ಚಂದನವನದಲ್ಲಿ ಅವಕಾಶಗಳ ಕೊರತೆ: ಪರಭಾಷಾ ಸಿನಿಮಾಗಳಲ್ಲಿ ಡಿಮ್ಯಾಂಡ್ ಹೆಚ್ಚಿಸಿಕೊಳ್ಳುತ್ತಿರುವ ಕನ್ನಡಿಗರಿವರು!

ಕನ್ನಡ ಕಿರುತೆರೆಯಿಂದ ಬೆಳ್ಳೆತೆರೆಗೆ ಎಂಟ್ರಿಕೊಟ್ಟಿದ್ದ ದೀಕ್ಷಿತ್ ಶೆಟ್ಟಿ, ದಿಯಾ ಸಿನಿಮಾ ಬಳಿಕ ಭರವಸೆಯ ನಾಯಕನಾಗಿ ಹೊರಹೊಮ್ಮಿದ್ದರು. ದಿಯಾ ಚಿತ್ರದ ಇವರ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದರು. ಆದರೆ, ದಿಯಾ ಬಳಿಕ ದೀಕ್ಷಿತ್ ತೆಲುಗು ಚಿತ್ರರಂಗಕ್ಕೆ ಎಂಟ್ರಿಕೊಟ್ಟರು. ಟಾಲಿವುಡ್‌ ಸ್ಟಾರ್ ನಟ ನಾನಿ ತಮ್ಮ ನಿರ್ಮಾಣದ ವೆಬ್‌ ಸೀರಿಸ್‌ನಲ್ಲಿ ದೀಕ್ಷಿತ್‌ಗೆ ಅವಕಾಶ ಕೊಟ್ಟರು. ಇವರ ಅಭಿನಯಕ್ಕೆ ಸೋತ ನಾನಿ, ನಂತರದಲ್ಲಿ ತಮ್ಮದೇ ಕಮರ್ಷಿಯಲ್ ಚಿತ್ರವಾದ ದಸರಾದಲ್ಲಿ ಮುಖ್ಯ ಪಾತ್ರವೊಂದನ್ನು ನೀಡಿದರು. ದೀಕ್ಷಿತ್ ತಮಗೆ ಒದಗಿ ಬಂದ ಅವಕಾಶವನ್ನೂ ಸರಿಯಾಗಿ ಬಳಸಿಕೊಂಡು ತೆಲುಗು ಪ್ರೇಕ್ಷಕರ ಮನಗೆದ್ದರು. ಸ್ಯಾಂಡಲ್‌ವುಡ್‌ಗಿಂತ ಟಾಲಿವುಡ್‌ನಲ್ಲೇ ಹೆಚ್ಚು ಡಿಮ್ಯಾಂಡ್ ಹೊಂದಿರುವ ಇವರು, ಸದ್ಯ ಕನ್ನಡದಲ್ಲಿ ಕೆಟಿಎಂ ಹಾಗೂ ಬ್ಲಿಂಕ್ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ. 

ಕವಲು ದಾರಿ, ಆಪರೇಷನ್ ಅಲಮೇಲಮ್ಮ ಸೇರಿದಂತೆ ಒಂದಾದ ಮೇಲೊಂದು ಹಿಟ್ ಸಿನಿಮಾ ನೀಡಿದ್ದ ನಟ ರಿಷಿಗೂ ಕೂಡ ಚಂದನವನದಲ್ಲಿ ಅಷ್ಟೊಂದು ಮನ್ನಣೆ ಸಿಗಲಿಲ್ಲ. ಒಂದು ದಶಕದಲ್ಲಿ ಕೇವಲ ೧೦ ಸಿನಿಮಾಗಲ್ಲಷ್ಟೇ ಅಭಿನಯಿಸಿರುವ ರಿಷಿ, ಈ ಪೈಕಿ ನಾಲ್ಕು ಚಿತ್ರಗಳಲ್ಲಿ ಅತಿಥಿ ಪಾತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ನಂತರದಲ್ಲಿ ಸದ್ದಿಲ್ಲದೇ ತೆಲುಗು ಚಿತ್ರರಂಗಕ್ಕೆ ಕಾಲಿಟ್ಟ ಈ ನಟ, ಶೈತಾನ್ ಎಂಬ ವೆಬ್‌ ಸರಣಿಯಲ್ಲಿ ಬಾಲಿ ಎಂಬ ಕ್ರೂರ ಪಾತ್ರಕ್ಕೆ ಬಣ್ಣಹಚ್ಚುವ ಮೂಲಕ ಪ್ರೇಕ್ಷಕರ ಮನಗೆದ್ದಿದ್ದಾರೆ. ಈ ವೆಬ್ ಸೀರಿಸ್‌ ಜೂನ್ 15ರಂದು ತೆಲುಗು, ತಮಿಳು, ತೆಲುಗು, ಮಲಯಾಳಂ ಹಾಗೂ ಹಿಂದಿ ಭಾಷೆಗಳಲ್ಲಿ ಬಿಡುಗಡೆಯಾಗಿ ಮೆಚ್ಚುಗೆಗೆ ಪಾತ್ರವಾಗಿತ್ತು. 

ಸ್ಲಂ ಬಾಲಾ, ಗುಂಡ್ರಗೋವಿ, ರಾಜಧಾನಿ, ದ್ಯಾವ್ರೆ ಸೇರಿದಂತೆ ಹಲವು ಸಿನಿಮಾಗಳ ಮೂಲಕ ತಮ್ಮ ನಟನಾ ಸಾಮರ್ಥ್ಯ ತೋರಿದ್ದ ನಟ ಸರ್ದಾರ್ ಸತ್ಯ ಅವರಿಗೆ, ಕನ್ನಡ ಚಿತ್ರರಂಗದಲ್ಲಿ ಹೆಳಿಕೊಳ್ಳುವಷ್ಟು ದೊಡ್ಡ ಪಾತ್ರದಲ್ಲಿ ನಟಿಸುವ ಅವಕಾಶ ಸಿಗಲಿಲ್ಲ. ಖಳನಾಯಕನ ಪಟ್ಟವೂ ಸಿಗಲಿಲ್ಲ. ತಮಿಳಿನ ವೆಟ್ರಿಮಾರನ್ ಇವರ ಪ್ರತಿಭೆಯನ್ನು ಬಳಸಿಕೊಂಡರು. ವಿಡುದಲೈ ಭಾಗ ೧ರಲ್ಲಿ ನಟಿಸುವ ಅವಕಾಶ ಗಿಟ್ಟಿಸಿಕೊಂಡ ಇವರು, ಒಳ್ಳೆಯ ಹೆಸರು ಗಳಿಸಿದರು. ಸದ್ಯ ಅವರು ವಿಡುದಲೈ ಭಾಗ ೨ರಲ್ಲಿ ನಟಿಸುತ್ತಿದ್ದಾರೆ. 

ನಟ ಕಾರ್ತಿಕ್ ಜಯರಾಂ ಇತ್ತೀಚೆಗಷ್ಟೇ ಕನ್ನಡ ಚಿತ್ರರಂಗದಲ್ಲಿನ ಅವಕಾಶ ಕೊರತೆ ಬಗ್ಗೆ ಬಹಿರಂಗವಾಗಿಯೇ ಅಸಮಾಧಾನ ಹೊರಹಾಕಿದ್ದರು. ಸ್ಯಾಂಡಲ್‌ವುಡ್‌ನಲ್ಲಿ ತನ್ನನ್ನು ಸರಿಯಾಗಿ ಬಳಸಿಕೊಳ್ಳಲಿಲ್ಲ ಅಂತ ಹೇಳಿದ್ದರು. ಜೊತೆಗೆ ಚಂದನವನದಲ್ಲಿ ತಮ್ಮನ್ನು ತುಳಿಯುವ ಕೆಲಸ ನಡೆಯುತ್ತಿದೆ ಅಂತ ಹೇಳಿದ್ದರು. ಇವರು ಕನ್ನಡ ಸೇರಿದಂತೆ ಯಮಿಳು, ತೆಲುಗು, ಹಿಂದಿ ಸಿನಿಮಾಗಳಲ್ಲಿ ಅಭಿನಯಿಸಿ ಸೈ ಎನಿಸಿಕೊಂಡಿದ್ದಾರೆ. 

ಕಿಸ್‌ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ನಟಿ ಶ್ರೀಲೀಲಾ, ನಂತರ ಭರಾಟೆ, ಬೈ ಟು ಲವ್ ಸಿನಿಮಾಗಳಲ್ಲಿ ಅಭಿನಯಿಸಿದರು. ಪೆಳ್ಳಿ ಸನದ್ ಚಿತ್ರದ ಮೂಲಕ ತೆಲುಗು ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಈ ನಟಿ, ತಮ್ಮ ನಟನೆ ಮೂಲಕ ತೆಲುಗು ಪ್ರೇಕ್ಷಕರ ಮನಗೆದ್ದರು. ಸದ್ಯ ಟಾಲಿವುಡ್‌ನಲ್ಲಿ ಬಹುಬೇಡಿಕೆಯ ನಟಿಯಾಗಿ ಹೊರಹೊಮ್ಮಿರುವ ಶ್ರೀಲೀಲಾ, ಐದಾರು ತೆಲುಗು ಚಿತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ.  

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಅಭಿನಯದ 'ವಜ್ರಕಾಯ' ಚಿತ್ರದ ಮೂಲಕ ನಟನೆಗೆ ಎಂಟ್ರಿಕೊಟ್ಟ ನಭಾ ನಟೇಶ್, ತಮ್ಮ ಅದ್ಭುತ ನಟನೆಯಿಂದ ವಿಮರ್ಶಕರು ಹಾಗೂ ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದರು. ನಂತರ ತೆಲುಗು ಸಿನಿಮಾರಂಗಕ್ಕೆ ಕಾಲಿಟ್ಟ ಈ ನಟಿ, ಮತ್ತೆ ಕನ್ನಡ ಚಿತ್ರರಂಗಕ್ಕೆ ಮರಳಿಲ್ಲ. ಸದ್ಯ ತೆಲುಗಿನಲ್ಲಿ ಸಕ್ರಿಯವಾಗಿದ್ದಾರೆ.  

ಕನ್ನಡ ಚಿತ್ರರಂಗದಲ್ಲಿ ಮಿಲ್ಕ್ ಬ್ಯೂಟಿ ಎಂದೇ ಖ್ಯಾತಿಯಾಗಿರುವ ಆಶಿಕಾ ರಂಗನಾಥ್, ಕ್ರೇಜಿ ಬಾಯ್‌ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟರು. ನಂತರ ಮುಗುಳುನಗೆ ರ್ಯಾಂಬೋ ೨, ಕೋಟಿಗೊಬ್ಬ ೩, ಮದಗಜ ಏರಿದಂತೆ ಕೆಲ ಹಿಟ್ ಸಿನಿಮಾಗಳಲ್ಲಿ ನಟಿಸಿದರು. ಬಳಿಕ ತಮಿಳು ಮತ್ತು ತೆಲುಗು ಚಿತ್ರರಂಗಕ್ಕೆ ಕಾಲಿಟ್ಟ ಈ ನಟಿ, ಟಾಲಿವುಡ್‌ನಲ್ಲಿ ಅಪಾರ ಜನಪ್ರಿಯತೆ ಗಳಿಸಿದ್ದಾರೆ. ಜೊತೆಗೆ ಇದೀಗ ಮಲಯಾಳಂ ಚಿತ್ರರಂಗಕ್ಕೂ ಕಾಲಿಟ್ಟಿದ್ದಾರೆ.