ಯಾರು ನಿನ್ನೊಂದಿಗೆ ಇಲ್ಲವೆಂದರೂ ನಾವು ಇರ್ತೀವಿ, ಮನೆಗೆ ಬಾ: ಅಪ್ಪ-ಮಗನ ಭಾವುಕ ಸಮ್ಮಿಲನಕ್ಕೆ ಸಾಕ್ಷಿಯಾದ ದೊಡ್ಮನೆ

ಬಿಗ್‌ಬಾಸ್‌ ಮನೆಗೆ ಎಲ್ಲಾ ಸದಸ್ಯರು ಫೋಷಕರು ಬಂದು ಹೋಗುತ್ತಿದ್ದಂತೆ ಡ್ರೋನ್ ಪ್ರತಾಪ್, ತಂದೆ-ತಾಯಿ ನನ್ನನ್ನು ನೋಡಲು ಬರುವುದಿಲ್ಲವೆನೋ ಎಂಬ ಆತಂಕದಲ್ಲಿದ್ದರು. ಜೊತೆಗೆ ಬೆಳಿಗ್ಗೆಯಿಂದ ಏನೂ ತಿನ್ನದೇ ಅವರ ಬರುವಿಕೆಗಾಗಿ ಕಾದು ಕುಳಿತಿದ್ದರು. ಹೀಗಿರುವಾಗ ಸಂಜೆ ಹೊತ್ತಿಗೆ ಪ್ರತಾಪ್ ಗಾರ್ಡನ್ ಏರಿಯಾದಲ್ಲಿ ಕುಳಿತಿದ್ದಾಗ, ಬಿಗ್‌ಬಾಸ್‌ ಮನೆಯ ಕೌಂಪೌಂಡ್ ಮೇಲಿಂದ ಒಮ್ಮೆಲೆ ಡ್ರೋನ್‌ವೊಂದು ಹಾರುತ್ತಾ ಬಂತು. ಅದನ್ನು ನೋಡಿದ ಪ್ರತಾಪ್ ಖುಷಿಗೆ ಪಾರವೇ ಇರಲಿಲ್ಲ. ಖುಷಿಯಲ್ಲಿ ಕುಣಿದಾಡುತ್ತಾ ಮನೆಯವರೆಲ್ಲರನ್ನು ಕರೆದು ಇದು ನನ್ನ ಡ್ರೋನ್ ಅಂತ ತೋರಿಸಿದರು. ಪ್ರತಾಪ್ ಅವರ ಡ್ರೋನ್ ನೋಡಿ ಮನೆಯವರೆಲ್ಲರೂ ಸಂತೋಷ ಪಟ್ಟು, ಅಭಿನಂದಿಸಿದರು.   

ಇದಾದ ಸ್ವಲ್ಪ ಹೊತ್ತಿಗೆ ಪ್ರತಾಪ್ ಅಪ್ಪ-ಅಮ್ಮ ವಿಡಿಯೋ ಮೂಲಕ ಮಗನೊಂದಿಗೆ ಮಾತನಾಡಿದರು. ಇದಾಗುತ್ತಿದ್ದಂತೆ ಪ್ರತಾಪ್ ನಿರೀಕ್ಷೆ ಹೆಚ್ಚಾಗಿದ್ದು, ಅಪ್ಪ, ಅವ್ವ ಅಂತ ಹುಡುಕಾಡಿದರು. ನಂತರ ಮುಖ್ಯದ್ವಾರದಿಂದ ಬಿಗ್‌ಬಾಸ್‌ ಮನೆಗೆ ಬಂದ ಪೋಷಕರನ್ನು ನೋಡುತ್ತಿದ್ದಂತೆ ಪ್ರತಾಪ್ ದುಃಖದ ಕಟ್ಟೆಯೊಡೆಯಿತು. ಮೂರು ವರ್ಷಗಳ ಬಳಿಕ ಅಪ್ಪ-ಅಮ್ಮನನ್ನು ನೋಡಿದ ಪ್ರತಾಪ್‌, ಬಿಗ್‌ಬಾಸ್‌ ಆದೇಶಕ್ಕೂ ಕಾಯದೇ ಪೋಷಕರು ಅಪ್ಪಿಕೊಂಡು ಮುದ್ದಾಡಿ, ಕಣ್ಣೀರಿಟ್ಟರು. ಪ್ರತಾಪ್ ತಂದೆ-ತಾಯಿಗೂ ಅಳು ತಡೆಯಲಾಗದೇ ಕಣ್ಣೀರು ಸುರಿಸುತ್ತಲೇ ಮಗನಿಗೆ ಅಳಬೇಡ ಅಂತ ಸಮಾಧಾನ ಮಾಡಿದರು. ಮನೆಯ ಸದಸ್ಯರೆಲ್ಲರೂ ಕೂಡ ಪ್ರತಾಪ್ ಪೋಷಕರನ್ನು ಪ್ರೀತಿಯಿಂದ ಮಾತನಾಡಿಸಿದರು. ಪ್ರತಾಪ್ ತಂದೆ ಬೆಳಿಗ್ಗೆಯಿಂದ ಹಸಿದುಕೊಂಡಿದ್ದ ಮಗನಿಗೆ ತಾವೇ ಹಣ್ಣುಗಳ್ನು ತಿನ್ನಿಸಿದರು. 

ನಂತರ ಅಪ್ಪ-ಅಮ್ಮನನ್ನು ಪ್ರತ್ಯೇಕವಾಗಿ ಗಾರ್ಡನ್ ಏರಿಯಾದಲ್ಲಿ ಕೂರಿಸಿಕೊಂಡ ಪ್ರತಾಪ್, ಊರಿನ ಸಮಾಚಾರ, ತಂಗಿಯ ಬಗ್ಗೆ ಕೇಳಿ ತಿಳಿದುಕೊಂಡರು. ಜೊತೆಗೆ ಅಪ್ಪನಿಗೆ ಸಾಲ ಮಾಡಿದ್ದೀಯಾ? ಎಷ್ಟು ಸಾಲ ಮಾಡಿದ್ದೀಯಾ? ಹಣಕ್ಕೆ ಏನು ಮಾಡುತ್ತಿದ್ದೀಯಾ? ಅಂತೆಲ್ಲಾ ವಿಚಾರಿಸಿದರು. ಅದಕ್ಕೆ ಅವರ ತಂದೆ, ನಾನು ದುಡಿತಾ ಇದ್ದೀನಿ, ರೇಷ್ಮೆ ಬೆಳೀತಾ ಇದ್ದೀನಿ. ನಿಮ್ಮನ್ನೆಲ್ಲಾ ಸಾಕಿ, ಓದಿಸಿಲ್ಲವಾ? ಹಣಕ್ಕೆ ಏನೂ ಸಮಸ್ಯೆಯಿಲ್ಲ. ನಾನು ದುಡಿಯುತ್ತಿದ್ದೇನೆ. ನೀನು ತಲೆ ಕೆಡಿಸಿಕೊಳ್ಳಬೇಡ ಎಂದರು. ಪ್ರತಾಪ್ ಅಪ್ಪನ ಮತು ಕೇಳಿ ಅತ್ತರು. ಮಗನನ್ನು ಸಮಾಧಾನಪಡಿಸಿದ ಅಪ್ಪ, ಊರಿಗೆ ಬಾ, ಯಾರು ಏನೂ ಅನ್ನುವುದಿಲ್ಲ. ಯಾರು ಏನೇ ಹೇಳಿದ್ರೆ ಏನು? ಅದು ನಮ್ಮ ಮನೆ, ಯಾರು ನಿನ್ನೊಂದಿಗೆ ಇಲ್ಲವೆಂದರೂ ನಾವು ಇರ್ತೀವಿ. ಮನೆಗೆ ಬಾ ಅಂತ ಹೇಳಿದರು. 

ಪ್ರತಾಪ್ ತಾಯಿ, ಅಳಬೇಡ. ನೀವು ಯಾಕೆ ಸಪ್ಪಗೆ ಇರುತ್ತೀಯಾ? ಎಲ್ಲರ ಜೊತೆ ಮಾತನಾಡಿಕೊಂಡು ಖುಷಿಯಿಂದ ಇರು ಎಂದರು. ಪ್ರತಾಪ್ ತಂಗಿಯ ಬಗ್ಗೆ ಕೇಳುತ್ತಲೇ ಇದ್ದರು. ಆಗ ಅವರ ತಂದೆ, ಪುಟ್ಟಿಗೆ ಕೆಲಸವಿತ್ತು, ಅದಕ್ಕೆ ಅವಳು ಬರುವುದಕ್ಕೆ ಸಾಧ್ಯವಾಗಲಿಲ್ಲ. ಅವಳು ಮನೆಯಿಂದಲೇ ಕೆಲಸ ಮಾಡುತ್ತಿದ್ದಾಳೆ. ಚೆನ್ನಾಗಿ ದುಡಿದು ನನ್ನನ್ನು ಮತ್ತು ಅಮ್ಮನನ್ನು ನೋಡಿಕೊಳ್ಳುತ್ತಿದ್ದಾಳೆ ಎಂದರು. ಇದನ್ನು ಕೇಳಿ ಮತ್ತೆ ಭಾವುಕರಾದ ಪ್ರತಾಪ್, ನಾನು ಮನೆಗೆ ಬರುತ್ತೇನೆ. ತಂಗಿಯನ್ನು ನಾನೇ ಮದುವೆ ಮಾಡ್ತೀನಿ ಎಂದರು. 

ನಂತರ ಮನೆಯ ಸದಸ್ಯರೊಂದಿಗೆ ಕೂತು ಎಲ್ಲರನ್ನು ಮುಗ್ಧತೆ ಹಾಗೂ ಬಲು ಪ್ರೀತಿಯಿಂದ ಮಾತನಾಡಿಸಿದ ಪ್ರತಾಪ್ ತಂದೆ, ನಾನು ಓದಿಲ್ಲ. ನನಗೆ ಸಹಿ ಹಾಕಲು ಅಷ್ಟೇ ಬರುತ್ತೆ ಎಂದರು. ಜೊತೆಗೆ ಮಾತು ಮಾತಿನಲ್ಲಿ ತಾವು ಜೀವನದಲ್ಲಿ ಪಟ್ಟ ಕಷ್ಟಗಳನ್ನು ಹಂಚಿಕೊಂಡರು. ಮನೆ ಕಟ್ಟಲು ಮಾಡಿರುವ ಹತ್ತು ಲಕ್ಷ ಸಾಲ, ತಮ್ಮ ಮಗಳು ದುಡಿದು ಮಾಡುತ್ತಿರುವ ಸಹಾಯ, ಅವಮಾನ ಎಲ್ಲವನ್ನು ಹೇಳುತ್ತಾ ಕಣ್ಣೀರಾದರು. ಆಗ ಉಳಿದ ಸ್ಪರ್ಧಿಗಳು ಧೈರ್ಯ ತುಂಬಿಮ ಮಗನಿದ್ದಾನೆ ಸುಮ್ಮನಿರಿ ಅಂದರು. ನಂತರ ತಾವು ತಂದಿದ್ದ ಮುದ್ದೆ ಹಾಗೂ ಉಪ್ಪು ಸಾರನ್ನು ಬಾಳೆ ಎಲೆಯಲ್ಲಿ ಎಲ್ಲರಿಗೂ ಅವರೇ ಬಡಿಸಿ, ಊಟ ಮಾಡಿಸಿದರು.