ಕನ್ನಡಕ್ಕೆ ಡಬ್ ಆಗಿ ಬರಲಿದೆ ಜನಪ್ರಿಯ ಧಾರಾವಾಹಿ 'ರಾಮಾಯಣ'

ಮರು ಪ್ರಸಾರವಾಗಿದ್ದ ಧಾರಾವಾಹಿ

80ರ ದಶಕದ ಅಂತ್ಯದಲ್ಲಿ ಹವಾ ಸೃಷ್ಟಿಸಿದ್ದ ಹಿಂದಿಯ 'ರಾಮಾಯಣ' ಧಾರಾವಾಹಿ ಇತ್ತೀಚೆಗೆ ಡಿಡಿ ನ್ಯಾಷನಲ್‌ನಲ್ಲಿ ಮರುಪ್ರಸಾರವಾಗಿತ್ತು. ಲಾಕ್ ಡೌನ್ ಅವಧಿಯಲ್ಲಿ ಮನೆಯಲ್ಲಿಯೇ ಇದ್ದ ಜನರೂ ಖುಷಿಯಿಂದ ಹಳೆಯ ಪೌರಾಣಿಕ ಧಾರಾವಾಹಿಯನ್ನು ವೀಕ್ಷಿಸಿದ್ದರು.

ದಾಖಲೆ ಬರೆದ ರಾಮಾಯಣ

ರಮಾನಂದ ಸಾಗರ್ ನಿರ್ದೇಶನದ 'ರಾಮಾಯಣ' ಪಡೆದ ಪ್ರಸಿದ್ಧಿ ಅಂತಿದ್ದಲ್ಲ. 1987ರಲ್ಲಿ ಪ್ರಸಾರವಾಗಿದ್ದ ಈ ಧಾರಾವಾಹಿ ಮರುಪ್ರಸಾರದಲ್ಲಿಯೂ ದಾಖಲೆ ಬರೆದಿತ್ತು. ಕೊನೆಯ ಕಂತು ಪ್ರಸಾರವಾದಾಗ 77 ಮಿಲಿಯನ್ ವೀಕ್ಷಣೆಗೆ ಒಳಗಾಗಿತ್ತು. ಇದು ಜಗತ್ತಿನಲ್ಲಿಯೇ ಟಿವಿ ಕಾರ್ಯಕ್ರಮವೊಂದರ ಎಪಿಸೋಡ್ ಅತಿ ಹೆಚ್ಚು ವೀಕ್ಷಣೆ ಪಡೆದ ದಾಖಲೆಯಾಗಿದೆ.

ಕನ್ನಡದಲ್ಲಿ ಧಾರಾವಾಹಿ

ಈ ಧಾರಾವಾಹಿ ಬೇರೆ ಬೇರೆ ಭಾಷೆಗಳಿಗೆ ಡಬ್ ಆಗಿದ್ದರೂ ಕನ್ನಡಕ್ಕೆ ಮಾತ್ರ ಬಂದಿಲ್ಲ. ಇದರ ಬಗ್ಗೆ ಅನೇಕರು ಅಸಮಾಧಾನ ವ್ಯಕ್ತಪಡಿಸಿದ್ದರು. ಕನ್ನಡದಲ್ಲಿ ಇಂತಹ ಧಾರಾವಾಹಿ ನಿರ್ಮಾಣವಾಗುವುದಿಲ್ಲ. ಹಿಂದಿಯಲ್ಲಿ ಪ್ರಸಾರವಾದಾಗ ಅದೇ ಭಾಷೆಯಲ್ಲಿ ನೋಡುವಂತಾಗಿದೆ. ಅದರ ಬದಲು ನಮ್ಮದೇ ಭಾಷೆಯಲ್ಲಿ ಬೇಕು ಎಂದು ಹೇಳಿದ್ದರು. ಅದರಂತೆ ಈ ಧಾರಾವಾಹಿ ಈಗ ಕನ್ನಡಕ್ಕೂ ಡಬ್ ಆಗಿದ್ದು, ಶೀಘ್ರದಲ್ಲಿಯೇ ಪ್ರಸಾರವಾಗಲಿದೆ.

ದಿನಾಂಕ ಮತ್ತು ಸಮಯ

ಅರುಣ್ ಗೋವಿಲ್, ಸುನೀಲ್ ಲಹ್ರಿ, ಅರವಿಂದ್ ತ್ರಿವೇದಿ, ದೀಪಿಕಾ ಚಿಖ್ಲಿಯಾ ಮುಂತಾದವರು ನಟಿಸಿದ್ದ ರಾಮಾಯಣ, ಕನ್ನಡದ ವೀಕ್ಷಕರಿಗೆ ಸಿಗಲಿದೆ. ಅದರ ಪ್ರಸಾರದ ದಿನಾಂಕ ಮತ್ತು ಸಮಯ ಇನ್ನೂ ಘೋಷಣೆಯಾಗಿಲ್ಲ.