ಈ ವಾರ ಒಟಿಟಿಯಲ್ಲಿ ನೋಡಬಹುದಾದ ಕನ್ನಡ, ಮಲಯಾಳಂ, ತೆಲುಗು, ತಮಿಳು ಸಿನಿಮಾಗಳಿವು!

ಈ ವರ್ಷ ಪ್ರೇಕ್ಷಕರಿಂದ ಮೆಚ್ಚುಗೆ ಕನ್ನಡ ಸಿನಿಮಾಗಳ ಪೈಕಿ 'ನೋಡಿದವರು ಏನಂತಾರೆ' ಕೂಡ ಒಂದು. ಕುಲದೀಪ್ ಕಾರ್ಯಪ್ಪ ನಿರ್ದೇಶನದಲ್ಲಿ ಮೂಡಿಬಂದ ಈ ಚಿತ್ರದಲ್ಲಿ ನವೀನ್ ಶಂಕರ್ ನಾಯಕನಾಗಿ ಅಭಿನಯಿಸಿದ್ದರು. 2025ರ ಜನವರಿ 31ರಂದು ಬಿಡುಗಡೆಯಾಗಿದ್ದ ಈ ಚಿತ್ರದಲ್ಲಿ ನವೀನ್ ನಟನೆ ಹಾಗೂ ನಿರ್ದೇಶಕರ ಕಥೆಗೆ ಪ್ರೇಕ್ಷಕರು ಫಿದಾಗಿದ್ದರು. ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡಿಕೊಂಡಿದ್ದ ನಾಯಕನಿಗೆ (ಸಿದ್ಧಾರ್ಥ್ ದೇವಯ್ಯ) ಲವ್ ಬ್ರೇಕಪ್ ಆಗಿರುತ್ತದೆ. ಇದು ವೃತ್ತಿಜೀವನದ ಮೇಲೂ ಪರಿಣಾಮ ಬೀರುತ್ತದೆ. ಚಿಕ್ಕಂದಿನಿಂದಲೇ ತನ್ನ ತಾಯಿ ಬಿಟ್ಟು ಹೋದಳೆಂದು ಸ್ತ್ರೀ ಕುಲದ ಮೇಲೆ ದ್ವೇಷ ಬೆಳೆಸಿಕೊಂಡಿದ್ದ ನಾಯಕ, ತನ್ನ ಜೀವನದ ಆಧಾರವನ್ನು ಹುಡುಕುತ್ತಾ, ಮನಸ್ಸಿನಲ್ಲಿ ಕಾಡುತ್ತಿರುವ ಅಸ್ತಿತ್ವದ ಪ್ರಶ್ನೆಗಳಿಗೆ ಉತ್ತರ ಹುಡುಕುವ ಪ್ರಯಾಣ ಆರಂಭಿಸುತ್ತಾನೆ. ನೋಡಿದವರು ಏನಂತಾರೆ ಸಿನಿಮಾ ಮಾರ್ಚ್‌ 21ಕ್ಕೆ ಅಮೆಜಾನ್ ಪ್ರೈಂ ವಿಡಿಯೋದಲ್ಲಿ ಬಿಡುಗಡೆ ಆಗಲಿದೆ.

ಕಾಲಿವುಡ್ ನಿರ್ದೇಶಕ ಅಶ್ವತ್ ಮಾರಿಮುತ್ತು ನಿರ್ದೇಶನದ ಹಾಗೂ ಪ್ರದೀಪ್ ರಂಗನಾಥನ್ ಹೀರೋ ಆಗಿ ನಟಿಸಿರುವ 'ಡ್ರ್ಯಾಗನ್' ಸಿನಿಮಾ ಬಾಕ್ಸಾಫೀಸ್‌ನಲ್ಲಿ ಸಖತ್ ಸದ್ದು ಮಾಡಿತ್ತು. ಇಂಜಿನಿಯರಿಂಗ್ ಓದುತ್ತಿರುವ ಯುವಕನೊಬ್ಬನ ಕಾಲೇಜು ಲೈಫ್, ಫ್ಯಾಮಿಲಿ ಕಥೆ ಹಾಗೂ ಜೀವನದಲ್ಲಿ ಸಕ್ಸಸ್ ಆಗಲು ಪರದಾಡುವ ಸಿಂಪಲ್ ಕಥೆಯನ್ನು ನಿರ್ದೇಶಕರು ಸಖತ್ ಮನೋರಂಜನೆ ನೀಡುವಂತೆ ಕಟ್ಟಿಕೊಟ್ಟಿದ್ದರು. ಈ ಸಿನಿಮಾದಲ್ಲಿ ಪ್ರದೀಪ್ ಜೊತೆಗೆ ಕಯಾದು ಲೋಹರ್ ಮತ್ತು ಅನುಪಮಾ ಪರಮೇಶ್ವರನ್ ನಟಿಸಿದ್ದು, ಸಿನಿಮಾ 100 ಕೋಟಿ ರೂ ಅಧಿಕ ಕಲೆಕ್ಷನ್ ಮಾಡಿದೆ. ಡ್ರ್ಯಾಗನ್ ಮಾರ್ಚ್‌ 21ರಂದು ನೆಟ್‌ಫ್ಲಿಕ್ಸ್‌ನಲ್ಲಿ ಸ್ಟ್ರೀಮಿಂಗ್ ಆಗಲಿದೆ. ಈ ಸಿನಿಮಾ ಕನ್ನಡಕ್ಕೂ ಡಬ್ ಆಗಿ ಬರಲಿದೆ.

ಕುಂಚಕೋ ಬೋಬನ್ ಹಾಗೂ ಪ್ರಿಯಾಮಣಿ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ ಕ್ರೈಮ್ ಥ್ರಿಲ್ಲರ್ ಮಲಯಾಳಂ ಸಿನಿಮಾ 'ಆಫೀಸರ್ ಆನ್ ಡ್ಯೂಟಿ'. ಜಿತು ಆಶ್ರಫ್ ನಿರ್ದೇಶನದ ಈ ಸಿನಿಮಾ ಇಂದು ಅಂದರೆ (ಮಾರ್ಚ್‌ 20)ರಂದು ನೆಟ್‌ಫ್ಲಿಕ್ಸ್ ಪ್ಲಾಟ್‌ಫಾರ್ಮ್‌ನಲ್ಲಿ ಬಿಡುಗಡೆ ಆಗಲಿದೆ.

ಧನುಶ್ ನಿರ್ದೇಶನದ 'ನೀಲವುಕು ಎನ್ ಮೇಕಲ್ ಎನ್ನಡಿ ಕೋಬಮ್' ಎಂಬ ತಮಿಳು ಸಿನಿಮಾ ಫೆಬ್ರವರಿ 21ರಂದು ಥೀಯೇಟರ್‌ನಲ್ಲಿ ಬಿಡುಗಡೆಯಾಗಿತ್ತು. ಈ ಸಿನಿಮಾ ಮಾರ್ಚ್ 21ರಂದು ಅಮೆಜಾನ್ ಪ್ರೈಂ ವಿಡಿಯೋದಲ್ಲಿ ಬಿಡುಗಡೆ ಆಗಲಿದೆ.

ಜಿತೇಂದರ್ ರೆಡ್ಡಿ ಎಂಬ ತೆಲುಗು ಸಿನಿಮಾ ಮಾರ್ಚ್ 17ರಂದು ಈಟಿವಿ ವಿನ್‌ನಲ್ಲಿ ಬಿಡುಗಡೆಯಾಗಿದೆ. ಇದೊಂದು ಬಯೋಪಿಕ್ ಸಿನಿಮಾ. ಇದಲ್ಲದೇ, ತೆಲುಗಿನ ಬ್ರಹ್ಮಾನಂದಂ ಮತ್ತು ಅವರ ಮಗ ರಾಜ ಗೌತಮ್ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸಿರುವ 'ಬ್ರಹ್ಮ ಆನಂದಂ' ಸಿನಿಮಾ ಮಾರ್ಚ್ 20ರಂದು ಆಹಾ ಒಟಿಟಿ ವೇದಿಕೆಯಲ್ಲಿ ಬಿಡುಗಡೆಯಾಗಲಿದೆ.