ಮೆಜಿಸ್ಟಿಕ್ ಟು ಹುಬ್ಬಳ್ಳಿ: ಊರಿನ ಹೆಸರುಗಳಲ್ಲಿ ಬಂದ ಕನ್ನಡ ಸಿನಿಮಾಗಳಿವು!

ದರ್ಶನ್ ಮೊದಲ ಬಾರಿ ಪೂರ್ಣ ಪ್ರಮಾಣದ ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ ಮೆಜೆಸ್ಟಿಕ್. ಮೆಜೆಸ್ಟಿಕ್ ಬೆಂಗಳೂರಿನ ಹೃದಯ ಭಾಗ. ಇದೇ ಹೆಸರಿನಲ್ಲಿ ಬಂದ ಈ ಚಿತ್ರ ಬಾಕ್ಸಾಫೀಸ್​​ನಲ್ಲಿ ಉತ್ತಮ ಗಳಿಕೆ ಕಂಡಿತ್ತು. ಮೆಜೆಸ್ಟಿಕ್ ಸಿನಿಮಾವನ್ನು 2002ರಲ್ಲಿ ನಿರ್ಮಾಪಕರಾದ ಭಾಮಾ ಹರೀಶ್ ಹಾಗೂ ರಾಮಮೂರ್ತಿ ಸುಮಾರು 30 ಲಕ್ಷ ರೂಪಾಯಿ ವೆಚ್ಚದಲ್ಲಿ ಈ ಸಿನಿಮಾ ನಿರ್ಮಾಣ ಮಾಡಿದ್ದರು. ಪಿ.ಎನ್​. ಸತ್ಯ ನಿರ್ದೇಶನದ ಮೆಜೆಸ್ಟಿಕ್ ಚಿತ್ರ ದರ್ಶನ್ ಸಿನಿಮಾ ಕರಿಯರ್​​​ಗೆ ದೊಡ್ಡ ಬುನಾದಿ ಹಾಕಿ ಕೊಟ್ಟಿತ್ತು.  

2006ರಲ್ಲಿ ತೆರೆಕಂಡ ಓಂ ಪ್ರಕಾಶ್ ರಾವ್ ನಿರ್ದೇಶನದ ಸಿನಿಮಾಗೆ ಸಕ್ಕರೆನಾಡು 'ಮಂಡ್ಯ'ದ ಶೀರ್ಷಿಕೆ ಇಡಲಾಗಿತ್ತು. ಈ ಚಿತ್ರದಲ್ಲಿ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕನಾಗಿ ನಟಿಸಿದ್ದರು. ನಾಯಕಿಯರಾಗಿ ರಕ್ಷಿತಾ ಹಾಗೂ ರಾಧಿಕಾ ಕಾಣಿಸಿಕೊಂಡಿದ್ದರು. ಮಂಡ್ಯ ಕರ್ನಾಟಕದ ಒಂದು ಜಿಲ್ಲೆಯಾಗಿದ್ದು, ಇಲ್ಲಿನ ಅನೇಕ ಕಲಾವಿದರು ಕನ್ನಡ ಚಿತ್ರರಂಗದಲ್ಲಿದ್ದಾರೆ.

ಕಲಾಸಿಪಾಳ್ಯ ಎಂಬುದು ಬೆಂಗಳೂರಿನ ಹಳೆಯ ಹಾಗೂ ಜನಪ್ರಿಯ ಏರಿಯಾವಾಗಿದೆ.  2004ರಲ್ಲಿ ಇದೇ ಹೆಸರಿನಲ್ಲಿ ಬಂದ ಸಿನಿಮಾ ರಕ್ಷಿತಾ ಮತ್ತು ಚಾಲೆಂಜಿಂಗ್ ಸ್ಟಾರ್ ದರ್ಶನ್‌ಗೆ ದೊಡ್ಡ ಇಮೇಜ್ ತಂದುಕೊಟ್ಟಿತ್ತು. ಓಂ ಪ್ರಕಾಶ್ ರಾವ್ ನಿರ್ದೇಶನದ ಕಲಾಸಿಪಾಳ್ಯ ಚಿತ್ರವನ್ನು ನಿರ್ಮಾಪಕ ರಾಮು 3 ಕೋಟಿ ಬಜೆಟ್​​​​ನಲ್ಲಿ ನಿರ್ಮಾಣ ಮಾಡಿದ್ದರು. ಈ ಚಿತ್ರ ಗಲ್ಲಾಪೆಟ್ಟಿಗೆಯಲ್ಲಿ ಗಳಿಸಿದ್ದು 7 ಕೋಟಿ ರೂಪಾಯಿ. ಅಂದಿನಿಂದ ಚಾಲೆಂಜಿಂಗ್ ಹೀರೋ ಆಗಿದ್ದ ದರ್ಶನ್ ಚಾಲೆಂಜಿಂಗ್ ಸ್ಟಾರ್ ಆದರು. ಈ ಸಮಯದಲ್ಲಿ ದರ್ಶನ್ ಮತ್ತು ರಕ್ಷಿತಾ ಜೋಡಿ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದ ಹಾಡುಗಳು ಕೂಡ ಸೂಪರ್ ಹಿಟ್‌ ಆಗಿದ್ದವು.  

2006ರಲ್ಲಿ ತೆರೆಕಂಡ ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಅಭಿನಯದ ಸಿನಿಮಾಗೆ ಚೋಟಾ ಮುಂಬೈ ಅಂತಲೇ ಕರೆಯಲ್ಪಡುವ 'ಹುಬ್ಬಳ್ಳಿ' ಹೆಸರನ್ನು ಇಡಲಾಗಿತ್ತು. ಓಂ ಪ್ರಕಾಶ್ ರಾವ್ ನಿರ್ದೇಶನದಲ್ಲಿ ಮೂಡಿಬಂದ `ಹುಬ್ಬಳ್ಳಿ' ಚಿತ್ರದಲ್ಲಿ ಸುದೀಪ್ 'ಎಸಿಪಿ ಅಜಯ್ ಕುಮಾರ್ ಸರನಾಯಕ್' ಪಾತ್ರದಲ್ಲಿ ನಟಿಸಿದ್ದರು. ರಕ್ಷಿತಾ ನಾಯಕಿಯಾಗಿ ನಟಿಸಿದ್ದರು.

2014ರಲ್ಲಿ ತೆರೆಕಂಡ ದುನಿಯಾ ವಿಜಯದ ಹಾಗೂ ಪಾರುಲ್ ಯಾದವ್ ನಟನೆಯ ಸಿನಿಮಾಗೆ 'ಶಿವಾಜಿನಗರ' ಅಂತ ಹೆಸರಿಡಲಾಗಿತ್ತು. ಶಿವಾಜಿನಗರ ಬೆಂಗಳೂರಿನ ಸಾವಿರಾರು ಜನರಿಗೆ ನೆಲೆಕೊಟ್ಟ ಜಾಗ ಹಾಗೂ ನೂರಾರು ವಹಿವಾಟು ನಡೆಯುವ ಸ್ಥಳ. ಮೆಜಿಸ್ಟಿಕ್ ಸಿನಿಮಾ ಮಾಡಿ ಗೆದ್ದಿದ್ದ ನಿರ್ದೇಶಕ ಪಿ ಸತ್ಯ ಈ ಆಕ್ಷನ್ ಸಿನಿಮಾಗೆ ಶಿವಾಜಿನಗರ ಅಂತ ಹೆಸರಿಟ್ಟಿದ್ದರು.