ಸ್ಯಾಂಡಲ್‌ವುಡ್‌ನ ಈ ಸಿನಿಮಾಗಳು ಹಾಲಿವುಡ್, ಕೊರಿಯನ್‌ ರಿಮೇಕ್ ಅಥವಾ ಸ್ಪೂರ್ತಿ ಎಂಬುದು ನಿಮಗೆ ಗೊತ್ತಾ?

2017ರಲ್ಲಿ ರಿಲೀಸ್ ಆಗಿದ್ದ 'ಪುಷ್ಪಕ ವಿಮಾನ' ಸಿನಿಮಾದಲ್ಲಿ ರಮೇಶ್ ಅರವಿಂದ್, ರಚಿತಾ ರಾಮ್, ಬಾಲನಟಿ ಯುವಿನಾ ಹಾಗೂ ಜೂಹಿ ಚಾವ್ಲಾ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದರು. ಇದೊಂದು ಅಪ್ಪಟ ತಂದೆ-ಮಗಳ ಬಾಂಧವ್ಯದ ಕಥೆ. ರಮೇಶ್ ಅರವಿಂದ್ ಈ ಚಿತ್ರದಲ್ಲಿ ಬುದ್ಧಿಮಾಂಧ್ಯ ಅಪ್ಪನ ಪಾತ್ರದಲ್ಲಿ ಬಹಳ ಅದ್ಭುತವಾಗಿ ನಟಿಸುವ ಮೂಲಕ ಪ್ರೇಕ್ಷಕರ ಮೆಚ್ಚುಗೆಗೆ ಪಾತ್ರರಾಗಿದ್ದರು. ಅಂದ್ಹಾಗೆ, ಈ ಚಿತ್ರ 2013ರಲ್ಲಿ ಬಿಡುಗಡೆಯಾಗಿದ್ದ 'ಮಿರಾಕಲ್ ಇನ್ ಸೆಲ್ ನಂ. 7' ಎಂಬ ಕೊರಿಯನ್ ಚಿತ್ರದ ಅನಧಿಕೃತ ರಿಮೇಕ್ ಎಂಬ ಮಾಹಿತಿ ವಿಕಿಪೀಡಿಯಾದಲ್ಲಿ ಲಭ್ಯವಿದೆ. ಇನ್ನು 'ಮಿರಾಕಲ್ ಇನ್ ಸೆಲ್ ನಂ. 7' ಚಿತ್ರದ ನಿರ್ಮಾಣ ಸಂಸ್ಥೆ ಕ್ರಾಸ್ ಪಿಕ್ಚರ್ಸ್ ಕಾಪಿರೈಟ್ ದೂರನ್ನು ದಾಖಲಿಸಿ ಸಹ ಗೆದ್ದಿತ್ತು. 

2016 ರಿಲೀಸ್ ಆಗಿದ್ದ ಗೋಲ್ಡನ್ ಸ್ಟಾರ್ ಗಣೇಶ್ ಹಾಗೂ ಸ್ಯಾಂಡಲ್‌ವುಡ್ ಸಿಂಡ್ರೆಲಾ ರಾಧಿಕಾ ಪಂಡಿತ್ ನಟನೆಯ 'ಜೂಮ್' ಸಿನಿಮಾ ರಿಮೇಕ್. ಇದು 1961ರಲ್ಲಿ ತೆರೆಗೆ ಬಂದಿದ್ದ 'ಲವರ್ ಕಮ್ ಬ್ಯಾಕ್' ಎಂಬ ಅಮೆರಿಕನ್ ಚಿತ್ರದ ರಿಮೇಕ್ ಎಂದು ವಿಕಿಪೀಡಿಯಾದಲ್ಲಿ ದಾಖಲಾಗಿದೆ. ಪ್ರಶಾಂತ್ ರಾಜ್ ನಿರ್ದೇಶನದ 'ಜೂಮ್' ಸಿನಿಮಾ ಅಷ್ಟೇನೂ ಯಶಸ್ಸು ಗಳಿಸಿರಲಿಲ್ಲ.

2012ರಲ್ಲಿ ಬಿಡುಗಡೆಗೊಂಡಿದ್ದ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಹಾಗೂ ದೀಪಿಕಾ ಕಾಮಯ್ಯ ನಟನೆಯ 'ಚಿಂಗಾರಿ' ಸಿನಿಮಾ 2008ರಲ್ಲಿ ಬಿಡುಗಡೆಯಾಗಿದ್ದ ಫ್ರೆಂಚ್-ಇಂಗ್ಲಿಷ್ ಚಿತ್ರ ಟೇಕನ್‌ನ ರಿಮೇಕ್ ಅಂತ ವಿಕಿಪೀಡಿಯಾದಲ್ಲಿ ದಾಖಲಾಗಿದೆ. ಕನ್ನಡದಲ್ಲಿ ಈ ಸಿನಿಮಾವನ್ನು ಎ ಹರ್ಷ ನಿರ್ದೇಶನ ಮಾಡಿದ್ದರು. ಸೃಜನ್ ಲೋಕೇಶ್, ಭಾವನಾ, ಯಶಸ್ ಸೂರ್ಯ, ಮಧು ಗುರುಸ್ವಾಮಿ ಮುಂತಾದವರು ತಾರಾಗಣದಲ್ಲಿದ್ದರು. 

2011ರಲ್ಲಿ ರಿಲೀಸ್ ಆದ 'ಸಾರಥಿ' ಸಿನಿಮಾ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸಿನಿ ಕರಿಯರ್‌ಗೆ ದೊಡ್ಡ ಬ್ರೇಕ್ ನೀಡಿತ್ತು. 2008ರ ಗಜ ಸಿನಿಮಾದ ನಂತರ ತೆರೆಕಂಡ ದರ್ಶನ್ ಮುಂದಿನ ಚಿತ್ರಗಳು ಅಷ್ಟು ಯಶಸ್ಸು ಗಳಿಸಿರಲಿಲ್ಲ. ಆಗ 2011ರಲ್ಲಿ ತೆರೆಕಂಡ ಸಾರಥಿ ಚಿತ್ರ ಭರ್ಜರಿ ಪ್ರದರ್ಶನ ಕಂಡು ದರ್ಶನ್ ಅವರನ್ನು ಬಾಕ್ಸಾಫೀಸ್ ಸುಲ್ತಾನ ಪಟ್ಟಕ್ಕೆ ಭದ್ರ ಬುನಾದಿ ನೀಡಿತ್ತು.  ಚಿತ್ರದ ಪಂಚಿಂಗ್ ಡೈಲಾಗ್ಸ್, ಲವ್ ಸ್ಟೋರಿ, ಫ್ಲ್ಯಾಶ್ ಬ್ಯಾಕ್ ಕಥೆ ಎಲ್ಲವೂ ಸಿನಿಪ್ರಿಯರಿಗೆ ಇಷ್ಟವಾಗಿತ್ತು. ಸಾರಥಿ ಸಿನಿಮಾ 1994ರಲ್ಲಿ ಬಿಡುಗಡೆಗೊಂಡಿದ್ದ ದ ಲಯನ್ ಕಿಂಗ್‌'ನಿಂದ ಸ್ಪೂರ್ತಿ ಪಡೆದು ನಿರ್ಮಿಸಿದ ಚಿತ್ರವಾಗಿದೆ. ಈ ವಿಷಯವನ್ನು ಸ್ವತಃ ದರ್ಶನ್ ವೇದಿಕೆ ಮೇಲೆ ಮುಕ್ತವಾಗಿ ಹೇಳಿದ್ದರು. 

2015ರಲ್ಲಿ ತೆರೆಕಂಡ  ಡಾಲಿ ಧನಂಜಯ್ ಮತ್ತು ಕೃತಿಕಾ  ಮುಖ್ಯ ಪಾತ್ರಗಳಲ್ಲಿ ನಟಿಸಿದ್ದ  'ಬಾಕ್ಸರ್'  ಸಿನಿಮಾದ ಕೊರಿಯನ್ ರಿಮೇಕ್ ಆಗಿದೆ. ಇದು 2011ರಲ್ಲಿ ತೆರೆಕಂಡ ಕೊರಿಯಾನ್ ರೋಮ್ಯಾಂಟಿಕ್ ಚಿತ್ರ ಆಲ್ಮೇಸ್ ರಿಮೇಕ್ ಆಗಿದೆ. ಆದರೆ, ಕನ್ನಡದಲ್ಲಿ ಪ್ರೇಮಕಥೆಗಿಂತ ಆಕ್ಷನ್‌ಗೆ ಹೆಚ್ಚು ಮಹತ್ವ ನೀಡಲಾಗಿತ್ತು. ಈ ಚಿತ್ರವನ್ನು ಪ್ರೀತಮ್ ಗುಬ್ಬಿ ನಿರ್ದೇಶನ ಮಾಡಿದ್ದರು. ಕೇವಲ ಇವಷ್ಟೇ ಅಲ್ಲದೇ ಇನ್ನೂ ಮುಂತಾದ ಸಿನಿಮಾಗಳು ಬೇರೆ ದೇಶಗಳ ಕಾಪಿ ಅಂತ ಸಿನಿರಸಿಕರು ಹೇಳಿದ್ದಾರೆ. ಕೆಲವೊಮ್ಮೆ ನಿರ್ದೇಶಕರು ಪ್ರೇಕ್ಷಕ ಹೇಳಿದ್ದನ್ನು ಒಪ್ಪದೇ, ಕಿಡಿಕಾರಿದ ಉದಾಹರಣೆಗಳೂ ಸಹ ಇವೆ.  ಹೀಗೆ ವಿದೇಶಿ ಚಿತ್ರಗಳ ರಿಮೇಕ್ ಆಗಿರುವ ಅಥವಾ ಅಲ್ಲಿಂದ ಸ್ಪೂರ್ತಿಗೊಂಡು ನಿರ್ಮಾಣವಾಗಿರುವ ಕನ್ನಡ ಸಿನಿಮಾಗಳ ಬಗ್ಗೆ ನಿಮಗೆ ಗೊತ್ತಿದ್ದರೆ ಅವುಗಳನ್ನೂ ಸಹ ಕಾಮೆಂಟ್ ಮೂಲಕ ತಿಳಿಸಿ.