತಾಂತ್ರಿಕವಾಗಿಯೂ ಗಮನ ಸೆಳೆಯುತ್ತೆ. ಇನನ್ನು ಮೈನಸ್ ಹೇಳುವುದಾದರೆ, ಫಸ್ಟ್ ಹಾಫ್‌ನಲ್ಲಿ ಲವ್ ಹಾಗೂ ಎಮೋಷನ್ಸ್ ಸಿಕ್ಕಾಪಟ್ಟೆ ಅಂತ ಅನಿಸಬಹುದು. ರಿವೇಂಜ್ ಸ್ಟೋರಿ ಅಂತ ನಿರೀಕ್ಷೆ ಇಟ್ಟುಕೊಂಡವರಿಗೆ ಸೈಡ್ ಬಿ ನಿರಾಸೆಯಾಗಬಹುದು. ಅದು ಬಿಟ್ಟರೆ, ಲವ್ ಸ್ಟೋರಿ, ಎಮೋಷನ್ ಬಯಸುವವರಿಗೆ ಹೇಳಿ ಮಾಡಿಸಿದ ಸಿನಿಮಾ. 

ಬಡ ಮಧ್ಯಮ ವರ್ಗದ ಇಬ್ಬರು ಪ್ರೇಮಿಗಳು ಸುಂದರ ಬದುಕು ಕಟ್ಟಿಕೊಳ್ಳುವ ಕನಸು ಕಾಣುತ್ತಾರೆ. ಸುಮುದ್ರದ ತೀರದಲ್ಲಿ ಸುಂದರವಾದ ಮನೆ ಕಟ್ಟಿಕೊಳ್ಳಬೇಕು ಅನ್ನೋ ಆಸೆ. ಆ ಕನಸಿಗೆ ಅದರದ್ದೇ ಆದ ಬೆಲೆ ಇರುತ್ತೆ. ಅದನ್ನು ಸಂಪಾದಿಸಲು ಹೋದ ಹೀರೋ ಸಂಕಷ್ಟಕ್ಕೆ ಸಿಲುಕುತ್ತಾನೆ. ನಂತರ ಜೈಲು, ಪ್ರೀತಿ, ರೋಧನೆ, ವೇದನೆ, ಭಾವುಕತೆ ಪ್ರೇಮಿಗಳಿಬ್ಬರ ಬಾಳಲ್ಲಿ ಹೆಣೆದುಕೊಳ್ಳುತ್ತಾ ಸಾಗುತ್ತೆ. ಮುಂದೇನಾಗುತ್ತೆ? ಪ್ರೇಮಿಗಳ ಪಾಡೇನು? ಈ ಕಥೆಯ ವಿಲನ್ ಯಾರು? ಎಂಬುದನ್ನು ಸೈಡ್‌ ಎನಲ್ಲಿ ತೋರಿಸಲಾಗಿತ್ತು.