ಡಾ.ರಾಜ್‌ರಿಂದ ಹಿಡಿದು ವಿಷ್ಣುವರ್ಧನ್‌ವರೆಗೆ: ಕನ್ನಡದ ದಿಗ್ಗಜರೊಂದಿಗೆ ಮನಮೆಚ್ಚಿದ ಹುಡುಗಿ ಸುಧಾರಾಣಿ ನಟಿಸಿದ ಸೂಪರ್ ಹಿಟ್ ಸಿನಿಮಾಗಳಿವು!

ನಟಿ ಸುಧಾರಾಣಿ ಬಾಲನಟಿಯಾಗಿ ಕನ್ನಡದ ಮೇರು ನಟ ಡಾ.ರಾಜ್‌ಕುಮಾರ್ ಅವರೊಂದಿಗೆ ಕೆಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ದೇವತಾ ಮನುಷ್ಉ ಚಿತ್ರದಲ್ಲಿ ಸುಧಾರಾಣಿ ಅಣ್ಣಾವ್ರ ಮಗಳ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಜೊತೆಗೆ ರಾಜ್‌ಕುಮಾರ್ ಅವರ ಭಾಗ್ಯವಂತ ಮತ್ತು ಜೀವನ ಚೈತ್ರ ಸಿನಿಮಾದಲ್ಲೂ ಇವರು ಬಣ್ಣ ಹಚ್ಚಿದ್ದಾರೆ. 

1986ರಲ್ಲಿ ತೆರೆಕಂಡ ಆನಂದ್ ಚಿತ್ರದ ಮೂಲಕ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಮತ್ತು ಸುಧಾರಾಣಿ ಒಟ್ಟಿಗೆ ಚಂದನವನ ಪ್ರವೇಶಿಸಿದರು. ಇಬ್ಬರಿಗೂ ಇದು ಮೊದಲ ಸಿನಿಮಾ. ಸಿಂಗೀತಂ ಶ್ರೀನಿವಾಸರಾವ್ ನಿರ್ದೇಶನದ ಈ ಚಿತ್ರ ಸುಮಾರು 38 ವಾರಗಳವರೆಗೆ ಪ್ರದರ್ಶನ ಕಂಡಿತ್ತು. ಸಿನಿಮಾದ `ಟುವ್ವಿ ಟುವ್ವಿ 'ಹಾಡು ಆಗಿನ ಕಾಲದ ಯುವಜನತೆಯ ಫೇವರೇಟ್ ಆಗಿತ್ತು. ಆನಂದ್ ಬಳಿಕ ಹಲವು ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದ ಸುಧಾರಾಣಿ ಹಾಗೂ ಶಿವರಾಜ್‌ಕುಮಾರ್ ಅಂದಿನ ಕಾಲದ ಟ್ರೆಡಿಂಗ್ ಅನ್‌ ಸ್ಕ್ರೀನ್ ಜೋಡಿಯಾಗಿ ಮಿಂಚಿದರು. ಈ ಜೋಡಿ ಹತ್ತಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಒಟ್ಟಿಗೆ ನಟಿಸಿದ್ದು, ಈ ಪೈಕಿ ಮನಮೆಚ್ಚಿದ ಹುಡುಗಿ, ಸಮರ, ಆಸೆಗೊಬ್ಬ ಮೀಸೆಗೊಬ್ಬ, ಮಿಡಿದ ಶೃತಿ, ಅಣ್ಣ-ತಂಗಿ ಚಿತ್ರಗಳು ಬ್ಲಾಕ್‌ಬಸ್ಟರ್ ಆಗಿದ್ದವು. 

ಶಿವರಾಜ್‌ಕುಮಾರ್ ನಂತರ ಸುಧಾರಾಣಿ ಅತಿಹೆಚ್ಚು ಸಿನಿಮಾಗಳಲ್ಲಿ ನಟಿಸಿರುವ ನಟ ರಮೇಶ್ ಜೊತೆ. ಇವರಿಬ್ಬರು ಪಂಚಮ ವೇದ, ಶ್ರೀಗಂಧ, ಅರಗಿಣಿ, ಅನುರಾಗ ಸಂಗಮ ಸೇರಿದಂತೆ ೮ ಚಿತ್ರಗಳಲ್ಲಿ ಈ ಜೊಡಿ ಒಟ್ಟಿಗೆ ನಟಿಸಿದ್ದಾರೆ.  90ರ ಕಾಲಘಟ್ಟದಲ್ಲಿ ಶೃತಿ, ಮಾಲಾಶ್ರೀಯವರೊಂದಿಗೆ ಮುಂಚೂಣಿಯಲ್ಲಿದ್ದ ನಟಿಯೆಂದರೆ ಅದು ಸುಧಾರಾಣಿ. 

ಸಾಹಸ ಸಿಂಹ ವಿಷ್ಣುವರ್ಧನ್ ಅಭಿನಯದ ಕಿಲಾಡಿ ಕಿಟ್ಟು ಸಿನಿಮಾದಲ್ಲಿ ಸುಧಾರಾಣಿ ಬಾಲ ಕಲಾವಿದೆಯಾಗಿ ಕಾಣಿಸಿಕೊಂಡಿದ್ದರು. ನಂತರ ಅವರ ನಟನೆಯ ಮಹಾಕ್ಷೇತ್ರಿಯ ಚಿತ್ರದಲ್ಲಿ ಅವರೊಂದು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು. ತದನಂತರ ಕೋಣ ಈದೈತೆ ಸಿನಿಮಾದಲ್ಲಿ ವಿಷ್ಣುವರ್ಧನ್‌ಗೆ ಪತ್ನಿಯಾಗಿ ಅತಿಥಿ ಪಾತ್ರವನ್ನು ನಿರ್ವಹಿಸಿದ್ದರು. 

1993ರಲ್ಲಿ ತೆರೆಕಂಡ ಮನೆ ದೇವ್ರು ಸಿನಿಮಾದಲ್ಲಿ ಕ್ರೇಜಿ ಸ್ಟಾರ್ ರವಿಚಂದ್ರನ್  ಜೊತೆ ನಟಿ ಸುಧಾರಾಣಿ ಅಭಿನಯಿಸಿದ್ದರು.  ಈ ಸಿನಿಮಾ ಸೂಪರ್ ಹಿಟ್ ಆಗುಗುವುದಲ್ಲದೇ ದೊಡ್ಡ ಮಟ್ಟದ ಹೆಸರು ತಂದುಕೊಟ್ಟಿತ್ತು.  ಈ ಸಿನಿಮಾವನ್ನು ರವಿಚಂದ್ರನ್ ಅವರೇ ನಿರ್ದೇಶನ ಮಾಡಿದ್ದರು. 

ರೆಬಲ್ ಸ್ಟಾರ್ ಅಂಬರೀಶ್ ಜೊತೆ ಮೂರು ಸಿನಿಮಾಗಳಲ್ಲಿ ನಟಿ ಸುಧಾರಾಣಿ ತೆರೆ ಹಂಚಿಕೊಂಡಿದ್ದರು. ಮಣ್ಣಿನ ದೋಣಿ, ಸಪ್ತಪದಿ ಹಾಗೂ ಮುಂಜಾನೆಯ ಮಂಜು ಸಿನಿಮಾಗಳಲ್ಲಿನ ಈ ಜೋಡಿಯ ನಟನೆಗೆ ಪ್ರೇಕ್ಷಕರು ಫಿದಾ ಆಗಿದ್ದರು.