ವಿದೇಶದಲ್ಲಿ ಸೆಟಲ್ ಆಗಿರುವ ಕನ್ನಡ ಕಿರುತೆರೆ ನಟಿಯರ ಪಟ್ಟಿ ಇಲ್ಲಿದೆ.

ಜೋಶ್ ಸಿನಿಮಾ ಖ್ಯಾತಿಯ ಸ್ನೇಹಾ ಆಚಾರ್ಯ ಸದ್ಯ ಪತಿಯೊಂದಿಗೆ ವಿದೇಶದಲ್ಲಿ ನೆಲೆಸಿದ್ದಾರೆ. ಇವರು ಕನ್ನಡದ ಅನೇಕ ಧಾರಾವಾಹಿ, ಸಿನಿಮಾಗಳು ಹಾಗೂ ರಿಯಾಲಿಟಿ ಶೋಗಳಲ್ಲೂ ಕಾಣಿಸಿಕೊಂಡಿದ್ದರು. ಡ್ಯಾನ್ಸ್ ಅಂದರೆ ತುಂಬಾ ಇಷ್ಟಪಡುವ ಸ್ನೇಹಾ, ಹಿಂದಿಯಲ್ಲಿ ಸೆಲೆಬ್ರಿಟಿ ನೃತ್ಯ ನಿರ್ದೇಶಕಿಯಾಗಿಯೂ ಕೆಲಸ ಮಾಡಿದ್ದಾರೆ. ಜೊತೆಗೆ ಕೆಲ ಹಿಂದಿ ಸಿನಿಮಾಗಳಲ್ಲೂ ಬಣ್ಣ ಹಚ್ಚಿದ್ದರು. ಕನ್ನಡ ಕಿರುತೆರೆಯ ಅತಿದೊಡ್ಡ ರಿಯಾಲಿಟಿ ಶೋ ಆದ ಬಿಗ್‌ಬಾಸ್ ಸೀಸನ್ ೬ರಲ್ಲೂ ಕಾಣಿಸಿಕೊಂಡಿದ್ದ ಇವರು, ಕುಣಿಯೋಣ ಬಾರ ನೃತ್ಯ ಕಾರ್ಯಕ್ರಮದ ನಿರೂಪಕಿಯಾಗಿದ್ದರು. ರಷ್ಯನ್ ಮೂಲದ ರಾಯನ್ ಎಂಬುವವರನ್ನು ಮದುವೆಯಾಗಿರುವ ಇವರು, ಪತಿಗೆ ವಿದೇಶದಲ್ಲಿ ಕೆಲಸ ಇರುವುದರಿಂದ ಅಲ್ಲಿಯೇ ನೆಲಸಿದ್ದಾರೆ. ಸ್ನೇಹಾ ಇತ್ತೀಚೆಗಷ್ಟೇ ಗಂಡು ಮಗುವಿನ ತಾಯಿಯಾಗಿದ್ದಾರೆ.  

ಪ್ಯಾಟೇ ಹುಡ್ಗೀರು ಹಳ್ಳಿ ಲೈಫು ರಿಯಾಲಿಟಿ ಶೋನ ವಿಜೇತೆಯಾಗಿದ್ದ ನಯನಾ ಪುಟ್ಟಸ್ವಾಮಿ ಕೂಡ ಈಗ ವಿದೇಶದಲ್ಲಿ ನೆಲೆಸಿದ್ದಶರೆ. ಇವರು ಅನಂತ್‌ ನಾಗ್ ಜೊತೆ ಚಿಟ್ಟೆಹೆಜ್ಜೆ ಎಂಬ ಧಾರಾವಾಹಿಯಲ್ಲಿ ನಾಯಕಿಯಾಗಿ ನಟಿಸಿದ್ದರು.  ಜೊತೆಗೆ ಸಿದ್ಧಾರ್ಥ, ಅಯೋಧ್ಯಪುರಂ, ಅಲೆಮಾರಿ ಸಿನಿಮಾಗಳಲ್ಲಿ ನಟಿಸಿದ್ದರು. ಬಿಗ್‌ಬಾಸ್ ಸೀಸನ್ 6ರಲ್ಲೂ ಕಾಣಿಸಿಕೊಂಡಿದ್ದ ನಯನಾ, ಸದ್ಯ ಚರಣ್ ಎಂಬುವವರನ್ನು ಮದುವೆಯಾಗಿ ವಿದೇಶದಲ್ಲಿ ವಾಸಿಸುತ್ತಿದ್ದಾರೆ. ನಯನಾ ಪತಿಗೆ ಅಮೆರಿಕಾದ ಯುನಿವರ್ಸಿಟಿಯಲ್ಲಿ ಕೆಲಸ ಸಿಕ್ಕಿರುವುದರಿಂದ ಇಡೀ ಕುಟುಂಬ ಅಲ್ಲಿ ನೆಲಸಿದೆ. ಇಷ್ಟುದಿನ ಮಗನ ಆರೈಕೆಯಲ್ಲಿ ಬ್ಯುಸಿಯಾಗಿದ್ದ ನಯನಾ, ಸದ್ಯ ಅಮೆರಿಕಾದಲ್ಲಿ ಟೀಚರ್‌ ಆಗಿ ಕೆಲಸ ಆರಂಭಿಸಿದ್ದಾರೆ. 

ನಟಿ ರಾಜೇಶ್ವರಿ ಪಾರ್ಥಸಾರಥಿ ಅಗ್ನಿಸಾಕ್ಷಿ ಧಾರಾವಾಹಿಯಲ್ಲಿ 'ಚಂದ್ರಿಕಾ' ಪಾತ್ರದ ಮೂಲಕ ಸಾಕಷ್ಟು ಖ್ಯಾತಿ ಪಡೆದಿದ್ದರು. ಬಳಿಕ ಕಾರಾಣಾಂತರದಿಂದ ಅರ್ಧಕ್ಕೆ ಸೀರಿಯಲ್ ಬಿಟ್ಟರು. ಬಳಿಕ ಕಲ್ಯಾಣ್ ಕ್ರಿಶ್ ಎಂಬುವವರನ್ನು ಮದುವೆಯಾದ ರಾಜೇಶ್ವರಿ, ಸದ್ಯ ಆಸ್ಟ್ರೇಲಿಯಾದಲ್ಲಿ ನೆಲೆಸಿದ್ದಾರೆ. ಇವರ ಪತಿ ವಿದೇಶದಲ್ಲಿ ಕೆಲಸ ಮಾಡುತ್ತಿರುವುದರಿಂದ ಅಲ್ಲಿ ನೆಲಸಿದ್ದಾರೆ. ಈ ದಂಪತಿಗೆ ಹವ್ಯಾ ಎಂಬ ಮಗಳಿದ್ದಾಳೆ.  

ಮಧುಬಾಲ, ಮನೆದೇವ್ರು ಧಾರಾವಾಹಿಗಳಲ್ಲಿ ಅಭಿನಯಿಸಿದ್ದ ನಟಿ ಅರ್ಚನಾ ಲಕ್ಷ್ಮಿ ನರಸಿಂಹಸ್ವಾಮಿ ಅವರ ಪತಿ ವಿಘ್ನೇಶ್ ಶರ್ಮಾ ವಿದೇಶದಲ್ಲಿ ಕೆಲಸ ಮಾಡುತ್ತಿದ್ದಾರೆ. ಹೀಗಾಗಿ, ತಾವೂ ಕೂಡ ವಿದೇಶದಲ್ಲಿ ನೆಲಸಿರುವ ಅರ್ಚನಾ, ಅಲ್ಲಿಯೇ ಹೆಚ್‌ಆರ್ ಆಗಿ ಕೆಲಸ ಮಾಡ್ತಿದ್ದಾರೆ. ಇವರು ಇತ್ತೀಚೆಗಷ್ಟೇ ಹೆಣ್ಣುಮಗುವಿಗೆ ಜನ್ಮ ನೀಡಿದ್ದಾರೆ. 

ಕನ್ನಡದ ಕೆಲ ಧಾರಾವಾಹಿ ಮತ್ತು ಸಿನಿಮಾಗಳಲ್ಲಿ ನಟಿಸಿರುವ ಅಕ್ಷತಾ ಕುಕಿ ಕೂಡ ಸದ್ಯ ಅಮೆರಿಕಾದಲ್ಲಿ ವಾಸಿಸುತ್ತಿದ್ದಾರೆ. ಫ್ಯಾಷನ್ ಶೋ ಒಂದರ ಮೂಲಕ ಬಣ್ಣದ ಲೋಕಕ್ಕೆ ಕಾಲಿಟ್ಟ ಅಕ್ಷತಾ, ಬಿಗ್‌ ಬಾಸ್ ಓಟಿಟಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಬಿಗ್‌ ಬಾಸ್ ಬಳಿಕ ಸಾಫ್ಟವೇರ್ ಇಂಜಿನಿಯರ್ ಆಗಿರುವ ಅವಿನಾಶ್ ಎಂಬುವವರೊಂದಿಗೆ ದಾಂಪತ್ಯ ಜೀವನಕ್ಕೆ ಕಾಲಿಟ್ಟರು. ಈಗ ಪತಿಯೊಂದಿಗೆ ಅಲ್ಲಿಯೇ ನೆಲಸಿದ್ದಾರೆ.  

ಬಿಗ್‌ ಬಾಸ್ ಕನ್ನಡ ಸೀಸನ್ 3ರಲ್ಲಿ ಸ್ಪರ್ಧಿಯಾಗಿ ಆಗಮಿಸಿದ್ದ ಗಗನಸಖಿ ನೇಹಾ ಗೌಡ ಕೂಡ ಅಮೆರಿಕಾದ ನಾರ್ತ್ ಕ್ಯಾಲಿಫೋರ್ನಿಯಾದಲ್ಲಿ ನೆಲಸಿದ್ದಾರೆ. ಇವರು ಡ್ಯಾನ್ಸಿಂಗ್ ರಿಯಾಲಿಟಿ ಶೋನಲ್ಲೂ ಭಾಗವಹಿಸಿದ್ದರು. ಕೆಲ ಸಿನಿಮಾಗಳಲ್ಲೂ ಇವರು ಬಣ್ಣ ಹಚ್ಚಿದ್ದರು