ಅಗ್ನಿಸಾಕ್ಷಿ ನಟ ಆತ್ಮಹತ್ಯೆ: ಸಂಪತ್ ಜಯರಾಮ್ ಜೀವನದ ಕುರಿತ ಮಾಹಿತಿ ಇಲ್ಲಿದೆ.

ನಟ ಸಂಪತ್ ಜಯರಾಮ್ ಕನ್ನಡ ಚಿತ್ರರಂಗ ಪೋಷಕ ನಟ. ಇವರು ಕನ್ನಡ ಹಲವು ಧಾರಾವಾಹಿ ಹಾಗೂ ಸಿನಿಮಾಗಳಲ್ಲಿ ಅಭಿನಯಿಸಿದ್ದರು.

ನಟ ಸಂಪತ್ ಜಯರಾಮ್ ಕಲರ್ಸ್ ಕನ್ನಡ ಧಾರಾವಾಹಿಯಲ್ಲಿ ಪ್ರಸಾರವಾಗುತ್ತಿದ್ದ ಅಗ್ನಿಸಾಕ್ಷಿ ಧಾರಾವಾಹಿಯಲ್ಲಿ ನಟಿಸಿದ್ದರು. ಈ ಸೀರಿಯಲ್‌ನಲ್ಲಿ ನಾಯಕಿ (ಸನ್ನಿಧಿ) ಅಣ್ಣನ ಪಾತ್ರಕ್ಕೆ ಬಣ್ಣ ಹಚ್ಚಿದ್ದರು. ಇದರ ಜೊತೆಗೆ ಹಲವು ಧಾರಾವಾಹಿಗಳಲ್ಲಿ ಫೋಷಕ ಪಾತ್ರ ನಿರ್ವಹಿಸಿದ್ದರು. 

ಸಂಪತ್ ಜಯರಾಮ್ 2022ರಲ್ಲಿ ತೆರೆಕಂಡ ನವನ್ ಶ್ರೀನಿವಾಸ್ ನಿರ್ದೇಶನದ ನೈಜ ಘಟನೆಯಾಧಾರಿತ ಕಂಬ್ಳಿ ಹುಳ ಸಿನಿಮಾದಲ್ಲಿ ಅಭಿನಯಿಸಿದ್ದರು. 2023ರಲ್ಲಿ ಬಾಲಾಜಿ ಫೋಟೋ ಸ್ಟುಡಿಯೋ ಸಿನಿಮಾದಲ್ಲಿ ಅಭಿನಯಿಸಿದ್ದರು.   

ಸಂಪತ್ ಜಯರಾಮ್ 2023ರ ಏಪ್ರಿಲ್ 22ರಂದು ನೆಲಮಂಗಲದ ತಮ್ಮ ನಿವಾಸದಲ್ಲಿ ಆತ್ಮಹತ್ಯೆಗೆ ಶರಣಾಗಿದ್ದಾರೆ. ಅವರಿಗೆ 35ವರ್ಷ ವಯಸ್ಸಾಗಿತ್ತು. ಅವರು ಸೂಕ್ತ ಅವಕಾಶವಿಲ್ಲದೇ ಕಂಗಾಲಾಗಿದ್ದರು ಎನ್ನಲಾಗಿದೆ.  

ಸ್ಯಾಂಡಲ್‌ವುಡ್‌ ನಟ ಸಂಪತ್ ಜಯರಾಮ್ ಒಂದು ವರ್ಷದ ಹಿಂದೆಯಷ್ಟೇ ಮದುವೆಯಾಗಿದ್ದರು. ಇತ್ತೀಚಿಗಷ್ಟೆ ವೈವಾಹಿಕ ಜೀವನಕ್ಕೆ ಕಾಲಿಟ್ಟಿದ್ದ ಅವರು ಇಹಲೋಕ ತ್ಯಜಿಸಿರುವುದು ಕುಟುಂಬಸ್ಥರಿಗೆ ತೀವ್ರ ಆಘಾತ ಉಂಟುಮಾಡಿದೆ.

ಸಂಪತ್ ಜಯರಾಮ್ ನಿಧನಕ್ಕೆ ನಟ ರಾಜೇಶ್ ಧ್ರುವ ಕಂಬನಿ ಮಿಡಿದ್ದಾರೆ. ನಿನ್ನ ಅಗಲಿಕೆ ತಡೆದಕೊಳ್ಳುವ ಶಕ್ತಿ ನಮಗಿಲ್ಲ ಮಗ. ಅದೆಷ್ಟೋ ಸಿನಿಮಾ ಮಾಡೋದಿದೆ. ಅದೆಷ್ಟೋ ಜಗಳ ಬಾಕಿಯಿದೆ. ಕಂಡ ಕನಸು ನನಸು ಮಾಡಿಕೊಳ್ಳೋಕೆ ಇನ್ನೂ ಸಾಕಷ್ಟು ಸಮಯ ಇದೆ. ಇನ್ನೂ ನಿನ್ನ ದೊಡ್ಡ-ದೊಡ್ಡ ಸ್ಟೇಜ್‌ನಲ್ಲಿ ನೋಡೋದಿತ್ತು ಎಂದು ಕಂಬನಿ ಮಿಡಿದಿದ್ದಾರೆ.