ಸಾಕಷ್ಟು ಪರಭಾಷಾ ಸಿನಿಮಾ ಆಫರ್ಸ್ ಬಂದ್ರೂ ಕನ್ನಡದಲ್ಲೇ ಉಳಿದು, ಬೆಳೆದ ನಟರಿವರು!

ವರನಟ ಡಾ. ರಾಜ್‌ಕುಮಾರ್ ಎಂದೂ ಕನ್ನಡ ಸಿನಿಮಾ ಬಿಟ್ಟು ಬೇರೆ ಭಾಷೆಯ ಸಿನಿಮಾಗಳಲ್ಲಿ ನಟಿಸಲೇ ಇಲ್ಲ. ಕೊನೆಯವರೆಗೂ ಪರಭಾಷೆ ಸಿನಿಮಾ ಮಾಡಿಲ್ಲ. ಕೊನೆವರೆಗೂ ಕನ್ನಡ ಚಿತ್ರರಂಗದ ಪರವಾಗಿ ನಿಂತುಕೊಂಡರು. ಚಿತ್ರರಂಗ ಮಾತ್ರವಲ್ಲದೇ, ಕರ್ನಾಟಕದಲ್ಲಿ ಎಲ್ಲೇ ಅನ್ಯಾಯವಾದರೂ ಅವರು ಹೋರಾಟ ಮಾಡ್ತಿದ್ರು. ಕಾವೇರಿ ನೀರಿಗಾಗಿ, ಕನ್ನಡಕ್ಕಾಗಿ, ಗೋಕಾಕ್ ಚಳವಳಿ ಹೀಗೆ ಕನ್ನಡದ ಬಗ್ಗೆ ಕರುನಾಡಿನ ಪರವಾಗಿ ನಿಂತವರು ಅಣ್ಣಾವ್ರು. 

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ನಾಯಕನಾಗುವುದಕ್ಕೂ ಮುನ್ನ ವಿಜಯಕಾಂತ್ ಅಭಿನಯದ ತಮಿಳಿನ 'ವಲ್ಲರಸು' ಸಿನಿಮಾದಲ್ಲಿ ಪೊಲೀಸ್ ಪಡೆಗೆ ಸೇರಲು ಆಕಾಂಕ್ಷೆಯಲ್ಲಿರುವ ಸ್ನೇಹಿತರ ಗುಂಪಿನಲ್ಲಿ ಕಾಣಿಸಿಕೊಂಡಿದ್ದರು. ಅದೊಂದು ಚಿಕ್ಕ ಪಾತ್ರ, ಯಾರು ಅವರನ್ನು ಗುರುತಿಸಿರಲಿಲ್ಲ. ಆ ಸಿನಿಮಾ ಬಿಟ್ಟರೆ ಇದುವರೆಗೂ ಡಿ ಬಾಸ್‌ ಪರಭಾಷಾ ಸಿನಿಮಾಗಳತ್ತ ಮುಖ ಮಾಡೇ ಇಲ್ಲ. ಅವರು ನಾಯಕನಾಗಿ ನಟಿಸಿದ ಮೊದಲ ಸಿನಿಮಾ ಮೆಜೆಸ್ಟಿಕ್‌ನಿಂದ ಹಿಡಿದು ಇತ್ತೀಚೆಗೆ ತೆರೆಕಂಡ ಕಾಟೇರ ಸಿನಿಮಾದವರೆಗೆ ಕನ್ನಡದಲ್ಲಿಯೇ ಅಭಿನಯಿಸಿದ್ದಾರೆ. ಈ ಬಗ್ಗೆ ಒಮ್ಮೆ ಮಾತನಾಡಿದ್ದ ದಾಸ, ಕನ್ನಡ ಸಿನಿಮಾಗಳ ಹೊರತಾಗಿ ಪರಭಾಷಾ ಸಿನಿಮಾಗಳ ಬಗ್ಗೆ ಯೋಚನೆ ಕೂಡ ಮಾಡಲಿಲ್ಲ ಬಿಡಿ. ಇದಕ್ಕೆ ಕಾರಣ ಕೂಡ ಇದೆ. ನಾವು ಕನ್ನಡಿಗರಾಗಿ ಬೇರೆ ಭಾಷೆಯವರಿಗೆ ಯಾಕೆ ಲಾಭ ಮಾಡಬೇಕು ಹೇಳಿ? ಇಲ್ಲಿಯೇ ಇರುತ್ತೇನೆ. ಇಲ್ಲಿಯೇ ಬೆಳೆಯುತ್ತೇನೆ ಎಂದಿದ್ದರು.

ನಟ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಕೋಟ್ಯಂತರ ಜನರ ಆರಾಧ್ಯ ದೈವ. ಅವರು ಎಲೆಮರೆ ಕಾಯಿಯಂತೆ ಅನಾಥಾಶ್ರಮ, ಗೋ ಶಾಲೆ, ಮಕ್ಕಳ ಶಿಕ್ಷಣಕ್ಕಾಗಿ ನೆರವು, ವೃದ್ಧಾಶ್ರಮ ಹೀಗೆ ಸಾಕಷ್ಟು ಸಾಮಾಜಿಕ ಕಾರ್ಯಗಳನ್ನು ಮಾಡಿದ್ದಾರೆ. ಯಾವುದೇ ಪ್ರಚಾರ ಬಯಸದೇ ಸಾಮಾಜಿಕ ಕಾರ್ಯಗಳಲ್ಲಿ ತೊಡಗಿಕೊಂಡು ಎಲ್ಲರಿಗೂ ಮಾದರಿಯಾಗಿದ್ದ ಅಪ್ಪು ಕೂಡ ಎಂದೂ ಪರಭಾಷಾ ಸಿನಿಮಾಗಳಲ್ಲಿ ನಟಿಸಲೇ ಇಲ್ಲ. ಬಾಲ್ಯದಿಂದಲೇ ಕನ್ನಡ ಸಿನಿಮಾಗಳಲ್ಲಿ ನಟಿಸಿ, ಸೂಪರ್ ಸ್ಟಾರ್ ಆದವರು ಪುನೀತ್. 

ಬಾಲ್ಯದಿಂದಲೂ ಚಿತ್ರರಂಗದ ಬಗ್ಗೆ ಅಪಾರ ಆಸಕ್ತಿಯಿದ್ದ ನಟ ಪ್ರೇಮ್, 2004ರಲ್ಲಿ ತೆರೆಕಂಡ `ಪ್ರಾಣ' ಚಿತ್ರದ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟರು. ಆದರೆ, ಈ ಚಿತ್ರ ಬಾಕ್ಸಾಫೀಸ್‌ನಲ್ಲಿ ಯಶಸ್ವಿಯಾಗಲಿಲ್ಲ. ಅದರ ಮುಂದಿನ ವರ್ಷವೇ ತೆರೆಕಂಡ `ನೆನಪಿರಲಿ' ಚಿತ್ರ ಪ್ರೇಮ್‌ಗೆ ಬಿಗ್ ಬ್ರೇಕ್ ನೀಡಿತು. ಅಂದಿನಿಂದ ಇಂದಿನವರೆಗೂ  26 ಸಿನಿಮಾಗಳಲ್ಲಿ ನಟಿಸಿರುವ ಪ್ರೇಮ್, ಇದುವರೆಗೂ ಬೇರೆ ಭಾಷೆಯ ಸಿನಿಮಾರಂಗಕ್ಕೆ ಕಾಲಿಟ್ಟಿಲ್ಲ.  

ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕನಾಗುವ ಮುನ್ನ ಸಿಹಿಕಹಿ ಚಂದ್ರು ನಿರ್ದೇಶನದ ಪಾಪ ಪಾಂಡು, ಯದ್ವಾ ತದ್ವಾ ಹಾಗೂ ವಠಾರ ಸೀರಿಯಲ್‌ಗಳಲ್ಲೂ ನಟಿಸಿದ್ದರು. ನಂತರ ಉದಯ ವಾಹಿನಿಯ 'ಕಾಮಿಡಿ ಟೈಮ್' ಎಂಬ ಕಾರ್ಯಕ್ರಮದ ನಿರೂಪಕರಾಗಿದ್ದರು. ಒಂದ್ಕಾಲದಲ್ಲಿ 'ಕಾಮಿಡಿ ಟೈಮ್ ಗಣೇಶ್' ಅಂತಲೇ ಖ್ಯಾತಿ ಗಳಿಸಿದ್ರು. ಆನಂತರ  2006ರಲ್ಲಿ ತೆರೆಕಂಡ ಚೆಲ್ಲಾಟ ಸಿನಿಮಾ ಮೂಲಕ ನಾಯಕನಾಗಿ ಎಂಟ್ರಿಕೊಟ್ಟ ಗೋಲ್ಡನ್ ಸ್ಟಾರ್ ಗಣೇಶ್, ಇಂದು ಸ್ಯಾಂಡಲ್‌ವುಡ್‌ ಸ್ಟಾರ್ ನಟರಲ್ಲೊಬ್ಬರು. ಇವರು ಕೂಡ ಪರಭಷಾ ಸಿನಿಮಾಗಳತ್ತ ಮುಖ ಮಾಡದೇ ಕನ್ನಡ ಚಿತ್ರರಂಗದಲ್ಲೇ ಇದ್ದಾರೆ. ಇಲ್ಲಿಯೇ ಉಳಿದು ಪ್ರೇಕ್ಷಕರಿಗೆ ಭರಪೂರ ಮನೋರಂಜನೆ ನೀಡುತ್ತಿದ್ದಾರೆ.