World Music Day:ಕನ್ನಡ ಚಿತ್ರರಂಗದ ಟಾಪ್ ಸಂಗೀತ ನಿರ್ದೇಶಕರ ಪಟ್ಟಿ ಇಲ್ಲಿದೆ.

ಹಂಸಲೇಖ ಅವರನ್ನು ಸ್ಯಾಂಡಲ್‌ವುಡ್‌ನಲ್ಲಿ ನಾದಬ್ರಹ್ಮ ಎಂದೇ ಕರೆಯಲಾಗುತ್ತೆ. 1973ರಲ್ಲಿ ತ್ರಿವೇಣಿ ಚಿತ್ರದ 'ನೀನಾ ಭಗವಂತ' ಹಾಡಿನ ಮೂಲಕ ಗೀತ ರಚನೆಕಾರರಾಗಿ ಚಿತ್ರರಂಗವನ್ನು ಪ್ರವೇಶಿಸಿದ ಇವರು, ಇದುವರೆಗೆ ಕನ್ನಡ ಮಾತ್ರವಲ್ಲದೆ ತಮಿಳು, ತೆಲುಗು, ಮಲಯಾಳಂ ಭಾಷಾ ಚಿತ್ರಗಳಿಗೆ ಸಂಗೀತ, ಸಾಹಿತ್ಯ ನೀಡಿದ್ದಾರೆ. 1986ರಲ್ಲಿ ಮೊದಲ ಬಾರಿಗೆ 'ಹೆಣ್ಣೆ ನಿನಗೇನು ಬಂಧನ' ಚಿತ್ರಕ್ಕೆ ಸಂಗೀತ ನಿರ್ದೇಶನ ಮಾಡಿದ ಇವರು, ನಂತರ ರವಿಚಂದ್ರನ್ ಜೊತೆ ಸೂಪರ್ ಹಿಟ್ ಸಿನಿಮ ಪ್ರೇಮಲೋಕ ಚಿತ್ರಕ್ಕೆ ಸಂಗೀತ ನೀಡಿದರು. ಹಂಸಲೇಖ ಇದುವರೆಗೂ300ಕ್ಕೂ ಹೆಚ್ಚು ಚಿತ್ರಗಳಿಗೆ ಸಂಗೀತ ನೀಡಿದ್ದು, ವಿ. ಹರಿಕೃಷ್ಣ, ವಿ.ಮನೋಹರ್ ಸೇರಿದಂತೆ ಅನೇಕ ಸಂಗೀತ ನಿರ್ದೇಶಕರಿಗೆ ಮಾರ್ಗದರ್ಶಕರು ಆಗಿದ್ದಾರೆ. 

ವಿ.ಹರಿಕೃಷ್ಣ ಅವರು ತಮ್ಮ ನಿಧನರಾದ ಕಾರಣ ಶಿಕ್ಷಣವನ್ನು ಅರ್ಧಕ್ಕೆ ನಿಲ್ಲಿಸಿ, ಮೆಕ್ಯಾನಿಕ್ ಅಂಗಡಿಯೊಂದನ್ನು ತೆರೆದು ಮೆಕ್ಯಾನಿಕ್ ಕೆಲಸ ಮಾಡಲು ಆರಂಭಿಸಿದರು. ಮೆಕ್ಯಾನಿಕ್ ಕೆಲಸ ಮಾಡುವುದ ಜೊತೆಗೆ ಸಂಗೀತದಲ್ಲಿ ಆಸಕ್ತಿ ಹೊಂದಿದ್ದರು. 1997ರಲ್ಲಿ ಸಂಗೀತ ಸಂಯೋಜಕರಾದ ಜಿ.ಕೆ ವೆಂಕಟೇಶ್ ಅವರ ಪುತ್ರಿ ವಾಣಿ ಎನ್ನುವರನ್ನು ವಿವಾಹವಾದರು. ಹರಿಕೃಷ್ಣ ಅವರ ಸಂಗೀತಕ್ಕೆ ವೆಂಕಟೇಶ್ ಪ್ರೇರಣೆಯಾದರು. ಬಳಿಕ  ಸಂಗೀತ ಸಂಯೋಜಕರ ಜೊತೆ ಕೆಲಸ ಮಾಡುತ್ತಿದ್ದ ಇವರು, ನಂತರದಲ್ಲಿ  ಹಂಸಲೇಖ, ವಿ.ರವಿಚಂದ್ರನ್, ಗುರು ಕಿರಣ್, ಮೊದಲಾದವರ ಜೊತೆಯಲ್ಲಿ ಕೀಬೋರ್ಡ್ ನುಡಿಸುತಿದ್ದರು. ಆ ಬಳಿಕ ಕಿರುಚಿತ್ರಗಳಿಗೆ ಮ್ಯೂಸಿಕ್ ಕೊಡಲು ಪ್ರಾರಂಭಿಸಿದ ಇವರಿಗೆ, 2006ರಲ್ಲಿ ದಿನಕರನ್ ತೂಗುದೀಪ್  ನಿರ್ಮಾಣದಲ್ಲಿ ಮೂಡಿಬಂದ 'ಜೊತೆ ಜೊತೆಯಲ' ಚಿತ್ರಕ್ಕೆ ಸಂಗೀತ ಸಂಯೋಜಕರಾಗಿ ಅವಕಾಶ ದೊರೆಯಿತು. ಈ ಚಿತ್ರ ಭರ್ಜರಿಯಾಗಿ ಯಶಸ್ಸು ಕಂಡಿತು. ಇದರಿಂದ ಇವರಿಗೆ ಒಳ್ಳೆ ಇಮೇಜ್ ಬಂತು. ಹೀಗೆ ದಿನಕರ್ ತೂಗುದೀಪ್ ಅವರ ನಿರ್ಮಾಣದಲ್ಲಿ ಮತ್ತಷ್ಟು ಚಿತ್ರಗಳು ಹರಿಕೃಷ್ಣ ಅವರ ಕೈಸೇರಿತು. ದರ್ಶನ್ ಅಭಿನಯದ ಬ್ಲಾಕ್ ಬಸ್ಟರ್ ಚಿತ್ರಗಳಾದ ನವಗ್ರಹ, ಭೂಪತಿ, ಗಜ, ಪೊರ್ಕಿ, ಪ್ರಿನ್ಸ್, ಸಾರಾಥಿ, ಚಿಂಗಾರಿ ಇನ್ನು ಹಲವು ಚಿತ್ರಗಳಲ್ಲಿ ಸಂಗೀತ ಸಂಯೋಜಕರಾಗಿ ಚಿತ್ರರಂಗದಲ್ಲಿ ಒಂದು ಒಳ್ಳೆಯ ಸ್ಥಾನವನ್ನು ಪಡೆದರು.  

ಅರ್ಜುನ್ ಜನ್ಯ ಕನ್ನಡ ಚಿತ್ರರಂಗದ ಸಂಗೀತ ಸಂಯೋಜಕರು, ಗಾಯಕರು, ಸಂಗೀತ ನಿರ್ದೇಶಕರಾಗಿ ಗುರುತಿಸಿಕೊಂಡಿದ್ದಾರೆ. ಕನ್ನಡ ಚಿತ್ರರಂಗದ ಎ ಆರ್ ರೆಹಮಾನ್ ಎನ್ನುವ ಹೆಗ್ಗಳಿಕೆ ಪಡೆದಿರುವ ಇವರು, ತಮ್ಮ ಸಂಗೀತ ನಿರ್ದೇಶನದಿಂದ ಮನೆ ಮಾತಾಗಿರುವ ಪ್ರತಿಭಾವಂತ ಸಂಗೀತ ನಿರ್ದೇಶಕ. ಕನ್ನಡ ಚಿತ್ರರಂಗದಲ್ಲಿ ಗುರುತಿಸಿಕೊಳ್ಳುವ ಮೊದಲು ಅರ್ಜುನ್ ಜನ್ಯ, ವಿ.ಮನೋಹರ್ ಮತ್ತು ಕೆ.ಕಲ್ಯಾಣ್ ಅವರ ಜೊತೆಯಲ್ಲಿ ಕೀಬೋರ್ಡ್ ಕಲಿಯುತ್ತಿದ್ದರು. ಜೊತೆಗೆ ಎ.ಆರ್ ರೆಹಮಾನ್ ಅವರ ಅಪ್ಪಟ ಅಭಿಮಾನಿಯಾರುವ ಇವರಿಗೆ, ಅವರ ಭೇಟಿಯ ನಂತ್ರ ಸಂಗೀತ ಸಂಯೋಜನೆ ಮಾಡಬೇಕೆಂಬ ಛಲ ಹುಟ್ಟಿಕೊಂಡಿತು. ಅದರಂತೆ 2006ರಲ್ಲಿ ಬಿಡುಗಡೆಗೊಂಡ 'ಆಟೋಗ್ರಾಫ್ ಪ್ಲೀಸ್‌' ಚಿತ್ರಕ್ಕೆ ಮೊದಲ ಸಂಗೀತ ನಿರ್ದೇಶನ ಮಾಡಿದರು. ಅಲ್ಲಿಂದ ಮುಂದೆ ಹಲವಾರು ಚಿತ್ರಗಳ ಹಾಡುಗಳಿಗೆ ಸಂಗೀತ ಸಂಯೋನೆ ಮಾಡಿದ್ದಾರೆ.

ಬಾಲ್ಯ ಶಿಕ್ಷಣವನ್ನೆಲ್ಲಾ ಶಿವಮೊಗ್ಗದಲ್ಲಿ ಮುಗಿಸಿದ ಅನೂಪ್ ಸೀಳಿನ್, ಉನ್ನತ ಶಿಕ್ಷಣಕ್ಕಾಗಿ ಬೆಂಗಳೂರಿಗೆ ಬರುತ್ತಾರೆ. ಜೊತೆಗೆ ಸಂಗೀತದ ಬಗ್ಗೆ ಸಾಕಷ್ಟು ಆಸಕ್ತಿ ಹೊಂದಿದ್ದ ಇವರು, ಶಿಕ್ಷಣದ ಜೊತೆಗೆ ಸಂಗೀತ ಕಲಿಯಲು ಆರಂಭಿಸಿದರು. ಬಳಿಕ ಕನ್ನಡ ಚಿತ್ರರಂಗದ ನಾದಬ್ರಹ್ಮ ಹಂಸಲೇಖ ಅವರ ಜೊತೆಯಲ್ಲಿ ಸಂಗೀತ ನಿರ್ದೇಶಿಸುವುದರ ಮೂಲಕ ಗುರುತಿಸಿಕೊಳ್ಳುತ್ತಾರೆ. ಮೊಟ್ಟಮೊದಲ ಬಾರಿಗೆ  ಒಂದಾಗೋಣ ಬಾ ಸಿನಿಮಾದ 'ಯಾರೋ ಯಾರೋ ನನ್ನವಳು ಯಾರೋ' ಹಾಡಿದ ಇವರಿಗೆ ದೊಡ್ಡ  ಬ್ರೇಕ್ ಸಿಕ್ಕಿತು. ಬಳಿಕ ಮದನ, ಜಾನಪದ, ನೆನಪಿರಲಿ, ಸಿಕ್ಸರ್ ಸಿನಿಮಾಗಳ ಹಾಡುಗಳಿಗೆ ಧ್ವನಿಯಾದ ಇವರು, ಮೊದಲು ಬಾರಿಗೆ ಗೂಳಿ ಸಿನಿಮಾಗೆ ಸಂಗೀತ ಸಂಯೋಜಿಸಿದರು. ಬಳಿಕ ಎದ್ದೇಳು ಮುಂಜುನಾಥ ಚಿತ್ರಕ್ಕೆ ಸಂಗೀತ ನೀಡಿದರು. ಈ ಹಾಡುಗಳು ಹಿಟ್ ಆಗಿ ಅವರಿಗೆ ಒಳ್ಳೆಯ ಇಮೇಜ್ ತಂದುಕೊಟ್ಟವು. ಬಳಿಕ ಕನ್ನಡದ ಟಾಪ್ ಸಂಗೀತ ನಿರ್ದೇಶಕರಾಗಿ ಗುರುತಿಸಿಕೊಂಡರು. 

ಅಜನೀಶ್ ಲೋಕನಾಥ್ ಕನ್ನಡ ಚಿತ್ರರಂಗದ ಪ್ರತಿಭಾವಂತ ಸಂಗೀತ ನಿರ್ದೇಶಕ ಹಾಗೂ ಗಾಯಕರಾಗಿ ಗುರುತಿಸಿಕೊಂಡಿದ್ದಾರೆ. ಭದ್ರಾವತಿಯಲ್ಲಿ ಜನಿಸಿದ ಇವರು 2009 ರಲ್ಲಿ ತೆರೆಕಂ `ಶಿಶಿರ' ಚಿತ್ರದ ಮೂಲಕ ಸಂಗೀತ ನಿರ್ದೇಶಕರಾದರು. ಮುಂದೆ 2014ರಲ್ಲಿ ತೆರೆಕಂಡ ಉಳಿದವರು ಕಂಡಂತೆ ಚಿತ್ರದ ಸಂಗೀತಕ್ಕಾಗಿ ವಿಮರ್ಶಕರಿಂದ ಮತ್ತು ಪ್ರೇಕ್ಷಕರಿಂದ ಪ್ರಶಂಸೆಗೊಳಗಾದರು. ಈ ಚಿತ್ರಕ್ಕಾಗಿ ಕರ್ನಾಟಕ ರಾಜ್ಯ ಚಲನಚಿತ್ರ ಪ್ರಶಸ್ತಿ ಮತ್ತು ಪಿಲ್ಮ ಫೇರ್ ಪ್ರಶಸ್ತಿ ಪಡೆದರು. `ರಂಗಿತರಂಗ ' ಚಿತ್ರದ ಹಿನ್ನಲೆ ಸಂಗೀತಕ್ಕಾಗಿ ಐಫಾ ಪ್ರಶಸ ಕೂಡ ಪಡೆದರು. ಮುಂದೆ ಇಷ್ಟಕಾಮ್ಯ, ಶ್ರೀಕಂಠ, ಕಿರಿಕ್ ಪಾರ್ಟಿ ಮುಂತಾದ ಚಿತ್ರಗಳಿಗೆ ಸಂಗೀತ ನೀಡಿದ ಇವರು, ೨೦೨೨ರಲ್ಲಿ ಕಾಂತಾರ ಸಿನಿಮಾಗೆ ಸಂಗೀತ ನೀಡುವ ಮೂಲಕ ಸಾಕಷ್ಟು ಜನಪ್ರಿಯತೆ ಪಡೆದುಕೊಂಡಿದ್ದಾರೆ. ಸದ್ಯ ಕನ್ನಡ ಮಾತ್ರವಲ್ಲದೇ ತೆಲುಗು ಮತ್ತು ತಮಿಳು ಚಿತ್ರರಂಗದಲ್ಲೂ ಗುರುತಿಸಿಕೊಂಡಿದ್ದಾರೆ.

ಗುರುಕಿರಣ್ ಕನ್ನಡ ಚಿತ್ರರಂಗದ ಹೆಸರಾಂತ ಸಂಗೀತ ನಿರ್ದೇಶಕರುಗಳಲ್ಲೊಬ್ಬರು. ಇವರು ಕಾಲೇಜಿನಲ್ಲಿರುವಾಗಲೇ ಗೀತೆಗಳನ್ನು ಬರೆಯುವಲ್ಲಿ, ಹಾಡುವುದರಲ್ಲಿ ನಿಸ್ಸಿಮರಾಗಿದ್ದರು. ನಂತರ ಕನ್ನಡ ಚಿತ್ರರಂಗದ ಹೆಸರಾಂತ ಸಂಗೀತ ನಿರ್ದೇಶಕ ವಿ.ಮನೋಹರ್ ಅವರ ಜೊತೆ ಸೇರಿಕೊಂಡು ಅವರ ಜೊತೆಯಲ್ಲಿ ಕೆಲಸವನ್ನು ಮಾಡುತ್ತಾರೆ. ನಂತರ ಇವರಿಗೆ ಉಪೇಂದ್ರ ಅಭಿನಯದ 'ಏ' ಚಿತ್ರದಲ್ಲಿ ಸಂಗೀತ ನಿರ್ದೇಶನವನ್ನು ಮಾಡಲು ಅವಕಾಶ ದೊರಕಿದಾಗ ಒಳ್ಳೆಯ ಸಂಗೀತವನ್ನು ರೂಪಿಸಿ, ಸ್ಯಾಂಡಲ್‌ವುಡ್‌ನಲ್ಲಿ ಗುರುತಿಸಿಕೊಂಡರು. ಈ ಚಿತ್ರದ ನಂತರ ಇವರಿಗೆ ಅನೇಕ ಚಿತ್ರಗಳಿಗೆ ಸಂಗೀತ ಸಂಯೋಜನೆ ಮಾಡಲು ಅವಕಾಶ ದೊರೆತವು. ಹಲವಾರು ಚಲನಚಿತ್ರಗಳಲ್ಲಿ ಹಾಡಿರುವ ಗುರುಕಿರಣ್ ಅವರು ಹಿನ್ನೆಲೆ ಗಾಯಕರೂ ಕೂಡ.

ರವಿ ಬಸ್ರೂರ್ ಕನ್ನಡ ಚಿತ್ರರಂಗದ ಪ್ರತಿಭಾವಂತ ಸಂಗೀತ ನಿರ್ದೇಶಕ, ನಟ, ನಿರ್ದೇಶಕ, ಸಂಭಾಷಣಾಕಾರ, ನಿರ್ಮಾಪಕ ಮತ್ತು ಗೀತರಚನಾಕಾರಾಗಿ ಗುರುತಿಸಿಕೊಂಡಿದ್ದಾರೆ. ಇವರ ಚಿತ್ರಗಳಲ್ಲಿ ಹಿನ್ನಲೆ ಸಂಗೀತ ಅದ್ಭುತವಾಗಿರುತ್ತದೆ. 2014ರಲ್ಲಿ ತೆರೆಕಂಡ ಉಗ್ರಂ ಚಿತ್ರಕ್ಕೆ ಹಿನ್ನಲೆ ಸಂಗೀತ ನೀಡುವುದರ ಮೂಲಕ ಕನ್ಡಡ ಚಿತ್ರರಂಗಕ್ಕೆ ಪ್ರವೇಶಿದ ಇವರು, ಚಿತ್ರದ ಹಿನ್ನಲೆ ಸಂಗೀತಕ್ಕಾಗಿ ಜೀ ಮ್ಯುಸಿಕ್ ಪ್ರಶಸ್ತಿ ಕೂಡ ಪಡೆದರು. ನಂತರ ಕರ್ವ, ಮಫ್ತಿ, ಅಂಜನಿಪುತ್ರ, ಕಟಕ ಮುಂತಾದ ಚಿತ್ರಗಳಿಗೆ ಸಂಗೀತ ನೀಡಿರುವ ರವಿ ಅವರು, ಅಂಜನಿಪುತ್ರ ಚಿತ್ರದ ಗೀತೆಯೊಂದಕ್ಕೆ ಸೈಮಾ ಅತ್ತ್ಯುತ್ತಮ ಹಿನ್ನಲೆ ಗಾಯಕ ಪ್ರಶಸ್ತಿ ಪಡೆದಿದ್ದಾರೆ. ಕುಂದಾಪುರ ಕನ್ನಡ ಭಾಷೆಯಲ್ಲಿ ಗರಗರ ಮಂಡಲ ಮತ್ತು ಬಿಲಿಂಡರ್ ಎಂಬ ಚಿತ್ರಗಳನ್ನು ನಿರ್ದೇಶಿಸುವ ಮೂಲಕ ನಿರ್ದೇಶಕನಾಗಿ ಹಾಗೂ ನಟರಾಗಿ ಕೂಡ ಮಿಂಚಿದ್ದಾರೆ. 

ರಘು ದಿಕ್ಷಿತ್  ಕನ್ನಡ ಚಿತ್ರರಂಗದ ಖ್ಯಾತ ಸಂಗೀತಗಾರ, ಸಂಗೀತ ನಿರ್ದೇಶಕ. ಇವರು ಗಿಟಾರ್, ಬ್ಯಾಂಡ್ ನುಡಿಸುವುದರ ಮೂಲಕ ಕರ್ನಾಟಕ ಮಾತ್ರವಲ್ಲದೆ, ದೇಶ-ವಿದೇಶಗಳಲ್ಲೂ ಹೆಸರು ಮಾಡಿದ್ದಾರೆ. ರಘು ದಿಕ್ಷಿಥ್ ಎಂದರೆ ಶಿಶುನಾಳ ಷರೀಫ್. ಇವರು ಹಾಡುವ ಹಾಡುಗಳಲ್ಲೇ ಶಿಶುನಾಳ ಷರೀಫ್ ಅವರ ಆಯ್ದ ಭಾಗದಿಂದ ಆರಿಸುತ್ತಾರೆ. ಇವರು ಅನೇಕ ಕಾರ್ಯಕ್ರಮಗಳಲ್ಲಿ ತಮ್ಮದೇ ಸ್ವಂತ ಮೆಲೋಡೀಸ್ ಮೂಲಕ ಜನರನ್ನು ಹುಚ್ಚೆಬ್ಬಿಸಿದವರು. ಇವರು ಮೊದಲ ಬಾರಿಗೆ ಸೈಕೋ ಚಿತ್ರಕ್ಕೆ ಸಂಗೀತ ಸಂಯೋಜಿಸಿ, ತಮ್ಮದೇ ಆದ ಶೈಲಿಯಲ್ಲಿ ಗುರುತಿಸಿಕೊಂಡರು. ನಂತರ ಜಸ್ಟ್ ಮಾತ್ ಮಾತಲ್ಲಿ, ಸೂಪರ್ ಮ್ಯಾನ್, ಕೋಟೆ ಹೀಗೆ ಹಲವು ಸಿನಮಾಗಳಿಗೆ ಸಂಗೀತ ಸಂಯೋಜಿಸಿ ಹಲವು ಭಾಷೆಗಳಲ್ಲೂ ತಮ್ಮನ್ನು ಗುರುತಿಸಿಕೊಂಡಿದ್ದಾರೆ.