ವಯಸ್ಸಾದ್ರೂ ಬಾಕ್ಸಾಫೀಸ್‌ನಲ್ಲಿ ಜ್ಯೂನಿಯರ್ ಸ್ಟಾರ್‌ಗಳಿಗೆ ಸವಾಲು ಹಾಕುತ್ತಿರುವ 7 ಸೀನಿಯರ್ ನಟರಿವರು!

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಕಳೆದ ವರ್ಷ 'ವೇದ' ಆಗಿ ಆರ್ಭಟಿಸಿದ್ದರು. ಎ. ಹರ್ಷ ನಿರ್ದೇಶನದ ಆಕ್ಷನ್ ಎಂಟರ್‌ಟೈನರ್ ಚಿತ್ರದಲ್ಲಿ ಕಣ್ಣಲ್ಲೇ ಕೊಲ್ಲುವ ಶಿವಣ್ಣನ ಅಭಿನಯಕ್ಕೆ ಅಭಿಮಾನಿಗಳು ಫಿದಾ ಆಗಿದ್ದರು. ಈ ವರ್ಷ ಉಪೇಂದ್ರ ಅಭಿನಯದ ಕಬ್ಜ ಸಿನಿಮಾದಲ್ಲೂ  ವಿಶೇಷ ಪಾತ್ರದಲ್ಲಿ ಅಭಿನಯಿಸಿದ್ದರು. ಇದೀಗ ರಜನಿಕಾಂತ್ ಅಭಿನಯದ ಜೈಲರ್ ಸಿನಿಮಾ ಮೂಲಕ ಶಿವಣ್ಣ ಮತ್ತೊಮ್ಮೆ ಹವಾ ಕ್ರಿಯೇಟ್ ಮಾಡಿದ್ದಾರೆ.  'ಜೈಲರ್' ಸಿನಿಮಾದಲ್ಲಿ ಹ್ಯಾಟ್ರಿಕ್ ಹೀರೋ ಶಿವಣ್ಣನದ್ದು ಅತಿಥಿ ಪಾತ್ರ. ಚಿತ್ರದಲ್ಲಿ ಮಂಡ್ಯದ ಮಾಫಿಯಾ ಡಾನ್ ನರಸಿಂಹ ಆಗಿ ಶಿವರಾಜ್‌ ಕುಮಾರ್ ದರ್ಶನ ಕೊಟ್ಟಿದ್ದಾರೆ. ಕೇವಲ ಎಂಟರಿಂದ ಹತ್ತು ನಿಮಿಷ ಬಂದು ಹೋಗುವ ಸೆಂಚುರಿ ಸ್ಟಾರ್ ತಮಿಳು ಪ್ರೇಕ್ಷಕರ ಮನಗೆದ್ದಿದ್ದಾರೆ. ಶಿವಣ್ಣನ ಸ್ವಾಗ್‌ಗೆ ಕಾಲಿವುಡ್ ಮಂದಿ ತಲೆಕೆಡಿಸಿಕೊಂಡಿದ್ದಾರೆ. ಶಿವಣ್ಣ ಜೈಲರ್ ಚಿತ್ರದಲ್ಲಿ ನರಸಿಂಹನ ಅವತಾರವೆತ್ತಿ ರಜನಿ ಅಭಿಮಾನಿಗಳ ಹೃದಯ ಗೆದ್ದುಬಿಟ್ಟಿದ್ದಾರೆ. ಸದ್ಯ ಎಲ್ಲಿ ನೋಡಿದರೂ ಶಿವಣ್ಣ ಪಾತ್ರದ ಬಗ್ಗೆನೇ ಗುಣಗಾನ. ಸೋಶಿಯಲ್ ಮೀಡಿಯಾದಲ್ಲಿ ಶಿವಣ್ಣನ ಲುಕ್, ಮ್ಯಾನರಿಸಂ ಬಗ್ಗೆಯೇ ಟಾಕ್ ಶುರುವಾಗಿದೆ.   

ಇತ್ತೀಚೆಗಷ್ಟೆ ಬಿಡುಗಡೆಯಾದ ಸೂಪರ್ ಸ್ಟಾರ್ ರಜನಿಕಾಂತ್ ನಟನೆಯ 'ಜೈಲರ್' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಕಮಾಲ್ ಮಾಡುತ್ತಿದೆ. ಇತ್ತೀಚಿನ ವರ್ಷಗಳಲ್ಲಿ ರಜನಿಕಾಂತ್ ಇಮೇಜ್‌ಗೆ ತಕ್ಕಂತೆ ಸಿನಿಮಾ ಮಾಡೋದು ಕಷ್ಟದ ಕೆಲಸ. ಆದರೆ, ಈ  ಚಿತ್ರದಲ್ಲಿ ರಜನಿಕಾಂತ್ ತಮ್ಮ ಯೂನಿಕ್ ಸ್ಟೈಲ್‌, ಮ್ಯಾನರಿಸಂನಿಂದ ಧೂಳೆಬ್ಬೆಸಿದ್ದಾರೆ. ಜೈಲರ್‌ನಲ್ಲಿ ನಿವೃತ್ತ ಜೈಲರ್ ಮುತ್ತುವೇಲ್ ಪಾಂಡಿಯಲ್ ಆಗಿ ರಜನಿಕಾಂತ್ ಆರ್ಭಟಿಸಿದ್ದಾರೆ. ವಯಸ್ಸು 70 ದಾಟಿದ್ರೂ ತಮ್ಮ ಅಭಿನಯದ ಮೂಲಕ ಅಭಿಮಾನಿಗಳಿಗೆ ಕಿಕ್ ಕೊಟ್ಟಿದ್ದಾರೆ.     

ಸತತ ಸೋಲುಗಳಿಂದ ಕಂಗೆಟ್ಟಿದ್ದ ಕಮಲ್ ಹಾಸನ್ 'ವಿಕ್ರಂ' ಆಗಿ ಕಳೆದ ವರ್ಷ ಭರ್ಜರಿ ಕಂಬ್ಯಾಕ್ ಮಾಡಿದ್ದರು. ಅಕ್ಷರಶಃ ಫೀನಿಕ್ಸ್ ರೀತಿ ಎದ್ದು ಬಂದರು. ಚಿತ್ರಕ್ಕೆ ಸಹ ನಿರ್ಮಾಪಕರು ಆಗಿದ್ದ ಕಮಲ್ ಈ ಚಿತ್ರದಿಂದ ಬಂದ ಹಣದಲ್ಲಿ ಸಾಲ ತೀರಿಸಿದ್ದರು. ಲೋಕೇಶ್ ಕನಕರಾಜ್ ನಿರ್ದೇಶನದ ಸಿನಿಮಾ 400 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಬಾಕ್ಸಾಫೀಸ್‌ ಶೇಕ್ ಮಾಡಿತ್ತು. ವಿಕ್ರಂ ಸಕ್ಸಸ್ ಬೆನ್ನಲ್ಲೇ ನಿಂತೇ ಹೋಗಿದ್ದ 'ಇಂಡಿಯನ್- 2' ಚಿತ್ರಕ್ಕೆ ಜೀವ ಬಂದಿತ್ತು. ಅದ್ಭುತ ನಟನಾದರೂ ಕಮಲ್ ಹಾಸನ್‌ಗೆ ಇತ್ತೀಚಿನ ಯಾವುದೇ ಸಿನಿಮಾ ದೊಡ್ಡ ಸಕ್ಸಸ್ ತಂದುಕೊಟ್ಟಿರಲಿಲ್ಲ. ಆ ಬರವನ್ನು 'ವಿಕ್ರಂ' ತಣಿಸಿತ್ತು.

ಈ ವರ್ಷದ ಆರಂಭದಲ್ಲೇ ಟಾಲಿವುಡ್ ಸೀರಿಯರ್ ಕಲಾವಿದರಿಬ್ಬರು ಬಾಕ್ಸಾಫೀಸ್‌ ಕಾಳಗಕ್ಕೆ ಇಳಿದಿದ್ದರು. ವೀರ ನರಸಿಂಹರೆಡ್ಡಿಯಾಗಿ ಬಾಲಕೃಷ್ಣ ಅಬ್ಬರಿಸಿದ್ದರು. ಗೋಪಿಚಂದ್ ಮಾಲಿನೇನಿ ನಿರ್ದೇಶನದ ಈ ಚಿತ್ರದಲ್ಲಿ ಶ್ರುತಿ ಹರಿಹರನ್ ನಾಯಕಿಯಾಗಿ ನಟಿಸಿದ್ದರು. ಆಕ್ಷನ್, ಎಮೋಷನ್, ಫೈಟ್ಸ್, ಡ್ಯಾನ್ಸ್, ಡೈಲಾಗ್ ಗಳಿಂದ ಕೂಡಿದ್ದ ಈ ಸಿನಿಮಾ ಸಖತ್ ಡಿಫೆರೆಂಟ್ ಆಗಿತ್ತು. ಇದೆ ಮೊದಲ ಬಾರಿಗೆ ಆಕ್ಷನ್ ಸಿನಿಮಾದಲ್ಲಿ ನಟಿಸಿದ್ದ ಬಾಲಕೃಷ್ಣ ಪ್ರೇಕ್ಷಕರ ಮನಗೆಲ್ಲುವಲ್ಲಿ ಯಶಸ್ವಿಯಾದರು.  ವೀರ ನರಸಿಂಹರೆಡ್ಡಿ ಮೂಲಕ ನಟ ದುನಿಯಾ ವಿಜಯ್ ತೆಲುಗು ಚಿತ್ರರಂಗಕ್ಕೆ ಕಾಲಿಟ್ಟಿದ್ದರು. 

ಟಾಲಿವುಡ್ ಮೆಗಾಸ್ಟಾರ್ ಚಿರಂಜೀವಿ ವಾಲ್ತೇರು ವೀರಯ್ಯ ಆಗಿ ದರ್ಬಾರ್ ನಡೆಸಿದ್ದರು. ಈ ಸಿನಿಮಾ ಕೂಡ ಸಂಕ್ರಾಂತಿಗೆ ಬಿಡುಗಡೆಯಾಗಿ ಸೂಪರ್ ಸಕ್ಸಸ್ ಆಗಿತ್ತು. ಈ ಮೂಲಕ  ಚಿರಂಜೀವಿ ತಾವೊಬ್ಬ ಮಾಸ್ ಹೀರೋ ಎಂಬುದನ್ನು ಮತ್ತೊಮ್ಮೆ ಸಾಭೀತು ಮಾಡಿದ್ದರು. ವಾಲ್ತೇರು ವೀರಯ್ಯ ಹಾಗೂ ವೀರ ನರಸಿಂಹರೆಡ್ಡಿ ಎರಡೂ ಸಿನಿಮಾಗಳು 150 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಮುನ್ನುಗ್ಗಿದ್ದವು. ಈ ಎರಡೂ ಸಿನಿಮಾಗಳನ್ನು ಮೈತ್ರಿ ಮೂವಿ ಮೇಕರ್ಸ್ ಸಂಸ್ಥೆ ನಿರ್ಮಾಣ ಮಾಡಿತ್ತು. ಎರಡೂ ಸಿನಿಮಾಗಳಿಗೆ ಮಿಶ್ರ ಪ್ರತಿಕ್ರಿಯೆ ಸಿಕ್ಕಿತ್ತು. ಆದರೆ ಸುಗ್ಗಿ ಸಂಭ್ರಮದಲ್ಲಿ ಪ್ರೇಕ್ಷಕರು ಸಿನಿಮಾ ನೋಡಲು ಮುಗಿಬಿದ್ದಿದರಿಂದ ಚಿರು- ಬಾಲಯ್ಯ ಇಬ್ಬರೂ ಗೆಲುವಿನ ದಡ ಸೇರಿದರು.

4 ವರ್ಷಗಳ ನಂತರ 'ಪಠಾಣ್' ಆಗಿ ಬಂದಿರುವ ಕಿಂಗ್ ಖಾನ್ ಶಾರುಖ್ ಹಳೇ ಬಾಕ್ಸಾಫೀಸ್ ದಾಖಲೆಗಳನ್ನು ಧೂಳಿಪಟ ಮಾಡಿದ್ದಾರೆ. ಸಿನಿಮಾ ಈಗಾಗಲೇ 1,000 ಕೋಟಿಗೂ ಅಧಿಕ ಕಲೆಕ್ಷನ್ ಮಾಡಿ ಮುನ್ನುಗ್ಗುತ್ತಿದೆ. ಶಾರುಖ್ ಖಾನ್ ಕಥೆ ಮುಗಿದೇ ಹೋಯ್ತು ಎಂದವರು, ಬಾಯ್ಕಾಟ್ 'ಪಠಾಣ್' ಎಂದವರು ಈಗ ಸೈಲೆಂಟ್ ಆಗಿಬಿಟ್ಟಿದ್ದಾರೆ. ಸಿದ್ಧಾರ್ಥ್ ಆನಂದ್ ನಿರ್ದೇಶನದ 'ಪಠಾಣ್' ಚಿತ್ರದಲ್ಲಿ ಶಾರುಖ್ ಖಾನ್, ದೀಪಿಕಾ ಪಡುಕೋಣೆ, ಜಾನ್ ಅಬ್ರಹಾಂ, ಸಲ್ಮಾನ್ ಖಾನ್ ನಟಿಸಿದ್ದರು. 

ಮಲಯಾಳಂ ಸೂಪರ್ ಸ್ಟಾರ್ ಮೋಹನ್ ಲಾಲ್ ಕೂಡ ಜೈಲರ್ ಸಿನಿಮಾದಲ್ಲಿ ಗಮನ ಸೆಳೆದಿದ್ದಾರೆ. ಚಿತ್ರದಲ್ಲಿ ಅವರು ಮ್ಯಾಥ್ಯೂ ಎಂಬ ಪಾತ್ರವನ್ನು ನಿರ್ವಹಿಸಿದ್ದಾರೆ. ಜೈಲರ್‌ನಲ್ಲಿ ಕೇವಲ ಐದು ನಿಮಿಷ ಕಾಣಿಸಿಕೊಳ್ಳುವ ಮೋಹನ್ ಲಾಲ್ ತಮ್ಮ ಅಭಿನಯದ ಮೂಲಕ ಪ್ರೇಕ್ಷಕರ ಮನಸ್ಸು ಗೆದ್ದಿದ್ದಾರೆ.