Romantic Kannada Movies: ಕನ್ನಡದ 8 ಎವರ್‌ಗ್ರೀನ್ ರೊಮ್ಯಾಂಟಿಕ್ ಸಿನಿಮಾಗಳಿವು!

1997ರಲ್ಲಿ ತೆರೆಕಂಡ 'ಅಮೃತವರ್ಷಿಣಿ' ಚಿತ್ರಕ್ಕೆ ದೊಡ್ಡ ಅಭಿಮಾನಿ ಬಳಗವಿದೆ. ಶರತ್ ಬಾಬು, ಸುಹಾಸಿನಿ ಮತ್ತು ರಮೇಶ್ ಅರವಿಂದ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದ ಈ ಸಿನಿಮಾ ಬ್ಲಾಕ್‌ಬಸ್ಟರ್ ಆಗಿತ್ತು. ಹಾಡುಗಳು ಈ ಸಿನಿಮಾದ ಪ್ರಮುಖ ಹೈಲೈಟ್. ಇಂದಿಗೂ ಅಮೃತವರ್ಷಿಣಿ ಸಿನಿಮಾದ ಹಾಡುಗಳು ಬಹುತೇಕ ಮಂದಿಯ ಫೇವರಿಟ್. ಚಿತ್ರದಲ್ಲಿ ಸುಹಾಸಿನಿ ಮತ್ತು ಶರತ್ ಬಾಬು ದಂಪತಿಯಾಗಿ ಕಾಣಿಸಿಕೊಂಡಿದ್ದರು. ರಮೇಶ್ ಅರವಿಂದ್ ಸ್ನೇಹಿತನ ಪತ್ನಿಯನ್ನೇ ಇಷ್ಟುಪಡುವ ಯುವಕನಾಗಿ ಕಾಣಿಸಿಕೊಂಡಿದ್ದರು.

1987ರಲ್ಲಿ ಬಿಡುಗಡೆಯಾಗಿದ್ದ ರವಿಚಂದ್ರನ್ ಹಾಗೂ ಜೂಹಿ ಚಾವ್ಲಾ ಅಭಿನಯದ 'ಪ್ರೇಮಲೋಕ' ಸಿನಿಮಾವನ್ನು ಕನ್ನಡ ಸಿನಿರಸಿಕರು ಮರೆಯಲು ಸಾಧ್ಯವೇ ಇಲ್ಲ. ಕ್ರೇಜಿ ಸ್ಟಾರ್ ಈ ಚಿತ್ರವನ್ನು ಕಟ್ಟಿಕೊಟ್ಟ ರೀತಿಯೇ ಭಿನ್ನವಾಗಿತ್ತು. ಚಿತ್ರದಲ್ಲಿನ ಲವ್ ಸ್ಟೋರಿ, ಹಾಡುಗಳು ಹಾಗೂ ರೊಮ್ಯಾನ್ಸ್ ಪ್ರೇಕ್ಷಕರನ್ನು ಥಿಯೇಟರ್‌ನತ್ತ ಕರೆತಂದಿತ್ತು. ಹಂಸಲೇಖ ಸಂಗೀತ ಸಂಯೋಜಿಸಿದ್ದ ಈ ಚಿತ್ರದಲ್ಲಿ ಬರೋಬ್ಬರಿ 10 ಹಾಡುಗಳಿದ್ದು, ಎಲ್ಲವೂ ಸೂಪರ್ ಹಿಟ್ ಆಗಿದ್ದವು.

ಮೋಹಕತಾರೆ ರಮ್ಯಾ ಹಾಗೂ ಧ್ಯಾನ್ ಲೀಡ್‌ರೋಲ್‌ನಲ್ಲಿ ನಟಿಸಿದ್ದ 'ಅಮೃತಧಾರೆ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಚಿತ್ರದಲ್ಲಿನ ಸುಂದರೆ ಪ್ರೇಮಕಥೆ ಹಾಗೂ ಹಾಡುಗಳು ಪ್ರೇಕ್ಷಕರಿಗೆ ಸಖತ್ ಇಷ್ಟವಾಗಿದ್ದವು. ಅಮಿತಾಬ್ ಬಚ್ಚನ್ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಈ ಚಿತ್ರ ಗಲ್ಲಾಪೆಟ್ಟಿಗೆಯಲ್ಲಿ ಉತ್ತಮ ಪ್ರತಿಕ್ರಿಯೆ ಜೊತೆಗೆ ಪ್ರೇಕ್ಷಕರಿಂದ ಭಾರೀ ಮೆಚ್ಚುಗೆಯನ್ನು ಪಡೆದಿತ್ತು.

ಕನ್ನಡ ಚಿತ್ರರಂಗದ ದಂತಕಥೆ ಶಂಕರ್ ನಾಗ್ ಅಭಿನಯದ 'ಗೀತಾ' ಸಿನಿಮಾವನ್ನೂ ಕೂಡ ಕನ್ನಡಿಗರು ಮರೆಯಲು ಸಾಧ್ಯವೇ ಇಲ್ಲ.  ರಾಕ್ ಬ್ಯಾಂಡ್ ಗಾಯಕ ಸಂಜು ಮತ್ತು ಗೀತಾಳ ಪ್ರೇಮಕಥೆಯನ್ನು ಹೊಂದಿದ್ದ ಈ ಸಿನಿಮಾ ಎಲ್ಲರ ಮನಗೆದ್ದಿತ್ತು. ತಾನು ಪ್ರೀತಿಸುವ ಗೀತಾಳನ್ನು ಮಾರಣಾಂತಿಕ ಕ್ಯಾನ್ಸರ್‌ನಿಂದ ಪಾರುಮಾಡುಲು ಪ್ರಯತ್ನಿಸಿ, ಕೊನೆಯ ಕ್ಷಣದಲ್ಲಿ ವಿಫಲವಾಗುವ  ಸಂಜುವಿನ ಪರಿಸ್ಥಿತಿ ಪ್ರೇಕ್ಷಕರಲ್ಲಿ ಕಣ್ಣೀರು ತರಿಸಿತ್ತು. ಈ  ಚಿತ್ರದ 'ಜೊತೆಯಲಿ ಜೊತೆಯಲಿ' ಹಾಡು ಸಾಕಷ್ಟು ಜನಪ್ರಿಯ. ಇಳಯರಾಜ ಸಂಗೀತ, ಚಿ.ಉದಯಶಂಕರ್ ರಚನೆ ಹಾಗೂ ಎಸ್ಪಿಬಿ ಹಾಗೂ ಎಸ್.ಜಾನಕಿ ಕಂಠ ಮಾಧುರ್ಯ ಇಂದಿಗೂ ಪುಳಕಗೊಳಿಸುತ್ತದೆ.

1995ರಲ್ಲಿ ಸುನೀಲ್ ದೇಸಾಯಿ ನಿರ್ದೇಶನದಲ್ಲಿ ಮೂಡಿಬಂದ  'ಬೆಳದಿಂಗಳ ಬಾಲೆ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಚಿತ್ರದಲ್ಲಿ ಅನಂತ್ ನಾಗ್ ಹಾಗೂ ಸುಮನ್ ನಗರ್ಕರ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ಫೋನ್ ಕರೆಗಳ ಮೂಲಕ ಸಂಭವಿಸುವ ಈ ಸಾಮಾನ್ಯ ಪ್ರೇಮಕಥೆ ಈ ಚಿತ್ರದ ಜೀವಾಳವಾಗಿತ್ತು.

ಶಿವ ರಾಜ್‌ಕುಮಾರ್, ಪ್ರೇಮಾ, ರಮೇಶ್ ಅರವಿಂದ್ ಮುಖ್ಯಪಾತ್ರದಲ್ಲಿ ನಟಿಸಿದ್ದ  ಸೂಪರ್ ಹಿಟ್ ಸಿನಿಮಾ 'ನಮ್ಮೂರ ಮಂದಾರ ಹೂವೆ'. ಸುಂದರ ಹಾಡುಗಳು, ಪ್ರೀತಿ, ಸ್ನೇಹ ಮತ್ತು ತ್ಯಾಗದ ಕಥೆ ಹೊಂದಿದ್ದ ಈ ಪ್ರೇಮಕಥೆ ಅತಿವಿರಳ ಎನ್ನಬಹುದು. ಈ ಸಿನಿಮಾ ಬಳಿಕ ರಮೇಶ್ ಅರವಿಂದ್ 'ತ್ಯಾಗರಾಜ' ಎಂಬ ಹೆಸರು ಪಡೆದುಕೊಂಡರು.

ದೊರೈ-ಭಗವಾನ್ ಕಾಂಬಿನೇಷನ್‌ನಲ್ಲಿ ಮೂಡಿಬಂದ 'ಎರಡು  ಕನಸು' ಸಿನಿಮಾವನ್ನು ಕೂಡ ಕನ್ನಡಿಗರು ಮರೆಯಲು ಸಾಧ್ಯವಿಲ್ಲ.  ಸಿನಿಮಾದಲ್ಲಿ ಡಾ.ರಾಜ್‌ಕುಮಾರ್, ಮಂಜುಳ ಹಾಗೂ ಕಲ್ಪನಾ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು.  ಬಾಲ್ಯದಿಂದ ಬೆಳೆದು ಬಂದ ಪ್ರೀತಿ ಮುದುಡಿ, ಮತ್ತೋರ್ವ ಯುವತಿಯನ್ನು ಕೈಹಿಡಿಯುವ ಅಧ್ಯಾಪಕನೊಬ್ಬ ತನ್ನ ಹೊಸ ಜೀವನಕ್ಕೆ ಹೊಂದಿಕೊಳ್ಳುವ ಸನ್ನಿವೇಶವನ್ನು ಚಿತ್ರ ಮನೋಘ್ನವಾಗಿ ಚಿತ್ರಸಿತ್ತು. ಈ ಸಿನಿಮಾ ತೆಲುಗಿನಲ್ಲಿ 'ಪೂಜಾ' ಹೆಸರಿನಲ್ಲಿ ರಿಮೇಕ್ ಆಗಿದೆ.

2020ರ ಲಾಕ್‌ಡೌನ್ ಸಮಯದಲ್ಲಿ ಬಿಡುಗಡೆಯಾಗಿದ್ದ 'ಲವ್ ಮಾಕ್ಟೇಲ್' ಸೂಪರ್ ಹಿಟ್ ಆಗಿತ್ತು. ರೊಮ್ಯಾಂಟಿಕ್ ಪ್ರೇಮಕಥೆಯನ್ನು ಹೊಂದಿದ್ದ ಈ ಚಿತ್ರವನ್ನು ಡಾರ್ಲಿಂಗ್ ಕೃಷ್ಣ ಅವರೇ ನಿರ್ದೇಶಿಸಿ, ನಟಿಸಿದ್ದರು. ಮಿಲನಾ ನಾಗರಾಜ್ 'ನಿಧಿಮಾ' ಪಾತ್ರ ನಿರ್ವಹಿಸಿದ್ದರು. ಸಾಮಾನ್ಯ ಯುವಕನೊಬ್ಬನ ಜೀವನದ ಹಲವು ಹಂತಗಳಲ್ಲಿ ಎದುರಾಗುವ ಪ್ರೀತಿಯ ಕಥೆಯನ್ನು ಈ ಸಿನಿಮಾ ಹೊಂದಿತ್ತು.