ಸ್ಯಾಂಡಲ್‌ವುಡ್‌ನಲ್ಲಿ ಟಗರು ಲಕ್: ಮೇಕೆ, ಟಗರು ಇದ್ದ ಈ ಸಿನಿಮಾಗಳು ಸೂಪರ್ ಹಿಟ್!

2018ರಲ್ಲಿ ತೆರೆಕಂಡ ದುನಿಯಾ ಸೂರಿ ನಿರ್ದೇಶನದ ಟಗರು ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ಸಿನಿಮಾ ಪೊಲೀಸ್ ಮತ್ತು ಡೆಡ್ಲಿ ರೌಡಿಗಳ ಕಣ್ಣಾಮುಚ್ಚಾಲೆಯನ್ನು ತೋರಿಸಿತ್ತು. ಖಡಕ್ ಪೊಲೀಸ್ ಅಧಿಕಾರಿಯಾಗಿ ಶಿವಣ್ಣ ಮತ್ತು ಕ್ರೌರ್ಯದ ಪ್ರತಿರೂಪ ಡಾಲಿಯಾಗಿ ಧನಂಜಯ ಮಿಂಚಿದ್ದರು. ಸಿನಿಮಾದಲ್ಲಿ ಶಿವರಾಜ್‌ಕುಮಾರ್ ಪಾತ್ರವನ್ನು ಟಗರುಗೆ ಹೋಲಿಸಲಾಗಿತ್ತು. ಚಿತ್ರದ 'ವಾರೆ ನೋಟ ನೋಡೈತೆ. ಕಾಲು ಕೆರೆದು ನಿಂತೈತೆ. ಗುಟುರು ಹಾಕಿ ಬಂದೈತೆ. ಎದುರು ಹೋದರೆ ಗಮ್ತೈತೆ' ಎಂಬ ಹಾಡಿನಲ್ಲಿ ಸಿವಣ್ಣನನ್ನು ಟಗರುಗೆ ಹೋಲಿಕೆ ಮಾಡಿ ವರ್ಣಿಸಲಾಗಿತ್ತು. ಈ ಸಿನಿಮಾ ಬಾಕ್ಸಾಪೀಸ್‌ನಲ್ಲಿ ಸೂಪರ್ ಹಿಟ್ ಆಗುವುದಲ್ಲದೇ 2018ರಲ್ಲಿ ಅತೀ ಹೆಚ್ಚು ಗಳಿಕೆ ಕಂಡ ಮೂರನೇ ಚಿತ್ರವಾಗಿತ್ತು. ಶಿವಣ್ಣನಿಗೆ ಮತ್ತೊಂದು ಸಕ್ಸಸ್ ನೀಡಿ, ಡಾಲಿ ಧನಂಜಯ್‌ಗೆ ಹೊಸ ಇಮೇಜ್ ಕೊಟ್ಟಿತ್ತು. 

ಟಗರು ಚಿತ್ರಕ್ಕೂ ಮುನ್ನ ಸೆಂಚುರಿ ಸ್ಟಾರ್ ಶಿವರಾಜ್‌ಕುಮಾರ್ ಅಭಿನಯಿಸಿದ್ದ ಸಿನಿಮಾ ಮೈಲಾರಿ. ಆರ್ ಚಂದ್ರು ನಿರ್ದೇಶನದ ಈ ಸಿನಿಮಾದಲ್ಲಿ  ಶಿವಣ್ಣ ಮಾಸ್ ಹಾಗೂ ಸ್ಟೈಲಿಶ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು. ಈ ಚಿತ್ರಕ್ಕೆ ಪ್ರೇಕ್ಷಕರಿಂದ ಮೆಚ್ಚುಗೆ ಕೂಡ ಸಿಕ್ಕಿತ್ತು.  2010ರಲ್ಲಿ ತೆರೆಕಂಡು ಹಿಟ್ ಆದ ಸಿನಿಮಾಗಳಲ್ಲಿ ಮೈಲಾರಿ ಕೂಡ ಒಂದಾಗಿತ್ತು. ಈ ಚಿತ್ರದ ಟೈಟಲ್ ಡಾ.ರಾಜ್‌ಕುಮಾರ್ ಅಭಿನಯದ ಬಂಗಾರದ ಪಂಜರ ಚಿತ್ರದಲ್ಲಿನ ಮೇಕೆಗೆ ಇಟ್ಟಿದ್ದ ಹೆಸರು. ಮೈಲಾರಿ ಬಾಕ್ಸಾಫೀಸ್‌ನಲ್ಲಿ 25 ಕೋಟಿ ಅಧಿಕ್ ಕಲೆಕ್ಷನ್ ಮಾಡಿತ್ತು.  

ಕ್ರೇಜಿ ಸ್ಟಾರ್ ನಿರ್ದೇಶಿಸಿ, ನಟಿಸಿದ್ದ ಸಿಪಾಯಿ ಸಿನಿಮಾದಲ್ಲಿಯೂ ಕೂಡ ಟಗರು ಫೈಟ್ ಇತ್ತು. ಈ ಫೈಟ್‌ನಿಂದಲೇ ಚಿತ್ರದ ಕಥೆಗೆ ದೊಡ್ಡ ಟ್ವಿಸ್ಟ್ ಸಿಕ್ಕಿತ್ತು. 1996ರಲ್ಲಿ ಬಿಡುಗಡೆಗೊಂಡಿದ್ದ ಈ ಚಿತ್ರದಲ್ಲಿ ನಟಿ ಸೌಂದರ್ಯ ಶಾಂತಿ ಎಂಬ ಪಾತ್ರದಲ್ಲಿ ಸಖತ್ ಕ್ಯೂಟ್ ಆಗಿ ನಟಿಸುವ ಮೂಲಕ ಕನ್ನಡಿಗರ ಮನಗೆದ್ದಿದ್ದರು. ಪ್ರೇಮಕಥೆ ಜೊತೆಗೆ ಸೈನಿಕರಿಬ್ಬರ ಸ್ನೇಹವನ್ನು ತೋರಿಸಿದ್ದ ಈ ಸಿನಿಮಾ ದೊಡ್ಡ ಯಶಸ್ಸು ಗಳಿಸಿತ್ತು. ಅಷ್ಟೇ ಅಲ್ಲದೇ, ಇದು ತೆಲಗು ನಟ ಚಿರಂಜೀವಿ ನಟಿಸಿದ ಪ್ರಥಮ ಕನ್ನಡ ಚಲನಚಿತ್ರ. ಬಳಿಕ ತೆಲುಗಿಗೆ ಮೇಜರ್ ಹೆಸರಿನಲ್ಲಿ ರಿಮೇಕ್ ಆಗಿತ್ತು.  

ಡಾ.ರಾಜ್‌ಕುಮಾರ್‌ ಅಭಿನಯದ ಸೂಪರ್ ಹಿಟ್ ಸಿನಿಮಾ 'ಬಂಗಾರದ ಪಂಜರ'ದಲ್ಲೂ ಮೇಕೆಗಳು ಕಥೆಯ ಪ್ರಮುಖ ಭಾಗವಾಗಿದ್ದವು. ಇದರಲ್ಲಿ ಅಣ್ಣಾವ್ರ ಜೊತೆಗೆ ಇರುತ್ತಿದ್ದ ಮೇಕೆಗೆ 'ಮೈಲಾರಿ' ಅಂತ ಹೆಸರಿಟ್ಟಿದ್ದರು. ಚಿತ್ರದಲ್ಲಿ ಅಣ್ಣಾವ್ರು ಬೀರ ಎಂಬ ಪಾತ್ರವನ್ನು ನಿರ್ವಹಿಸಿದ್ದು, ಈ ಸಿನಿಮಾ ಚಿತ್ರಮಂದಿರಗಳಲ್ಲಿ 25 ವಾರಗಳ ಕಾಲ ಓಡಿತ್ತು.  

ರಾಜ್‌ ಬಿ ಶೆಟ್ಟಿ ಅಭಿನಯದ ಬಹುನಿರೀಕ್ಷಿತ ಟೋಬಿ ಸಿನಿಮಾ ಇದೇ ವಾರ ಬಿಡುಗಡೆಗೆ ಸಜ್ಜಾಗಿದೆ.  ಈ ಚಿತ್ರದ ಮಾರಿ ಮಾರಿ...ಮಾರಿಗೆ ದಾರಿ ಹಾಡಿನ ಸಾಲೊಂದು ಸಿಕ್ಕಾಪಟ್ಟೆ ಸೌಂಡ್ ಮಾಡ್ತಿದೆ. ಜೊತೆಗೆ ಟೈಟಲ್ ಕೂಡ ಸಿನಿರಸಿಕರ ಗಮನ ಸೆಳೆದಿದೆ.  ಕೆಣಕಿದರೆ ಕುರಿಯೂ ಮಾರಿಯಾಗಬಲ್ಲದು ಅನ್ನೋದು ಟೋಬಿ ಥೀಮ್. ಇದೊಂದು ಪಕ್ಕಾ ಕಮರ್ಷಿಯಲ್ ಸಿನಿಮಾವಾಗಿದ್ದು, ದೊಡ್ಡಮಟ್ಟದಲ್ಲಿ ನಿರ್ಮಾಣ ಮಾಡಲಾಗಿದೆ. ಚಿತ್ರದ ನಾಯಕ ರಾಜ್ ಬಿ ಶೆಟ್ಟಿ ಜೀವನದಲ್ಲಿ ಒಂದಷ್ಟು ಘಟನೆಗಳು ನಡೆದಿವೆ. ಆ ಘಟನೆಗಳೇ ಈ ಸಿನಿಮಾಗೆ ಸ್ಫೂರ್ತಿಯಂತೆ. ಹೀಗಾಗಿ, ಟೋಬಿ ಕೂಡ ಈ ಮೇಲಿನ ಸಿನಿಮಾಗಳಂತೆಯೇ ಸೂಪರ್ ಹಿಟ್ ಆಗಲಿದೆಯಾ? ಎಂಬುದನ್ನು ಕಾದು ನೋಡಬೇಕು.  

ಉಮೇಶ್ ಕೆ ಕೃಪಾ ನಿರ್ದೇಶನದ 'ಟಗರು ಪಲ್ಯ' ಸಿನಿಮಾದಲ್ಲೂ ಕೂಡ ಟಗರು ಇದೆ. ಈ ಚಿತ್ರದಲ್ಲಿ ನಾಗಭೂಷಣ್ ಎನ್.ಎಸ್ ನಾಯಕನಾಗಿ ನಟಿಸುತ್ತಿದ್ದು, ಲವ್ಲಿ ಸ್ಟಾರ್ ಪ್ರೇಮ್ ಪುತ್ರಿ ಅಮೃತಾ ನಾಯಕಿಯಾಗಿ ಕನ್ನಡ ಚಿತ್ರರಂಗಕ್ಕೆ ಎಂಟ್ರಿ ಕೊಡುತ್ತಿದ್ದಾರೆ. ಈ ಸಿನಿಮಾವನ್ನು ನಟರಾಕ್ಷಸ ಧನಂಜಯ್ ತಮ್ಮ 'ಡಾಲಿ ಪಿಕ್ಚರ್ಸ್' ಅಡಿಯಲ್ಲಿ ನಿರ್ಮಿಸುತ್ತಿದ್ದು, ಇದೂ ಕೂಡ ಹಾಡುಗಳಿಂದಲೇ ಸಖತ್ ಸೌಂಡು ಮಾಡ್ತಿದೆ. ಅಂದಾಗೆ ಈ ಸಿನಿಮಾದ ರಿಲೀಸ್ ಡೇಟ್ ಇನ್ನೂ ಬಿಡುಗಡೆಯಾಗಿಲ್ಲ.