2025ರಲ್ಲಿ ತಮ್ಮ ಕೈಯಲ್ಲಿ ಅತಿಹೆಚ್ಚು ಸಿನಿಮಾಗಳನ್ನು ಹೊಂದಿರುವ ಸ್ಯಾಂಡಲ್‌ವುಡ್ ನಟರು ಯಾರು ಗೊತ್ತಾ? ಇಲ್ಲಿದೆ ಲಿಸ್ಟ್

2025ರಲ್ಲಿ ಅತಿಹೆಚ್ಚು ಸಿನಿಮಾಗಳನ್ನು ಹೊಂದಿರುವ ನಟರ ಪೈಕಿ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಮೊದಲ ಸ್ಥಾನದಲ್ಲಿದ್ದಾರೆ. ಶಿವಣ್ಣ್ ಕೈಯಲ್ಲಿ ಶಿವಗಣ, ಫಾರ್ಟಿಫೈವ್, ಭೈರವನ ಕೊನೆ ಪಾಠ, ಉತ್ತರಕಾಂಡ, ಶಿವಣ್ಣ 131,  A for ಆನಂದ್, ಎಸ್‌ಅರ್‌ಕೆ, ಆರ್‌ಡಿಎಕ್ಸ್, ನೀ ಸಿಗೋವರೆಗೂ, ಕಬ್ಜ ಚಾಪ್ಟರ್ 2 ಹಾಗೂ ಅಶ್ವತ್ಥಾಮ ಸೇರಿದಂತೆ ಬರೋಬ್ಬರಿ 11 ಸಿನಿಮಾಗಳಿವೆ. ಇದಲ್ಲದೇ ಪರಭಾಷಾ ಸಿನಿಮಾಗಳಲ್ಲಿಯೂ ಕರುನಾಡ ಚಕ್ರವರ್ತಿ ನಟಿಸುತ್ತಿದ್ದಾರೆ. ಮೂತ್ರಕೋಶಕ್ಕೆ ತಗುಲಿದ್ದ ಕ್ಯಾನ್ಸರ್ ಚಿಕಿತ್ಸೆಗಾಗಿ ಅಮೆರಿಕಾಗೆ ತೆರಳಿದ್ದ ಶಿವಣ್ಣ, ಜನವರಿ 25ರಂದು ಮತ್ತೆ ತಾಯ್ನಾಡಿಗೆ ಮರಳಿ ಬರಲಿದ್ದಾರೆ. ಹೊಸ ವರ್ಷದಂದು ತಾವು ಕ್ಯಾನ್ಸರ್‌ ಫ್ರಿಯಾಗಿರುವುದಾಗಿ ವಿಡಿಯೋ ಮಾಡಿ ತಿಳಿಸಿದ್ದರು.

2025ರಲ್ಲಿ ರಿಯಲ್ ಸ್ಟಾರ್ ಉಪೇಂದ್ರ ಅವರ ಕೈಯಲ್ಲಿ ಬರೋಬ್ಬರಿ ಏಳು ಸಿನಿಮಾಗಳಿವೆ. ಎಂ ಜಯರಾಮ್ ನಿರ್ದೇಶನದ ಬುದ್ದಿವಂತ 2, ಓಂ ಪ್ರಕಾಶ್  ರಾವ್ ನಿರ್ದೇಶನದ ತ್ರಿಶೂಲಂ, ಕೆ ಮಾದೇಶ ನಿರ್ದೇಶನದ ಲಗಾಮ್, ರಾಮ್‌ ಗೋಪಾಲ್ ವರ್ಮಾ ಆಕ್ಷನ್ ಕಟ್ ಹೇಳುತ್ತಿರುವ ಐ ಆಮ್ ಆರ್, ಅರ್ಜುನ್ ಜನ್ಯ ನಿರ್ದೇಶನದ 45, ಎಸ್.ವಿ. ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನದ ರಕ್ತ ಕಾಶ್ಮೀರ ಹಾಗೂ ಆರ್ ಚಂದ್ರು ನಿರ್ದೇಶನದ ಕಬ್ಜ 2 ಚಿತ್ರಗಳಲ್ಲಿ ಉಪ್ಪಿ ನಟಿಸುತ್ತಿದ್ದಾರೆ. ಈ ಪೈಕಿ ಬುದ್ದಿವಂತ 2, 45 ಹಾಗೂ ರಕ್ತ ಕಾಶ್ಮೀರ ಸಿನಿಮಾಗಳು 2025ರ ಮೊದಲಾರ್ಧದಲ್ಲೇ ಬಿಡುಗಡೆಯಾಗಲಿವೆ.

ಪ್ರತಿ ಸಿನಿಮಾಗೂ ವಿಭಿನ್ನ ಪಾತ್ರ ಆಯ್ಕೆ ಮಾಡಿಕೊಳ್ಳುವ ಡಾಲಿ ಧನಂಜಯ್ ಸದ್ಯ ಐದು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಟಿ ಎಸ್ ನಾಗಾಭರಣ ನಿರ್ದೇಶನದ ನಾಡಪ್ರಭು ಕೆಂಪೇಗೌಡ, ಶಶಾಂಕ್ ಸೊಘಲ್ ನಿರ್ದೇಶನದ ಜಿಂಗೋ, ಶಂಕರ್ ಗುರು ಆಕ್ಷನ್ ಕಟ್ ಹೇಳುತ್ತಿರುವ ಅಣ್ಣ From Mexico, ರೋಹಿತ್ ಪದಕಿಯವರ ಉತ್ತರಕಾಂಡ ಹಾಗೂ ಡಾಲಿ ಸಿನಿಮಾಗಳು ಧನಂಜಯ್ ಕೈಯಲ್ಲಿವೆ. ಈ ಪೈಕಿ ಉತ್ತರಾಖಂಡ ಈ ವರ್ಷದ ಮೊದಲಾರ್ಧದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಬಳಿ ನಾಲ್ಕು ಸಿನಿಮಾಗಳು ಇವೆ. ಈ ವರ್ಷ ದರ್ಶನ್ ಹಾಗೂ ಮಿಲನಾ ಪ್ರಕಾಶ್ ಕಾಂಬಿನೇಷನ್‌ನ  'ಡೆವಿಲ್' ಸಿನಿಮಾ ಬಿಡುಗಡೆಯಾಗಲಿದ್ದು, ಸಿನಿಮಾಗಾಗಿ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ. ಸದ್ಯ ಬೆನ್ನು ನೋವಿಗೆ ಚಿಕಿತ್ಸೆ ಪಡೆಯುತ್ತಿರುವ ದರ್ಶನ್, ಫೆಬ್ರವರಿಯಿಂದ ಶೂಟಿಂಗ್‌ನಲ್ಲಿ ಭಾಗವಹಿಸುವ ಸಾಧ್ಯತೆಯಿದೆ. ಡೆವಿಲ್ ಜೊತೆಗೆ ರಾಜವೀರ ಮದಕರಿ ನಾಯಕ, ತರುಣ್ ಸುಧೀರ್ ನಿರ್ದೇಶನದ ಡಿ59 ಹಾಗೂ ಜೋಗಿ ಪ್ರೇಮ್ ನಿರ್ದೇಶನದ ಸಿನಿಮಾಗಳು ದರ್ಶನ್ ಕೈಯಲ್ಲಿವೆ.

ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕೈಯಲ್ಲೂ ನಾಲ್ಕು ಸಿನಿಮಾಗಳಿವೆ. ಚೇರನ್ ನಿರ್ದೇಶನದ ಕಿಚ್ಚ 47, ಸುದೀಪ್ ಅವರೇ ನಿರ್ದೇಶಿಸಿ ನಟಿಸುತ್ತಿರುವ ಕೆಕೆ, ಅನೂಪ್ ಭಂಡಾರಿಯವರ ಬಿಲ್ಲ ರಂಗ ಭಾಷಾ ಹಾಗೂ ಅಶ್ವತ್ಥಾಮ ಚಿತ್ರಗಳಲ್ಲಿ ಕಿಚ್ಚ ಬ್ಯುಸಿಯಾಗಿದ್ದಾರೆ. ಈ ಪೈಕಿ ಬಿಲ್ಲ ರಂಗ ಭಾಷಾ  ಸಿನಿಮಾ 2025ರ ಧ್ವಿತೀಯಾರ್ಧದಲ್ಲಿ ಬಿಡುಗಡೆಯಾಗಬಹುದೆಂಬ ನಿರೀಕ್ಷೆಯಿದೆ.

ರಾಕಿಂಗ್ ಸ್ಟಾರ್ ಯಶ್ 2022ರ ಏಪ್ರಿಲ್‌ನಲ್ಲಿ ಬಂದು ಹೋಗಿದ್ದೇ ಕೊನೆ, ಈವರೆಗೂ ಯಶ್ ಅವರ ಯಾವ ಸಿನಿಮಾವೂ ತೆರೆಗೆ ಬಂದಿಲ್ಲ. ಕೆಜಿಎಫ್ 2 ಸಿನಿಮಾ ಬಂದು ಎರಡು ವರ್ಷ ಕಳೆದಿದ್ದು, ಸದ್ಯ ರಾಕಿಂಗ್ ಭಾಯ್ ಟಾಕ್ಸಿಕ್ ಹಾಗೂ ರಾಮಾಯಣ ಸಿನಿಮಾಗಳ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಟಾಕ್ಸಿಕ್ ಸಿನಿಮಾ ಈ ವರ್ಷದ ಏಪ್ರಿಲ್ 10 ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಘೋಷಿಸಿದೆ.

2024ರಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ 'ಕಷ್ಣಂ ಪ್ರಣಯ ಸಖಿ' ಬಿಡುಗಡೆಯಾಗಿ ಸೂಪರ್ ಹಿಟ್ ಆಗಿತ್ತು. ಸದ್ಯ ಗಣೇಶ್ ಕೈಯಲ್ಲಿ ನಾಲ್ಕು ಸಿನಿಮಾಗಳಿವೆ. ವಿಖ್ಯಾತ್ ಎ ಆರ್ ನಿರ್ದೇಶನದ ಯುವರ್ಸ್ ಸಿನ್ಸಿಯರ್ಲಿ ರಾಮ್, ಸಿಂಪಲ್ ಸುನಿ ನಿರ್ದೇಶನದ ದಿ ಸ್ಟೋರಿ ಆಫ್ ರಾಯಗಡ, ಪಿನಾಕ ಹಾಗೂ ಶಿವಗಣ ಸಿನಿಮಾಗಳಲ್ಲಿ ಗಣೇಶ್ ನಟಿಸುತ್ತಿದ್ದಾರೆ. ಈ ಪೈಕಿ ಯುವರ್ಸ್ ಸಿನ್ಸಿಯರ್ಲಿ ರಾಮ್ ಈ ವ‍ರ್ಷ ಬಿಡುಗಡೆಯಾಗುವುದು ಪಕ್ಕಾ ಎನ್ನುವಂತಿದೆ.

ಡಿವೈನ್ ಸ್ಟಾರ್ ರಿಷಭ್ ಸದ್ಯ ಕಾಂತಾರ ಪ್ರಿಕ್ವೇಲ್‌ನಲ್ಲಿ ಬ್ಯುಸಿಯಾಗಿದ್ದು, ಈ ಚಿತ್ರ ಮುಂದಿನ ವರ್ಷದ ಅಕ್ಟೋಬರ್‌ 02ರಂದು ತೆರೆಗೆ ಬರುವುದಾಗಿ ಚಿತ್ರತಂಡ ಘೋಷಿಸಿದೆ. ಇದರ ಜೊತೆಗೆ ದಿ ಪ್ರೈಡ್ ಆಫ್ ಛತ್ರಪತಿ ಶಿವಾಜಿ ಮಹಾರಾಜ್, ಅಂಟಗೋನಿ ಶೆಟ್ಟಿ, ಬೆಲ್‌ ಬಾಟಮ್ 2 ಸಿನಿಮಾಗಳಲ್ಲಿ ಅವರು ನಟಿಸುತ್ತಿದ್ದಾರೆ.