ಗೀತಾ ಟು ಮುಂಗಾರುಮಳೆ: ಕನ್ನಡದ ಟಾಪ್ 5 ಕ್ಲಾಸಿಕ್ ಲವ್ ಸ್ಟೋರಿ ಸಿನಿಮಾಗಳಿವು!

ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಪೂಜಾ ಗಾಂಧಿ ನಟನೆಯ 'ಮುಂಗಾರು ಮಳೆ' ಕನ್ನಡದ ಕ್ಲಾಸಿಕ್ ಲವ್ ಸ್ಟೋರಿ ಸಿನಿಮಾಗಳ್ಲೊಂದು. ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದ್ದ ಈ ಚಿತ್ರದಲ್ಲಿ ಲವ್‌ಸ್ಟೋರಿ, ಎಮೋಷನ್, ಗಣೇಶ್ ಡೈಲಾಗ್ ಡೆಲವರಿಯಂತೂ ಸಿಕ್ಕಾಪಟ್ಟೆ ಗಮನ ಸೆಳೆದಿತ್ತು. ಚಿತ್ರದಲ್ಲಿನ ಲವ್‌ಸ್ಟೋರಿ ಪ್ರೇಕ್ಷಕರನ್ನು ಎರಡ್ಮೂರು ಥಿಯೇಟರ್‌ಗೆ ಬರುವಂತೆ ಮಾಡಿತ್ತು. ಸಿನಿಮಾದಲ್ಲಿನ ಪ್ರತಿಯೊಂದು ಡೈಲಾಗ್‌ಗಳು ಸೂಪರ್ ಹಿಟ್ ಆಗಿದ್ದವು. ಆನಂತರ ಬೇರೆ-ಬೇರೆ ಭಾಷೆಗಳಿಗೆ ರಿಮೇಕ್ ಆಗಿದ್ದ ಮುಂಗಾರುಮಳೆ ಚಿತ್ರ ಅಲ್ಲಿ ಗೆಲುವು ಕಾಣಲಿಲಲ್ಲ. ಆದರೆ, ಕನ್ನಡದಲ್ಲಿ ಇಂದಿಗೂ ಎವರ್‌ಗ್ರೀನ್ ಲವ್‌ಸ್ಟೋರಿ ಸಿನಿಮಾವಾಗಿದೆ.

1987ರಲ್ಲಿ ಬಿಡುಗಡೆಯಾಗಿದ್ದ ರವಿಚಂದ್ರನ್ ಹಾಗೂ ಜೂಹಿ ಚಾವ್ಲಾ ಅಭಿನಯದ 'ಪ್ರೇಮಲೋಕ' ಸಿನಿಮಾವನ್ನು ಕನ್ನಡ ಸಿನಿರಸಿಕರು ಮರೆಯಲು ಸಾಧ್ಯವೇ ಇಲ್ಲ. ಕ್ರೇಜಿ ಸ್ಟಾರ್ ಈ ಚಿತ್ರವನ್ನು ಕಟ್ಟಿಕೊಟ್ಟ ರೀತಿಯೇ ಭಿನ್ನವಾಗಿತ್ತು. ಹಂಸಲೇಖ ಸಂಗೀತ ಸಂಯೋಜಿಸಿದ್ದ ಈ ಚಿತ್ರದಲ್ಲಿ ಬರೋಬ್ಬರಿ 10 ಹಾಡುಗಳಿದ್ದು, ಎಲ್ಲವೂ ಸೂಪರ್ ಹಿಟ್ ಆಗಿದ್ದವು. ಇದಾದ ಬಳಿಕ ರವಿಚಂದ್ರನ್ ಹಲವು ಹಿಟ್ ಸಿನಿಮಾಗಳನ್ನು ಕೊಟ್ಟಿದ್ದಾರೆ. ಆದರೂ 'ಪ್ರೇಮಲೋಕ' ಮೀರಿಸುವ ಸಿನಿಮಾ ಮಾಡಲು ಅವರಿಂದಲೂ ಸಾಧ್ಯವಾಗಲಿಲ್ಲ. ಆರಂಭದಲ್ಲಿ ದಿನದಲ್ಲಿ ಹೆಚ್ಚು ಸದ್ದು ಮಾಡದ ಈ ಚಿತ್ರ, ಆನಂತರದಲ್ಲಿ ಮೌತ್ ಪಬ್ಲಿಸಿಟಿಯಿಂದಲೇ ಎಲ್ಲರನ್ನು ಚಿತ್ರಮಂದಿರಗಳತ್ತ ಕರೆಸಿತ್ತು. ಈ ಚಿತ್ರಕ್ಕೆ ಕಾಲೇಜು ವಿದ್ಯಾರ್ಥಿಗಳು ಹಾಗೂ ಯುವಕರು ಫಿದಾ ಆಗಿದ್ದರು.

ಕಾಮಿಡಿ, ಲವ್, ಸೆಂಟಿಮೆಂಟ್ ಎಲ್ಲವನ್ನೂ ಒಳಗೊಂಡಿದ್ದ ರೊಮ್ಯಾಂಟಿಕ್ ಟ್ರ್ಯಾಜಿಡಿ ಸಿನಿಮಾ 'ಬಂಧನ'ವನ್ನು ಕನ್ನಡ ಸಿನಿರಸಿಕರು ಮರೆಯಲು ಸಾಧ್ಯವೇ ಇಲ್ಲ. ಈ ಸಿನಿಮಾದಲ್ಲಿ ವಿಷ್ಣು ಹಾಗೂ ಸುಹಾಸಿನಿ ಕಾಂಬಿನೇಷನ್ ಜನರ ಮನಸೋಲುವಂತೆ ಮಾಡಿ ಹೊಸ ಮೈಲಿಗಲ್ಲನ್ನು ಸೃಷ್ಟಿಸಿತ್ತು. ರಾಜೇಂದ್ರ ಸಿಂಗ್ ಬಾಬು ನಿರ್ದೇಶಿಸಿದ 'ಬಂಧನ' ಕನ್ನಡಿಗರ ಪಾಲಿಗೆ ಎವರ್‌ಗ್ರೀನ್ ಸಿನಿಮಾ. ಈ ಚಿತ್ರದ ಮೈನ್ ಅಟ್ರ್ಯಾಕ್ಷನ್ ಮಧುರವಾದ ಹಾಡುಗಳು. ಬಂಧನದ ಹಾಡುಗಳು ಇಂದಿಗೂ ಕೂಡ ಎವರ್ ಗ್ರೀನ್. ಚಿತ್ರದಲ್ಲಿ ವಿಷ್ಣು ದಾದಾ ' ಡಾ.ಹರೀಶ್' ಪಾತ್ರದಲ್ಲಿ ಅದ್ಭುತವಾಗಿ ನಟಿಸಿದ್ದರು. ತನ್ನ ಕಾರಣದಿಂದಲೇ ಬೇರೆಯಾದ ನಂದಿನಿ-ಬಾಲು ಅವರನ್ನು ಒಟ್ಟುಗೂಡಿಸುವ ಕರುಣಾಮಯನಾಗಿ, ಚಿತ್ರದ ಕೊನೆಗೆ ಟ್ರ್ಯಾಜಿಡಿ ನಾಯಕನಾಗಿ ಹಲವು ತರದ ಅಭಿನಯಗಳನ್ನು ಏಕಕಾಲಕ್ಕೆ ನೀಡಿದ್ದರು. 

'ಪಲ್ಲವಿ ಅನುಪಲ್ಲವಿ' ಕನ್ನಡ ಚಿತ್ರರಂಗದ ಬೆಸ್ಟ್‌ ಸಿನಿಮಾಗಳಲ್ಲಿ ಒಂದು. ಲೆಜೆಂಡರಿ ನಿರ್ದೇಶಕ ಮಣಿರತ್ನಂ ನಿರ್ದೇಶಿಸಿದ ಮೊದಲ ಸಿನಿಮಾವಿದು. ಜೊತೆಗೆ ಬಾಲಿವುಡ್‌ ನಟ ಅನಿಲ್ ಕಪೂರ್ ನಟಿಸಿದ ಮೊದಲ ಕನ್ನಡ ಹಾಗೂ ಏಕೈಕ ಕನ್ನಡ ಸಿನಿಮಾ. 1983ರಲ್ಲಿ ತೆರೆಕಂಡಿದ್ದ ಈ ಸಿನಿಮಾದ ಕಥೆ ಆಗಿನ ಕಾಲಕ್ಕೆ ಫಾರ್ವರ್ಡ್ ಅಂತ ಅನಿಸಿತ್ತು.  ಚಿತ್ರದಲ್ಲಿ ಅನಿಲ್ ಕಪೂರ್‌ಗೆ ನಾಯಕಿಯಾಗಿ ಲಕ್ಷ್ಮಿ ಕಾಣಿಸಿಕೊಂಡಿದ್ದು, ಸಿನಿಮಾದ ನಗುವ ನಯನ ಮಧುರ ಮೌನ ಗೀತೆ ಇಂದಿಗೂ ಪ್ರಸಿದ್ಧವಾಗಿದೆ.

ಕನ್ನಡ ಚಿತ್ರರಂಗದ ದಂತಕಥೆ ಶಂಕರ್ ನಾಗ್ ಅಭಿನಯದ 'ಗೀತಾ' ಕೂಡ ಕನ್ನಡದ ಕ್ಲಾಸಿಕ್ ಲವ್ ಸ್ಟೋರಿ ಸಿನಿಮಾಗಳ್ಲೊಂದು. ರಾಕ್ ಬ್ಯಾಂಡ್ ಗಾಯಕ ಸಂಜು ಮತ್ತು ಗೀತಾಳ ಪ್ರೇಮಕಥೆಯನ್ನು ಹೊಂದಿದ್ದ ಈ ಸಿನಿಮಾ ಎಲ್ಲರ ಮನಗೆದ್ದಿತ್ತು. ತಾನು ಪ್ರೀತಿಸುವ ಗೀತಾಳನ್ನು ಮಾರಣಾಂತಿಕ ಕ್ಯಾನ್ಸರ್‌ನಿಂದ ಪಾರುಮಾಡುಲು ಪ್ರಯತ್ನಿಸಿ, ಕೊನೆಯ ಕ್ಷಣದಲ್ಲಿ ವಿಫಲವಾಗುವ  ಸಂಜುವಿನ ಪರಿಸ್ಥಿತಿ ಪ್ರೇಕ್ಷಕರಲ್ಲಿ ಕಣ್ಣೀರು ತರಿಸಿತ್ತು. ಈ  ಚಿತ್ರದ 'ಜೊತೆಯಲಿ ಜೊತೆಯಲಿ' ಹಾಡು ಸಾಕಷ್ಟು ಜನಪ್ರಿಯ. ಇಳಯರಾಜ ಸಂಗೀತ, ಚಿ.ಉದಯಶಂಕರ್ ರಚನೆ ಹಾಗೂ ಎಸ್ಪಿಬಿ ಹಾಗೂ ಎಸ್.ಜಾನಕಿ ಕಂಠ ಮಾಧುರ್ಯ ಇಂದಿಗೂ ಪುಳಕಗೊಳಿಸುತ್ತದೆ.