'ಬಿಗ್ ಬಾಸ್' ಮನೆಯಲ್ಲಿ ಅಗ್ನಿ ಅನಾಹುತ ಸಂಭವಿಸಿದ್ದು ಹೇಗೆ.? ಕಾರಣ ಏನು.?

'ಬಿಗ್ ಬಾಸ್' ಎಂಬ 'ಮರ'ದ ಮನೆ

ಇಡೀ 'ಬಿಗ್ ಬಾಸ್' ಮನೆ ನಿರ್ಮಾಣ ಆಗಿರುವುದು ಇಟ್ಟಿಗೆ, ಸಿಮೆಂಟ್ ನಿಂದಲ್ಲ. ಬದಲಾಗಿ ಮರದಿಂದ.!

ಅದು ಮನೆ ಅನ್ನೋದಕ್ಕಿಂತ ಹೆಚ್ಚಾಗಿ 'ಸೆಟ್'!

'ಬಿಗ್ ಬಾಸ್ ಮನೆ' ಅಂತ ಕರೆಯುವುದಕ್ಕಿಂತ ಹೆಚ್ಚಾಗಿ ಅದೊಂದು ಸೆಟ್. 'ಬಿಗ್ ಬಾಸ್' ಒಂದು ರಿಯಾಲಿಟಿ ಶೋ. ಪ್ರತಿ ಸೀಸನ್ ಕೂಡ ಹೊಸದಾಗಿ ಕಾಣಬೇಕಾಗಿರುವುದಿಂದ, 'ಬಿಗ್ ಬಾಸ್' ಮನೆಯನ್ನ ಪ್ರತಿ ಬಾರಿ ನವೀಕರಣ ಮಾಡಲಾಗುತ್ತೆ. ಹೀಗಾಗಿ, ಅದನ್ನ ಮಾಮೂಲಿ ಮನೆಗಳಂತೆ ನಿರ್ಮಾಣ ಮಾಡುವ ಬದಲು ಮರದಿಂದ ನಿರ್ಮಿಸುತ್ತಾರೆ.

ಲೈಟ್ಸ್, ವೈರ್ ಲೆಕ್ಕವಿಲ್ಲ!

ಹೇಳಿ ಕೇಳಿ 'ಬಿಗ್ ಬಾಸ್' ರಿಯಾಲಿಟಿ ಶೋ. ಅಂದ್ಮೇಲೆ ಕ್ಯಾಮರಾ, ಲೈಟಿಂಗ್ಸ್ ಎಲ್ಲವೂ ಅವಶ್ಯಕ. ಹೀಗಾಗಿ, 'ಬಿಗ್ ಬಾಸ್ ಮನೆ' ಎಂಬ ಸೆಟ್ ನಲ್ಲಿ ಲೆಕ್ಕವಿಲ್ಲದಷ್ಟು ವೈರ್ ಕನೆಕ್ಷನ್, ಕೇಬಲ್ ಲಿಂಕ್ ಇರುತ್ತವೆ.

ಶಾರ್ಟ್ ಸರ್ಕ್ಯೂಟ್ ಆಗುವುದು ಹೇಗೆ.?

ಹಾಗ್ನೋಡಿದ್ರೆ, ಮಾಮೂಲಿ ಮನೆಗಳಲ್ಲಿ ಶಾರ್ಟ್ ಸರ್ಕ್ಯೂಟ್ ಉಂಟಾಗುವ ಸಾಧ್ಯತೆ ಕಮ್ಮಿ. ಆದ್ರೆ, ಟಿವಿ ಶೋಗಳಿಗಾಗಿ ನಿರ್ಮಿಸುವ ಸೆಟ್ ಗಳಲ್ಲಿ ಅಗ್ನಿ ಅವಘಡಗಳು ಸಂಭವಿಸುವ ಸಾಧ್ಯತೆ ಹೆಚ್ಚು. ಯಾಕಂದ್ರೆ, ಶೋಗಳಲ್ಲಿ ಬಳಸುವ ಲೈಟ್ಸ್ ಹಾಗೂ ಇನ್ನಿತರ ಸಾಧನಗಳೇ ಅಂಥವು. ಇನ್ನೂ, ಸೆಟ್ ನಲ್ಲಿ ಇಟ್ಟಿಗೆಯ ಗೋಡೆಗಳ ಬದಲು ಪ್ಲೈವುಡ್ ಶೀಟ್ ಗಳೇ ಹೆಚ್ಚಾಗಿ ಬಳಸುವ ಕಾರಣ ಬೆಂಕಿ ಬೇಗ ವ್ಯಾಪಿಸಿಕೊಳ್ಳುತ್ತದೆ. ಸದ್ಯ ಸಂಪೂರ್ಣ ಮರದಿಂದಲೇ ನಿರ್ಮಾಣ ಆಗಿರುವ 'ಬಿಗ್ ಬಾಸ್' ಮನೆಯಲ್ಲಿ ಆಗಿರುವುದು ಇದೇ.!

'ಬಿಗ್ ಬಾಸ್' ಮನೆ ಸಂಪೂರ್ಣ ಭಸ್ಮ

ಬಿಡದಿ ಬಳಿ ಇರುವ ಮೇಣದ ಮ್ಯೂಸಿಯಂನಲ್ಲಿ ಮೊದಲು ಬೆಂಕಿ ಕಾಣಿಸಿಕೊಂಡಿದೆ. ಮೇಣದಿಂದ ಬೆಂಕಿ ಹೊತ್ತಿಕೊಂಡು 'ಬಿಗ್ ಬಾಸ್' ಮನೆಗೂ ವ್ಯಾಪಿಸಿದೆ. ಎಲ್ಲವೂ ಮರದಿಂದಲೇ ಕೂಡಿದ್ದರಿಂದ ಸಂಪೂರ್ಣವಾಗಿ ಭಸ್ಮ ಆಗಿದೆ. 'ಬಿಗ್ ಬಾಸ್' ಸೆಟ್ ನಲ್ಲಿ ಬೆಂಕಿ ನಂದಿಸುವ ಸಾಧನಗಳಿದ್ದರೂ, ಘಟನೆ ಮಧ್ಯರಾತ್ರಿ ಸಂಭವಿಸಿರುವುದರಿಂದ ಹಾನಿ ಹೆಚ್ಚಾಗಿದೆ.