ಚಿನ್ನಾರಿ ಮುತ್ತ ಟು ಗುರು ಶಿಷ್ಯರು: ಕ್ರೀಡೆ ಆಧಾರಿತ ಟಾಪ್ 6 ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

2009ರಲ್ಲಿ ತೆರೆಕಂಡ 'ಕಬ್ಬಡಿ' ಸಿನಿಮಾ ಪ್ರೇಕ್ಷಕರ ಮನಗೆದ್ದಿತ್ತು. ಚಿತ್ರದಲ್ಲಿ ಪ್ರವೀಣ್ ಹಾಗೂ ಪ್ರಿಯಾಂಕಾ ನಿಜವಾದ ಕಬ್ಬಡಿ ಆಟಗಾರರಾಗಿ ನಟಿಸಿದ್ದರು. ಹಿರಿಯ ನಟ ಕಿಶೋರ್ ಕಬ್ಬಡಿ ಟ್ರೈನರ್ ಆಗಿ ಕಾಣಿಸಿಕೊಂಡಿದ್ದರು. ನರೇಂದ್ರ ಬಾಬು ಆಕ್ಷನ್ ಕಟ್ ಹೇಳಿದ್ದ ಈ ಚಿತ್ರ ಬಾಕ್ಸಾಫೀಸ್‌ನಲ್ಲಿ ಕಮಾಲ್ ಮಾಡದಿದ್ದರೂ ಪ್ರೇಕ್ಷಕರಿಂದ ಮೆಚ್ಚುಗೆ ಪಡೆದದುಕೊಂಡಿತ್ತು.

2022ರಲ್ಲಿ ರಿಲೀಸ್ ಆದ ಜಡೇಶ್ ಕುಮಾರ್ ಹಂಪಿ ನಿರ್ದೇಶನದ 'ಗುರು ಶಿಷ್ಯರು' ಸಿನಿಮಾವನ್ನು ಅಪ್ಪಟ ಭಾರತೀಯ ಕ್ರೀಡೆ ಆಗಿರುವ ಖೋ-ಖೋ ಆಟವನ್ನೇ ಪ್ರಧಾನವಾಗಿಟ್ಟುಕೊಂಡು ಮಾಡಲಾಗಿತ್ತು.ಸಿನಿಮಾದಲ್ಲಿ ಶರಣ್ ಪಿಟಿ ಶಿಕ್ಷಕನ ಪಾತ್ರ ನಿರ್ವಹಿಸಿದ್ದು, ತರುಣ್ ಸುಧೀರ್ ಕ್ರಿಯೇಟಿವ್ಸ್ ಬ್ಯಾನರ್ ಅಡಿಯಲ್ಲಿ ನಿರ್ಮಾಣ ಮಾಡಿದ್ದರು. ಇದರಲ್ಲಿ ಖೋ-ಖೋ ಆಟವೇ ಜೀವಾಳ.  1995ರ ಸಮಯದಲ್ಲಿ ಹಳ್ಳಿ ಪರಿಸರದಲ್ಲಿ ನಡೆಯುವ ಖೋ-ಖೋ ಪಂದ್ಯಾವಳಿಯ ಕಥೆಯನ್ನು ಇದರಲ್ಲಿ ಹೆಣೆಯಲಾಗಿತ್ತು.

ವಿಜಯ್ ರಾಘವೇಂದ್ರ ಬಾಲನಟನಾಗಿ ನಟಿಸಿ, ಟಿ.ಎಸ್ ನಾಗಭರಣ ನಿರ್ದೇಶನ ಮಾಡಿದ್ದ 'ಚಿನ್ನಾರಿ ಮುತ್ತ' ಸಿನಿಮಾದಲ್ಲಿ ರಾಷ್ಟ್ರಪ್ರಶಸ್ತಿ ಸೇರಿದಂತೆ ಹಲವು ಅತ್ಯುತ್ತಮ ಪ್ರಶಸ್ತಿಗಳನ್ನು ಬಾಚಿಕೊಂಡಿತ್ತು. ಚಿತ್ರದಲ್ಲಿ ಹಲವು ಪರಿಸ್ಥಿತಿಗಳಿಂದ ತಪ್ಪಿಸಿಕೊಂಡು ಹಳ್ಳಿಯಿಂದ ಪಟ್ಟಣಕ್ಕೆ ಬರುವ ಓರ್ವ ಅನಾಥ ಹುಡುಗ, ರನ್ನಿಂಗ್ ರೇಸ್‌ನಲ್ಲಿ ಭಾಗವಹಿಸಿ ವಿಜಯಶಾಲಿಯಾಗುವ ಕಥೆ ಹೆಣೆಯಲಾಗಿತ್ತು.

ತೆಲುಗಿನ ಚಿತ್ರದ ರಿಮೇಕ್ ಆದ 'ಮೌರ್ಯ' ಚಿತ್ರದಲ್ಲಿ ಪವರ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಕಿಕ್ ಬಾಕ್ಸರ್ ಪಾತ್ರದಲ್ಲಿ ನಟಿಸಿದ್ದರು. ಎಸ್ ನಾರಾಯಣ್ ನಿರ್ದೇಶನದಲ್ಲಿ ಮೂಡಿಬಂದ ಈ ಚಿತ್ರಕ್ಕೆ ರಾಕಲೈನ್ ವೆಂಕಟೇಶ್ ಬಂಡವಾಳ ಹೂಡಿದ್ದಾರೆ. ಭಿನ್ನಾಭಿಪ್ರಾಯಗಳಿಂದ ತನ್ನನ್ನು ಮತ್ತು ತನ್ನ ತಾಯಿಯನ್ನು ತೊರೆದಿದ್ದ ತಂದೆಯನ್ನು ಅರಸುತ್ತಾ ಹೋಗುವ ನಾಯಕ, ಕೊನೆಗೆ ಹೇಗೆ ತನ್ನ ತಂದೆಯ ಆಸೆಯನ್ನು ಪೂರೈಸುತ್ತಾನೆ ಎಂಬುದು ಚಿತ್ರದ ಕಥೆಯಾಗಿತ್ತು.

ಕೃಷ್ಣ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಪೈಲ್ವಾನ್ ಸಿನಿಮಾದಲ್ಲಿ ಕಿಚ್ಚ ಸುದೀಪ್ ಬಾಕ್ಸಿಂಗ್ ಮತ್ತು ಕುಸ್ತಿ ಪಟುವಾಗಿ ನಟಿಸಿದ್ದರು. ಈ ಚಿತ್ರದಲ್ಲಿ ನಾಯಕ ಕಿಚ್ಚ ಅನಾಥ. ಪೈಲ್ವಾನ ಕುಟುಂಬವೊಂದರ ಮುಖ್ಯಸ್ಥ ಸರ್ಕಾರ್ ಕಿಚ್ಚನಿಗೆ ಆಶ್ರಯ ನೀಡುತ್ತಾನೆ. ನಂತರ ಕಿಚ್ಚನಿಗೆ ಸರ್ಕಾರನೇ ಸರ್ವಸ್ವವಾಗುತ್ತಾನೆ. ಹಾಗೇ ಸರ್ಕಾರನ ಕನಸಾದ ಬಾಕ್ಸಿಂಗ್‌ನಲ್ಲಿ ಚಾಂಪಿಯನ್ ಅಗುವುದನ್ನು ನನಸು ಮಾಡಲು ಪಣತೊಡುತ್ತಾನೆ. ಆದರೆ, ಇದೇ ದಾರಿಯಲ್ಲಿ ಹೋಗುವಾಗ ಒಬ್ಬ ದೊಡ್ಡ ಉದ್ಯಮಿ ಪುತ್ರಿ ಕಿಚ್ಚನ ಬಾಳಲ್ಲಿ ಬರುತ್ತಾಳೆ. ಪರಸ್ಪರ ಪ್ರೀತಿಯಲ್ಲಿ ಬಿದ್ದು ವಿವಾಹವಾಗುವ ಇವರಿಗೆ, ರುಕ್ಮಿಣಿ ತಂದೆ ಅಡ್ಡಿಪಡಿಸಿ ಸರ್ಕಾರನ ಮುಂದೆ ಸಹಾಯಕ್ಕೆ ಅಂಗಲಾಚುತ್ತಾನೆ. ಆಗ ಸರ್ಕಾರ್, ಕಿಚ್ಚ ಇನ್ನು ಮುಂದೆ ರುಕ್ಮಿಣಿಯಿಂದ ದೂರವಿರುತ್ತಾನೆ ಎಂದು ಮಾತು ಕೊಡುತ್ತಾನೆ. ಆದರೆ, ಮಾತು ತಪ್ಪಿದ ಕಿಚ್ಚ ಪತ್ನಿ ರುಕ್ಮಿಣಿ ಜೊತೆ ಊರೇ ಬಿಟ್ಟು ಹೊರಡುತ್ತಾನೆ. ಮುಂದೆ ಕಿಚ್ಚ ಮತ್ತೆ ಸರ್ಕಾರನ ಮಡಿಲು ಸೇರುತ್ತಾನಾ ? ಸರ್ಕಾರನ ಬಾಕ್ಸಿಂಗ್ ಕನಸು ನನಸು ಮಾಡುತ್ತಾನಾ ಎನ್ನುವುದು ಚಿತ್ರದ ಕಥೆ.

ಡಾ.ರಾಜ್‌ಕುಮಾರ್ ಮತ್ತು ಪದ್ಮಪ್ರಿಯಾ ಮುಖ್ಯ ಪಾತ್ರದಲ್ಲಿ ನಟಿಸಿದ್ದ 'ತಾಯಿಗೆ ತಕ್ಕ ಮಗ' ಚಿತ್ರದಲ್ಲಿ ಅಣ್ಣಾವ್ರು ಬಾಕ್ಸರ್ ಪಾತ್ರದಲ್ಲಿ ನಟಿಸಿದ್ದರು. ವಿ ಸೋಮಶೇಖರ್ ನಿರ್ದೇಶನದಲ್ಲಿ ಮೂಡಿಬಂದ ಈ ಚಿತ್ರವನ್ನು ಪಾರ್ವತಮ್ಮ ರಾಜ್‌ಕುಮಾರ್ ಅವರು ಪೂರ್ಣಿಮಾ ಪಿಕ್ಚರ್ಸ್ ಅಡಿಯಲ್ಲಿ ನಿರ್ಮಾಣ ಮಾಡಿದ್ದರು. ಸಾಕುತಂದೆ-ತಾಯಿ ಆಶ್ರಯದಲ್ಲಿ ಬೆಳೆಯುವ ಕುಮಾರ್, ಬಾಕ್ಸಿಂಗ್ ಮೂಲಕ ತನ್ನ ನಿಜವಾದ ತಂದೆಯ ಹಂತಕರ ಮೇಲೆ ಸೇಡು ತೀರಿಸಿಕೊಳ್ಳುವ ಕಥೆಯನ್ನು ಈ ಚಿತ್ರ ಹೊಂದಿತ್ತು.