ವಿನಯ್ ರಾಜ್‌ಕುಮಾರ್ 'ಪೆಪೆ' ಸಿನಿಮಾ ಕಥೆ, ಕಲಾವಿದರ ಅಭಿನಯ, ರೇಟಿಂಗ್ಸ್ ಕುರಿತ ಮಾಹಿತಿ ಇಲ್ಲಿದೆ.

ಪೆಪೆ ಅಲಿಯಾಸ್ ಪ್ರದೀಪ್ ಪಾತ್ರವನ್ನೇ ಕೇಂದ್ರವಾಗಿಟ್ಟಿಕೊಂಡು ಹೆಣೆದಿರುವ ಕಥೆ. ಎರಡು ವಿಭಿನ್ನ ಜಾತಿಯ ಪೋಷಕರ ಮಗ ತನ್ನ ಹಕ್ಕುಗಳು ಹಾಗೂ ಸಾಂಪ್ರದಾಯಿಕ ನಂಬಿಕೆಗಳಿಗಾಗಿ ಹೋರಾಡುತ್ತಾನೆ. ಕೊಡಗಿನ ಗ್ರಾಮವೊಂದರಲ್ಲಿ ನಡೆಯುವ ಈ ಕಾಲ್ಪನಿಕ ಕಥೆಯಲ್ಲಿ ಬೇರೆ ಬೇರೆ ಜಾತಿಗಳ ನಡುವೆ ನೀರಿಗಾಗಿ ನಡೆಯುವ ಸಂಘರ್ಷವಿದೆ. ಮೇಲ್ಜಾತಿ ಹಾಗೂ ಕೆಳಜಾತಿಗಳ ನಡುವಿನ ಹೋರಾಟ 'ಪೆಪೆ' ಚಿತ್ರದ ಕಥೆಯ ಎಳೆ. 

ಇಲ್ಲಿವರೆಗೂ ಸಾಪ್ಟ್ ಪಾತ್ರಗಳಲ್ಲಿ ಮಿಂಚಿದ್ದ 'ಪೆಪೆ' ಮೂಲಕ ಮಾಸ್ ಹೀರೋ ಆಗಿದ್ದಾರೆ. ಅದಕ್ಕೆ ಅವರು ರಗಡ್ ಲುಕ್‌ನಲ್ಲಿ ಬಡಿದಾಡುವ ದೃಶ್ಯಗಳೇ ಸಾಕ್ಷಿ. ಹಾಗೇ ಸಿನಿಮಾದ ಉದ್ದಕ್ಕೂ ಗಂಭೀರವಾಗಿಯೇ ಕಾಣಿಸಿಕೊಳ್ಳುತ್ತಾರೆ. ವಿನಯ್ ಮಾಸ್‌ ಲುಕ್‌ನಲ್ಲಿ ಇಷ್ಟವಾದ್ರೆ,ಇವರೊಂದಿಗೆ ನಟಿಸಿದ ಇನ್ನೂ ಹಲವು ಪಾತ್ರಗಳು ನೆನಪಿನಲ್ಲಿ ಉಳಿಯುತ್ತವೆ. ಮಯೂರ್ ಪಟೇಲ್, ಕಾಜಲ್​ ಕುಂದರ್​, ಮೇದಿನಿ ಕೆಳಮನಿ, ಅರುಣಾ ಬಾಲ್‌ರಾಜ್, ಸಂಧ್ಯಾ ಅರಕೆರೆ ಪಾತ್ರಗಳು ಕೂಡ ಅಷ್ಟೇ ಪವರ್‌ಫುಲ್ ಆಗಿವೆ. ಅದರಲ್ಲೂ ಕಾಜಲ್ ಕುಂದರ್ ಪಾತ್ರವಂತೂ ಸಿಕ್ಕಾಪಟ್ಟೆ ರಗಡ್ ಅಂತ ಅನಿಸುತ್ತೆ. 

ಸಿನಿಮಾರಂಗದಲ್ಲಿ ಯಾವಾಗಲೂ ಹೊಸ ಪ್ರಯೋಗಗಳು ಆಗುತ್ತಿರಬೇಕು. ಅದನ್ನು ಪ್ರೇಕ್ಷಕರು ಬಯುಸುತ್ತಿರುತ್ತಾರೆ. ಪೆಪೆಯಲ್ಲೂ ನಿರ್ದೇಶಕ ಶ್ರೀಲೇಶ್​ ಎಸ್​. ನಾಯರ್ ಇಂತಹದ್ದೇ ಪ್ರಯೋಗಕ್ಕೆ ಕೈಹಾಕಿದ್ದಾರೆ. ಸಿನಿಮಾ ಕಥೆ ಥ್ರಿಲ್ಲಿಂಗ್ ಆಗಿ ಹೇಳಬೇಕು ಅನ್ನುವ ಭರಾಟೆಯಲ್ಲಿ ಚಿತ್ರಕಥೆಯಲ್ಲಿ ಪ್ರಯೋಗ ಮಾಡಿದ್ದಾರೆ. ಈ ಪ್ರಯತ್ನದಲ್ಲಿ ಹಲವು ಕಡೆ ಎಡವಿರುವುದು ಗಮನಕ್ಕೆ ಬರುತ್ತೆ. ಈ ಸಿನಿಮಾದಲ್ಲಿ ನಟಿಸಿದ ಬಹುತೇಕ ಎಲ್ಲಾ ಪಾತ್ರಗಳು ಪ್ರೇಕ್ಷಕರನ್ನು ಕಾಡುತ್ತಾರೆ. ಇದು ಸಿನಿಮಾದ ಹೈಲೈಟ್‌ಗಳಲ್ಲಿ ಒಂದು. 

ಇನ್ನು ಮೈನಸ್ ನೋಡುವುದಾದರೆ, ಚಿತ್ರದ ಕಥೆಯನ್ನು ಒಮ್ಮೆಗೆ ಬಿಟ್ಟು ಕೊಡಬಾರದು ಅಂತ ಹಂತ-ಹಂತವಾಗಿ ಹೇಳುವ ವಿಧಾನ ಕೈಕೊಟ್ಟಿದೆ. ಪ್ರೇಕ್ಷಕರಿಗೆ ರಿಲೀಫ್ ಕೊಡುವುದಕ್ಕೆ ಸೆಳೆಯುವ ಹಾಡುಗಳು ಬೇಕಿತ್ತು. ಸಿನಿಮಾದ ಉದ್ದಕ್ಕೂ ಗಂಭೀರ ವಿಷಯವನ್ನೇ ಹೇಳುವುದಕ್ಕಿಂತ ಮಧ್ಯದಲ್ಲಿ ಹಾಸ್ಯದ ಸನ್ನಿವೇಶ ಇಟ್ಟಿದ್ದರೆ ಚೆನ್ನಾಗಿರುತ್ತಿತ್ತೋ ಏನೋ ಅಂತ ಅನಿಸುತ್ತೆ.