Happy Birthday: ಇಂಡಿಯನ್ ಮೈಕಲ್ ಜಾಕ್ಸನ್ ಪ್ರಭುದೇವ ಕುರಿತ ಇಂಟರೆಸ್ಟಿಂಗ್ ವಿಷಯಗಳು ಇಲ್ಲಿವೆ.

ಪ್ರಭುದೇವ ಅವರು ಮೂಲತಃ ಮೈಸೂರಿ ಜಿಲ್ಲೆಯ ಟಿ.ನರಸೀಪುರ ತಾಲೂಕಿನ 'ದೂರ' ಗ್ರಾಮದವರು. ವೀಕೆಂಡ್ ವಿತ್ ರಮೇಶ್ ಶೋನಲ್ಲಿ ದೂರ ಗ್ರಾಮದಲ್ಲಿದ್ದಾಗ ಅವರ ಬಾಲ್ಯ ಹೇಗಿತ್ತು ಎಂಬುದನ್ನು ಪ್ರಭುದೇವ ರಿವೀಲ್ ಮಾಡಿದ್ದರು. ಬುಗುರಿ ಆಟ, ಗೋಲಿಯಾಟ, ಸೈಕನ್‌ನಲ್ಲಿ ಬಂಡಿ ಹೊಡೆಯುತ್ತಿದ್ದನ್ನು ತಿಳಿಸಿದ್ದರು. ಇವರು ಕಾರ್ಯಕ್ರಮದಲ್ಲಿ ಚಾಮರಾಜನಗರ ಕಡೆಯ ಕನ್ನಡವನ್ನೇ ಬಳಸಿದ್ದು ವಿಶೇಷವಾಗಿತ್ತು.

ಪ್ರಭುದೇವ ಅವರು1 973ರ ಏಪ್ರಿಲ್ 3ರಂದು ಜನಿಸಿದರು. ಅಂದು ಅಮಾವಾಸ್ಯೆ. ಸಾಮಾನ್ಯವಾಗಿ ಅಮಾವಾಸ್ಯೆಯಂದು, ಮಂಗಳವಾರ ಎಂದರೆ ಎಲ್ಲರಿಗೂ ಭಯ ಇರುತ್ತೆ. ಆದರೆ, ತಮ್ಮ ಮಗ ಅಮಾವಾಸ್ಯೆಯಂದು ಹುಟ್ಟಿದ ಎಂದು ಮೂಗೂರು ಸಂದರ್ ತುಂಬಾ ಖುಷಿಪಟ್ಟಿದ್ದರಂತೆ. ನನ್ನ ಮಗ ಅಮಾವಾಸ್ಯೆಯಂದು ಹುಟ್ಟಿದ್ದು ನನಗೆ ಖುಷಿ ತಂದಿದೆ ಎಂದು ವೀಕೆಂಡ್ ವಿತ್ ರಮೇಶ್‌ ಕಾರ್ಯಕ್ರಮದಲ್ಲಿ ಪ್ರಭುದೇವ ತಂದೆ ಸಂತಸ ವ್ಯಕ್ತಪಡಿಸಿದ್ದರು.

ಪ್ರಭುದೇವ ಅವರಿಗೆ ಹಪ್ಪಳವೆಂದರೆ ಭಯಂಕರ ಇಷ್ಟವಂತೆ. ಹಪ್ಪಳವನ್ನು ಕೈಯಲ್ಲಿ ಹಿಡಿದುಕೊಂಡು ಚೂರು ಚೂರೇ ಮುರಿದುಕೊಂಡು ತಿನ್ನುತ್ತಿದ್ದರಂತೆ. ಅದರಲ್ಲೂ ಉದ್ದಿನ ಹಪ್ಳ, ಸಂಡಿಗೆ ಅಂದ್ರೆ ಬಹಳ ಇಷ್ಟವಂತೆ. ಈಗಲೂ ಕೂಡ ಶೂಟಿಂಗ್‌ನಲ್ಲಿ ಅವರಿಗೆ ಅಂತಲೇ ಹಪ್ಪಳ ಎತ್ತಿಡುತ್ತಾರಂತೆ. ಇದರ ಜೊತೆಗೆ ಮೈಸೂರು ಪಾಕ್, ಒಬ್ಬಟ್ಟು, ಪಾಯಸ, ರವೆ ಉಂಡೆ ಎಂದರೆ ಪ್ರಭುದೇವ ಅವರಿಗೆ ಎಲ್ಲಿಲ್ಲದ ಪ್ರೀತಿ. ಅದರಲ್ಲೂ ಅಮ್ಮ ಮಾಡಿದ ಪಾಯಸವೆಂದರೆ ಬಹಳ ಇಷ್ಟವಂತೆ. ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲಿ ನಾನೆಲ್ಲೇ ಶೂಟಿಂಗ್ ಹೋಗಿಬಂದರೂ ಮೈಸೂರಿಗೆ ಹೋಗುತ್ತೇನೆ ಎಂದರೆ ಅಮ್ಮ ಪಾಯಸ ರೆಡಿ ಮಾಡಿರುತ್ತಾರೆ. ಪಾಯಸ ಅಂದರೂ ನನಗೆ ಭಯಂಕರ ಇಷ್ಟ ಎಂದಿದ್ದರು.

ವೀಕೆಂಡ್ ವಿತ್ ರಮೇಶ್‌ಗೆ ಪ್ರಭುದೇವ ಅವರ ಮೈಸೂರಿನ ಗೆಳೆಯರು ಆಗಮಿಸಿದ್ದರು. ಅದರಲ್ಲಿ ಕೆಲವರು ಲುಂಗಿ ಉಟ್ಟುಕೊಂಡು ಬಂದಿದ್ದರು. ಈ ವೇಳೆ ಬಾಲ್ಯದ ದಿನಗಳನ್ನು ನೆನೆದ ಇಂಡಿಯನ್ ಮೈಕಲ್ ಜಾಕ್ಸನ್, ಒಮ್ಮೆ ನನಗೆ ಸ್ನೇಹಿತರು ಒತ್ತಾಯ ಮಾಡಿ ಲುಂಗಿ ಉಡಲು ಹೇಳಿದ್ದರು. ಆ ಕಾರಣಕ್ಕಾಗಿ ನಾನು ಲುಂಗಿ ಕಟ್ಟಿಕೊಂಡು ರಾತ್ರಿ ಮಲಗಿದ್ದೆ. ಬೆಳಗ್ಗೆ ನೋಡಿದರೆ ಲುಂಗಿಯೇ ಇಲ್ಲ. ಅಂದಿನಿಂದ ಲುಂಗಿಯೇ ಕಟ್ಟಿಕೊಳ್ಳುವುದಿಲ್ಲ ಎಂದು ನಿರ್ಧರಿಸಿದೆ. ಅಂದಿನಿಂದ ಇಂದಿನವರೆಗೂ ನಾನ್ಯಾವತ್ತೂ ಲುಂಗಿ ಹಾಕಿಕೊಳ್ಳುವುದಿಲ್ಲ. ನೈಟ್‌ ಪ್ಯಾಂಟ್ ಅಥವಾ ಶಾರ್ಟ್ ಹಾಕಿಕೊಂಡು ಮಲಗುತ್ತೇನೆ ಎಂದು ಬಾಲ್ಯದ ಪ್ರಸಂಗವನ್ನು ನೆನಪು ಮಾಡಿಕೊಂಡಿದ್ದರು. 

ಪ್ರಭುದೇವ ಅವರು ತಾವು 11ನೇ ತರಗತಿಯಲ್ಲಿ (ಪಿಯುಸಿ) ಫೇಲ್ ಆಗಿರುವುದು ಮತ್ತು ಈ ಸಂದರ್ಭ ಅವರ ತಂದೆ ಮೂಗೂರು ಸುಂದರ್ ಪ್ರತಿಕ್ರಿಯೆ ಹೇಗಿತ್ತು ಎಂಬುದನ್ನು ವಿವರಿಸಿದ್ದಾರೆ. ನಾನು ಪಿಯುಸಿಯಲ್ಲಿ ಫೇಲ್‌ ಆಗಿದ್ದೆ. ಅದನ್ನು ಮನೆಯಲ್ಲಿ ತಿಳಿಸಲು ಭಯಪಟ್ಟಿದ್ದೆ. ನಾನು ಮನೆಯಲ್ಲಿ ಎಂದು ಕೆಲಸ ಮಾಡಿದವನಲ್ಲ, ಆದರೆ ಅಂದು ಬಹಳ ಕೆಲಸ ಮಾಡಿದ್ದೆ. ಆಗ ನಾವು ಮನೆ ಕಟ್ಟಿಸುತ್ತಿದ್ದೆವು. ಅಪ್ಪ ಬೆಳಗ್ಗೆ ಮನೆಯಿಂದ ಹೊರಟರೇ ರಾತ್ರಿಯೇ ಮನೆಗೆ ಬರುತ್ತಿದ್ದರು. ಆದರೆ, ನನ್ನ ರಿಸಲ್ಟ್ ಬಂದ ದಿನ ಮನೆಯಲ್ಲೇ ಇದ್ದರು. ಅಪ್ಪ ರಿಸಲ್ಟ್‌ ಕೇಳಲು ಡೈನೋಸಾರಸ್‌ನಂತೆ ಹೆಜ್ಜೆ ಇಟ್ಟುಕೊಂಡು ನನ್ನ ಬಳಿ ಬರುತ್ತಿದ್ದದ್ದನ್ನು ನೋಡಿ ಇನ್ನೂ ಭಯ ಜಾಸ್ತಿಯಾಗಿತ್ತು. ಕೊನೆಗೆ ನನ್ನ ಬಳಿಬಂದು ರಿಸಲ್ಟ್ ಏನಾಯಿತು ಎಂದರು. ನಾನು ಹೆದರಿಕೆಯಿಂದಲೇ ಫೇಲ್ ಅಂದೆ. ಈ ವೇಳೆ ನನ್ನ ತಂದೆ ಬೆನ್ನು ತಟ್ಟಿ, ನಿನಗೆ ಏನೂ ಮಾಡಬೇಕು ಅನಿಸುತ್ತದೆಯೋ ಅದನ್ನು ಮಾಡು ಎಂದರು. ಅಂದು ಅವರು ಬೆನ್ನುತಟ್ಟಿದ್ದರಿಂದಲೇ ಇಂದು ನಾನಿಲ್ಲಿ ಕುಳಿತ್ತಿದ್ದೇನೆ ಎಂದರು.  

ವೀಕೆಂಡ್ ವಿತ್ ರಮೇಶ್‌ ಕಾರ್ಯಕ್ರಮದಲ್ಲಿ ತಮ್ಮ ವಿದ್ಯಾಭ್ಯಾಸದ ಕುರಿತು ಮಾತನಾಡಿದ ಪ್ರಭುದೇವ, ನನಗೆ ಓದಿನಲ್ಲಿ ಅಷ್ಟೇನೂ ಆಸಕ್ತಿ ಇರಲಿಲ್ಲ. ನಾವು ಅಣ್ಣ-ತಮ್ಮಂದಿರು ಮೂವರು ಕೂಡ ಡ್ಯಾನ್ಸ್ ಕಲಿಯುತ್ತಿದ್ದೆವು. ಕೆಲವೊಮ್ಮೆ ಅಪ್ಪನೊಂದಿಗೆ ಶೂಟಿಂಗ್‌ಗೆ ಹೋಗುತ್ತಿದ್ದೆವು. ನಾನು 9ನೇ ತರಗತಿಯಲ್ಲಿರುವಾಗಲೇ ತೆಲುಗು ಸಿನಿಮಾವೊಂದರಲ್ಲಿ ಕೋ ಡ್ಯಾನ್ಸರ್ ಆಗಿದೆ. ಅಲ್ಲಿಯವರೆಗೂ ನಾನು ನೃತ್ಯ ಮಾಡುತ್ತೇನೆಂದು ಯಾರಿಗೂ ತಿಳಿದಿರಲಿಲ್ಲ. ಸಿನಿಮಾ ರಿಲೀಸ್ ಆದ ಮೇಲೆ ಶಾಲೆಯಲ್ಲಿ ತಿಳಿದಿತ್ತಂತೆ.

ಪ್ರಭುದೇವ ನಟರಾಗಿ, ನಿರ್ದೇಶಕರಾಗಿ, ಕೋರಿಯೋಗ್ರಾಫರ್ ಆಗಿ ಭಾರತದಾದ್ಯಂತ ಸಾಧನೆ ಮಾಡಿದ್ದಾರೆ. ಇದಕ್ಕಾಗಿ ಅವರಿಗೆ ಪದ್ಮಶ್ರೀ ಪ್ರಶಸ್ತಿಯೂ ಲಭಿಸಿದೆ. ಪ್ರಭುದೇವ 100ಕ್ಕೂ ಹೆಚ್ಚು ಸಿನಿಮಾಗಳಿಗೆ ಕೊರಿಯೋಗ್ರಫಿ ಮಾಡಿದ್ದಾರೆ. ಜೊತೆಗೆ 61 ಸಿನಿಮಾಗಳಲ್ಲಿ ನಟಿಸಿದ್ದು,15 ಸಿನಿಮಾಗೆ ಆಕ್ಷನ್ ಕಟ್ ಹೇಳಿದ್ದಾರೆ. ಮೂರು ಸಿನಿಮಾಗಳನ್ನು ನಿರ್ಮಾಣ ಮಾಡಿದ್ದಾರೆ. ಭಾರತದ ಸ್ಟಾರ್ ನಟರ ಜೊತೆ ಕೆಲಸ ಮಾಡಿದ್ದಾರೆ.