ನಟಿ ಪವಿತ್ರ ಲೋಕೇಶ್ ಜೀವನದ ಕುರಿತು ನಿಮಗೆ ಗೊತ್ತಿರದ ಕೂತೂಹಲಕಾರಿ ವಿಷಯಗಳು!

ಪವಿತ್ರ ಲೋಕೇಶ್ ಮೂಲತಃ ಮೈಸೂರಿವರು. ಇವರ ತಂದೆ  ಲೋಕೇಶ್ ಕನ್ನಡ ರಂಗಭೂಮಿ ಮತ್ತು ಚಲನಚಿತ್ರ ನಟರಾಗಿದ್ದರು.  ಪವಿತ್ರ 9ನೇ ತರಗತಿಯಲ್ಲಿರುವಾಗ ಅವರ ತಂದೆ ನಿಧನರಾದರು. ಹತ್ತನೇ ತರಗತಿಯಲ್ಲಿ 80ಕ್ಕೂ ಹೆಚ್ಚು ಪ್ರತಿಶತ ಅಂಕ ಗಳಿಸಿ, ನಾಗರಿಕ ಸೇವಾ ಪರೀಕ್ಷೆ ಸಿದ್ಧತೆ ನಡೆಸುತ್ತಿದ್ದರು. ನಂತರ ವಾಣಿಜ್ಯ ವಿಷಯದಲ್ಲಿ ಪದವಿ ಪಡೆದು ಒಂದು ಬಾರಿ ನಾಗರಿಕ ಸೇವಾ ಪರೀಕ್ಷೆಯನ್ನು ಎದುರಿಸಿದರು. ಆದರೆ, ಮೊದಲ ಪ್ರಯತ್ನದಲ್ಲಿ ಯಶಸ್ಸು ಸಿಗಲಿಲ್ಲ. ಆಗ ತಂದೆಯ ನಿಧನದಿಂದ ಮನೆಯ ಆರ್ಥಿಕ ಸ್ಥಿತಿಯು ಸರಿಯಾಗಿ ಇರದಿದ್ದ ಕಾರಣ ನಟನೆಗೆ ಇಳಿದರು.

ರೆಬೆಲ್ ಸ್ಟಾರ್ ಅಂಬರೀಶ್ ಸಲಹೆಯಂತೆ ಚಿತ್ರರಂಗಕ್ಕೆ ಬಂದ ಪವಿತ್ರ ಲೋಕೇಶ್ ಅವರ ಮೊದಲ ಸಿನಿಮಾ ಮಿಸ್ಟರ್ ಅಭಿಷೇಕ್. ಆಗ ಅವರಿಗೆ ಕೇವಲ ೧೬ ವರ್ಷ. ಅದೇ ವರ್ಷ ಬಂಗಾರದ ಕಳಶ ಸಿನಿಮಾದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದರು. ನಂತರ ಕೆಲವು ಚಿಕ್ಕ ಪಾತ್ರಗಳಲ್ಲಿ ನಟಿಸಿದರೂ ಮನ್ನಣೆ ಸಿಗದಿದ್ದಾಗ ಒಂದು ಕಂಪನಿಯಲ್ಲಿ HR ಆಗಿ ಕೆಲಸ ಮಾಡಿದರು. ಇವರು ಸಾಧಾರಣ ಯುವತಿಯರಿಗಿಂತ ಸ್ವಲ್ಪ ಎತ್ತರವಿದ್ದರಿಂದ ನಾಯಕನಟಿಯಾಗಿ ನಟಿಸುವ ಅವಕಾಶಗಳು ಸಿಗಲಿಲ್ಲ. ಆದ್ದರಿಂದ ತಮಗೇ ಸಿಕ್ಕ ಎಲ್ಲಾ ಚಿತ್ರಗಳಲ್ಲಿ ನಟಿಸಿದರು.

ಪವಿತ್ರ ಲೋಕೇಶ್ ಅವರಿಗೆ ಮನ್ನಣೆ ತಂದುಕೊಟ್ಟ ಸಿನಿಮಾ ಎಸ್‌.ಎಲ್‌.ಭೈರಪ್ಪನವರ ಕಾದಂಬರಿ ಆಧಾರಿತ ಗಿರೀಶ್ ಕಾಸರವಳ್ಳಿ ನಿರ್ದೇಶನದ ನಾಯಿಯ ನೆರಳು. ಈ ಸಿನಿಮಾದ ನಟನೆಗೆ ವಿಮರ್ಶಕರಿಂದ ಮೆಚ್ಚುಗೆ ವ್ಯಕ್ತವಾಯಿತು. ಜೊತೆಗೆ ಪವಿತ್ರ ಅವರಿಗೆ ಚಿತ್ರದ ನಟನೆಗಾಗಿ ಕರ್ನಾಟಕ ರಾಜ್ಯ ಅತ್ಯುತ್ತಮ ನಟಿ ಪ್ರಶಸ್ತಿ ಲಭಿಸಿತು. 

ಪವಿತ್ರ ಲೋಕೇಶ್ ಕಿರುತೆರೆ ಮಾತ್ರವಲ್ಲದೇ ಕಿರುತೆರೆಯಲ್ಲೂ ತಮ್ಮದೇಯಾದ ಛಾಪು ಮೂಡಿಸಿದ್ದರು. ನಾಗಭರಣ ನಿರ್ದೇಶನದ ಜೀವನ್ಮುಖಿ ಧಾರಾವಾಹಿ ಕಿರುತೆರೆಗೆ ಕಾಲಿಟ್ಟ ಈ ನಟಿ, ಮಧ್ಯವಯಸ್ಕ ವಿಧವೆಯಾಗಿ ನಟಿಸಿದರು. ಬಳಿಕ 2000ರಲ್ಲಿ ಗುಪ್ತಗಾಮಿನಿ ಸೀರಿಯಲ್‌ನಲ್ಲಿ ಅಭಿನಯಿಸಿದರು. ಈ ಸೀರಿಯಲ್ ಕೂಡ ಅವರಿಗೆ ಅಪಾರ ಮನ್ನಣೆ ತಂದು ಕೊಟ್ಟಿತು. ಬಳಿಕ ಗೆಳತಿ, ನೀತಿಚಕ್ರ, ಧರಿತ್ರಿ, ಪುನರ್‌ಜನ್ಮ, ಈಶ್ವರಿ ಸೇರಿದಂತೆ ಹಲವು ಸೀರಿಯಲ್‌ಗಳಲ್ಲಿ ಬಣ್ಣ ಹಚ್ಚಿದರು. 

ಪವಿತ್ರ ಲೋಕೇಶ್ ಅವರು ಮೊದಲು ಒಬ್ಬರನ್ನು ಮದುವೆಯಾಗಿದ್ದರು. ನಂತರ ಕುಟುಂಬ ಸಮಸ್ಯೆಯಿಂದ ಮೊದಲ ಪತಿಯಿಂದ ವಿಚ್ಚೇದನ ಪಡೆದರು. ಆ ಬಳಿಕ ನಟ ಮತ್ತು ರಂಗಕರ್ಮಿ ಸುಚೇಂದ್ರ ಪ್ರಸಾದ್‌ ಅವರೊಂದಿಗೆ ವಾಸವಿದ್ದರು. ಇವರಿಬ್ಬರಿಗೆ ಇಬ್ಬರು ಮಕ್ಕಳಿದ್ದಾರೆ. ಹನ್ನೊಂದು ವರ್ಷಗಳ ಕಾಲ ಒಟ್ಟಿಗಿದ್ದ ಪವಿತ್ರ ಲೋಕೇಶ್ ಮತ್ತು ಸುಚೇಂದ್ರ ಪ್ರಸಾದ್, 2018ರಲ್ಲಿ ದೂರಾದರು.  

ಪವಿತ್ರ ಲೋಕೇಶ್ ಅಭಿನಯದ ಮೊದಲ ತೆಲುಗು ಸಿನಿಮಾ ರವಿತೇಜ ಅಭಿನಯದ ದೊಂಗೋಡು. ಬಳಿಕ ತೆಲುಗಿನಲ್ಲಿ ತಾಯಿ, ತಂಗಿ ಮತ್ತು ಚಿಕ್ಕಮ್ಮನ ಪಾತ್ರಗಳಲ್ಲಿ ನಟಿಸಿ ತೆಲುಗು ಪ್ರೇಕ್ಷಕರ ಮನಗೆದ್ದರು. 

ಸದ್ಯ ನಟಿ ಪವಿತ್ರಾ ಲೋಕೇಶ್ ಮತ್ತು ತೆಲುಗು ನಟ ನರೇಶ್ ಲಿವಿಂಗ್ ರಿಲೇಶನ್‌ಶಿಪ್‌ನಲ್ಲಿದ್ದಾರೆ. ಕಳೆದ ವರ್ಷ ಇವರಿಬ್ಬರು ಮೈಸೂರಿನ ಹೋಟೆಲ್‌ವೊಂದರಲ್ಲಿ ಇದ್ದಾಗ ನರೇಶ್ ಮೂರನೇ ಪತ್ನಿ ರಮ್ಯಾ ಕೈಯಲ್ಲಿ ರೆಡ್‌ ಹ್ಯಾಂಡಾಗಿ ಸಿಕ್ಕಿಬಿದ್ದಿದ್ದರು. ಬಳಿಕ ಇವರಿಬ್ಬರ ಸಂಬಂಧದ ಬಗ್ಗೆ ಎಲ್ಲರಿಗೂ ತಿಳಿದಿತ್ತು. ನಂತರ ಇಬರಿಬ್ಬರ ಕುರಿತು ನರೇಶ್ ಪತ್ನಿ ರಮ್ಯಾ ಸಾಕಷ್ಟು ಆರೋಪಗಳನ್ನು ಮಾಡಿದ್ದರು. ಆದರೆ, ಆ ಆರೋಪಗಳಿಗೆ ಪವಿತ್ರ ಲೋಕೇಶ್ ಮತ್ತು ನರೇಶ್ ಕ್ಯಾರೇ ಅಂದಿರಲಿಲ್ಲ. ಸದ್ಯ 63 ವರ್ಷದ ನರೇಶ್ ಹಾಗೂ 44 ವರ್ಷದ ಪವಿತ್ರ ಸಹಜೀವನ ನಡೆಸುತ್ತಿದ್ದು, ಬಹಿರಂಗವಾಗಿ ಹೇಳಿದ್ದಾರೆ. 

ನರೇಶ್ ಮತ್ತು ಪವಿತ್ರಾ ಲೋಕೇಶ್ ತಮ್ಮದೇ ಲವ್ ಸ್ಟೋರಿಯನ್ನು ಸಿನಿಮಾ ಮಾಡಿದ್ದು, ಇಂದು ಕನ್ನಡ ಮತ್ತು ತೆಲುಗು ಭಾಷೆಯಲ್ಲಿ ಬಿಡುಗಡೆಯಾಗಿದೆ.  'ಮತ್ತೆ ಮದುವೆ' ಸಿನಿಮಾವನ್ನು ಎಂ.ಎಸ್.ರಾಜು ನಿರ್ದೇಶನ ಮಾಡಿದ್ದಾರೆ.