ಈ ವಾರ ಸ್ನೇಹಿತ್ ನೇರ ನಾಮಿನೇಟ್: ಕಣ್ಣಲ್ಲೇ ಮಾತನಾಡಿಕೊಂಡ ವರ್ತೂರು ಸಂತೋಷ್-ಡ್ರೋನ್ ಪ್ರತಾಪ್

ಹಲವು ಬಾರಿ ಸೂಚನೆ ಕೊಟ್ಟರೂ ಹಾಗೂ ೫೦ ದಿನಗಳು ಉರುಳಿದರೂ ಕೆಲ ಸ್ಪರ್ಧಿಗಳು ಬಿಗ್‌ಬಾಸ್ ಮನೆಯಲ್ಲಿ ಅತಿಹೆಚ್ಚು ಆಂಗ್ಲ ಭಾಷೆಯ ಪದಗಳನ್ನು ಬಳಸುತ್ತಿದ್ದಾರೆ. ಇದನ್ನು ಗಮನಿಸಿದ ಬಿಗ್‌ಬಾಸ್‌ ಶಿಕ್ಷೆಯೊಂದನ್ನು ವಿಧಿಸಿದ್ದಾರೆ. ಈ ಮನೆಯಲ್ಲಿ ಯಾರು ಹೆಚ್ಚು ಇಂಗ್ಲಿಷ್ ಭಾಷೆ ಬಳಸುತ್ತಾರೋ ಅವರನ್ನು ಒಮ್ಮತದಿಂದ ನಿರ್ಧರಿಸಿ, ತಿಳಿಸಿ ಎಂದರು. ಆಗ ಸ್ಪರ್ಧಿಗಳೆಲ್ಲರೂ ಒಮ್ಮತದಿಂದ ಸ್ನೇಹಿತ್ ಹೆಸರು ಹೇಳಿದರು. ಬಳಿಕ ಬಿಗ್‌ಬಾಸ್ ಸ್ನೇಹಿತ್ ಅವರನ್ನು ನೇರವಾಗಿ ನಾಮಿನೇಟ್ ಮಾಡಿದರು. 

ಏಂಟನೇ ವಾರ ಬಿಗ್‌ಬಾಸ್ ಮನೆಯಿಂದ ಹೊರಹೋಗಲು ವಿನಯ್ ಗೌಡ, ಸಂಗೀತಾ ಶೃಂಗೇರಿ, ಸ್ನೇಹಿತ್ ಗೌಡ, ನಮ್ರತಾ, ತನಿಷಾ, ಡ್ರೋನ್ ಪ್ರತಾಪ್, ವರ್ತೂರು ಸಂತೋಷ್ ಹಾಗೂ ಮೈಕಲ್ ನಾಮಿನೇಟ್ ಆಗಿದ್ದಾರೆ. ಈ ವಾರಾಂತ್ಯದಲ್ಲಿ ಎಂಟು ಜನರ ಪೈಕಿ ಯಾರು ಹೊರಹೋಗಲಿದ್ದಾರೆ ಎಂಬುದನ್ನು ಕಾದು ನೋಡ್ಬೇಕು. 

ವೈಲ್ಡ್ ಕಾರ್ಡ್ ಎಂಟ್ರಿಕೊಟ್ಟ ಅವಿನಾಶ್ ಶೆಟ್ಟಿ ಮತ್ತು ಪವಿ ಪೂವಪ್ಪಗೆ ಬಿಗ್‌ಬಾಸ್‌ ಇಬ್ಬರನ್ನು ಸೇವ್ ಮಾಡುವ ವಿಶೇಷ ಅಧಿಕಾರವೊಂದನ್ನು ನೀಡಿದ್ದರು. ಜೊತೆಗೆ ಪ್ರತಿಯೊಬ್ಬ ಸ್ಪರ್ಧಿಗಳು ತಮಗೆ ಬೇಕಾದ ಒಬ್ಬರನ್ನು ಸೇಫ್ ಮಾಡುವಂತೆ ಅವರಿಬ್ಬರ ಬಳಿ ಕೇಳಿಕೊಳ್ಳುವಂತೆ ಸೂಚಿಸಿದ್ದರು. ಎಲ್ಲರ ಮಾತನ್ನು ಕೇಳಿದ ಪವಿ ಪೂವಪ್ಪ, ತುಕಾಲಿ ಸಂತು ಅವರನ್ನು ಸೇಫ್ ಮಾಡಿದರು. ಅವಿನಾಶ್ ಅವರು ಸಿರಿ ಅವರನ್ನು ಎಲಿಮಿನೇಷನ್ ಬೆಂಕಿಯಿಂದ ಸೇಫ್ ಮಾಡಿದರು. 

ಸಿರಿ ಮತ್ತು ತುಕಾಲಿ ಸಂತು ಸೇವ್ ಆಗುತ್ತಿದ್ದಂತೆ ಪ್ರತಾಪ್ ಮತ್ತು ವರ್ತೂರು ಸಂತೋಷ್ ಕಣ್ಣಲ್ಲೇ ಮಾತನಾಡಿಕೊಂಡಿದ್ದಾರೆ. ಅವರ ಕಣ್ಸನ್ನೇ ಈ ವಾರ ಹೊರಹೋಗೋದು ಸ್ನೇಹಿತ್ ಎಂಬರ್ಥದಲ್ಲಿತ್ತು. ಇದನ್ನು ವೀಕ್ಷಕರು ಗಮನಿಸಿದ್ದಾರೆ. ಅಂತಿಮವಾಗಿ ಎಲಿಮಿನೇಷನ್ ನಿರ್ಧಾರವಾಗುವುದು ವೋಟಿಂಗ್‌ನಿಂದ. ಹೀಗಾಗಿ ಯಾರು ಈ ವಾರ ಹೋಗಲಿದ್ದಾರೆ ಎಂಬುದನ್ನು ವೀಕ್ಷಕರೇ ನಿರ್ಧರಿಸಲಿದ್ದಾರೆ.  

ಸದ್ಯ ಬಿಗ್‌ಬಾಸ್ ಮನೆಗೆ ಎರಡು ವೈಲ್ಡ್ ಕಾರ್ಡ್ ಎಂಟ್ರಿಯಾಗಿದೆ.  ಪವಿ ಪೂವಪ್ಪ ಹಾಗೂ ಅವಿನಾಶ್ ಶೆಟ್ಟಿ ವೈಲ್ಡ್ ಕಾರ್ಡ್ ಮೂಲಕ ಬಿಗ್‌ಬಾಸ್ ಮನೆ ಪ್ರವೇಶಿಸಿದ್ದಾರೆ. ಈ ನಡುವೆ ಕ್ಯಾಪ್ಟನ್ಸಿ ಟಾಸ್ಕ್ ಆರಂಭವಾಗಿದ್ದು, ಈ ವೇಳೆ ಸ್ಫರ್ದಿಗಳ ನಡುವೆ ಕಿತ್ತಾಟ ಶುರುವಾಗಿದೆ. ತುಕಾಲಿ ಸಂತೋಷ್ ಅವರನ್ನು ವಿನಯ್ ತಳ್ಳಿದ್ದಾರೆ. ನಂತರ ಸ್ನೇಹಿತ್‌ನನ್ನು ತುಕಾಲಿ ಸಂತು ತಳ್ಳಿದ್ದು, ಎರಡು ತಂಡದವರು ಕಿತ್ತಾಡಿದ್ದಾರೆ.