ಕಿರುತೆರೆಯ ಜನಪ್ರಿಯ ನಟಿ ಆತ್ಮಹತ್ಯೆ: ಕಾರಣ ನಿಗೂಢ

ಸೀಲಿಂಗ್ ಫ್ಯಾನ್‌ಗೆ ನೇಣು

25 ವರ್ಷದ ನಟಿ ಆತ್ಮಹತ್ಯಾ ಪತ್ರವನ್ನು ಕೂಡ ಬರೆದಿಟ್ಟಿದ್ದಾರೆ ಎನ್ನಲಾಗಿದೆ. ಆದರೆ ಅದರಲ್ಲಿ ಅವರು ಈ ದುಡಕಿನ ನಿರ್ಧಾರ ತೆಗೆದುಕೊಳ್ಳಲು ಕಾರಣ ಏನೆಂಬುದನ್ನು ತಿಳಿಸಿಲ್ಲ. ಮಂಗಳವಾರ ಬೆಳಿಗ್ಗೆ 6.30ರ ವೇಳೆಗೆ ಪ್ರೇಕ್ಷಾ ಅವರು ಸೀಲಿಂಗ್ ಫ್ಯಾನ್‌ಗೆ ನೇಣು ಹಾಕಿಕೊಂಡಿರುವುದನ್ನು ಮನೆಯವರು ನೋಡಿದ್ದರು.

ಕಾರಣ ತಿಳಿಯಲು ತನಿಖೆ

ನಟಿಯ ತಂದೆ ಕೂಡಲೇ ಆಕೆಯನ್ನು ಆಸ್ಪತ್ರೆಗೆ ಕರೆದೊಯ್ದರು. ಆದರೆ ಆಕೆ ಆಗಲೇ ಮೃತಪಟ್ಟಿದ್ದಾರೆ ಎಂದು ವೈದ್ಯರು ತಿಳಿಸಿದರು. ಲಾಕ್ ಡೌನ್ ಸಮಯದಿಂದಲೂ ಪ್ರೇಕ್ಷಾ ನಗರದಲ್ಲಿಯೇ ಇದ್ದರು. ಅವರ ಆತ್ಮಹತ್ಯೆಯ ಕಾರಣ ತಿಳಿಯಲು ತನಿಖೆ ನಡೆಸಲಾಗಿದೆ ಎಂದು ಹೀರಾ ನಗರ್ ಪೊಲೀಸ್ ಅಧಿಕಾರಿ ರಾಜೀವ್ ಭಡೋರಿಯಾ ತಿಳಿಸಿದ್ದಾರೆ.

ನೋವುಗಳೆಲ್ಲ ಜಾರಿ ಹೋಗಲಿ...

ನಾಲ್ಕು ದಿನಗಳ ಹಿಂದೆ ಪ್ರೇಕ್ಷಾ ಇನ್‌ಸ್ಟಾಗ್ರಾಂನಲ್ಲಿ ತಮ್ಮ ಫೋಟೊವೊಂದನ್ನು ಹಂಚಿಕೊಂಡಿದ್ದರು. 'ನನ್ನತ್ತ ಬರುವ ಎಲ್ಲ ದುಃಖಗಳು ಹಾಗೇ ಜಾರಿಹೋಗಲಿ, ನನ್ನ ಕಂಗಳಲ್ಲಿ ನಿನ್ನನ್ನು ತುಂಬಿಕೊಂಡಿರುವೆ, ಮಾತನಾಡದೆಯೇ ನಿನ್ನೊಂದಿಗೆ ಮಾತನಾಡುತ್ತಲಿರುವೆ' ಎಂದು ಕವಿತೆಯ ಸಾಲೊಂದನ್ನು ಬರೆದುಕೊಂಡಿದ್ದರು.

ರಂಗಭೂಮಿ, ಧಾರಾವಾಹಿ

ಕ್ರೈಮ್ ಪ್ಯಾಟ್ರೋಲ್ ಧಾರಾವಾಹಿಯ ಜತೆ ಅವರು, ಮೇರಿ ದುರ್ಗಾ, ಲಾಲ್ ಇಷ್ಕ್ ಧಾರಾವಾಹಿಗಳಲ್ಲಿ ಕೂಡ ನಟಿಸಿದ್ದರು. ರಂಗಭೂಮಿಯಲ್ಲಿಯೂ ಗುರುತಿಸಿಕೊಂಡಿದ್ದು, ಡಾಟರ್ ಇನ್ ಲಾ, ಡ್ರಾಪ್ಸ್, ರಾಕ್ಷಸನ್, ಇನ್ ಕಂಪ್ಲೀಟ್ ವುಮನ್ ಮುಂತಾದ ನಾಟಕಗಳಲ್ಲಿ ಅಭಿನಯಿಸಿದ್ದರು.