'ಲಕ್ಷ್ಮೀ ನಿವಾಸ' ಸೀರಿಯಲ್‌ ಸೀರಿಯಲ್‌ನ ನಟಿ ದಿಶಾ ಮದನ್ ಕುರಿತ ಕುತೂಹಲಕಾರಿ ವಿಷಯಗಳಿವು!

ದಿಶಾ ಮದನ್ ಅವರು ಮೂರನೇ ವಯಸ್ಸಿನಲ್ಲಿದ್ದಾಗಲೇ ಭರತನಾಟ್ಯಂ ಕಲಿಯಲು ಆರಂಭಿಸಿದ್ದರು.  ನಂತರ ಐದನೇ ವಯಸ್ಸಿನಲ್ಲಿರುವಾಗ ರಾಮಾಯಣದಲ್ಲಿರುವ ವಾನರನ ಪಾತ್ರದಲ್ಲಿ ದಿಶಾ ಕಾಣಿಸಿಕೊಂಡಿದ್ದರು. ಇದಕ್ಕೆ ಸಂಭಾವನೆ ಕೂಡ ಸಿಕ್ಕಿತ್ತಂತೆ. ಜೊತೆಗೆ 10ನೇ ಕ್ಲಾಸ್‌ ಮುಗಿವುದರೊಳಗೆ ಭರತನಾಟ್ಯಂನಲ್ಲಿ ಜೂನಿಯರ್ ಹಾಗೂ ಸೀನಿಯರ್ ಎಕ್ಸಾಮ್ ಮುಗಿಸಿದ್ದರು.

ದಿಶಾ ಮದನ್ ಅವರು ಬರೋಬ್ಬರಿ 13 ವರ್ಷಗಳ ಕಾಲ ಭರತನಾಟ್ಯಂ ಕಲಿತರು. ಇದಾದ ಬಳಿಕ ಕುಚುಪುಡಿ ನೃತ್ಯ ಕಲಿತರು. ಆನಂತರದಲ್ಲಿ ಹಿಪ್‌ಹಾಪ್‌, ಸಾಲ್ಸಾ, ಬಾಲಿವುಡ್ ಹಾಗೂ ಕಲರಿಪಯಟ್ಟು ನೃತ್ಯವನ್ನು ಕಲಿತಿದ್ದಾರೆ. ಮ್ಯೂಸಿಕಲಿ ಎಂಬ ಆಪ್‌ನಲ್ಲಿ ಮಿಲಿಯನ್ ಫಾಲೋವರ್ಸ್ ಹೊಂದಿದ ಮೊದಲ ಭಾರತೀಯ ಅಂದರೆ ಅದು ದಿಶಾ ಮದನ್.

ದಿಶಾ ಮದನ್ ಅವರು 'ಡ್ಯಾನ್ಸ್ ಇಂಡಿಯಾ ಡ್ಯಾನ್ಸ್' ರಿಯಾಲಿಟಿ ಶೋನಲ್ಲಿ ಭಾಗವಹಿಸಿದ್ದರು. ಇದು ಅಂತಾರಾಷ್ಟ್ರೀಯ ಮಟ್ಟದ ವೇದಿಕೆಯಾಗಿತ್ತು. ಆನಂತರದಲ್ಲಿ ಸುನಾಮಿ ಕಿಟ್ಟಿ ಜೊತೆಗೆ ಕನ್ನಡ 'ಡ್ಯಾನ್ಸ್ ಸ್ಟಾರ್' ರಿಯಾಲಿಟಿ ಶೋನಲ್ಲಿ ಭಾಗವಹಿಸಿ ವಿಜೇತರಾಗಿದ್ದರು. ಪತಿಯೊಂದಿಗೆ ಇಸ್ಮಾರ್ಟ್‌ ಸೂಪರ್ ಜೋಡಿ ಕಾರ್ಯಕ್ರಮದಲ್ಲೂ ಭಾಗವಹಿಸಿದ್ದರು.

ಈ ನಟಿ 2006ರಲ್ಲಿ ಪ್ರಸಾರವಾದ 'ಕುಲವಧು' ಧಾರಾವಾಹಿಯಲ್ಲಿ ವಚನಾ ಪಾತ್ರದ ಮೂಲಕ ಸಿಕ್ಕಾಪಟ್ಟೆ ಜನಪ್ರಿಯತೆ ಗಳಿಸಿದ್ದರು. ವಚನಾ ಎಂಬ ಪಾತ್ರ ಬಹಳ ಸ್ವಾರ್ಥ ಮನೋಭಾವದ, ತಂಗಿಗೆ ಏನೂ ಉಳಿತಾಗಲು ಬಿಡದ ಕೆಟ್ಟ ಪಾತ್ರವಾಗಿತ್ತು. ಈ ಪಾತ್ರದ ಮೂಲಕ ದಿಶಾ 'ವಚನಾ' ಅಂತಲೇ ಖ್ಯಾತಿ ಗಳಿಸಿದ್ದರು. ಬಳಿಕ ತಂದೆಗೆ ಉದ್ಯಮದಲ್ಲಿ ಸಹಾಯ ಮಾಡಬೇಕೆಂದು ಧಾರಾವಾಹಿಗೆ ಗುಡ್‌ಬೈ ಹೇಳಿದ್ದರು.

ದಿಶಾ 2020ರಲ್ಲಿ ಬಿಡುಗಡೆಯಾದ 'ಫ್ರೆಂಚ್ ಬಿರಿಯಾನಿ' ಸಿನಿಮಾದಲ್ಲಿ ಪತ್ರಕರ್ತೆ ಮಾಲಿನಿ ಪಾತ್ರ ಮಾಡಿದ್ದರು. ಆನಂತರ ಶ್ರೀಮುತ್ತು ಸಿನಿ ಸರ್ವೀಸಸ್ ಹಾಗೂ ಸಖತ್ ಸ್ಟುಡಿಯೋ ನಿರ್ಮಾಣದಲ್ಲಿ ಮೂಡಿಬಂದ 'ಹೇಟ್ ಯೂ ರೋಮಿಯೋ' ಎಂಬ ವೆಬ್‌ ಸೀರೀಸ್‌ನಲ್ಲಿ ಚಾರ್ವಿ ಎಂಬ ಪಾತ್ರ ಮಾಡಿದ್ದರು. ಹಂಬಲ ಪೊಲಿಟೀಶಿಯನ್ ನೊಗರಾಜ್‌ ಸಿನಿಮಾದಲ್ಲೂ ನಟಿಸಿದ್ದಾರೆ.

ಸದ್ಯ ಲಕ್ಷ್ಮೀ ನಿವಾಸ ಧಾರಾವಾಹಿಯಲ್ಲಿ ಭಾವನಾ ಪಾತ್ರ ಮಾಡುತ್ತಿರುವ ದಿಶಾ, ಬಹಳ ಸೌಮ್ಯ ಹಾಗೂ ಮೃದು ಸ್ವಭಾವದ ಹೆಣ್ಣುಮಗಳಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಹತ್ತು ವರ್ಷಗಳ ಹಿಂದೆ ಮಾಡಿದ ವಚನಾ ಪಾತ್ರಕ್ಕೆ ಈ ಪಾತ್ರ ಸಂಪೂರ್ಣ ತದ್ವಿರುದ್ದವಾಗಿದೆ. ಭಾವನಾ ಪಾತ್ರದಲ್ಲಿ ತ್ಯಾಗ ಹಾಗೂ ಮಾತೃ ಹೃದಯದ ಟಚ್ ಇದೆ. ತಮ್ಮ ಸ್ವಂತ ಮಗಳಲ್ಲದಿದ್ದರೂ ಖುಷಿ ಎಂಬ ಮಗುವನ್ನು ಬಹಳಷ್ಟು ಪ್ರೀತಿಸಿರುವ ಭಾವನಾ ಪಾತ್ರ ಕಿರುತೆರೆ ಪ್ರೇಕ್ಷಕರ ಮನಗೆದ್ದಿದೆ.,