ಬಾಯಲ್ಲಿ ಆಟ ಆಡೋದಲ್ಲ, ಅಲ್ಲಿ ಇಳಿದು ಆಟವಾಡಬೇಕು: ಐ ಆಮ್ ಗೋಯಿಂಗ್ ಟು ಸ್ಲಾಪ್ ಹರ್ ಎಂದ ನಮ್ರತಾ

ಕಳೆದ ಸಂಚಿಕೆಯಲ್ಲಿ ಎಲ್ಲಾ ಸ್ಪರ್ಧಿಗಳಿಗೆ ಕೊಳೆ ಒಳ್ಳೆಯದಲ್ಲ ಎಂಬ ಟಾಸ್ಕ್ ನೀಡಲಾಗಿತ್ತು. ಇದರ ಅನುಸಾರ ಆಟಗಾರರು ಎದುರಾಳಿ ತಂಡದ ಆಟಗಾರರಿಂದ ತಮಗೆ ಮೀಸಲಾಗಿರುವ ಬಟ್ಟೆಗಳನ್ನು ರಕ್ಷಿಸಿ, ಎದುರಾಳಿ ತಂಡದ ಬಟ್ಟೆಗಳಿಗೆ ಬಣ್ಣ ಎರಚಬೇಕಿತ್ತು. ಮೊದಲ ಸುತ್ತಿನಲ್ಲಿ ಸಂಗೀತಾ ಮಾಲೀಕತ್ವದ ತಂಡ ಜಯ ಗಳಿಸಿತು. ಈ ವೇಳೆ ಎದುರಾಳಿ ತಂಡ ವಿರುದ್ಧ ಮಾತನಾಡಿದ ತನಿಷಾ, ಅವರು ಒಂದನ್ನೇ ಒಗೆದು ಒಗೆದು ಅಲ್ಲೇ ಇಟ್ಟುಕೊಂಡಿದ್ದಾರೆ ಎಂದರು. ಇದರಿಂದ ರೊಚ್ಚಿಗೆದ್ದ ನಮ್ರತಾ, ತನಿಷಾ ಹೇಳೋದೆಲ್ಲಾ ಕರೆಕ್ಟ್. ನಮ್ಮ ಹಾರ್ಡ್‌ ವರ್ಕ್ ಏನೂ ಇಲ್ಲ. ಐ ಆಮ್ ಗೋಯಿಂಗ್ ಟು ಸ್ಲಾಪ್ ಹರ್. ಎ ಟೈಟ್ ಸ್ಲಾಪ್ ಆನ್ ಹರ್ ಫೇಸ್. ಹಾರ್ಡ್ ವರ್ಕ್‌ನ ಕೌಂಟ್ ಮಾಡೋದೆ ಇಲ್ವಲ್ಲಾ ಅಂತ  ಕೆಂಡಕಾರಿದರು. 

ಎರಡೇ ಸುತ್ತು ಮುಗಿದ ಮೇಲೆ ವಿನಯ್ ತಮ್ಮ ಬೆರಳಿಗೆ ಏಟಾಗಿರುವುದನ್ನು ತೋರಿಸಿದರು. ಮುಂಚೆಯೇ ಏಟಾಗಿತ್ತು, ಅದರ ಮೇಲೆ ಮತ್ತೆ ಏಟು ಬಿತ್ತು ಅಂತ ಹೇಳಿದರು. ಕಾರ್ತಿಕ್‌ ಬೆನ್ನು ನೋವಿನಿಂದ ಬಳಲಿದರು. ಹೀಗಾಗಿ, ಇಬ್ಬರು ವೈದ್ಯರು ಸಲಹೆ ಮೇರೆಗೆ ಮೂರನೇ ಸುತ್ತಿನ ಆಟದಿಂದ ಹೊರಗುಳಿಬೇಕಾಗಿ ಬಂತು. 

ಕಾರ್ತಿಕ್ ಹಾಗೂ ವಿನಯ್ ಆಟದಿಂದ ಹೊರಗುಳಿದ ಕಾರಣ ಮೂರನೇ ಸುತ್ತಿನಲ್ಲಿ ಎರಡೂ ತಂಡದಿಂದ ಕೇವಲ ಇಬ್ಬರು ಮಾತ್ರ ಆಡಬೇಕಿತ್ತು.  ಆಗ ಸಂಗೀತಾ ತಂಡದಿಂದ ನಮ್ರತಾ, ಮೈಕಲ್ ಹಾಗೂ ತನಿಷಾ ಟೀಂನಿಂದ ತುಕಾಲಿ ಸಂತು, ವರ್ತೂರು ಸಂತೋಷ್ ಆಡಿದರು. ಈ ಸಂದರ್ಭ ತುಕಾಲಿ ಸಂತು ಹಾಗೂ ಮೈಕಲ್ ನಡುವೆ ತಳ್ಳಾಟ ನಡೆಯಿತು. 

ಎರಡನೇ ಸುತ್ತಿನಲ್ಲಿ ತನಿಷಾ ತಂಡ ಗೆದ್ದರೆ, ಮೂರನೇ ಸುತ್ತಿನಲ್ಲಿ ಸಂಗೀತಾ ತಂಡ ಗೆಲುವು ಸಾಧಿಸಿತು. ಮೂರನೇ ಸುತ್ತು ಮುಗಿದ ಮೇಲೆ ಎಲ್ಲಾ ಒಗೆದಿದ್ದಾರೆ, ಆದ್ರೆ ಒಣಗಿ ಹಾಕಿಲ್ಲ ಅಂತ ಸಂಗೀತಾ ಹೇಳಿದರು. ಅದಕ್ಕೆ ತನಿಷಾ ಎಲ್ಲಾ ಸುಮ್ಮನೆ ಹಾಕಿದ್ದಾರೆ ಅಷ್ಟೇ ಎನ್ನುತ್ತಿದ್ದಂತೆ, ನಮ್ರತಾ ಎನ್ ಸುಮ್‌ ಸುಮ್ನೆ ಮಾತನಾಡಬಾರದು. ಎಲ್ಲಾ ಬಟ್ಟೆಗಳನ್ನು ಒಗೆದಿದ್ದೇನೆ ಅಂತ ಗರಂ ಆದರು. ಇದಾದ ಮೇಲೆ ಬಿಗ್‌ಬಾಸ್‌ ಎರಡು ತಂಡಗಳ ಪೈಕಿ ಅತ್ಯುತ್ತಮ ಪ್ರದರ್ಶನ ನೀಡಿದವರ್ಯಾರು ಚರ್ಚಿಸಿ, ಒಮ್ಮತದ ನಿರ್ಧಾರ ತಿಳಿಸಿ ಎಂದರು. ಈ ವೇಳೆ ನಡೆದ ಚರ್ಚೆಯಲ್ಲಿ ವರ್ತೂರು ಸಂತೋಷ್ ಜಾಸ್ತಿ ಬಟ್ಟೆಗಳನ್ನು ಒಗೆದರು. ಪ್ರತಾಪ್ ಇದ್ದಾಗ ತುಂಬಾ ಚೆನ್ನಾಗಿ ಬಟ್ಟೆಗಳನ್ನು ಒಗೆಯುತ್ತಿದ್ದರು. ಆದ್ರೆ ನಮ್ರತಾಗೆ ಹೋಲಿಸಿದ್ರೆ ವರ್ತೂರು ಸಂತೋಷ್ ಚೆನ್ನಾಗಿ ಒಗೆದರು ಎಂದು ತನಿಷಾ ಹೇಳಿದರು.  

ಚರ್ಚೆಯಲ್ಲಿ ತಮ್ಮ ಹೆಸರು ಬರುತ್ತಿದ್ದಂತೆ ಸಿಡಿದೆದ್ದ ನಮ್ರತಾ, ಈ ಚರ್ಚೆಯಲ್ಲಿ ನನ್ನ ಹೆಸರು ತೆಗೆದುಕೊಳ್ಳುವಂತಿಲ್ಲ. ಕಂಪೇರ್‌ ಮಾಡಬೇಡಿ, ನನ್ನ ಹೆಸರು ತೆಗೆದುಕೊಳ್ಳಬೇಡಿ. ನಿಮ್ಮ ವ್ಯಾಲಿಡೇಷನ್ ನನಗೆ ಬೇಕಾಗಿಲ್ಲ. ಮೂರು ವಾರಗಳಿಂದ ನೀವು ಆಡೇ ಇಲ್ಲ. ಅಂದಮೇಲೆ ನನಗೆ ವ್ಯಾಲಿಡೇಷನ್ ಕೊಡೋಕೆ ನಿವ್ಯಾರು? ಮೂರು ವಾರಗಳಿಂದ ಬಾಯಲ್ಲಿ ಆಡೋದಲ್ಲ. ಅಲ್ಲಿ ಇಳಿದು ಆಡಬೇಕು. ಮಾತಾಡಿ ಆಡೋ ಗೇಮ್ ಇದ್ದರೆ ಅದರಲ್ಲಿ ನೀವೇ ಗೆಲ್ಲೋದು ಅಂತ ಸಿಡಿದೆದ್ದರು. 

ಅದಕ್ಕೆ ತನಿಷಾ, ಹಂಡ್ರೆಡ್ ಪರ್ಸೆಂಡ್ ನಾನೇ. ನಾನು ಬಿಟ್ಟು ಕೊಡುವ ಮಾತೇ ಇಲ್ಲ ಎಂದರು. ಅದಕ್ಕೆ ನಮ್ರತಾ, ಮೂರು ವಾರಗಳಿಂದ ಆಡಿ ಪ್ರೂವ್ ಮಾಡೋಕೆ ಆಗಲಿಲ್ಲ. ಮಾತಾಡಿ ಫ್ರೂವ್ ಮಾಡೋದು ಅಂದ್ರೆ ಇದೇ ಎಂದರು.