ತಮ್ಮ ಪ್ರೊಡಕ್ಷನ್ಸ್ ಮೂಲಕ ಹೊಸ ಪ್ರತಿಭೆಗಳಿಗೆ ಪ್ರೋತ್ಸಾಹಿಸುತ್ತಿರುವ 7 ಸ್ಯಾಂಡಲ್‌ವುಡ್ ನಟರಿವರು!

ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಚಂದನವನದ ಬಹುಮುಖ ಪ್ರತಿಭೆ. ನಟನೆ ಮಾತ್ರವಲ್ಲದೇ, ನಿರ್ದೇಶನ ಮತ್ತು ನಿರ್ಮಾಣದಲ್ಲಿ ತೊಡಗಿಸಿಕೊಂಡು ಸೃಜನಾತ್ಮಕ ಚಿತ್ರಗಳನ್ನು ಕನ್ನಡಕ್ಕೆ ನೀಡಿದ್ದಾರೆ. ತಮ್ಮದೇ ಪರಂವಃ ಸ್ಟುಡಿಯೋಸ್ ಬ್ಯಾನರ್ ಮೂಲಕ ಸಾಕಷ್ಟು ಹೊಸ ಪ್ರತಿಭೆಗಳಿಗೆ ಅವಕಾಶ ನೀಡಿದ್ದಾರೆ. ಕಿರಿಕ್ ಪಾರ್ಟಿ, ಹಂಬಲ್ ಪೊಲಿಟಿಷಿಯನ್ ನಾಗರಾಜ್, ಕಥೆಯೊಂದು ಶುರುವಾಗಿದೆ, ಭೀಮಾ ಸೇನಾ ನಳಮಹಾರಾಜ, ಸಕುಟುಂಬ ಸಮೇತ, 777 ಚಾರ್ಲಿ, ಬ್ಯಾಚುಲರ್ ಪಾರ್ಟಿ, ಸಪ್ತ ಸಾಗರದಾಚೆ ಎಲ್ಲೋ ರಕ್ಷಿತ್ ಬ್ಯಾನರ್‌ನಲ್ಲಿ ಬಂದ ಸಿನಿಮಾಗಳು. ಪ್ರತಿಯೊಂದು ಸಿನಿಮಾದ ಮೂಲಕ ಓರ್ವ ಪ್ರತಿಭಾನ್ವಿತ ನಿರ್ದೇಶಕನನ್ನು 'ಪರಂವಃ ಸ್ಟುಡಿಯೋಸ್' ಸ್ಯಾಂಡಲ್‌ವುಡ್‌ಗೆ ಪರಿಚಯಿಸಿದೆ. ತಮ್ಮ ಜೊತೆಯಿದ್ದ ರೈಟಿಂಗ್ ಟೀಂನ ಪ್ರತಿಯೊಬ್ಬ ಸದಸ್ಯರಿಗೂ ರಕ್ಷಿತ್ ಅವಕಾಶ ನೀಡುವ ಪ್ರಯತ್ನ ಮಾಡ್ತಿದ್ದಾರೆ. ಪರಂವಃ ಸ್ಟುಡಿಯೋಸ್ ಬ್ಯಾನರ್‌ನಲ್ಲಿ ಮೂಡಿಬರುತ್ತಿರುವ ಮುಂದಿನ ಸಿನಿಮಾಗಳು ಇಬ್ಬನಿ ತಬ್ಬಿದ ಇಳೆಯಲಿ, ಅಬ್ರಕಾಡಬ್ರಾ ಹಾಗೂ ಮಿಥ್ಯ. 

ಬಡವರ ಮಕ್ಕಳು ಬೆಳಿಬೇಕು ಎಂಬುದು ನಟರಾಕ್ಷಸ ಡಾಲಿ ಧನಂಜಯ್ ಅವರ ಜನಪ್ರಿಯ ಮಾತು. ಅದರಂತೆ ತಮ್ಮ 'ಡಾಲಿ ಪಿಕ್ಚರ್ಸ್' ಎಂಬ ನಿರ್ಮಾಣ ಸಂಸ್ಥೆ ಮೂಲಕ ಅನೇಕ ಹೊಸಬರಿಗೆ ಅವಕಾಶ ನೀಡಿ, ಬೆನ್ನುತಟ್ಟಿದ್ದಾರೆ. ಬಡವ ರಾಸ್ಕಲ್‌ ಸಿನಿಮಾ ಮೂಲಕ ನಿರ್ಮಾಪಕರಾದ ಡಾಲಿ, ಮೊದಲ ಸಿನಿಮಾದಲ್ಲೇ ಸೂಪರ್ ಸಕ್ಸಸ್ ಕಂಡರು. ಆನಂತರದಲ್ಲಿ ಹೆಡ್‌ಬುಷ್, ಟಗರು ಪಲ್ಯ , ಡೇರ್ ಡೇವಿಲ್ ಮುಸ್ತಫಾ ಸಿನಿಮಾಗಳನ್ನು ನಿರ್ಮಿಸಿದರು. ಸದ್ಯ ವಿದ್ಯಾಪತಿ, ಜೆಸಿ ದ ಯೂನಿವರ್ಸಿಟಿ ಸಿನಿಮಾಗಳಿಗೆ ಬಂಡವಾಳ ಹೂಡಿದ್ದಾರೆ. ಜೊತೆಗೆ ಡಾಲಿ ಪಿಕ್ಚರ್ಸ್ ವರ್ಷಕ್ಕೆ ಎರಡು ಸಿನಿಮಾಗಳನ್ನು ನಿರ್ಮಿಸಲಿದ್ದು, ಹೊಸಬರಿಗೆ ಅವಕಾಶ ನೀಡಲಿದೆ ಎಂಬ ಮಾಹಿತಿಯನ್ನು ನೀಡಿದ್ದಾರೆ. ಡಾಲಿ ಪಿಕ್ಚರ್ಸ್ ಬ್ಯಾನರ್ ಅಡಿಯಲ್ಲಿ ಈಗಾಗಲೇ ಹಲವು ಹೀರೋ, ಹೀರೋಯಿನ್​, ನಿರ್ದೇಶಕರು ಚಂದನವನಕ್ಕೆ ಎಂಟ್ರಿ ಕೊಟ್ಟಿದ್ದಾರೆ. ಯಾವುದೇ ಗಾಡ್‌ಫಾದರ್ ಇಲ್ಲದೇ ತಮ್ಮ ಸ್ವಂತ ಪ್ರತಿಭೆಯಿಂದಲೇ ಸ್ಟಾರ್ ಆಗಿರುವ ಧನಂಜಯ್, ಇಂಡಸ್ತ್ರಿಯಲ್ಲಿ ಹೊಸಬರು ಕೆರಿಯರ್ ಆರಂಭಿಸುವಾಗಿನ ಕಷ್ಟ ಗೊತ್ತಿರುವುದರಿಂದ ಹೊಸಬರಿಗೆ ಹೆಚ್ಚಿನ ಅವಕಾಶ ನೀಡ್ತಿದ್ದಾರೆ.

ಹೊಸ ಪ್ರತಿಭೆಗಳಿಗೆ ಪ್ರೋತ್ಸಾಹ ನೀಡುವರಲ್ಲಿ ಪವರ್ ಸ್ಟಾರ್ ಪುನೀತ್ ರಾಜ್‌ಕುಮಾರ್ ಮೊದಲಾಗಿದ್ದರು. ಅಪ್ಪು ಹೊಸ ಪ್ರತಿಭೆಗಳು, ಯುವ ನಟರು ಹಾಗೂ ನಿರ್ದೇಶಕರಿಗೆ ಅವಕಾಶ ಕೊಡುವ ಉದ್ದೇಶದಿಂದ 'ಪಿಆರ್‌ಕೆ' ಎಂಬ ಸಂಸ್ಥೆಯನ್ನು ಹುಟ್ಟುಹಾಕಿದ್ದರು. ಈ ತಮ್ಮ ಕನಸಿನ ಕೂಸಾದ ಪಿಆರ್‌ಕೆ ಸಂಸ್ಥೆ ಮೂಲಕ ಸಾಕಷ್ಟು ಪ್ರತಿಭೆಗಳಿಗೆ ಅವಕಾಶ ಕೊಟ್ಟರು. ಅಪ್ಪು ನಿಧನದ ಬಳಿಕ ಅಶ್ವಿನಿ ಪುನೀತ್ ರಾಜ್‌ಕುಮಾರ್ ಈ ಸಂಸ್ಥೆಯನ್ನು ನಡೆಸಿಕೊಂಡು ಹೋಗುತ್ತಿದ್ದಾರೆ. ಪಿಆರ್‌ಕೆ ಪ್ರೊಡಕ್ಷನ್ಸ್ ಬ್ಯಾನರ್ ಅಡಿಯಲ್ಲಿ ಈಗಾಗಲೇ ಒಳ್ಳೊಳ್ಳೆಯ ಸಿನಿಮಾಗಳು ನಿರ್ಮಾಣವಾಗಿವೆ. 

ಡಿವೈನ್ ಸ್ಟಾರ್ ರಿಷಭ್ ಶೆಟ್ಟಿ ಕನ್ನಡ ಚಿತ್ರರಂಗದಲ್ಲಿ ಅದ್ಭುತ ನಟ, ನಿರ್ದೇಶಕ ಹಾಗೂ ನಿರ್ಮಾಪಕರಾಗಿ ಗುರುತಿಸಿಕೊಂಡಿದ್ದಾರೆ. ಇವರು ತಮ್ಮ ರಿಷಭ್ ಶೆಟ್ಟಿ ಫಿಲ್ಮ್ಸ್ ಬ್ಯಾನರ್ ಮೂಲಕ ಸರ್ಕಾರಿ ಹಿ ಪ್ರಾ ಶಾಲೆ ಕಾಸರಗೋಡು, ಹೀರೋ, ಕಥಾ ಸಂಗಮ, ಪೆಡ್ರೋ ಸಿನಿಮಾ, ಶಿವಮ್ಮ ಯರೆಹಂಚಿನಾಳ ಸಿನಿಮಾಗಳನ್ನು ನಿರ್ಮಿಸಿದ್ದಾರೆ. ಇವರ ನಿರ್ಮಾಣದ 'ಲಾಫಿಂಗ್ ಬುದ್ಧ' ಸಿನಿಮಾ ಆಗಸ್ಟ್ ೩೦ರಂದು ಬಿಡುಗಡೆಗೆ ಸಜ್ಜಾಗಿದೆ.  ತಮ್ಮ ವಿಭಿನ್ನ ಚಿತ್ರಗಳು ಮತ್ತು ಭಿನ್ನ ಚಿತ್ರ ನಿರ್ಮಾಣ ಶೈಲಿಯಿಂದ ಪ್ರಸಿದ್ಧರಾಗಿರುವ ಇವರ ನಿರ್ಮಾಣದಲ್ಲಿ ಮುಂದೆ ಹಲವು ಸಿನಿಮಾಗಳು ಬರುವ ನಿರೀಕ್ಷೆಯಿದೆ. 

ಚಾಲೆಂಜಿಂಗ್ ಸ್ಟಾರ್ ದರ್ಶನ್ 2006ರಲ್ಲಿ ತಮ್ಮ ತಂದೆಯವರ ಹೆಸರಿನಲ್ಲಿ 'ತೂಗುದೀಪ ಪ್ರೊಡಕ್ಷನ್ಸ್ ಸಂಸ್ಥೆ' ಆರಂಭಿಸಿ, ಜೊತೆ ಜೊತೆಯಲ್ಲಿ ಚಿತ್ರ ನಿರ್ಮಿಸಿದರು. ನಂತರ ಈ ಬ್ಯಾನರ್ ಅಡಿಯಲ್ಲಿ ಬುಲ್ ಬುಲ್, ಮದುವೆಯ ಮಮತೆಯ ಕರೆಯೋಲೆ ಸಿನಿಮಾಗಳನ್ನು ನಿರ್ಮಿಸಿದರು. ಇದೇ ಹೆಸರಿನಲ್ಲಿರುವ ಚಿತ್ರ ವಿತರಣೆ ಸಂಸ್ಥೆ ಬೃಂದಾವನ, ಒಗ್ಗರಣೆ, ಜೈಲಲಿತಾ, ಉಗ್ರಂ, ಪರಮಶಿವ ಮುಂತಾದ ಚಿತ್ರಗಳನ್ನು ವಿತರಿಸಿದೆ. 

2017ರ ನವೆಂಬರ್ 18ರಂದು ಕರುನಾಡ ಚಕ್ರವರ್ತಿ ಶಿವರಾಜ್‌ಕುಮಾರ್ ಶ್ರೀಮುತ್ತು ಸಿನಿ ಸರ್ವೀಸ್ ಹೆಸರಿನ ಪ್ರೊಡಕ್ಷನ್ಸ್ ಬ್ಯಾನರ್ ಆರಂಭಿಸಿದರು. ಶಿವಣ್ಣ ಪುತ್ರಿ ನಿವೇದಿತಾ ಅವರು ಮುನ್ನಡೆಸುತ್ತಿರುವ ಈ ಬ್ಯಾನರ್ ಅಡಿಯಲ್ಲಿ ಹೇಟ್ ಯು ರೋಮಿಯೋ, ಹನಿಮೂನ್ ವೆಬ್ ಸೀರಿಸ್‌ಗಳು ನಿರ್ಮಾಣವಾಗಿವೆ. ಸದ್ಯ ನಿವೇದಿತಾ ಅವರು ವಂಶಿಕೃಷ್ಣ ನಿರ್ದೇಶನದ 'ಫೈರ್ ಫ್ಲೈ' ಸಿನಿಮಾ ನಿರ್ಮಾಣ ಮಾಡ್ತಿದ್ದಾರೆ.

ಸದ್ಯ ನಟನೆಯಿಂದ ದೂರವಾವಿರುವ ಮೋಹಕ ತಾರೆ ರಮ್ಯಾ 'ಆಪಲ್ ಬಾಕ್ಸ್ ಸ್ಟುಡಿಯೋಸ್' ಎಂಬ ನಿರ್ಮಾಣ ಸಂಸ್ಥೆ ಆರಂಭಿಸಿದ್ದಾರೆ. ಈ ಸಂಸ್ಥೆ ಅಡಿಯಲ್ಲಿ ಸ್ವಾತಿ ಮುತ್ತಿನ ಮಳೆ ಹನಿಯೇ ಎಂಬ ಸಿನಿಮಾ ನಿರ್ಮಿಸಿರುವ ರಮ್ಯಾ, ಮುಂದಿನ ದಿನಗಳಲ್ಲಿ ಹೊಸಬರಿಗೆ ಆದ್ಯತೆ ನೀಡುವ ಭರವಸೆಯಿದೆ.