ಸ್ಯಾಂಡಲ್‌ವುಡ್‌ ಈ ಸ್ಟಾರ್ ನಟರು ಯಾವ್ಯಾವ ಧಾರವಾಹಿಗಳಲ್ಲಿ ನಟಿಸಿದ್ದಾರೆ ಗೊತ್ತಾ? ಇಲ್ಲಿದೆ ಲಿಸ್ಟ್

ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಡುವುದಕ್ಕೂ ಮುನ್ನ ದರ್ಶನ್ ಕಿರುತೆರೆ ಧಾರಾವಾಹಿಗಳಲ್ಲಿ ಕೂಡ ನಟಿಸಿದ್ದರು. 'ನೀನಾಸಂ'ನಲ್ಲಿ ನಟನೆಯ ತರಬೇತಿ ಪಡೆದಿರುವ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರಿಗೆ ಸಿನಿಲೋಕಕ್ಕೂ ಮುನ್ನ ಕಿರುತೆರೆ ಲೋಕದ ಪರಿಚಯವಾಗಿತ್ತು. ಡಿ ಬಾಸ್ ಒಂದಲ್ಲ, ಎರಡಲ್ಲ, ಮೂರು ಧಾರಾವಾಹಿಗಳಲ್ಲಿ ಬಣ್ಣ ಹಚ್ಚಿದ್ದರು. ದರ್ಶನ್ ನಟನೆಯ ಮೊದಲ ಸೀರಿಯಲ್ ಅಂಬಿಕಾ. ನಂತ ಖೆಡ್ಡಾ ಹಾಗೂ ಊರ್ವಶಿ ಎಂಬ ಮತ್ತೆರಡು ಧಾರಾವಾಹಿಗಳಲ್ಲಿ ಬಣ್ಣ ಹಚ್ಚಿದ್ದರು. ಒಟ್ಟಾರೆ, 3 ಧಾರಾವಾಹಿಗಳಲ್ಲಿ ನಟಿಸಿದ ಬಳಿಕವೇ ಹೀರೀ ಆಗಿ ಬೆಳ್ಳಿತೆರೆಯಲ್ಲಿ ಮಿಂಚಿದರು. 

ಸ್ಯಾಂಡಲ್‌ವುಡ್‌ ಬಾದ್‌ಷಾ ಕಿಚ್ಚ ಸುದೀಪ್ ಮೊದಲ ಬಾರಿಗೆ ಬಣ್ಣ ಹಚ್ಚಿದ್ದು ಉದಯ ಟಿವಿಯಲ್ಲಿ ಪ್ರಸಾರವಾದ 'ಪ್ರೇಮದ ಕಾದಂಬರಿ' ಧಾರಾವಾಹಿಯಲ್ಲಿ. ಬಳಿಕ ಸಿನಿಮಾದಲ್ಲಿ ನಟಿಸುವ ಅವಕಾಶ ಪಡೆದ ಅಭಿನಯ ಚಕ್ರವರ್ತಿ, ಸ್ಟಾರ್ ನಟನಾಗಿ ಮಿಂಚುತ್ತಿದ್ದಾರೆ. ಸುದೀಪ್ ಧಾರಾವಾಹಿ ಹೊರತುಪಡಿಸಿ, ಕನ್ನಡ ಕಿರುತೆರೆ ಅತಿದೊಡ್ಡ ರಿಯಾಲಿಟಿ ಶೋ ಬಿಗ್‌ಬಾಸ್‌ ಸೀಸನ್ ಒಂದರಿಂದ ಸೀಸನ್ ೧೦ರ ವರೆಗೆ ನಿರೂಪಣೆ ಮಾಡಿ, ಯಶಸ್ವಿಗೊಳಿಸಿದ್ದಾರೆ. ಜೊತೆಗೆ ಪ್ಯಾಟೆ ಹುಡ್ಗೀರ್ ಹಳ್ಳಿ ಲೈಫು ಎಂಬ ಕಾರ್ಯಕ್ರಮವನ್ನು ನಡೆಸಿಕೊಟ್ಟಿದ್ದಾರೆ. 

ರಾಕಿಂಗ್ ಸ್ಟಾರ್ ಯಶ್  ನಟನೆ ಆರಂಭಿಸಿದ್ದು ಕಿರುತೆರೆಯಿಂದಲೇ. ಯಶ್ ಅವರ ಮೊದಲ ಸೀರಿಯಲ್ 'ನಂದಗೋಕುಲ'.ಇದೇ ಸೀರಿಯಲ್‌ನಲ್ಲಿ ಇವರ ಪತ್ನಿ ನಟಿ ರಾಧಿಕಾ ಪಂಡಿತ್ ಮುಖ್ಯ ಪಾತ್ರದಲ್ಲಿ ನಟಿಸುತ್ತಿದ್ದರು. ನಂತರ 'ಪ್ರೀತಿ ಇಲ್ಲದ ಮೇಲೆ'  ಸೀರಿಯಲ್‌ನಲ್ಲಿ ಅನಂತನಾಗ್‌ರ ಮಗನಾಗಿ, ಸಂಗೀತದ ಹಂಬಲವಿರುವ ಯುವಕನಾಗಿ ನಟಿಸಿ ಪ್ರೇಕ್ಷಕರಿಗೆ ಹತ್ತಿರವಾದರು. ಇಂದು ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಮಿಂಚುತ್ತಿದ್ದಾರೆ.

ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗುವ ಮುನ್ನ ಸಿಹಿಕಹಿ ಚಂದ್ರು ನಿರ್ದೇಶನದ ಪಾಪ ಪಾಂಡು, ಯದ್ವಾ ತದ್ವಾ ಹಾಗೂ ವಠಾರ ಸೀರಿಯಲ್‌ಗಳಲ್ಲೂ ನಟಿಸಿದ್ದರು. ನಂತರ  ಉದಯ ವಾಹಿನಿಯ 'ಕಾಮಿಡಿ ಟೈಮ್' ಎಂಬ ಕಾರ್ಯಕ್ರಮದ ನಿರೂಪಕರಾಗಿದ್ದರು. ಒಂದ್ಕಾಲದಲ್ಲಿ 'ಕಾಮಿಡಿ ಟೈಮ್ ಗಣೇಶ್' ಅಂತಲೇ ಖ್ಯಾತಿ ಗಳಿಸಿದ್ರು. ಆನಂತರದಲ್ಲಿ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿಕೊಟ್ಟ ಗಣೇಶ್, ಇಂದು ಸ್ಟಾರ್ ನಟನಾಗಿದ್ದಾರೆ.  

ಬ್ಲ್ಯಾಕ್ ಕೋಬ್ರಾ ದುನಿಯಾ ವಿಜಯ್ ಸ್ಯಾಂಡಲ್‌ವುಡ್‌ಗೆ ಕಾಲಿಡುವುದಕ್ಕೂ ಮುನ್ನ ಸಿಹಿಕಹಿ ಚಂದ್ರು ನಿರ್ದೇಶನದ 'ಪಾಪ ಪಾಂಡು' ಸೀರಿಯಲ್‌ನಲ್ಲಿ ಪುಟ್ಟ ಪಾತ್ರವೊಂದನ್ನು ನಿರ್ವಹಿಸಿದ್ದರು. ಬಳಿಕ ಕೆಲ ಸಿನಿಮಾಗಳಲ್ಲಿ ಸಣ್ಣ-ಪುಟ್ಟ ಪಾತ್ರ ನಿರ್ವಹಿಸಿದ್ದರು. ಅವರ ನಸೀಬು ಬದಲಾಯಿಸಿದ್ದು ಸೂರಿ ನಿರ್ದೇಶನ ದುನಿಯಾ ಚಿತ್ರ.

ಡಾರ್ಲಿಂಗ್ ಕೃಷ್ಣ ಕೂಡ ಕಿರುತೆರೆಯಿಂದಲೇ ಹಿರಿತೆರೆಗೆ ಬಂದವರು. ಕೆಲ ವರ್ಷಗಳ ಹಿಂದೆ ಸ್ಟಾರ್ ಸುವರ್ಣ ವಾಹಿನಿಯಲ್ಲಿ ಪ್ರಸಾರವಾದ 'ಕೃಷ್ಣ ರುಕ್ಮಿಣಿ' ಧಾರಾವಾಹಿ ಮೂಲಕ ಗಮನ ಸೆಳೆದಿದ್ದರು. ಈ ಸೀರಿಯಲ್‌ನಲ್ಲಿ ಅವರ ಪಾತ್ರದ ಹೆಸರು ಕೂಡ ಕೃಷ್ಣ ಆಗಿತ್ತು. ಕೂಲಿ ಗ್ಲಾಸ್ ಹಾಕಿಕೊಂಡು, ಕೃಷ್ಣ ಎಂಬ ಲಾಕೆಟ್ ಹಾಕಿಕೊಂಡು, ಪೆನ್ಸಿಲ್ ಪ್ಯಾಂಟ್ ಧರಿಸಿ ಬುಲೆಟ್ ಬೈಕ್ ಓಡಿಸುತ್ತಿದ್ದ ಕೃಷ್ಣ ಕ್ಯಾರೆಕ್ಟರ್ ಸಿಕ್ಕಾಪಟ್ಟೆ ಟ್ರೆಂಡ್ ಆಗಿತ್ತು. 

ಶ್ರೀನಗರ ಕಿಟ್ಟಿ ಬಾಲನಟನಾಗಿ ಮಲೆನಾಡಿನ ಚಿತ್ರಗಳು, ದೊಡ್ಮನೆ, ಕಂದನ ಕಾವ್ಯ ಮುಂತಾದ ಸೀರಿಯಲ್‌ಳಲ್ಲಿ ನಟಿಸಿದ್ದರು. ಇದೇ ಸಮಯದಲ್ಲಿ ರಂಗಭೂಮಿಯಲ್ಲಿ ಸಕ್ರಿಯವಾಗಿದ್ದ ಕಿಟ್ಟಿ ಕಾಡು, ಕಪ್ಪೆ ಭಾವಿ ನಕ್ಷತ್ರ, ಅಕ್ಕ, ಸಂಜೆ ಮಲ್ಲಿಗೆ ಮುಂತಾದ ನಾಟಕಗಳಲ್ಲಿ ನಟಿಸಿದ್ದಾರೆ. ಶಿಕ್ಷಣ ಮುಗಿದ ನಂತರ ನಟನಾಗಿ ಚಂದ್ರಿಕಾ, ಪ್ರೀತಿಗಾಗಿ, ಆನಂದ ಸಾಗರ, ಮನೆ ಮನೆ ಕಥೆ ಮುಂತಾದ ಧಾರಾವಾಹಿಗಳಲ್ಲಿ ನಟಿಸಿದ್ದರು. 

ನಟ ರಿಷಿ ಅವರು ಕೂಡ ಕಿರುತೆರೆಯಿಂದಲೇ ನಟನಾ ವೃತ್ತಿ ಆರಂಭಿಸಿದವರು. ಇವರು ಟಿ.ಏನ್.ಸೀತಾರಾಮ್ ನಿರ್ದೇಶನದ ಮಹಾಪರ್ವ ಧಾರಾವಾಹಿಯ ಮೂಲಕ ಕಿರುತೆರೆ ಪ್ರವೇಶಿಸಿದರು. ನಂತರ ಅನುರೂಪ ಧಾರವಾಹಿಯ ಮೂಲಕ ಕರ್ನಾಟಕದ ಮನೆ ಮಾತಾದರು.