ಕನ್ನಡದಲ್ಲಿ ಅವಕಾಶಗಳಿಲ್ಲದೇ ಪರಭಾಷೆಯಲ್ಲಿ ಗುರುತಿಸಿಕೊಂಡ ಸೀರಿಯಲ್ ನಟಿಯರಿವರು!

ಕನ್ನಡದ 'ಲಕುಮಿ' ಧಾರಾವಾಹಿಯಲ್ಲಿ ಮಿಂಚಿದ್ದ ನವ್ಯಾ ಸ್ವಾಮಿಯನ್ನು ಹಲವರು ಮರೆತ್ತಿದ್ದಾರೆ. ಮೈಸೂರು ಮೂಲದ ಈ ನಟಿ, ಕೆಲ ಶೋಗಳಲ್ಲಿ ನಿರೂಪಕಿಯಾಗಿಯೂ ಮಿಂಚಿದ್ದರು. ನಂತರ ಕನ್ನಡದಲ್ಲಿ ಅವಕಾಶಗಳು ಕಡಿಮೆಯಾದಾಗ ತೆಲುಗಿನತ್ತ ಮುಖ ಮಾಡಿದರು. ಸದ್ಯ ನವ್ಯಾ ತೆಲುಗು ಕಿರುತೆರೆಯಲ್ಲೇ ಸಕ್ರಿಯರಾಗಿದ್ದಾರೆ. ಕನ್ನಡದಲ್ಲಿ ಕಾಣಿಸಿಕೊಂಡು ದಶಕಗಳೇ ಕಳೆದಿವೆ.

ಕನ್ನಡದ ಮೇಘ ಮಂದಾರ ಧಾರಾವಾಹಿಯ ಮೂಲಕ ನಟನೆಗೆ ಎಂಟ್ರಿಕೊಟ್ಟ ರಚಿತಾ ಮಹಾಲಕ್ಷ್ಮೀ, ನಂತರ ಗೀತಾಂಜಲಿ, ಸೂರ್ಯಕಾಂತಿ, ಸುಪ್ರಭಾತ, ಸವಿಗನಸು ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ನಟಿಸಿದರು. ಬಳಿಕ ತೆಲುಗು ಮತ್ತು ತಮಿಳು ಕಿರುತೆರೆಯಲ್ಲಿ ಅವಕಾಶ ಗಳಿಸಿದರು. ಜಗ್ಗೇಶ್ ನಟನೆಯ ರಂಗನಾಯಕ ಸಿನಿಮಾದಲ್ಲಿ ನಟಿಸಿರುವುದು ಬಿಟ್ಟರೆ, ಬೇರೆ ಯಾವ ಕನ್ನಡ ಸೀರಿಯಲ್‌ಗಳಲ್ಲೂ ನಟಿಸಿಲ್ಲ.

ಉಡುಪಿ ಮೂಲದ ಆಶಿಕಾ ಗೋಪಾಲ್ ಪಡುಕೋಣೆ 'ನಿಹಾರಿಕಾ' ಸಿನಿಮಾ ಮೂಲಕ ನಟನೆಗೆ ಎಂಟ್ರಿಕೊಟ್ಟರು. ನಂತರ ತ್ರಿವೇಣಿ ಸಂಗಮದಲ್ಲಿ ನಟಿಸಿದ ಇವರಿಗೆ ತಮಿಳು ಹಾಗೂ ತೆಲುಗು ಕಿರುತೆರೆಯಲ್ಲಿ ಹೆಚ್ಚಿನ ಅವಕಾಶಗಳು ಸಿಕ್ಕವು. ಸದ್ಯ ಪರಭಾಷೆಯಲ್ಲೇ ಆಶಿಕಾ ಫೇಮಸ್ ನಟಿಯಾಗಿ ಗುರುತಿಸಿಕೊಂಡಿದ್ದಾರೆ.

ದೇವಿ ಸೀರಿಯಲ್ ಮೂಲಕ ಬಣ್ಣದ ಬದುಕಿಗೆ ಬಂದ ನಟಿ ಮೇಘನಾ ಲೋಕೇಶ್, ನಂತರ ಪವಿತ್ರ ಬಂಧನ ಹಾಗೂ ಪುರುಷೋತ್ತಮ ಧಾರಾವಾಹಿಗಳಲ್ಲಿ ನಟಿಸಿದರು. ಮೈಸೂರು ಮೂಲದ ಇವರಿಗೆ ಬ್ರೇಕ್ ನೀಡಿದ್ದು ಮಾತ್ರ ತೆಲುಗು ಕಿರುತೆರೆ. ಶಶಿರೇಖಾ ಪರಿಣಯಂ ಧಾರಾವಾಹಿ ಮೂಲಕ ತೆಲುಗುಗೆ ಹೋದ ಈ ಚೆಲುವೆ, ಸದ್ಯ ತೆಲುಗು ಕಿರುತೆರೆಯಲ್ಲೂ ಬ್ಯುಸಿಯಾಗಿದ್ದಾರೆ.

ಕನ್ನಡದ ಬಿಳಿ ಹೆಂಡ್ತಿ ಧಾರಾವಾಹಿ ಮೂಲಕ ಗುರುತಿಸಿಕೊಂಡ ತೇಜಸ್ವಿನಿ ಗೌಡಗೆ ನಂತರ ತೆಲುಗಿನಲ್ಲಿ ಅವಕಾಶ ದೊರೆಯಿತು. ಆದರೆ, ಅಲ್ಲಿಗೆ ಹೋಗುವ ಮುನ್ನ , ಹೋದ ನಂತರ ಕೂಡ ಕನ್ನಡದಲ್ಲಿ ಅವರಿಗೆ ಹೇಳಿಕೊಳ್ಳುವಂತೆ ಅವಕಾಶಗಳು ದೊರೆಯಲಿಲ್ಲ.