ಸ್ಯಾಂಡಲ್‌ವುಡ್‌ನ ಈ ಸಿನಿಮಾಗಳಲ್ಲಿ ಪ್ರೀತಿ ಸೋಲ್ತು, ಸಿನಿಮಾ ಗೆಲ್ತು..!

ಕಿಚ್ಚ ಸುದೀಪ್ ವೃತ್ತಿ ಜೀವನದ ಆರಂಭದಲ್ಲಿಯೇ 'ಮಾಸ್ ಹೀರೋ' ಇಮೇಜಿಗೆ ವಿರುದ್ಧವಾದ ಸಿನಿಮಾಗಳಲ್ಲಿ ನಟಿಸಿದವರು. ಸಿನಿಮಾದ ನಾಯಕ ಕೊನೆಯಲ್ಲಿ ವಿಲನ್ ಕೊಂದು ನಾಯಕ ಗೆಲ್ಲಬೇಕು, ನಾಯಕಿಯನ್ನು ಬಿಗಿದು ತಬ್ಬಿಕೊಳ್ಳಬೇಕು ಎಂಬುದು ಇಂದಿಗೂ ಇದೆ. ಆದರೆ, ಕಿಚ್ಚನಿಗೆ ಹೆಸರು ತಂದುಕೊಟ್ಟ ಹುಚ್ಚ ಸಿನಿಮಾದಲ್ಲಿ ನಾಯಕ ಹುಚ್ಚನಾಗಿ ಹೋಗುತ್ತಾನೆ ಎಂಬುದು ಮಾಸ್ ಪ್ರೇಕ್ಷಕರಿಗೆ ಜೀರ್ಣವಾಗುವ ವಿಷಯವಲ್ಲ. ಹೌದು..ಓಂ ಪ್ರಕಾಶ್ ರಾವ್ ನಿರ್ದೇಶನದ ಹುಚ್ಚ ಸಿನಿಮಾದಲ್ಲಿ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ನಟನೆ ಇಂದಿಗೂ ಪ್ರೇಕ್ಷಕರ ಕಣ್ಣಿಗೆ ಕಟ್ಟಿದೆ. ಚಿತ್ರದಲ್ಲಿ ಆಂಗ್ರಿ ಯಂಗ್‌ಮ್ಯಾನ್ ಆಗಿರುವ ಕಿಚ್ಚನಿಗೆ ಓರ್ವಸಿಂಪಲ್ ಬ್ರಾಹ್ಮಣ ಹುಡುಗಿ ಮೇಲೆ ಪ್ರೀತಿಯಾಗುತ್ತದೆ. ನಂತರ ಆಕೆ ಪ್ರೀತಿ ಒಪ್ಪಿಕೊಂಡು ಕೆಲ ಸಮಯದಲ್ಲೇ ಆತನ ತಲೆಗೆ ಏಟು ಬಿದ್ದು ಹುಚ್ಚನಾಗುತ್ತಾನೆ.  ಅವನಿಗೆ ಮರಳಿ ನೆನಪು ಬರುವಷ್ಟರಲ್ಲಿ ಅವನು ಪ್ರೀತಿಸಿದ ಹುಡುಗಿ ಆತ್ಮಹತ್ಯೆ ಮಾಡಿಕೊಂಡಿರುತ್ತಾಳೆ. ಬಳಿಕ ಆತ ಸರಿಹೋಗಿ, ತನ್ನ ಪ್ರೇಯಸಿಯನ್ನು ಹುಡುಕಿಕೊಂಡು ಬರ್ತಾನೆ. ಆದರೆ, ಕಿಚ್ಚ ಬರುವಷ್ಟರಲ್ಲಿ ಅವನು ಪ್ರೀತಿಸಿದ ಹುಡುಗಿ ಆತ್ಮಹತ್ಯೆ ಮಾಡಿಕೊಂಡಿರುತ್ತಾಳೆ.. 2001ರಲ್ಲಿ ತೆರೆಕಂಡ ಈ ಚಿತ್ರ ಸೂಪರ್ ಹಿಟ್ ಆಗಿತ್ತು.

ನಾಗತಿಹಳ್ಳಿ ಚಂದ್ರಶೇಖರ್ ನಿರ್ದೇಶನದ ಸೂಪರ್ ಹಿಟ್ ಸಿನಿಮಾ 'ಅಮೃತಧಾರೆ'. ರಮ್ಯಾ ಅಮೃತಳಾಗಿ, ಧ್ಯಾನ್ ಪುರುವಾಗಿ ಅಭಿನಯಿಸಿದ್ದ ಈ ಚಿತ್ರದಲ್ಲಿ ಒಂದು ಮಧ್ಯಮ ವರ್ಗದ ನವದಂಪತಿ ಲೈಫ್‌ನಲ್ಲಿ ಸೆಟಲ್ ಆಗಬೇಕೆಂಬ ಕನಸು ಕಂಡಿರುತ್ತಾರೆ. ಸ್ವಂತ ಮನೆ ಕಟ್ಟಿಸಿ, ಪತ್ನಿಗೆ ಸರ್‌ಪ್ರೈಸ್ ಕೊಡಬೇಕೆಂಬ ಕನಸು ಹೊಂದಿದ್ದ ಪುರುಗೆ ಅಮೃತಾ ಇನ್ನು ಹೆಚ್ಚು ದಿನ ಬದುಕಲ್ಲ ಎಂಬ ವಿಷಯ ಕೇಳಿ ಹೃದಯ ನಿಂತಂತಾಗುತ್ತದೆ. ಬಳಿಕ ತನ್ನೆಲ್ಲಾ ನೋವುಗಳನ್ನು ಮರೆಮಾಚಿಕೊಂಡು ಅಮೃತಾಳ ಎಲ್ಲಾ ಆಸೆಗಳನ್ನು ಈಡೇರಿಸುತ್ತಾ ಬರ್ತಾನೆ. ಕೊನೆಗೆ ಪ್ರೀತಿಗೆ ಸಾಕ್ಷಿಯಾದ ತಾಜ್‌ಮಹಲ್ ಎದುರು ಅಮೃತಾ ಸಾಯುತ್ತಾಳೆ. 2005ರಲ್ಲಿ ರಿಲೀಸ್ ಆದ ಈ ಚಿತ್ರವು ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಪ್ರತಿಕ್ರಿಯೆ ಜೊತೆಗೆ ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆ ಪಡೆದಿತ್ತು.

ಪ್ರೀತಿ ಮಧುರ, ತ್ಯಾಗ ಅಮರ ಎಂಬ ಸಾಲು ಮುಂಗಾರು ಮಳೆ ಸಿನಿಮಾಗೆ ಸೂಟ್ ಆಗುತ್ತೆ. ಈ ಚಿತ್ರದಲ್ಲಿ ಗಣೇಶ್ ಲವ್ ಎಮೋಷನ್ ಡೈಲಾಗ್ಸ್ ಜೊತೆಗೆ ರಿಯಲ್ ಲೈಫ್‌ಗೆ ಕನೆಕ್ಟ ಆಗುವ ಜೊತೆಗೆ ನಟಸಿದ್ದರು. ಚಿತ್ರದಲ್ಲಿ ಅನಂತ್ ನಾಗ್ ಅವರ ನಂಬಿಕೆ ಉಳಿಸಿಕೊಳ್ಳಲು ತನ್ನ ಪ್ರೀತಿ ತ್ಯಾಗ ಮಾಡುವ ವಿಧಾನ, ಕ್ಲೈಮ್ಯಾಕ್ಸ್‌ನಲ್ಲಿ ತನ್ನ ಪ್ರೀತಿ ಮೊಲ ಸತ್ತಾಗ ಪಡುವ ವೇದನೆ ಜನರಿಗೆ ಸಿಕ್ಕಾಪಟ್ಟೆ ಕನೆಕ್ಟ್ ಆಗಿತ್ತು. 2006ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಜೊತೆಗೆ ಚಿತ್ರಮಂದಿರಗಳಲ್ಲಿ ಒಂದು ವರ್ಷ ಪ್ರದರ್ಶನಗೊಳ್ಳುವ ಮೂಲಕ ದಾಖಲೆ ಬರೆಯಿತು. ಕೇವಲ 70 ಲಕ್ಷ ರೂ. ವೆಚ್ಚದಲ್ಲಿ ನಿರ್ಮಾಣವಾದ ಈ ಸಿನಿಮಾ ಗಲ್ಲಾಪೆಟ್ಟಿಗೆಯಲ್ಲಿ 75 ಕೋಟಿ ಬಾಚಿಕೊಂಡಿತ್ತು.

ಎಸ್ ನಾರಾಯಣ್ ಅವರ ನಿರ್ದೇಶನದ 'ಚೆಲುವಿನ ಚಿತ್ತಾರ' ಸಿನಿಮಾವನ್ನು ರಿಯಲ್ ಲೈಫ್ ಘಟನೆಯನ್ನು ಆಧರಿಸಿ ಮಾಡಲಾಗಿತ್ತು. ಇದು ತಮಿಳಿನ 'ಕಾದಲ್' ರೀಮೆಕ್ ಕೂಡ ಹೌದು. ಚಿತ್ರದಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಅಮೂಲ್ಯ ಮುಖ್ಯಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದರು. ಓರ್ವ ಎಸ್‌ಎಸ್‌ಎಲ್‌ಸಿ ಓದುತ್ತಿರುವ ವಿದ್ಯಾರ್ಥಿನಿ ಮತ್ತು ಮೆಕಾನಿಕ್ ನಡುವಿನ ಪ್ರೀತಿ ಓಡೋಗಿ ಮದುವೆಯಾಗುವ ಹಂತಕ್ಕೆ ತಲುಪುತ್ತದೆ. ಆನಂತರ ಹುಡುಗಿ ಮನೆಯವರು ಇವರಿಬ್ಬರನ್ನು ಹುಡುಕಿ, ಊರಿಗೆ ಕರೆತಂದು ಗಣೇಶ್‌ಗೆ ಸಿಕ್ಕಾಪಟ್ಟೆ ಹೊಡೀತಾರೆ. ಬಳಿಕ ಪ್ರೀತಿ ಸಿಗದೇ ಗಣೇಶ್ ಹುಚ್ಚನಾಗಿ ಬೀದಿ ಬೀದಿ ಅಲೆಯುತ್ತಿರುತ್ತಾರೆ. ಅಮೂಲ್ಯ ಬೇರೆಯವರನ್ನು ಮದುವೆಯಾಗಿರುತ್ತಾರೆ. ಒಂದಿನ ಹುಚ್ಚನಾಗಿರುವ ಮಾದೇಶನನ್ನು ನೋಡಿ ತನ್ನ ತಪ್ಪಿನಿಂದಲೇ ಅವನ ಪರಿಸ್ಥಿತಿ ಹೀಗಾಗಿದೆ ಅಂತ ಗೋಳಾಡುತ್ತಾಳೆ. 2007ರಲ್ಲಿ ತೆರೆಕಂಡ ಈ ಚಿತ್ರ ರಿಜಿನಲ್ ಸಿನಿಮಾವನ್ನು ಮೀರಿಸಿ ಸೂಪರ್ ಸಕ್ಸಸ್ ಕಂಡಿತ್ತು.

ಎ.ಪಿ.ಅರ್ಜುನ್ ನಿರ್ದೇಶನದಲ್ಲಿ ಮೂಡಿಬಂದ ಚೊಚ್ಚಲ ಲವ್‌ಸ್ಟೋರಿ ಹೊಂದಿದ್ದ ಸಿನಿಮಾ ಅಂಬಾರಿ. ಓರ್ವ ಶ್ರೀಮಂತ ಹುಡುಗಿ ಹಾಗೂ ಮುಗ್ಥ ಹುಡುಗನ ಪ್ರೀತಿ ಕತೆ ಚಿತ್ರದಲ್ಲಿತ್ತು. ಈ ಚಿತ್ರದಲ್ಲಿನ ನಾಯಕ ಮತ್ತು ನಾಯಕಿ ತಾಜ್‌ ಮಹಲ್ ವರೆಗೂ ಸೈಕಲ್‌ನಲ್ಲಿ ಹೋಗುವುದು ಹೈಲೈಟ್ ಅಂತ ಹೇಳಬಹುದು. ಈ ಚಿತ್ರದ ಕೊನೆಯಲ್ಲಿ ನಾಯಕ ಸಾಯುತ್ತಾನೆ. 2010ರಲ್ಲಿ ಬಿಡುಗಡೆಯಾದ ಈ ಸಿನಿಮಾ ಭರ್ಜರಿ ಯಶಸ್ಸು ಸಾಧಿಸುವುದರ ಜೊತೆಗೆ ಯೋಗಿಗೆ ಅತ್ತ್ಯುತ್ತಮ ನಾಯಕನಟ ರಾಜ್ಯಪ್ರಶಸ್ತಿ ತಂದು ಕೊಟ್ಟಿತು. ಈ ಚಿತ್ರದ ಹಾಡುಗಳು ಕೂಡ ಸೂಪರ್ ಹಿಟ್ ಆಗಿದ್ದವು.