ಸ್ಯಾಂಡಲ್‌ವುಡ್ ನಟರ ಧ್ವನಿಯಲ್ಲಿ ಮೂಡಿಬಂದ ಬೆಸ್ಟ್ ಸಾಂಗ್‌ಗಳಿವು: ನಿಮ್ಮಷ್ಟದ ಸಾಂಗ್ ಯಾವುದು?

ತಮ್ಮ ಕಂಚಿನ ಕಂಠ, ತೀಕ್ಷ್ಣ ನೋಟ, ಖಡಕ್ ಅಭಿನಯದಿಂದ ಗುರುತಿಸಿಕೊಂಡಿರುವ ಸ್ಯಾಂಡಲ್‌ವುಡ್ ನಟ ವಶಿಷ್ಠ ಸಿಂಹ ಹಾಡಿರುವ ದಯವಿಟ್ಟು ಗಮನಿಸಿ ಸಿನಿಮಾದ 'ಮರೆತೇ ಹೋದೆನು, ಹೊರಟ ಕಾರಣ' ಹಾಡು ಸಿಕ್ಕಾಪಟ್ಟೆ ವೈರಲ್ ಆಗಿತ್ತು. ಇದು ವಶಿಷ್ಠ ಧ್ವನಿಯಲ್ಲಿ ಬಂದ ಬೆಸ್ಟ್ ಸಾಂಗ್. 

ಕಿಚ್ಚ ಸುದೀಪ್ ವಾಯ್ಸ್‌ಗೆ ಮರಳಾಗದವರಿಲ್ಲ. ವಾಲಿ ಸಿನಿಮಾದ ಓ ಸೋನಾ ಓ ಸೋನಾ, ವಸಂತ ಮಾಸದಲಿ, ಚಂದು ಚಿತ್ರದ ಸೊಂಟದ ವಿಷ್ಯ, ರಂಗ ಎಸ್ಎಸ್‌ಎಲ್‌ಸಿ ಸಿನಿಮಾದ ಡವ್ ಡವ್ ದುನಿಯಾ ಕಣೋ, ನಲ್ಲ ಚಿತ್ರದ ಮಚ್ಚಾ ಡವ್ ಹೋಡಿಯೋದ್, ಕೆಂಪೇಗೌಡ ಸಿನಿಮಾದ ಹಳೆ ರೇಡಿಯೋ, ಕೋಟಿಗೊಬ್ಬ 2 ಚಿತ್ರದ ಹೂ..ನಾ..ಹೂ..ನಾ, ರಾಟೆ ಸಿನಿಮಾದ ಜೋಡಕ್ಕಿ ಸೇರಿದಂತೆ ವೀರಮದಕರಿ, ಗೂಳಿ, ಶಾಂತಿನಿವಾಸ, ಮುಂತಾದ ಚಿತ್ರಗಳಲ್ಲಿ ಸುದೀಪ್ ಹಾಡಿದ್ದಾರೆ. ಈ ಪೈಕಿ ಬಚ್ಚನ್ ಸಿನಿಮಾದ 'ಹಲ್ಲೋ ಹಲ್ಲೋ'  ಹಾಡು ಹೆಚ್ಚು ಜನರ ಮನಗೆದ್ದಿತ್ತು. 

ಆಡು ಮುಟ್ಟದ ಸೊಪ್ಪಿಲ್ಲ ಎನ್ನುವ ಹಾಗೆ ರಿಯಲ್ ಸ್ಟಾರ್ ಉಪೇಂದ್ರ ಚಿತ್ರರಂಗದಲ್ಲಿ ಮಾಡದ ಕೆಲಸವಿಲ್ಲ. ನಿರ್ದೇಶಕನಾಗಿ, ನಟನಾಗಿ ಮಾತ್ರವಲ್ಲದೇ ಗಾಯಕರಾಗಿಯೂ ಮೋಡಿ ಮಾಡಿರುವ ಹೆಗ್ಗಳಿಕೆ ಉಪ್ಪಿ ಅವರದ್ದು. ಅದರಲ್ಲಿ ಉಪೇಂದ್ರ ಸಿನಿಮಾದ 'ಉಪ್ಪಿಗಿಂತ ರುಚಿ ಬೇರೆ ಇಲ್ಲ' ಹಾಗೂ ಬುದ್ದಿವಂತ ಚಿತ್ರದ 'ಚಿತ್ರಾನ್ನ ಚಿತ್ರಾನ್ನ' ಹಾಡು ಸಿನಿರಸಿಕರ ಫೆವರಿಟ್ ಅಂದರೆ ತಪ್ಪಾಗಲ್ಲ. 

ನಟ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಟನೆ ಜೊತೆಗೆ ಗಾಯಕರಾಗಿಯೂ ತನ್ನದೇಯಾದ ಛಾಪು ಮೂಡಿಸಿದ್ದರು. ತಮ್ಮ ಚಿತ್ರಗಳಿಗೆ ಮಾತ್ರವಲ್ಲದೇ, ಬೇರೆ-ಬೇರೆ ಸಿನಿಮಾಗಳಿಗೂ ಹಾಡುತ್ತಿದ್ದರು. ಅಪ್ಪು ಹಾಡಿರುವ 'ಬಾನ ದಾರಿಯಲ್ಲಿ ಸೂರ್ಯ ಜಾರಿ ಹೋದ' ಮತ್ತು 'ನಿನ್ನ ಕಂಗಳ ಬಿಸಿಯ ಹನಿಗಳು' ಹಾಡು ಅಭಿಮಾನಿಗಳ ನೆಚ್ಚಿನದ್ದು. 

ಯಾವುದೇ ಸಿನಿಮಾ ಹಿನ್ನೆಲೆಯಿಲ್ಲದೆ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಯಶ್ ಇಂದು ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಮಿಂಚುತ್ತಿದ್ದಾರೆ. ಯಶ್ ಕೂಡ ಗಾಯಕನಾಗಿ ಗುರುತಿಸಿಕೊಂಡಿದ್ದಾರೆ. ಮಿಸ್ಟರ್ ಆಂಡ್ ಮಿಸ್ಟರ್ ರಾಮಾಚಾರಿ ಸಿನಿಮಾದ ಅಣ್ತಮ್ಮ ಹಾಡಿನ ಮೂಲಕ ಗಾಯಕರಾದ ಇವರು ಮೊದಲ ಹಾಡಿನಲ್ಲೇ ಪ್ರೇಕ್ಷಕರಿಂದ ಮೆಚ್ಚುಗೆ ಗಿಟ್ಟಿಸಿಕೊಂಡಿದ್ದರು.

ಸುಮಾರು 2 ದಶಕಗಳಿಂದ ತಮ್ಮ ತಿಳಿಹಾಸ್ಯದಿಂದ ಕನ್ನಡ ಸಿನಿಪ್ರಿಯರಿಗೆ ಕಚಗುಳಿಯಿಡುತ್ತಿರುವ ಶರಣ್, ನಾಯಕನಟ, ನಿರ್ಮಾಪಕ ಮತ್ತು ಹಿನ್ನಲೆ ಗಾಯಕರಾಗಿಯೂ ಗುರುತಿಸಿಕೊಂಡಿದ್ದಾರೆ. ಇವರು ಹಾಡಿರವ 'ಹಾಲು ಕುಡಿದ ಮಕ್ಲೇ  ಉಳಿಯಲ್ಲ' ಹಾಡು  ಅಭಿಮಾನಿಗಳ ನೆಚ್ಚಿನದ್ದು.