ನರ್ತನ್ ಟು ಶ್ರೀನಿಧಿ ಬೆಂಗಳೂರು: ಸ್ಯಾಂಡಲ್‌ವುಡ್‌ನ ಭರವಸೆಯ ಯುವ ನಿರ್ದೇಶಕರಿವರು!

ಕನ್ನಡದ ಪ್ರತಿಭಾನ್ವಿತ ಯುವ ನಿರ್ದೇಶಕರ ಪೈಕಿ ಕಿರಣ್ ರಾಜ್ ಕೆ ಕೂಡ ಒಬ್ಬರು. 2019ರಲ್ಲಿ ಬಿಡುಗಡೆಯಾದ ಕಥಾಸಂಗಮ ಸಿನಿಮಾದ ಏಳು ಕಥೆಗಳಲ್ಲಿ ಒಂದು ಕಥೆಯನ್ನು ನಿರ್ದೇಶಿಸುವ ಮೂಲಕ ಕನ್ನಡ ಚಿತ್ರರಂಗಕ್ಕೆ ಕಾಲಿಟ್ಟ ಇವರು, ರಕ್ಷಿತ್ ಶೆಟ್ಟಿ ಅವರ 777 ಚಾರ್ಲಿ ಮೂಲಕ ಸ್ವತಂತ್ರ ನಿರ್ದೇಶಕರಾದರು. 2022ರಲ್ಲಿ ಪ್ಯಾನ್ ಇಂಡಿಯಾ ಮಟ್ಟದಲ್ಲಿ ಬಿಡುಗಡೆಯಾಗಿದ್ದ ಈ ಸಿನಿಮಾ ಬ್ಲಾಕ್‌ಬಸ್ಟರ್ ಆಗಿತ್ತು. ಮುಂದಿನ ದಿನಗಳಲ್ಲಿ ಅವರಿಗೆ ಬಿಗ್‌ ಸ್ಟಾರ್‌ಗಳ ಜೊತೆಗೆ ಕೆಲಸ ಮಾಡುವ ಅವಕಾಶ ಸಿಕ್ಕರೆ ಸೂಪರ್ ಹಿಟ್ ಸಿನಿಮಾ ಕೊಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.

2024ರಲ್ಲಿ ಬಿಡುಗಡೆಯಾದ ವಿಭಿನ್ನ ಲವ್ ಸ್ಟೋರಿ ಹೊಂದಿದ್ದ ಸಿನಿಮಾ 'ಇಬ್ಬನಿ ತಬ್ಬಿದ ಇಳೆಯಲಿ'. ನವೀನರಾದ ಪ್ರೇಮಕಥೆ ಹೊಂದಿದ್ದ ಈ ಚಿತ್ರದ ನಿರ್ದೇಶಕ ಚಂದ್ರಜಿತ್ ಬೆಳ್ಳಿಯಪ್ಪ. ಇದಕ್ಕೂ ಮುನ್ನ ಕಿರಿಕ್ ಪಾರ್ಟಿ, ಅವನೇ ಶ್ರೀಮನ್ನಾರಾಯಣ ಬರಹಗಾರನಾಗಿ ಕೆಲಸ ಮಾಡಿದ್ದ ಇವರು, ಕಥಾ ಸಂಗಮ ಸಿನಿಮಾದ ಒಂದು ಚಿಕ್ಕ ಕಥೆ ಬರೆದಿದ್ದರು. 'ಇಬ್ಬನಿ ತಬ್ಬಿದ ಇಳೆಯಲಿ' ಮುಖಾಂತರ ಸ್ವತಂತ್ರ ನಿರ್ದೇಶಕರಾದ ಚಂದ್ರಜಿತ್ ಬೆಳ್ಳಿಯಪ್ಪ, ಮೊದಲ ಸಿನಿಮಾದಲ್ಲೇ ಪ್ರೇಕ್ಷಕರ ಮನಗೆದ್ದಿದ್ದರು.

ಒಂದೇ ಸಿನಿಮಾದಲ್ಲಿ ಕನ್ನಡ ಚಿತ್ರರಂಗದಲ್ಲಿ ಭರವಸೆ ಹುಟ್ಟಿಸಿರುವ ಯುವ ನಿರ್ದೇಶಕರಲ್ಲಿ ನರ್ತನ್ ಅವರನ್ನು ಮರೆಯಲು ಸಾಧ್ಯವೇ ಇಲ್ಲ. ಮೊದಲ ಸಿನಿಮಾದಲ್ಲೇ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಹಾಗೂ ರೋರಿಂಗ್ ಸ್ಟಾರ್ ಶ್ರೀಮುರಳಿಗೆ ಆಕ್ಷನ್ ಕಟ್ ಹೇಳುವ ಅವಕಾಶ ಪಡೆದಿದ್ದರು. 2018ರಲ್ಲಿ ಬಿಡುಗಡೆಯಾದ 'ಮಫ್ತಿ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. 2024ರಲ್ಲಿ ಇದರ ಪ್ರಿಕ್ವೆಲ್  'ಭೈರತಿ ರಣಗಲ್' ಬಿಡುಗಡೆಯಾಗಿದ್ದು, ಇದು ಹಿಟ್‌ ಲಿಸ್ಟ್ ಸೇರಿದೆ. ರಾಕಿಂಗ್‌ ಸ್ಟಾರ್ ಅವರೊಂದಿಗೂ ಕೆಲಸ ಮಾಡುವ ಅವಕಾಶ ಇವರಿಗೆ ಸಿಕ್ಕಿತ್ತು. ಮುಂದಿನ ದಿನಗಳಲ್ಲಿ ನರ್ತನ್ ಬ್ಲಾಕ್‌ಬಸ್ಟರ್ ಸಿನಿಮಾ ನೀಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.

2024ರಲ್ಲಿ ಬಿಡುಗಡೆಯಾದ  'ಬ್ಲಿಂಕ್' ಸಿನಿಮಾ ಸಿಕ್ಕಾಪಟ್ಟೆ ಸದ್ದು ಮಾಡಿತ್ತು. ದೀಕ್ಷಿತ್ ಶೆಟ್ಟಿ ಪ್ರಮುಖ ಪಾತ್ರದಲ್ಲಿ ಅಭಿನಯಿಸಿದ್ದ ಈ ಸಿನಿಮಾವನ್ನು ಶ್ರೀನಿಧಿ ಬೆಂಗಳೂರು ನಿರ್ದೇಶನ ಮಾಡಿದ್ದರು. ಒಟಿಟಿಯಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡಿದ್ದ ಈ ಸಿನಿಮಾವನ್ನು ಪರಭಾಷಾ ಪ್ರೇಕ್ಷಕರು ಕೂಡ ಮೆಚ್ಚಿಕೊಂಡಿದ್ದರು. ವಿದೇಶದಲ್ಲೂ ಬಿಡುಗಡೆಯಾಗಿ ಮೆಚ್ಚುಗೆ ಗಳಿಸಿತ್ತು. ಈ ರೀತಿಯ ಸೈನ್ಸ್, ಫಿಕ್ಷನ್ ಸಿನಿಮಾಗಳು ಕನ್ನಡದಲ್ಲಿ ಬರೋದು ಕಡಿಮೆ. ಒಂದು ವೇಳೆ ಬಂದರೂ ಜನರಿಗೆ ತಲುಪುವುದು ತುಂಬಾ ವಿರಳ. ಆದರೆ, ಇದೆರಡು ಕೊರತೆಯನ್ನ ಬ್ಲಿಂಕ್ ಸಿನಿಮಾ ಮೂಲಕ ಶ್ರೀನಿಧಿ ಬೆಂಗಳೂರು ಪೂರೈಸಿದರು. ಚೆಂದನವನದಲ್ಲಿ ಇದೊಂದು ಹೊಸ ಪ್ರಯತ್ನವಾಗಿತ್ತು. ಮುಂದಿನ ದಿನಗಳಲ್ಲಿ ಶ್ರೀನಿಧಿ ಅವರಿಂದ ಇನ್ನಷ್ಟು ವಿಭಿನ್ನ ಸಿನಿಮಾಗಳನ್ನು ನಿರೀಕ್ಷಿಸಬಹುದು.

2023ರಲ್ಲಿ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಅವರ ಪಿಆರ್‌ಕೆ ಬ್ಯಾನರ್‌ನಲ್ಲಿ ನಿರ್ಮಾಣವಾದ  'ಆಚಾರ್ & ಕೋ' ಸಿನಿಪ್ರೇಕ್ಷಕರ ಮನಗೆದ್ದಿತ್ತು. ಈ ಸಿನಿಮಾದ ನಿರ್ದೇಶಿಕಿ ಸಿಂಧು ಶ್ರೀನಿವಾಸಮೂರ್ತಿ. ಹೊಸ ಪ್ರತಿಭೆಗಳೇ ಮಾಡಿರುವ ಈ ಸಿನಿಮಾದಲ್ಲಿ ಅಂದಿನ ಕಾಲಘಟ್ಟವನ್ನು ಸೊಗಸಾಗಿ ತೋರಿಸಲಾಗಿತ್ತು. ಯಾವುದೇ ರಕ್ತಪಾತ, ಐಟಂ ಸಾಂಗ್, ಆಕ್ಷನ್ ಸನ್ನಿವೇಶ, ಬಿಲ್ಡಪ್ ಸೀನ್‌ಗಳು ಆಚಾರ್ & ಕೋ ಚಿತ್ರದಲ್ಲಿ ಇರಲಿಲ್ಲ. ಆ ಮೂಲಕ ಸಿಂಧು ಶ್ರೀನಿವಾಸಮೂರ್ತಿ ತಮ್ಮ ನಿರ್ದೇಶನದ ಶಕ್ತಿಯನ್ನ ತೋರಿಸಿದ್ದರು.

2021ರಲ್ಲಿ ರಿಲೀಸ್ ಆದ ಡಾಲಿ ಧನಂಜಯ್ ನಟನೆಯ 'ಬಡವ ರಾಸ್ಕಲ್' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾದ ನಿರ್ದೇಶಕ ಶಂಕರ್ ಗುರು. ಈ ಸಿನಿಮಾವನ್ನು ಡಾಲಿ ಅವರೇ ನಿರ್ಮಾಣ ಮಾಡಿದ್ದು ಬಾಕ್ಸಾಫೀಸ್‌ನಲ್ಲಿ ಬರೋಬ್ಬರಿ 16 ಕೋಟಿ ರೂ. ಕಲೆಕ್ಷನ್ ಮಾಡಿತ್ತು. ಫ್ರೆಂಡ್‌ಶಿಪ್, ಫ್ಯಾಮಿಲಿ, ಲವ್ ಎಲ್ಲಾ ಎಲಿಮೆಂಟ್ಸ್ ಇದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಸದ್ಯ ಶಂಕರ್ ಗುರು ಅವರು ಡಾಲಿ ಅವರ ಜೊತೆಗೆ 'ಅಣ್ಣ ಫ್ರಮ್ ಮೆಕ್ಸಿಕೋ' ಸಿನಿಮಾ ಮಾಡ್ತಿದ್ದಾರೆ.

2024ರಲ್ಲಿ ಸಿನಿಮಾ ನಿರ್ದೇಶಿಸಿ ಗೆದ್ದ ಡೈರೆಕ್ಟರ್ಸ್‌ಗಳ ಪೈಕಿ ಸಂದೀಪ್ ಸುಂಕದ್  ಕೂಡ ಒಬ್ಬರು. ಇವರು 24ರ ಫೆಬ್ರವರಿ 16ರಂದು ಬಿಡುಗಡೆಯಾಗಿದ್ದ ರಂಗಾಯಣ ರಘು ಮುಖ್ಯ ಪಾತ್ರದಲ್ಲಿ ಅಭಿನಯಿಸಿದ್ದ 'ಶಾಖಾಹಾರಿ' ಸಿನಿಮಾವನ್ನು ನಿರ್ದೇಶನ ಮಾಡಿದ್ದರು. ಶಿವಮೊಗ್ಗದ ತೀರ್ಥಹಳ್ಳಿಯ ಹಳ್ಳಿಯೊಂದರಲ್ಲಿ ನಡೆಯುವ ರೋಚಕ ಕಥೆಯೇ ಶಾಖಾಹಾರಿ. ಥ್ರಿಲ್ಲರ್  ಕಥೆ ಹೊಂದಿದ್ದ ಈ ಸಿನಿಮಾಗೆ ಥಿಯೇಟರ್‌ಗಿಂತ ಒಟಿಟಿಯಲ್ಲಿ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿತ್ತು. ಕಳೆದ ವರ್ಷದ ಒಟಿಟಿ ಹಿಟ್ ಕನ್ನಡ ಸಿನಿಮಾ ಶಾಖಾಹಾರಿ. ಈ ಮೂಲಕ ಸಂದೀಪ್ ಸುಂಕದ್ ತಮ್ಮ ಚೊಚ್ಚಲ ಸಿನಿಮಾದಲ್ಲೇ ಗೆಲುವು ಕಂಡಿದ್ದರು. ಮುಂದಿನ ದಿನಗಳಲ್ಲಿ ಅವರು ಮತ್ತಷ್ಟು ಒಳ್ಳೇ ಸಿನಿಮಾ ನೀಡುವುದರಲ್ಲಿ ಯಾವುದೇ ಅನುಮಾನವಿಲ್ಲ.