ಬಿಲ್ ಕೊಡಲು ಹಣ ಇರುತ್ತಿರಲಿಲ್ಲ: ರಾಕಿಂಗ್ ಸ್ಟಾರ್ ಯಶ್ ಕುರಿತು ನಿಮಗೆ ಗೊತ್ತಿಲ್ಲದ ವಿಷಯಗಳಿವು

ಯಶ್ ಅವಕಾಶಗಳಿಗಾಗಿ ಹುಡುಕುತ್ತಿದ್ದ ದಿನಗಳಲ್ಲಿ ಊಟಕ್ಕಾಗಿ ಪರದಾಡುವಂತಹ ಪರಿಸ್ಥಿತಿ ಇತ್ತು. ಯಶ್ ಎಷ್ಟೋ ಬಾರಿ ಕಳ್ಳೆಪುರಿ, ನೀರು ಕುಡಿದುಕೊಂಡು ಇರುತ್ತಿದ್ದರು. ಮಲಗುವುದಕ್ಕೂ ಜಾಗ ಇರಲಿಲ್ಲ. ನ್ಯಾಷನಲ್ ಕಾಲೇಜು ಮೈದಾನದಲ್ಲಿ ಮಲಗಿ ಬೆಳಗ್ಗೆ ಎದ್ದು ಯಾವುದೋ ಶೌಚಾಯಲಯಕ್ಕೆ ನಾನು ಕಣ್ಣಾರೆ ನೋಡಿದ್ದೇನೆ ಎಂದು ಯಶ್ ಸ್ನೇಹಿತ್ ಮತ್ತು ನಟ ನಂಜುಂಡ ಈ ಹಿಂದೆ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮದಲ್ಲಿ ಹೇಳಿದ್ದರು

ಯಶ್ ಒಂದು ದಿನ ಮಲಗುವುದಕ್ಕೂ ಜಾಗವಿಲ್ಲದೆ ಮೆಜೆಸ್ಟಿಕ್ ನ ಮೈಸೂರು ಬಸ್ ನಿಲ್ದಾಣದಲ್ಲಿ ಮಲಗಿದ್ದರಂತೆ. ಒಂದು ಕಡೆ ಯಾರ್ರೀ ಮೈಸೂರು ಎಂದು ಕರೆಯುವವರು, ಇನ್ನೊಂದು ಕಡೆ ಗಾಂಧಿನಗರ. ಆಗ ಎಲ್ಲೂ ಹೋಗದೆ ಅಲ್ಲೇ ಉಳಿದೆ. ಆ ರಾತ್ರಿ ಭಿಕ್ಷುಕರು, ವೇಶ್ಯೆಯರು ಎಲ್ಲ ತರಹದ ಜನ ಬರುತ್ತಿದ್ದರು. ಬಸ್ ನಿಲ್ದಾಣದಲ್ಲಿ ಪೊಲೀಸರು ಲಾಠಿಯಲ್ಲಿ ಹೊಡೆಯುತ್ತಿದ್ದರು. ಆಗಲೇ ನಾನು ಗಾಂಧಿನಗರದಲ್ಲಿ ಎತ್ತರಕ್ಕೆ ಬೆಳೆಯಬೇಕು ಎಂಬ ಛಲ ಮೂಡಿತ್ತು. ಆ ಕರಾಳ ರಾತ್ರಿ ಹುಮ್ಮಸ್ಸು, ಛಲ ತುಂಬಿತ್ತು ಎಂದು ಯಶ್ ಹೇಳಿದ್ದರು. 

ಯಶ್ ನಟನೆಯ ಹಿಂದೆ ರಂಗಭೂಮಿ ಬಣ್ಣದ ನಂಟು ಇದೆ. ಯಶ್ ಹಣವಿಲ್ಲದಿದ್ದಾಗಲೂ ಹೋಟೆಲ್ ನಲ್ಲಿ ಬೇಕಾದ್ದೆಲ್ಲವನ್ನು ತಿನ್ನುತ್ತಿದ್ದರು. ಹಣ ಕೇಳಿದರೆ ಸ್ಟಾರ್ ಆದ ಮೇಲೆ ಕೊಡುತ್ತೇನೆ ಎನ್ನುತ್ತಿದ್ದರು. ಬಳಿಕ ಹೀರೋ ಆದಮೇಲೆ ಆ ಹೋಟೆಲ್ ಮಾಲೀಕರಿಗೆ ಸಾವಿರ ರೂಪಾಯಿ ಕೊಟ್ಟಿದ್ದರಂತೆ. ಅವರಿಗೆ ಯಾವ ಬಾಕಿ ಎಂದು ಅರ್ಥವಾಗುತ್ತಿರಲಿಲ್ಲ ಎಂದು ಕಾರ್ಯಕ್ರಮವೊಂದರಲ್ಲಿ ತಮ್ಮ ಹಳೆಯ ದಿನಗಳನ್ನು ನೆನಪಿಸಿಕೊಂಡಿದ್ದರು. 

ಯಶ್ ರಂಗಭೂಮಿಯಲ್ಲಿ ತೊಡಗಿಕೊಂಡಾಗ ಟಿ.ಎಸ್. ನಾಗಾಭರಣ ಅವರ 'ಬೆನಕ' ನಾಟಕ ತಂಡದಲ್ಲಿದ್ದರು. 'ತಬರನ ಕಥೆ'ಯಳ್ಳಿ ಪೊಲೀಸ್ ಪಾತ್ರ ಅವರದು. ಆಗ ತಬರನ ಪಾತ್ರವನ್ನು  ಟಿ.ಎಸ್.ನಾಗಾಭರಣ ಘೋಷಿಸಿದ್ದರು. ಈ ವೇಳೆ ಲಾಠಿಯಲ್ಲಿ ಹೊಡೆಯುವ ಸಂದರ್ಭದಲ್ಲಿ ಯಶ್ ನಿಜವಾಗಿಯೂ ಅವರಿಗೆ ಎರಡು ಏಟು ಕೊಟ್ಟಿದ್ದರಂತೆ. ಇದನ್ನು ಸ್ವತಃ ನಾಗಾಭರಣ ಅವರೇ ನೆನಪಿಸಿಕೊಳ್ಳುತ್ತಾರೆ. 

ಸದ್ಯ ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಮಿಂಚುತ್ತಿರುವ ಯಶ್ ಎಲ್ಲಿವರೆಗೆ ಓದಿದ್ದಾರೆಎಂಬ ಕುತೂಹಲ ಹಲವರಿಗೆ ಇರುತ್ತದೆ. ಈ ಬಗ್ಗೆ ಈ ಹಿಂದೆ ಪ್ರತಿಕ್ರಿಯಿಸಿದ್ದ ರಾಕಿಂಗ್ ಸ್ಟಾರ್, ತಾವು ಪಿಯುಸಿಗೆ ವಿದ್ಯಾಭ್ಯಾಸಕ್ಕೆ ಗುಡ್ ಬೈ ಹೇಳಬೇಕಾಯಿತು. ಇದಕ್ಕೆ ಕಾರಣ ಸಿನಿಮಾದಲ್ಲಿ ನಟಿಸಬೇಕು, ಹೀರೋ ಆಗಬೇಕು ಎಂಬ ಕನಸು. ಆ ಕನಸಿಗಾಗಿ ತಾನು ಪಿಯುಸಿಗೆ ವಿದ್ಯಾಭ್ಯಾಸ ನಿಲ್ಲಿಸಬೇಕಾಯಿತು ಎಂದಿದ್ದರು. 

ಯಶ್ ಹುಟ್ಟಿ ಬೆಳೆದದ್ದು ಮಾಧ್ಯಮ ಕುಟುಂಬದಲ್ಲಿ. ಹಾಸನ ಜಿಲ್ಲೆಯ ಭುವನಹಳ್ಳಿಯಲ್ಲಿ ಅರುಣ್ ಕುಮಾರ್ ಮತ್ತು ಪುಷ್ಪಾ ದಂಪತಿಯ ಮಗನಾಗಿ ಯಶ್ ಜನಿಸಿದರು. ಇವರ ತಂದೆ ಬೆಂಗಳೂರು `ಬಿಎಂಟಿಸಿ'ಯಲ್ಲಿ ಚಾಲಕರಾಗಿ ಕೆಲಸ ಮಾಡುತ್ತಿದ್ದರು. ಅವರ ತಂದೆ ಬಿಎಂಟಿಸಿ ಚಾಲಕರಾಗಿದ್ದಾಗಲೇ ಯಶ್ ಸ್ಟಾರ್ ಎನಿಸಿಕೊಂಡಿದ್ದರು. ಯಶ್ ಅವರಿಗೆ ತಂದೆಯ ಕೆಲಸದ ಬಗ್ಗೆ ಕೀಳರಿಮೆಯಾಗಲಿ, ಮುಜುಗರವಾಗಲಿ ಇರಲಿಲ್ಲ. ಯಾಕೆಂದರೆ ಆ ಕೆಲಸದಿಂದಲೇ ತಾವೆಲ್ಲ ಎಷ್ಟು ಎತ್ತರಕ್ಕೆ ಬರಲು ಸಾಧ್ಯವಾಯಿತು ಎನ್ನುತ್ತಾರೆ ಯಶ್.   

ಹೈಸ್ಕೂಲ್-ಕಾಲೇಜು ದಿನಗಳಲ್ಲಿ ಹಲವು ಡ್ಯಾನ್ಸ್ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿದ್ದ ಯಶ್ ಒಂದು ಸಲ ಮೈಸೂರಿನಲ್ಲಿ ಆರ್ಕೆಸ್ಟ್ರಾದಲ್ಲಿ ಡ್ಯಾನ್ಸ್ ಮಾಡಬೇಕಾದರೆ ರಿಯಲ್ ಸ್ಟಾರ್ ಉಪೇಂದ್ರರವರು ನೋಡಿ ಯಶ್‌ರನ್ನು ತುಂಬಾ ಹೊಗಳಿದ್ದರು.`ವಿಕೆಂಡ್ ವಿಥ್ ರಮೇಶ್' ಕಾರ್ಯಕ್ರಮದಲ್ಲಿ ಈ ಘಟನೆ ನೆನೆದ ಯಶ್, ಉಪೇಂದ್ರರವರು ತಮಗೆ ಸ್ಫೂರ್ತಿ ಎಂದರು. 

2007ರಲ್ಲಿ ತೆರೆಗೆ ಬಂದ 'ಜಂಬದ ಹುಡುಗಿ' ಚಿತ್ರದ ಮೂಲಕ ಚಂದನವನ ಪ್ರವೇಶಿಸಿದ ಯಶ್ 2008ರಲ್ಲಿ ಶಶಾಂಕ್ ನಿರ್ದೇಶನದಲ್ಲಿ ಮೂಡಿಬಂದ 'ಮೊಗ್ಗಿನ ಮನಸ್ಸು' ಚಿತ್ರದ ಮೂಲಕ ಪೂರ್ಣ ಪ್ರಮಾಣದ ನಾಯಕನಾಗಿ ಹೊರಹೊಮ್ಮಿದರು. ಈ ಚಿತ್ರದಲ್ಲಿನ ಅಭಿನಯಕ್ಕೋಸ್ಕರ ಫಿಲ್ಮ್ ಫೇರ್ ಪ್ರಶಸ್ತಿ ಕೂಡ ಪಡೆದರು. ತಾವು ಮೊದಲ ಬಾರಿ ನಾಯಕನಾಗಿ ನಟಿಸಿದ ಚಿತ್ರದಲ್ಲೂ ನಾಯಕಿಯಾಗಿ ನಟಿಸಿದ್ದು ರಾಧಿಕಾ ಪಂಡಿತ್.

ಯಶ್-ರಾಧಿಕಾ ದಂಪತಿ 'ಯಶೋಮಾರ್ಗ' ಎಂಬ ಸಂಸ್ಥೆ ಸ್ಥಾಪಿಸಿ ಸಮಾಜಸೇವೆಯಲ್ಲಿ ತೊಡಗಿದ್ದಾರೆ. ಯಶೋಮಾರ್ಗ ಸಂಸ್ಥೆಯ ಅಡಿಯಲ್ಲಿ ಯಶ್ ದಂಪತಿ 4 ಕೋಟಿ ವೆಚ್ಚ ಮಾಡಿ ಕೊಪ್ಪಳ ನಗರ ಕೆರೆಯ ಹೂಳೆತ್ತಿಸಿ, ಕೊಪ್ಪಳ ಜನತೆಯ ನೀರಿನ ಸಮಸ್ಯೆಗೆ ಶಾಶ್ವತ ಪರಿಹಾರ ಒದಗಿಸಿದರು. 

ಬಾಲ್ಯದ ಹೆಸರು ನವೀನ್ ಕುಮಾರ್ ಗೌಡ. ಬಳಿಕ ವೃತ್ತಿಜೀವನಕ್ಕಾಗಿ ತಮ್ಮ ಹೆಸರನ್ನು ಬದಲಾಯಿಸಿದರು. ಯಶ್ ತಮ್ಮ ಹದಿನೇಳನೆ ವಯಸ್ಸಿನಲ್ಲಿಯೇ ಕುಟುಂಬಕ್ಕೆ ಸಹಾಯವಾಗಲು ಪಿಯುಸಿಗೆ ಗುಡ್‌ಬೈ ಹೇಳಿ ಕೆಲಸ ಮಾಡಲು ಪ್ರಾರಂಭಿಸಿದರು. `ನವೀನ್ ಪ್ರಾವಿಜನ್ ಸ್ಟೋರ್' ಎಂಬ ತಮ್ಮದೇ ಸ್ಟೋರ್ ತೆಗೆದು ಕುಟುಂಬದ ಜವಾಬ್ದಾರಿ ವಹಿಸಿಕೊಂಡರು.