ಬರ್ತಡೇ ಸ್ಪೆಷಲ್; ಪ್ರಿಯಾಮಣಿ ನಟನೆಯ ಸೂಪರ್ ಹಿಟ್ ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ನಟಿ ಪ್ರಿಯಾಮಣಿ ನಟನೆಯ ಮೊದಲ ಕನ್ನಡ ಸಿನಿಮಾ ರಾಮ್. ಈ ಸಿನಿಮಾದಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್‌ಗೆ ಜೋಡಿಯಾಗಿ ಕಾಣಿಸಿಕೊಂಡಿದ್ದರು. ರಂಗಾಯಣ ರಘು, ಸಾಧು ಕೋಕಿಲ, ಶ್ರೀನಾಥ್, ದೊಡ್ಡಣ್ಣ, ಚೈತ್ರ ಶೆನೆಯ್, ಪದ್ಮ ವಸಂತಿ, ಚೇತನ್ ಕುಮಾರ್, ಮೊದಲಾದವರ ತಾರ ಬಳಗವೇ ಚಿತ್ರದಲ್ಲಿದ್ದು, ಈ ಸಿನಿಮಾವನ್ನು ಕೆ ಮಾದೇಶ್ ನಿರ್ದೇಶನ ಮಾಡಿದ್ದರು. ಸಿನಿಮಾದಲ್ಲಿ ಪೂಜಾಳ (ಪ್ರಿಯಾಮಣಿ) ಶ್ರೀಮಂತ ಚಿಕ್ಕಪ್ಪ ಅವಳಿಗೆ ಬಲವಂತವಾಗಿ ಮದುವೆ ಮಾಡಿಸಲು ಪ್ರಯತ್ನಿಸುತ್ತಿರುತ್ತಾನೆ. ಈ ವೇಳೆ ರಾಮ್ (ಪುನೀತ್) ಆಕೆಯನ್ನು ಆ ಮದುವೆಯಿಂದ ರಕ್ಷಿಸುತ್ತಾನೆ. ಬಳಿಕ ಇಬ್ಬರು ಅಲ್ಲಿಂದ ತಪ್ಪಿಸಿಕೊಂಡು ಕಾಡು ಸೇರುತ್ತಾರೆ. ಈ ಸಂದರ್ಭ ಪೂಜೆಗೆ ರಾಮ್‌ ಮೇಲೆ ಪ್ರೀತಿಯಾಗುತ್ತದೆ. ಈ ಸಿನಿಮಾ ಚಿತ್ರಮಂದಿರಗಳಲ್ಲಿ 125 ದಿನಗಳನ್ನು ಪೂರೈಸಿತ್ತು.   

ದುನಿಯಾ ಸೂರಿ ನಿರ್ದೇಶನದ 'ಅಣ್ಣಾಬಾಂಡ್' ಸಿನಿಮಾದಲ್ಲಿ ಪುನೀತ್ ರಾಜ್‌ಕುಮಾರ್ ಜೊತೆ ಪ್ರಿಯಾಮಣಿ ನಾಯಕಿಯಾಗಿ ಅಭಿನಯಿಸಿದ್ದರು. ಡ್ರಗ್ಸ್ ಮಾಫಿಯಾ ಪಾತಕಗಳಿಗೆ ಸಮಾಜದ ಕೆಲವರು ಬಲಿಯಾಗುವ ಕಥೆಯ ಎಳೆಯೊಂದಿಗೆ ಸಮಾಜ ಸುಧಾರಣೆ, ಮಾನವೀಯ ಮೌಲ್ಯಗಳಿಗೆ ಬೆಲೆ ಕೊಡಬೇಕೆಂಬ ಸಿದ್ಧಾಂತವೂ ಸಿನಿಮಾದಲ್ಲಿತ್ತು. ಈ ಸಿನಿಮಾದಲ್ಲಿ ರಂಗಾಯಣ ರಘು ಅವರ ಅಭಿನಯಕ್ಕೂ ಪ್ರೇಕ್ಷಕರಿಂದ ಮೆಚ್ಚುಗೆ ವ್ಯಕ್ತವಾಗಿತ್ತು. 'ಅಣ್ಣಾಬಾಂಡ್' ಸಿನಿಮಾದಲ್ಲಿ ಲವ್ ಸ್ಟೋರಿ, ಫೈಟ್ಸ್, ಡ್ಯಾನ್ಸ್‌ ಎಲ್ಲವೂ ಇದ್ದು ಪ್ರೇಕ್ಷಕರ ಮನಗೆದ್ದಿತ್ತು. ಈ ಸಿನಿಮಾ ಬಳಿಕ ಪ್ರಿಯಾಮಣಿಗೆ ಕನ್ನಡ ಚಿತ್ರರಂಗದಲ್ಲಿ ಬೇಡಿಕೆ ಹೆಚ್ಚಾಯಿತು. 

ಕನ್ನಡ ಮತ್ತು ತಮಿಳಿನಲ್ಲಿ ನಿರ್ಮಿಸಲಾದ 'ಚಾರುಲತಾ' ಸಿನಿಮಾದಲ್ಲಿ ಪ್ರಿಯಾಮಣಿ ದ್ವಿಪಾತ್ರದಲ್ಲಿ ನಟಿಸಿದ್ದರು. ಈ ಸಿನಿಮಾ ಇಬ್ಬರ ಅವಳಿ ಸಹೋದರಿಯರ ಕಥೆಯನ್ನೊಳಗೊಂಡಿತ್ತು. ಚಿತ್ರದಲ್ಲಿ ಅವಳಿ ಸಹೋದರಿಯರ ದೇಹ ಅಂಟಿಕೊಂಡಿಕೊಂಡಿರುತ್ತದೆ. ಅವರಲ್ಲಿ   ಒಬ್ಬರು ಒಬ್ಬಹುಡುಗನನ್ನು ಪ್ರೀತಿಸುತ್ತಾಳೆ. ಹೀಗಾಗಿ ಅವರ ತಾಯಿ ಶಸ್ತ್ರಶಕಿತ್ಸೆ ಮೂಲಕ ಅವರಿಬ್ಬರ ದೇಹ ಬೇರ್ಪಡಿಸಲು ನಿರ್ಧರಿಸುತ್ತಾರೆ. ಈ ವೇಳೆ ಒಬ್ಬಳು ಸಾಯುತ್ತಾಳೆ. ಬಳಿಕ ಪ್ರೇತವಾಗಿ ಇನ್ನೊಬ್ಬಳಿಗೆ ತೊಂದರೆ ಕೊಡಲು ಆರಂಭಿಸುತ್ತಾಳೆ. ಈ ಸಿನಿಮಾ ಕನ್ನಡ ಮತ್ತು ತಮಿಳಿನಲ್ಲಿ ಹಿಟ್ ಆಗಿ ಮಲಯಾಳಂಗೆ ಡಬ್ ಆಗಿತ್ತು. 

ಯೋಗರಾಜ್ ಭಟ್ ಅವರ 'ದನ ಕಾಯೋನು' ಸಿನಿಮಾ ಹೊಸ ರೀತಿಯ ಕತೆ. ಈ ಸಿನಿಮಾದಲ್ಲಿ ದುನಿಯಾ ವಿಜಯ್ ನಾಯಕನಾಗಿ ಹಾಗೂ ಪ್ರಿಯಾಮಣಿ ನಾಯಕಿಯಾಗಿ ಅಭಿನಯಿಸಿದ್ದರು. ಪ್ರಾಣಿಗಳೇ ಗುಣದಲ್ಲಿ ಮೇಲು, ಮಾನವರು ಅಂದಕ್ಕಿಂತ ಕೀಳು' ಎಂಬ ಮಾತಿಗೆ ದೃಶ್ಯ ರೂಪಕ ಕೊಟ್ಟು, ಎಲ್ಲರ ಮನ ಮುಟ್ಟುವ ರೀತಿಯಲ್ಲಿ 'ದನ ಕಾಯೋನು' ಚಿತ್ರವನ್ನ ತೆರೆಗೆ ತರಲಾಗಿತ್ತು. ವಿಭಿನ್ನ ಕಥೆ ಹೊಂದಿದ್ದ ಈ ಸಿನಿಮಾ ಹಿಟ್ ಆಗಿತ್ತು. 

ಅಂಬರೀಶ್ ಸಿನಿಮಾದಲ್ಲಿ ದರ್ಶನ್, ರಚಿತ ರಾಮ್ ಮತ್ತು ಪ್ರಿಯಾಮಣಿ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದರು. ಈ ಚಿತ್ರದಲ್ಲಿ ಹೊರಗಿನ ದೇಶದವರು ಇಲ್ಲಿನ ರಾಜಕಾರಣಿಯ ಮೂಲಕ ಬೆಂಗಳೂರಿನಲ್ಲಿ ಭೂ ಮಾಫಿಯಾ ಮಾಡಲು ಬಂದಾಗ ಅವರನ್ನು ಹೆದುರಿಸಿ, ಬೆಂಗಳೂರನ್ನು ನಿರ್ಮಿಸಿದ ಕೆಂಪೇಗೌಡನ ರೂಪದಲ್ಲಿ ಅಂಬರೀಶ್ (ದರ್ಶನ್) ಎಲ್ಲವನ್ನು ಹೇಗೆ ಕಾಪಾಡುತ್ತಾನೆ ಎಂಬುದನ್ನು ತೋರಿಸಲಾಗಿತ್ತು. ಚಿತ್ರದಲ್ಲಿ ಪ್ರಿಯಾಮಣಿ ಶ್ರೀಮಂತೆಯಾಗಿ ಕಾಣಿಸಿಕೊಂಡಿದ್ದು, ದುಡ್ಡಿನಿಂದಲೇ ಎಲ್ಲವನ್ನು ಕೊಂಡುಕೊಳ್ಳಬಹುದು ಎಂಬ ಧಿಮಾಕಿನ ಯುವತಿಯ ಪಾತ್ರ ಮಾಡಿದ್ದರು.