ಧ್ರುವಾ ಸರ್ಜಾ ಅಭಿನಯದ ಮಾರ್ಟಿನ್ ಸಿನಿಮಾ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಇಲ್ಲಿದೆ.

ಹತ್ತು ಆನೆಯ ಶಕ್ತಿಯನ್ನೊಂದಿರುವ ವ್ಯಕ್ತಿ ಪಾಕಿಸ್ತಾನದ ನೆಲದಲ್ಲಿ ತನ್ನ ಪರಾಕ್ರಮವನ್ನು ತೋರಿಸುತ್ತಾನೆ. ಇಂಡಿಯನ್ ಎಂಬ ಟ್ಯಾಟೂ ಹಾಕಿಸಿಕೊಂಡ ವ್ಯಕ್ತಿ ಅಲ್ಲಿದ್ದ ಎಲ್ಲರನ್ನೂ ಮಣ್ಣು ಮುಕ್ಕಿಸುತ್ತಾನೆ. ಆ ನಂತರ ಭಾರತಕ್ಕೆ ಪರಾರಿ ಕೂಡ ಆಗುತ್ತಾನೆ. ಆದರೆ, ದುರಾದೃಷ್ಟವಶಾತ್.. ಈ ವ್ಯಕ್ತಿಗೆ ತನ್ನ ಹಿನ್ನೆಲೆ ಗೊತ್ತಿರಲ್ಲ. ತಾನ್ಯಾರು ಎನ್ನುವ ಅರಿವು ಇರಲ್ಲ. ಈ ಕಾರಣಕ್ಕೆ ಹತಾಶೆಗೊಳಗಾಗುವ ಈ ವ್ಯಕ್ತಿ ತನ್ನ ಅಸ್ತಿತ್ವವನ್ನು ಹುಡುಕಲು ಶುರುಮಾಡುತ್ತಾನೆ. ಈ ಪ್ರಯಾಣದಲ್ಲಿ ಕಾಳಸಂತೆಯ ಅರಿವು ಆಗುತ್ತೆ. ಭಾರತದ ಮೇಲೆ ದಾಳಿಯನ್ನು ಮಾಡಲು ಭಯೋತ್ಪಾದಕರು ಸರ್ವ ಸನ್ನದ್ದರಾಗಿದ್ದಾರೆ ಎಂಬ ವಿಚಾರ ಕೂಡ ಈ ಬಲಶಾಲಿಗೆ ಗೊತ್ತಾಗುತ್ತೆ. ಮುಂದೇನಾಗುತ್ತೆ ಎಂಬದೇ ಸಿನಿಮಾ ಕಥೆ. 

ಇಡೀ ಮಾರ್ಟಿನ್ ಚಿತ್ರವನ್ನು ಧ್ರುವಾ ತಮ್ಮ ಹೆಗಲ ಮೇಲೆ ಹೊತ್ತುಕೊಂಡಿದ್ದಾರೆ. ದೈತ್ಯಾಕಾರದ ವ್ಯಕ್ತಿಯಾಗಿ ಅಬ್ಬರಿಸಿದ್ದಾರೆ. ತಮ್ಮ ಅಭಿನಯದ ಸಾಮರ್ಥ್ಯದ ಪ್ರದರ್ಶನವನ್ನು ಮಾಡಿದ್ದಾರೆ. ಸಾಹಸ ಸನ್ನಿವೇಶದಲ್ಲಿ ಧ್ರುವಾ ಅವರನ್ನು ನೋಡುವುದೇ ಚೆಂದದ ಅನುಭವ. ಇನ್ನು ಎಲ್ಲಾ ಸಿನಿಮಾದಲ್ಲೂ ನಿಮ್ಮ ನಕ್ಕು ನಲಿಸುವ ಚಿಕ್ಕಣ್ಣ ಮಾರ್ಟಿನ್ ಚಿತ್ರದಲ್ಲಿ ನಿಮ್ಮನ್ನು ನಗಿಸುವುದಿಲ್ಲ. ಯಾಕೆಂದರೆ, ಇದೇ ಮೊದಲ ಬಾರಿ ಚಿಕ್ಕಣ್ಣ ತುಂಬಾ ಗಂಭೀರವಾದ ಪಾತ್ರವನ್ನು ಮಾಡಿದ್ದಾರೆ. ಈ ಮೂಲಕ ಅಚ್ಚರಿಗೆ ದೂಡಿದ್ದಾರೆ. ಚಿತ್ರದ ವಿಶೇಷತೆಯಲ್ಲಿ ಇದು ಕೂಡ ಒಂದು.

ಮಾರ್ಟಿನ್ ಹೇಳಿ ಕೇಳಿ ಮಾಸ್ ಸಿನಿಮಾ. ಇಡೀ ಚಿತ್ರ ಧ್ರುವಾ ಮೇಲೆ ಕೇಂದ್ರಿಕೃತವಾದ ಸಿನಿಮಾ. ಹೀಗಾಗಿ, ಇಲ್ಲಿ ಬೇರೆಯವರಿಗೆ ಹೆಚ್ಚೇನು ಅವಕಾಶ ಇಲ್ಲ. ಸುಕೃತಾ ವಾಗ್ಲೆ, ಅಚ್ಯುತ್ ಕುಮಾರ್, ನಿಕಿತಿನ್ ಧೀರ್ ಮುಂತಾದವರಿಗೆ ಇಲ್ಲಿ ಹೆಚ್ಚೇನು ಕೆಲಸ ಇಲ್ಲ. ಚಿತ್ರಕ್ಕೊಂದು ತಿರುವು ನೀಡುವುದೇ ಚಿತ್ರದ ಇನ್ನೊಬ್ಬ ನಾಯಕಿ ಅನ್ವೇಶಿ ಜೈನ್. ಚಿತ್ರದ ನಾಯಕಿ ವೈಭವಿ ಶಾಂಡಿಲ್ಯ ಅವರಿಗೆ ಹೆಚ್ಚಿನ ಸ್ಕ್ರೀನ್ ಸ್ಪೇಸ್ ಸಿಕ್ಕಿದೆ.

ಧ್ರುವ ಸರ್ಜಾ ಈ ಚಿತ್ರದ ಬೆನ್ನೆಲುಬಾದರೆ ಸತ್ಯ ಹೆಗ್ಡೆ ಅವರ ಛಾಯಾಗ್ರಹಣ ಈ ಚಿತ್ರದ ಶಕ್ತಿ. ಪ್ರತಿಯೊಂದು ದೃಶ್ಯವನ್ನು ಸತ್ಯ ಹೆಗ್ಡೆ ಅದ್ಭುತವಾಗಿ ತಮ್ಮ ಕ್ಯಾಮರಾ ಕಣ್ಣಿನಲ್ಲಿ ಸೆರೆ ಹಿಡಿದಿದ್ದಾರೆ. ಕೆಲವೊಂದು ದೃಶ್ಯಗಳಂತೂ ನಿಬ್ಬೇರಗಾಗಿಸುತ್ತಾವೆ. ಚಿತ್ರದ ವಿಎಫ್‌ಎಕ್ಸ್‌ ಕೆಲಸವನ್ನು ಕೊನೆ ಕ್ಷಣದಲ್ಲಿ ಬೇರೆಯವರಿಂದ ಮಾಡಿಸಿರುವ ಕಾರಣಕ್ಕೆ ಸಮಯಾವಕಾಶದ ಕೊರತೆಯಿಂದಾಗಿ ಕೆಲಸಗಳನ್ನೆಲ್ಲ ಆತುರಾತುರವಾಗಿ ಮಾಡಿರುವುದು ಎದ್ದು ಕಾಣುತ್ತೆ. ಅಲ್ಲಲ್ಲಿ ವಿಎಫ್‌ಎಕ್ಸ್ ಕೆಲಸ ಕೈ ಕೊಟ್ಟಿದೆ. ಇನ್ನೂ ಅರ್ಜುನ್ ಸರ್ಜಾ ಬರೆದ ಕಥೆಯಲ್ಲಿ ಹೊಸತನ ಇರದ ಕಾರಣ ಮುಂದೇ ಹೀಗೆ ಆಗಬಹುದು ಎಂದು ಪ್ರೇಕ್ಷಕರು ಊಹಿಸಬಹುದು.  

ಹಬ್ಬದ ದಿನವಾಗಿದ್ದರೂ ಮಾರ್ಟಿನ್ ಸಿನಿಮಾಗೆ ಮೊದಲ ದಿನ ಭರ್ಜರಿ ರೆಸ್ಪಾನ್ಸ್ ಸಿಕ್ಕಿದ್ದು, ಹೆಚ್ಚು ಕಡಿಮೆ ಆರರಿಂದ ಏಳು ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ ಎಂದು ವಿತರಕರ ವಲಯದಲ್ಲಿ ಚರ್ಚೆಯಾಗುತ್ತಿದೆ. ತೆಲುಗು ಹಾಗೂ ತಮಿಳಿನಲ್ಲೂ ನಿರೀಕ್ಷೆಯಷ್ಟೇ ರೆಸ್ಪಾನ್ಸ್ ಸಿಕ್ಕಿದೆ. ಹಿಂದಿಯಲ್ಲೂ ಎಕ್ಸ್‌ಪೆಕ್ಟ್ ಮಾಡಿದಷ್ಟು ಕಲೆಕ್ಷನ್ ಆಗಿದೆ ಎನ್ನಲಾಗಿದೆ. ತೆಲುಗಿನಲ್ಲಿ ಮೊದಲ ದಿನ 50 ರಿಂದ 60 ಲಕ್ಷ ರೂಪಾಯಿ ಕಲೆಕ್ಷನ್ ಆಗಿದೆ. ಹಾಗೇ ಹಿಂದಿ ಬೆಲ್ಟ್‌ನಲ್ಲಿ 'ಮಾರ್ಟಿನ್' ಸಿನಿಮಾ 25 ರಿಂದ 30 ಲಕ್ಷ ರೂಪಾಯಿ ಮೊದಲ ದಿನದ ಕಲೆಕ್ಟ್ ಮಾಡಿದೆ ಎನ್ನಲಾಗಿದೆ. ನಿಖರವಾದ ಸಿನಿಮಾ ಕಲೆಕ್ಷನ್ ವಿವರವನ್ನು ಚಿತ್ರತಂಡವೇ ರಿವೀಲ್ ಮಾಡಬೇಕಿದೆ.