ಇಂದಿನಿಂದ ಓಟಿಟಿಯಲ್ಲಿ ದರ್ಶನ್ 'ಕ್ರಾಂತಿ': ಚಿತ್ರದ ಥಿಯೇಟರ್‌, ಸ್ಯಾಟಲೈಟ್, ಓಟಿಟಿ ಕಲೆಕ್ಷನ್ ವಿವರ ಇಲ್ಲಿದೆ.

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 'ಕ್ರಾಂತಿ' ಸಿನಿಮಾ ಇಂದಿನಿಂದ (ಫೆಬ್ರವರಿ 23) ಅಮೆಜಾನ್ ಪ್ರೈಮ್ ವಿಡಿಯೊದಲ್ಲಿ ಸ್ಟ್ರೀಮ್ ಆಗುತ್ತಿದೆ. ಫೆಬ್ರವರಿ ೨೨ರ ಮಧ್ಯರಾತ್ರಿಯಿಂದಲೇ 'ಕ್ರಾಂತಿ' ಪ್ರಸಾರವಾಗುತ್ತಿದೆ. ಜನವರಿ 26ಕ್ಕೆ ತೆರೆಕಂಡಿದ್ದ ಚಿತ್ರಕ್ಕೆ ಮಿಶ್ರಪ್ರತಿಕ್ರಿಯೆ ಸಿಕ್ಕಿತ್ತು.ಕ್ರಾಂತಿ 28 ದಿನಗಳ ಕಾಲ ಚಿತ್ರಮಂದಿರದಲ್ಲಿ ಪ್ರದರ್ಶನ ಕಂಡ ಬಳಿಕ ಓಟಿಟಿಗೆ ಬಂದಿದೆ.  

ಜನವರಿ 26ರಂದು ಗಣರಾಜ್ಯೋತ್ಸವದ ಪ್ರಯುಕ್ತ ಬಿಡುಗಡೆಗೊಂಡಿದ್ದ ಕ್ರಾಂತಿ ಚಿತ್ರ ತಿಂಗಳಿಗೂ ಮುನ್ನವೇ ಓಟಿಟಿಗೆ ಬರುತ್ತಿರುವುದು ಸದ್ಯ ಸಾಮಾಜಿಕ ಜಾಲತಾಣದಲ್ಲಿ ಸಾಕಷ್ಟು ಚರ್ಚೆಗೆ ಕಾರಣವಾಗಿದೆ. ಕ್ರಾಂತಿ ಸಿನಿಮಾ ಕಲೆಕ್ಷನ್ ಬಗ್ಗೆ ಭಾರೀ ಚರ್ಚೆ ನಡೆದಿತ್ತು. ಆದರೆ, ಚಿತ್ರತಂಡ ಸಕ್ಸಸ್ ಮೀಟ್ ಮಾಡಿ ಎಲ್ಲಾ ಗೊಂದಲಕ್ಕೂ ತೆರೆ ಎಳೆದಿತ್ತು. ಇತ್ತೀಚೆಗೆ 25 ದಿನ ಪೂರೈಸಿದ್ದ ಸಿನಿಮಾ ಇಷ್ಟು ಬೇಗ ಡಿಜಿಟಲ್ ಫ್ಲಾಟ್‌ಫಾರ್ಮ್‌ಗೆ ಬರ್ತಿರೋದು ಅಚ್ಚರಿ ಮೂಡಿಸಿದೆ.

ದರ್ಶನ್ ಅವರ 'ಯಜಮಾನ' ಸಿನಿಮಾದಲ್ಲಿ ಎಣ್ಣೆ ಗಾಣದ ಕಥೆಯನ್ನು ಹೇಳಲಾಗಿತ್ತು. ಆದರೆ, ಕ್ರಾಂತಿ ಚಿತ್ರದಲ್ಲಿ ಅಕ್ಷರ ಕ್ರಾಂತಿ  ಮಾಡಲಾಗಿತ್ತು. ಅಂದರೆ ಕ್ರಾಂತಿ ಸಿನಿಮಾದಲ್ಲಿ ಸರ್ಕಾರಿ ಕನ್ನಡ ಶಾಲೆಗಳ ಸ್ಥಿತಿಗತಿ ಬಗ್ಗೆ ಚರ್ಚೆ ನಡೆಸಲಾಗಿತ್ತು. ಕ್ರಾಂತಿ ಕಮರ್ಷಿಯಲ್ ಅಂಶಗಳ ಜೊತೆಗೆ ಒಂದು ಸಂದೇಶವನ್ನು ಹೊತ್ತು ಬಂದಿತ್ತು. ಹಣಬಲ, ಬಾಹುಬಲವುಳ್ಳ ಎನ್‌ಆರ್‌ಐ ವ್ಯಕ್ತಿಯೊಬ್ಬ ಖಾಸಗಿ ಶಾಲೆಗಳ ಮೇಲೆ ಸಮರ ಸಾರುವ ಹಾಗೂ ಸರ್ಕಾರವನ್ನು ಸರ್ಕಾರಿ ಶಾಲೆಗಳ ಪರವಾಗುವಂತೆ ಮಾಡುವ ಕಥೆಯನ್ನು ಕ್ರಾಂತಿ ಸಿನಿಮಾ ಹೊಂದಿದೆ. 

ಗಣರಾಜ್ಯೋತ್ಸವದಂದು ತೆರೆಕಂಡಿದ್ದ 'ಕ್ರಾಂತಿ' ಸಿನಿಮಾ  ₹100 ಕೋಟಿ ಕ್ಲಬ್ ಸೇರಿದೆ. ಇದರಲ್ಲಿ ಥಿಯೇಟರ್‌ನಿಂದ ಬಂದ ಹಣ, ಸ್ಯಾಟಲೈಟ್ ಹಾಗೂ ಓಟಿಟಿಯಿಂದ ಸೇಲ್ ಆದ ಮೊತ್ತ ಸೇರಿದೆ. 

'ಕ್ರಾಂತಿ' ಸ್ಯಾಟಲೈಟ್ ಹಕ್ಕುಗಳು ಭಾರಿ ಮೊತ್ತಕ್ಕೆ ಸೇಲ್ ಆಗಿದೆ. 'ಕ್ರಾಂತಿ' ಪ್ರಸಾರದ ಹಕ್ಕು ಉದಯ ಟಿವಿಗೆ ಸೇಲ್ ಆಗಿದೆ. ಮೂಲಗಳ ಪ್ರಕಾರ, ಉದಯ ಟಿವಿಗೆ 13 ಕೋಟಿ ರೂ. ಸೇಲ್ ಆಗಿದೆ ಎನ್ನಲಾಗಿದೆ. ಇವೆಲ್ಲವನ್ನೂ ಸೇರಿ ಕ್ರಾಂತಿ ಸಿನಿಮಾ 100 ಕೋಟಿ ರೂ. ಸಂಪಾದನೆ ಮಾಡಿದೆ ಎಂದು ಹೇಳಲಾಗುತ್ತಿದೆ.