10 ದಿನದಲ್ಲಿ 12 ಕೋಟಿ ರೂ. ಕಲೆಕ್ಷನ್ ಮಾಡಿದ ಮಾಡಿದ ಹಾಸ್ಟೆಲ್ ಹುಡುಗರು: ಇಲ್ಲಿದೆ ಬಾಕ್ಸಾಫೀಸ್ ರಿಪೋರ್ಟ್

Author Sowmya Bairappa | Published: Monday, July 31, 2023, 03:30 PM [IST]

ಜುಲೈ 21ರಂದು ಬಿಡುಗಡೆಯಾಗಿದ್ದ 500ಕ್ಕೂ ಹೆಚ್ಚು ರಂಗಭೂಮಿ ಕಲಾವಿದರು ಅಭಿನಯಿಸಿರುವ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ರಾಜ್ಯಾದ್ಯಂತ ಭರ್ಜರಿ ಪ್ರದರ್ಶನ ಕಾಣುತ್ತಿದೆ. ಸಂಪೂರ್ಣ ಹೊಸಬರೇ ಸೇರಿಕೊಂಡು ಮಾಡಿರುವ ಈ ಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮ ರೆಸ್ಪಾನ್ಸ್ ಸಿಗುತ್ತಿದೆ. ಹಾಲಿವುಡ್‌ನ ಬೃಹತ್ ಚಿತ್ರಗಳಾದ ಬಾರ್ಬಿ ಹಾಗೂ ಓಪನ್‌ಹೈಮರ್ ಜೊತೆ ರಿಲೀಸ್ ಆಗಿದ್ದ ಕನ್ನಡದ ಈ ಸಿನಿಮಾ ದೈತ್ಯ ಚಿತ್ರಗಳನ್ನು ಕರ್ನಾಟಕ ಬಾಕ್ಸಾಫೀಸ್‌ನಲ್ಲಿ ಓವರ್‌ಟೇಕ್ ಮಾಡಿದೆ. ಈ ಚಿತ್ರ ತೆರೆಕಂಡು ನಿನ್ನೆಗೆ 10 ದಿನ ಕಳೆದಿದ್ದು, ಕಲೆಕ್ಷನ್ ರಿಪೋರ್ಟ್ ಇಲ್ಲಿದೆ.

Table of content

ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ಜುಲೈ 30ಕ್ಕೆ 10 ದಿನಗಳ ಪೂರೈಸಿದ್ದು, ಈವರೆಗೆ 12 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಜೊತೆಗೆ ಈವರೆಗೆ 6.4 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿವೆ ಎಂದು ಬಾಕ್ಸ್ ಆಫೀಸ್ ಪರಿಣಿತರು ತಿಳಿಸಿದ್ದಾರೆ. ಇನ್ನು ಚಿತ್ರದ ಎರಡನೇ ವಾರಂತ್ಯದ ಬುಕಿಂಗ್ ಸಹ ಭರ್ಜರಿಯಾಗಿದ್ದು, ಈ ವಾರವೂ ಸಹ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ಮತ್ತಷ್ಟು ಒಳ್ಳೆಯ ಗಳಿಕೆ ಮಾಡುವುದಂತೂ ಖಚಿತವಾಗಿದೆ.

ಬಿಡುಗಡೆಯ ದಿನ ಪಡೆದುಕೊಂಡಿದ್ದ ಪ್ರದರ್ಶನಗಳ ಸಂಖ್ಯೆಗಿಂತ ಮೂರು ಪಟ್ಟು ಹೆಚ್ಚಿನ ಪ್ರದರ್ಶನಗಳನ್ನು ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ಹತ್ತನೇ ದಿನ ಪಡೆದುಕೊಂಡಿದ್ದು, ಇನ್ನೂ ಹೆಚ್ಚಿನ ಕಲೆಕ್ಷನ್ ಮಾಡುವುದು ಪಕ್ಕಾ ಆಗಿದೆ. ಹೀಗೆಯೇ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಚಿತ್ರದ ಕಲೆಕ್ಷನ್ ಓಟ ಮುಂದುವರೆದರೆ ರಿಯಲ್ ಸ್ಟಾರ್ ಉಪೇಂದ್ರ ನಟನೆಯ ಎ, ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ನಟನೆಯ ಅಪ್ಪು ಹಾಗೂ ರಂಗಿತರಂಗ ಚಿತ್ರಗಳ ಬಳಿಕ ಕನ್ನಡ ಚಿತ್ರರಂಗದಲ್ಲಿ ಹೊಸಬರ ಮೊದಲ ಚಿತ್ರಗಳು ಮಾಡಿದ ಬೃಹತ್ ದಾಖಲೆಯ ಪಟ್ಟಿಯನ್ನು ಈ ಚಿತ್ರ ಸೇರಲಿದೆ.

ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ಜುಲೈ 21ರಂದು ರಾಜ್ಯಾದ್ಯಂತ ಬಿಡುಗಡೆಯಾಗಿತ್ತು. ಬಿಡುಗಡೆಯಾದ ಮೊದಲ ದಿನ ಅಂದರೆ ಜುಲೈ 21ರಂದು 1.09 ಕೋಟಿ ರೂ ಗಳಿಕೆ ಕಂಡಿತ್ತು. ಹಾಗೆಯೇ ಎರಡನೇ ದಿನ ಅಂದರೆ 2.1 ಕೋಟಿ ರೂ ಗಳಿಸಿತ್ತು. ಇದೀಗ 12 ಕೋಟಿ ರೂಪಾಯಿ ಕಲೆಕ್ಷನ್ ಮಾಡುವ ಮೂಲಕ ಹೊಸಬರ ಸಿನಿಮಾ ದಾಖಲೆ ಮಾಡಿದೆ.

ಕನ್ನಡದ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಹಾಲಿವುಡ್‌ನ ಬೃಹತ್ ಚಿತ್ರಗಳಾದ ಬಾರ್ಬಿ ಹಾಗೂ ಆಪನ್‌ಹೈಮರ್ ಚಿತ್ರಗಳ ಜೊತೆ ತೆರೆಗೆ ಬಂದಿತ್ತು. ಇದೀಗ ಈ ಎರಡು ದೈತ್ಯ ಸಿನಿಮಾಗಳನ್ನು ಕರ್ನಾಟಕ ಬಾಕ್ಸ್ ಆಫೀಸ್‌ನಲ್ಲಿ ಓವರ್ ಟೇಕ್ ಮಾಡಿದ ಸಿನಿಮಾ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಎನಿಸಿಕೊಂಡಿದೆ. ಹೌದು, ಹೊಸಬರೇ ಸೇರಿಕೊಂಡು ಮಾಡಿರುವ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ ಸಿನಿಮಾ ರಾಜ್ಯ ಬಾಕ್ಸ್ ಆಫೀಸ್‌ನಲ್ಲಿ ಅಬ್ಬರಿಸುತ್ತಿದ್ದು, ಮೊದಲ ದಿನಕ್ಕಿಂತ ಎರಡು ಹಾಗೂ ಮೂರನೇ ದಿನದ ಪ್ರದರ್ಶನಗಳಲ್ಲಿ ದುಪ್ಪಟ್ಟು, ಮೂರು ಪಟ್ಟು ಕಲೆಕ್ಷನ್ ಅನ್ನು ಮಾಡಿ, ಕನ್ನಡ ಸಿನಿರಸಿಕರಿಂದ ಭೇಷ್ ಎನಿಸಿಕೊಂಡಿದೆ.

ಜುಲೈ ತಿಂಗಳಲ್ಲಿ ಬಿಡುಗಡೆಗೊಂಡಿರುವ ಹಾಸ್ಟೆಲ್ ಹುಡುಗರು ಬೇಕಾಗಿದ್ದಾರೆ, ಕೌಸಲ್ಯಾ ಸುಪ್ರಜಾ ರಾಮ ಹಾಗೂ ಆಚಾರ್ಯ ಅಂಡ್ ಕೋ ಚಿತ್ರಗಳು ಸದ್ಯ ಬಾಕ್ಸಾಫೀಸ್‌ನಲ್ಲಿ ಒಳ್ಳೆಯ ಗಳಿಕೆ ಮಾಡಿ, ಉತ್ತಮ ಬುಕಿಂಗ್ ಪಡೆದುಕೊಳ್ಳುತ್ತಿವೆ. ಒಂದೆಡೆ ಹಾಲಿವುಡ್‌ನ ಆಪನ್‌ಹೈಮರ್ ಹಾಗೂ ಬಾರ್ಬಿ ಚಿತ್ರಗಳು ಬೆಂಗಳೂರಿನಲ್ಲಿ ಹೆಚ್ಚಿನ ಪ್ರದರ್ಶನಗಳನ್ನು ಗಿಟ್ಟಿಸಿಕೊಂಡು ಬಿಡುಗಡೆಯಾದರೂ ಸಹ ಕನ್ನಡದ ಈ ಚಿತ್ರಗಳು ಒಳ್ಳೆಯ ಸಂಖ್ಯೆಯ ಪ್ರದರ್ಶನಗಳನ್ನು ಪಡೆದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದು, ವರ್ಷದ ಮೊದಲಾರ್ಧದಲ್ಲಿ ಕುಗ್ಗಿಹೋಗಿದ್ದ ಕನ್ನಡ ಚಿತ್ರರಂಗಕ್ಕೆ ಗೆದ್ದು ಬೀಗುವ ಚಿತ್ರಗಳು ಬಂದಂತಾಗಿದೆ.