ಬಿಗ್‌ಬಾಸ್‌ ಕನ್ನಡ ಸೀಸನ್ 11ರ ವಿನ್ನರ್, ರನ್ನರ್ ಅಪ್ ಜೊತೆಗೆ ಫೈನಲಿಸ್ಟ್‌ಗಳಿಗೆ ಎಷ್ಟೆಷ್ಟು ಹಣ ಸಿಕ್ತು ಗೊತ್ತಾ?

ಕರ್ನಾಟಕದ ಜನತೆಯಿಂದ ಬರೋಬ್ಬರಿ 5,23,89,31 ಮತಗಳನ್ನು ಪಡೆದು ಹನುಮಂತು 'ಬಿಗ್‌ಬಾಸ್ ಕನ್ನಡ ಸೀಸನ್ 11ರ' ಟ್ರೋಫಿ ಗೆದ್ದಿದ್ದಾರೆ. ಬಿಗ್‌ಬಾಸ್ ಇತಿಹಾಸದಲ್ಲಿಯೇ ಇಷ್ಟೊಂದು ವೋಟ್ ಯಾರಿಗೂ ಬಂದಿಲ್ಲ. ಈ ಬಾರಿ ವಿನ್ನರ್‌ಗೆ 5 ಕೋಟಿ ಮತಗಳು ಬಂದಿರುವುದು ಇತಿಹಾಸವಾಗಿದೆ. ಬಿಗ್‌ಬಾಸ್‌ ವಿನ್ನರ್ ಆಗಿರುವ ಹನುಮಂತು ಅವರಿಗೆ ಕಾನ್ಫಿಡೆನ್ಸ್ ಗ್ರೂಪ್ ಅವರ ಕಡೆಯಿಂದ 50 ಲಕ್ಷ ರೂಪಾಯಿ ಸಿಕ್ಕಿದೆ. ಇದರ ಜೊತೆಗೆ ವಾರದ ಸಂಭಾವನೆಯೂ ಸಿಕ್ಕಿದೆ.

ಬಿಗ್‌ಬಾಸ್ ಕನ್ನಡ ಸೀಸನ್ 11ರ ರನ್ನರ್ ಅಪ್ ಆಗಿ ತ್ರಿವಿಕ್ರಮ್ ಹೊರಹೊಮ್ಮಿದ್ದಾರೆ. ಬಿಗ್‌ಬಾಸ್‌ ಮನೆಯಲ್ಲಿ ತ್ರಿವಿಕ್ರಮ್ ಅವರ ಆಟದ ಶೈಲಿ, ಪಂಚ್‌ಲೈನ್, ಬುದ್ಧಿವಂತಿಗೆ ಹಾಗೂ ಸ್ಪಷ್ಟನೆ ಎಲ್ಲವೂ ವೀಕ್ಷಕರಿಗೆ ಇಷ್ಟವಾಗಿತ್ತು. ಇನ್ನು ರನ್ನರ್ ಅಪ್‌ ತ್ರಿವಿಕ್ರಮ್‌ಗೆ ಇಂಡಸ್ 555 ಟಿಎಂಟಿ ಅವರ ಕಡೆಯಿಂದ 10 ಲಕ್ಷ ರೂಪಾಯಿ, ಜಾರ್ ಅಪ್ ಅವರ ಕಡೆಯಿಂದ 5 ಲಕ್ಷ ರೂಪಾಯಿ ಕ್ಯಾಶ್ ಪ್ರೈಸ್ ಸಿಕ್ಕಿದೆ. ಇದರ ಜೊತೆಗೆ ವಾರಕ್ಕೆ ಇಂತಿಷ್ಟು ಎಂಬ ಸಂಭಾವನೆಯೂ ಸಿಕ್ಕಿದೆ.

50 ದಿನಗಳ ಬಳಿಕ ವೈಲ್ಡ್‌ಕಾರ್ಡ್ ಸ್ಪರ್ಧಿಯಾಗಿ ಎಂಟ್ರಿಕೊಟ್ಟಿದ್ದ ರಜತ್ ಕಿಶನ್, ಟಾಸ್ಕ್, ಮನೋರಂಜನೆ ಎಲ್ಲದರಲ್ಲೂ ಮುಂದಿದ್ದರು. ತಮ್ಮ ಆಟದ ವೈಖರಿ ಮೂಲಕ ಅಪಾರ ಅಭಿಮಾನಿಗಳನ್ನು ಸಂಪಾದಿಸಿರುವ ರಜತ್ ಬಗ್ಗೆ ಸುದೀಪ್ ಕೂಡ ಮೆಚ್ಚುಗೆ ಸೂಚಿಸಿದ್ದರು. ಮೂರನೇ ಸ್ಥಾನ ಪಡೆದಿರುವ ರಜತ್ ಅವರಿಗೆ ವಾರದ ಸಂಭಾವನೆ ಜೊತೆಗೆ  10 ಲಕ್ಷ ರೂಪಾಯಿ ನಗದು ಬಹುಮಾನ ಸಿಕ್ಕಿದೆ.

ಬಿಗ್‌ಬಾಸ್ ಮನೆಯಲ್ಲಿ ತಮ್ಮ ವ್ಯಕ್ತಿತ್ವ ಹಾಗೂ ನೇರನುಡಿಯಿಂದಲೇ ಪ್ರೇಕ್ಷಕರಿಗೆ ಹತ್ತಿರವಾಗಿದ್ದ್ ಮೋಕ್ಷಿತಾ ಪೈ, ನಾಲ್ಕನೇ ಸ್ಥಾನ ಪಡೆದುಕೊಂಡಿದ್ದಾರೆ. ಮೋಕ್ಷಿತಾಗೆ ಸದ್ಗುರು ಆಯುರ್ವೇದ ಗ್ರಾಮ್ ಫ್ಲೋರ್ ಸೋಪ್ ಅವರ ಕಡೆಯಿಂದ 5 ಲಕ್ಷ ರೂಪಾಯಿ ಹಾಗೂ ಇಕೋ ಪ್ಲ್ಯಾನೆಟ್ ಅವರ ಕಡೆಯಿಂದ 2 ಲಕ್ಷ ರೂಪಾಯಿ ಕ್ಯಾಶ್ ಪ್ರೈಸ್ ಸಿಕ್ಕಿದೆ. ಒಟ್ಟು 7 ಲಕ್ಷ ರೂ. ನಗದು ಬಹುಮಾನ ಸಿಕ್ಕಿದೆ. ಇದರ ಜೊತೆಗೆ ವಾರದ ಸಂಭಾವನೆ ಕೂಡ ಸಿಕ್ಕಿದೆ. ಮೂಲಗಳ ಪ್ರಕಾರ, ಮೋಕ್ಷಿತಾ ಅವರ ಸಂಭಾವನೆ ವಾರದ ಸಂಭಾವನೆ 60 ಸಾವಿರ ರೂಪಾಯಿ. 

ಬಿಗ್‌ಬಾಸ್‌ ಮನೆಗೆ ಎಂಟ್ರಿಕೊಟ್ಟಾಗಿನಿಂದಲೂ ಪ್ರಬಲ ಸ್ಪರ್ಧಿಯಾಗಿ ಗುರುತಿಸಿಕೊಂಡಿದ್ದ ಉಗ್ರಂ ಮಂಜು 5ನೇ ಸ್ಥಾನ ಪಡೆದುಕೊಂಡಿದ್ದಾರೆ. ಮಂಜು ಅವರಿಗೆ ವಾಕ್‌ಮೇಟ್ ಫೂಟ್‌ವೇರ್ ಕಡೆಯಿಂದ 2 ಲಕ್ಷ ರೂ. ಕ್ಯಾಶ್‌ಪ್ರೈಸ್, ಇಕೋ ಪ್ಲ್ಯಾನೆಟ್ ಕಡೆಯಿಂದ 1 ಲಕ್ಷ ರೂ ಹಾಗೂ ಸಂಗೀತ ಮೊಬೈಲ್ಸ್ ಕಡೆಯಿಂದ 50 ಸಾವಿರ ಮೊತ್ತದ ಗಿಫ್ಟ್‌ ಸಿಕ್ಕಿದೆ. ಇದರ ಜೊತೆಗೆ ಬಿಗ್‌ಬಾಸ್‌ ಮನೆಯಲ್ಲಿ ಮಂಜು ಅವರಿಗೆ ವಾರಕ್ಕೆ 70 ಸಾವಿರ ರೂ. ಸಂಭಾವನೆ ಸಿಗುತ್ತಿತ್ತು ಎನ್ನಲಾಗಿದೆ.

6ನೇ ಸ್ಥಾನ ಪಡೆದ ಭವ್ಯಾ ಗೌಡ ಅವರಿಗೆ ಶ್ರೀಕೃಷ್ಣ ತುಪ್ಪ ಕಡೆಯಿಂದ 2 ಲಕ್ಷ ರೂಪಾಯಿ, ಸುದರ್ಶನ್ ಸಿಲ್ಕ್ ಕಡೆಯಿಂದ 1 ಲಕ್ಷ ಹಾಗೂ ಇಕೋ ಪ್ಲ್ಯಾನೆಟ್ ಕಡೆಯಿಂದ 50 ಸಾವಿರ ರೂ. ಕ್ಯಾಶ್ ಪ್ರೈಜ್ ಸಿಕ್ಕಿದೆ. ಇದರ ಜೊತೆಗೆ ಭವ್ಯಾಗೆ ವಾರದ ಸಂಭಾವನೆ ಕೂಡ ಸಿಕ್ಕಿದೆ. ವರದಿಗಳ ಪ್ರಕಾರ, ಬಿಗ್‌ಬಾಸ್‌ ಮನೆಯಲ್ಲಿ ಭವ್ಯಾ ಗೌಡ ಅವರಿಗೆ ವಾರಕ್ಕೆ 40 ಸಾವಿರ ರೂ. ಸಂಭಾವನೆ ಸಿಗುತ್ತಿತ್ತು ಎನ್ನಲಾಗಿದೆ.