ನಟನೆಗೆ ಗುಡ್‌ ಬೈ ಹೇಳಿ ಫಾರಿನ್‌ನಲ್ಲಿ ನೆಲೆಸಿರುವ ಸ್ಯಾಂಡಲ್‌ವುಡ್ ನಟಿಯರಿವರು!

ಕನ್ನಡ, ತೆಲುಗು, ತಮಿಳು, ಮಲಯಾಳಂ, ಹಿಂದಿ, ಭೋಜಪುರಿ, ಬೆಂಗಾಳಿ ಭಾಷೆಗಳಲ್ಲಿ ಸುಮಾರು 100ಕ್ಕೂ ಹೆಚ್ಚು ಚಿತ್ರಗಳಲ್ಲಿ ನಟಿಸಿರುವ ರಂಭಾ, ಸರ್ವರ್ ಸೋಮಣ್ಣ ಸಿನಿಮಾ ಮೂಲಕ ಕನ್ನಡ ಚಿತ್ರರಂಗ ಪ್ರವೇಶಿಸಿದರು. ಆನಂತರ ಓ ಪ್ರೇಮವೇ, ಭಾವ ಭಾಮೈದ, ಸಾಹುಕಾರ, ಪಾಂಡುರಂಗ ವಿಠ್ಠಲ, ಗಂಡುಗಲಿ ಕುಮಾರರಾಮ ಮುಂತಾದ ಚಿತ್ರಗಳಲ್ಲಿ ಅಭಿನಯಿಸಿ ಕನ್ನಡಿಗರ ಮನಗೆದ್ದಿದ್ದರು. 2010ರಲ್ಲಿ ಟೊರೊಂಟೊದಲ್ಲಿ ನೆಲೆಸಿದ ಭಾರತೀಯ ಉದ್ಯಮಿ ಇಂದ್ರಕುಮಾರ್ ಅವರನ್ನು ವರಿಸಿದ ರಂಭಾ, ಮದುವೆ ಬಳಿಕ ಪತಿಯೊಂದಿಗೆ ಕೆನಡಾದಲ್ಲಿ ಸೆಟಲ್ ಆದರು. 

ಬಾಲನಟಿಯಾಗಿ ಸಿನಿಮಾರಂಗ ಪ್ರವೇಶಿಸಿದ ಸಿಂಧು ಮೆನನ್, 'ಪ್ರೇಮ ಪ್ರೇಮ ಪ್ರೇಮ' ಚಿತ್ರದಿಂದ ನಾಯಕಿಯಾದರು. ಆನಂತರ ಕಿಚ್ಚ ಸುದೀಪ್ ಅಭಿನಯದ `ನಂದಿ' ಮತ್ತು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ `ಧರ್ಮ' ಚಿತ್ರದ ಮೂಲಕ ಜನಪ್ರಿಯರಾದರು. ಏತನ್ಮಧ್ಯೆ ಪರಭಾಷಾ ಚಿತ್ರಗಳಲ್ಲಿಯೂ ನಟಿಸಿ ಸೈ ಎನಸಿಕೊಂಡರು. ಸ್ವಲ್ಪಕಾಲ ಕಿರುತೆರೆಯ ಕಾರ್ಯಕ್ರಮಗಳಲ್ಲಿ ನಿರೂಪಕಿಯಾಗಿ ಕಾಣಿಸಿಕೊಂಡ ಸಿಂಧು ಕೆಲ ಧಾರಾವಾಹಿಗಳಲ್ಲಿಯೂ ಅಭಿನಯಿಸಿದ್ದಾರೆ. 2010ರಲ್ಲಿ ಯುಕೆ ಮೂಲದ ಪ್ರಭು ಅವರನ್ನು ಕೈಹಿಡಿದ ಸಿಂಧು, ನಟನೆಗೆ ಗುಡ್‌ಬೈ ಹೇಳಿದರು. 

2011ರಲ್ಲಿ ತಮಿಳು ಚಿತ್ರದ ಮೂಲಕ ಸಿನಿಪಯಣ ಆರಂಭಿಸಿದ ನಟಿ ದೀಪಿಕಾ ಕಾಮಯ್ಯ, ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ 'ಚಿಂಗಾರಿ' ಸಿನಿಮಾದಿಂದ ಬಿಗ್ ಬ್ರೇಕ್ ಪಡೆದರು. ನಂತರ ಗಣೇಶ್‌ರ ಅಟೋರಾಜ ಚಿತ್ರದಲ್ಲಿ ನಟಿಸಿದ ಇವರು, ಹಿಂದಿಯಲ್ಲಿ ಶಾಹೀದ್ ಕಪೂರ್ ನಟನೆಯ`ಪಟಾ ಪೋಸ್ಟರ್ ನಿಕಲಾ ಹಿರೋ' ಚಿತ್ರದಲ್ಲಿ ಕೂಡ ಬಣ್ಣಹಚ್ಚಿದ್ದರು. ಬಿಗ್‌ಬಾಸ್ ಸೀಸನ್ 2ರಲ್ಲಿ ಕಾಣಿಸಿಕೊಂಡಿದ್ದರು. 2017ರಲ್ಲಿ ಆಸ್ಟ್ರೇಲಿಯಾದ ಬ್ಯಾಂಕಿಂಗ್ ಸಂಸ್ಥೆಯಲ್ಲಿ ಕೆಲಸ ಮಾಡ್ತಿದ್ದ ಸುಮಂತ್ ಗೋಪಿ ಜೊತೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟರು. ಮದುವೆ ಬಳಿಕ ನಟನೆಗೆ ಗುಡ್‌ಬೈ ಹೇಳಿದ ದೀಪಿಕಾ, ಆಸ್ಟ್ರೇಲಿಯಾದಲ್ಲಿ ನೆಲಸಿದ್ದಾರೆ. 

ಕನ್ನಡ ,ತೆಲುಗು,ಮಲಯಾಳಂ ಮತ್ತು ತಮಿಳು ಸಿನಿಮಾರಂಗಗಳಲ್ಲಿ 40ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ಮಾನ್ಯ ನಾಯ್ಡು, ತಾವು ನಟಿಸಿದ ನಾಲ್ಕು ಭಾಷೆಗಳಲ್ಲಿಯೂ ಫಿಲ್ಮ್ ಫೇರ್ ಅವಾರ್ಡ್ ಪಡೆದಿದ್ದರು. ಕನ್ನಡದಲ್ಲಿ ದರ್ಶನ್ ನಟನೆಯ ಶಾಸ್ತ್ರಿ ಹಾಗೂ ವಿಷ್ಣುವರ್ಧನ್ ಅವರ ವರ್ಷ ಸೇರಿದಂತೆ ಕೆಲ ಚಿತ್ರಗಳಲ್ಲಿ ನಟಿಸಿದ್ದಾರೆ.  2013ರಲ್ಲಿ ವಿಕಾಸ್ ಬಾಜ್‌ಪೈ ಅವರನ್ನು ಕೈಹಿಡಿದ ಮಾನ್ಯ, ಸಿನಿಮಾದಿಂದ ದೂರವಾಗಿ ಪತಿಯೊಂದಿಗೆ ಅಮೆರಿಕಾದಲ್ಲಿ ನೆಲೆಸಿದರು. ಸದ್ಯ ಅಮೆರಿಕದಲ್ಲಿ ಬ್ಯಾಂಕ್ ಉದ್ಯೋಗಿ ಆಗಿರುವ ಮಾನ್ಯಾಗೆ  ಒಮಿಷ್ಕಾ ಎಂಬ ಮಗಳಿದ್ದಾಳೆ. 

80ರ ದಶಕದಲ್ಲಿ ಟಾಪ್ ನಟಿಯಾಗಿ ಇಂಡಿಯಲ್ ಫಿಲ್ಮ ಇಂಡಸ್ಟ್ರಿ ಆಳಿದ್ದ ನಟಿ ಮಾಧವಿ, 1981ರಲ್ಲಿ ತೆರೆಕಂಡ ರಜನಿಕಾಂತ್ ಅಭಿನಯದ `ಘರ್ಜನೆ' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟರು. ಆನಂತರ ವರನಟ ಡಾ. ರಾಜ್‌ಕುಮಾರ್ ಜೊತೆ ನಂತರ ಹಾಲು ಜೇನು, ಅನುರಾಗ ಅರಳಿತು, ಜೀವನ ಚೈತ್ರ, ಆಕಸ್ಮಿಕ, ಒಡಹುಟ್ಟಿದವರು, ಚಾಣಕ್ಯ, ಗೆದ್ದಮಗ ಮುಂತಾದ ಚಿತ್ರಗಳಲ್ಲಿ ನಟಿಸಿ ಕನ್ನಡ ಸಿನಿಪ್ರೇಮಿಗಳ ಮನಸ್ಸು ಗೆದ್ದರು. ಸುಮಾರು ಎರಡು ದಶಕಗಳ ಸಿನಿಜೀವನದಲ್ಲಿ ಸುಮಾರು ಮುನ್ನೂರಕ್ಕು ಹೆಚ್ಚು ಚಿತ್ರಗಳಲ್ಲಿ ನಟಿಸಿದ್ದ ಈ ನಟಿ, 1996ರಲ್ಲಿ ತಮ್ಮ ಆಧ್ಯಾತ್ಮಿಕ ಗುರುಗಳಾದ ಸ್ವಾಮಿ ರಾಮ್‌ರ ಸಂಪರ್ಕದಿಂದ ಅವರ ಅಮೆರಿಕನ್ ಶಿಷ್ಯರಾದ ರಾಲ್ಫ್ ಶರ್ಮಾರನ್ನು ಮದುವೆಯಾದರು. ರಾಲ್ಫ್ ಅಮೇರಿಕಾದಲ್ಲಿ ಫಾರ್ಮಾಸಿಟಿಕಲ್ ಉದ್ಯಮದಲ್ಲಿದ್ದಾರೆ. ಪ್ರಸ್ತುತ ಅಮೇರಿಕಾದ ನ್ಯೂಜಸಿ೯ಯಲ್ಲಿ ನೆಲೆಸಿರುವ ಮಾಧವಿಗೆ ಮೂರು ಪುತ್ರಿಯರಿದ್ದಾರೆ. ಡಾ.ರಾಜ್ ಮತ್ತು ವಿಷ್ಣುವರ್ಧನ್ ಜೊತೆ ತಲಾ  7 ಚಿತ್ರಗಳಲ್ಲಿ ನಾಯಕಿಯಾಗಿ ನಟಿಸಿದ್ದಾರೆ.