ಸದ್ಯ ಯಾವ್ಯಾವ ಸ್ಯಾಂಡಲ್‌ವುಡ್‌ ನಟರ ಕೈಯಲ್ಲಿ ಎಷ್ಟೆಷ್ಟು ಸಿನಿಮಾಗಳಿವೆ ಗೊತ್ತಾ? ಇಲ್ಲಿದೆ ನೋಡಿ ಲಿಸ್ಟ್

ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅವರ ಕೈಯಲ್ಲಿ ನಾಲ್ಕು ಸಿನಿಮಾಗಳು ಇವೆ.  ದರ್ಶನ್  2023ರಲ್ಲಿ ಎರಡು ಸಿನಿಮಾಗಳನ್ನು ಮಾಡಿದ್ದರು. ಈ ಪೈಕಿ  'ಕಾಟೇರ' ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಈ ವರ್ಷ ದರ್ಶನ್ ಹಾಗೂ ಮಿಲನಾ ಪ್ರಕಾಶ್ ಕಾಂಬಿನೇಷನ್‌ನ  'ಡೆವಿಲ್' ಸಿನಿಮಾವನ್ನು 2024ರ  ಕ್ರಿಸ್‌ಮಸ್‌ಗೆ ರಿಲೀಸ್ ಮಾಡುವುದಾಗಿ ಚಿತ್ರತಂಡ ಘೋಷಣೆ ಮಾಡಿತ್ತು. ಆದರೆ, ಜೂನ್ 11ರಂದು ಬೆಂಗಳೂರಿನ ಕಾಮಾಕ್ಷಿಪಾಳ್ಯದಲ್ಲಿ ನಡೆದ ಚಿತ್ರದುರ್ಗ ಮೂಲದ ರೇಣುಕಾಸ್ವಾಮಿ ಕೊಲೆ ಪ್ರಕರಣದಲ್ಲಿ ದರ್ಶನ್ ಅರೆಸ್ಟ್ ಆದರು. ಹೀಗಾಗಿ, ಡೆವಿಲ್ ಚಿತ್ರದ ಚಿತ್ರೀಕರಣ ಅರ್ಧಕ್ಕೆ ನಿಂತು ಹೋಗಿದೆ. ಸದ್ಯ ದರ್ಶನ್ ಡೆವಿಲ್ ಸಿನಿಮಾ ಜೊತೆಗೆ ರಾಜವೀರ ಮದಕರಿ ನಾಯಕ, ತರುಣ್ ಸುಧೀರ್ ನಿರ್ದೇಶನದ ಡಿ59 ಹಾಗೂ ಜೋಗಿ ಪ್ರೇಮ್ ನಿರ್ದೇಶನದ ಸಿನಿಮಾವೊಂದರಲ್ಲಿ ನಟಿಸುತ್ತಿದ್ದಾರೆ.

ಈ ವಾರ ತೆರೆಗೆ ಬರುತ್ತಿರುವ ಮ್ಯಾಕ್ಸ್ ಸಿನಿಮಾ ಬಿಟ್ಟು ಅಭಿನಯ ಚಕ್ರವರ್ತಿ ಕಿಚ್ಚ ಸುದೀಪ್ ಕೈಯಲ್ಲಿ ನಾಲ್ಕು ಸಿನಿಮಾಗಳಿವೆ. ಈ ಪೈಕಿ ಚೇರನ್ ನಿರ್ದೇಶನದ ಕಿಚ್ಚ 47, ಸುದೀಪ್ ಅವರೇ ನಿರ್ದೇಶಿಸಿ ನಟಿಸುತ್ತಿರುವ ಕೆಕೆ, ಅನೂಪ್ ಭಂಡಾರಿಯವರ ಬಿಲ್ಲ ರಂಗ ಭಾಷಾ ಹಾಗೂ ಅಶ್ವತ್ಥಾಮ ಚಿತ್ರಗಳಲ್ಲಿ ಬ್ಯುಸಿಯಾಗಿದ್ದಾರೆ. ಸುದೀಪ್ ಅವರ ಮ್ಯಾಕ್ಸ್ ಸಿನಿಮಾ ಡಿಸೆಂಬರ್ ೨೫ರಂದು  5 ಭಾಷೆಗಳಲ್ಲಿ ತೆರೆಗೆ ಬರಲು ಸಜ್ಜಾಗಿದ್ದು, ಕಿಚ್ಚ ಪೊಲೀಸ್ ಪಾತ್ರದಲ್ಲಿ ಮಿಂಚಿದ್ದಾರೆ.

ರಾಕಿಂಗ್ ಸ್ಟಾರ್ ಯಶ್ 'ಕೆಜಿಎಫ್' ಸಿನಿಮಾ ಮೂಲಕ ಇಡೀ ಭಾರತೀಯ ಚಿತ್ರರಂಗ ಮತ್ತೊಮ್ಮೆ ಸ್ಯಾಂಡಲ್‌ವುಡ್‌ನತ್ತ ತಿರುಗಿ ನೋಡುವಂತೆ ಮಾಡಿದ್ದಾರೆ. ಆದರೆ, 2022ರ ಏಪ್ರಿಲ್‌ನಲ್ಲಿ ಬಂದು ಹೋಗಿದ್ದೇ ಕೊನೆ, ಈವರೆಗೂ ಯಶ್ ಅವರ ಯಾವ ಸಿನಿಮಾವೂ ತೆರೆಗೆ ಬಂದಿಲ್ಲ. ಕೆಜಿಎಫ್ 2 ಸಿನಿಮಾ ಬಂದು ಎರಡು ವರ್ಷ ಕಳೆದಿದ್ದು, ಸದ್ಯ ರಾಕಿಂಗ್ ಭಾಯ್ ಟಾಕ್ಸಿಕ್ ಹಾಗೂ ರಾಮಾಯಣ ಸಿನಿಮಾಗಳ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ.  

ರಿಯಲ್ ಸ್ಟಾರ್ ಉಪೇಂದ್ರ ಅವರ ಕೈಯಲ್ಲಿ ಬರೋಬ್ಬರಿ ಏಳು ಸಿನಿಮಾಗಳಿವೆ. ಎಂ ಜಯರಾಮ್ ನಿರ್ದೇಶನದ ಬುದ್ದಿವಂತ 2, ಓಂ ಪ್ರಕಾಶ್  ರಾವ್ ನಿರ್ದೇಶನದ ತ್ರಿಶೂಲಂ, ಕೆ ಮಾದೇಶ ನಿರ್ದೇಶನದ ಲಗಾಮ್, ರಾಮ್‌ ಗೋಪಾಲ್ ವರ್ಮಾ ಆಕ್ಷನ್ ಕಟ್ ಹೇಳುತ್ತಿರುವ ಐ ಆಮ್ ಆರ್, ಅರ್ಜುನ್ ಜನ್ಯ ನಿರ್ದೇಶನದ 45, ಎಸ್.ವಿ. ರಾಜೇಂದ್ರ ಸಿಂಗ್ ಬಾಬು ನಿರ್ದೇಶನದ ರಕ್ತ ಕಾಶ್ಮೀರ ಹಾಗೂ ಆರ್ ಚಂದ್ರು ನಿರ್ದೇಶನದ ಕಬ್ಜ 2 ಚಿತ್ರಗಳಲ್ಲಿ ಉಪ್ಪಿ ನಟಿಸುತ್ತಿದ್ದಾರೆ. ಈ ಪೈಕಿ ಬುದ್ದಿವಂತ 2 ಸಿನಿಮಾ 2025ರ ಮೊದಲಾರ್ಧದಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ.

ಸ್ಯಾಂಡಲ್‌ವುಡ್‌ನ ಬಹುತೇಕ ಸ್ಟಾರ್ ನಟರು ವರ್ಷಕ್ಕೆ ಒಂದೆರಡು ಸಿನಿಮಾ ಮಾಡುತ್ತಾರೆ. ಆದರೆ, ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಅವರು 60 ವರ್ಷವಾದರೂ ಪ್ರತಿವರ್ಷ ಮೂರ್ನಾಲ್ಕು ಸಿನಿಮಾ ಮಾಡಿಯೇ ಮಾಡ್ತಾರೆ. ಶಿವಣ್ಣ್ ಕೈಯಲ್ಲಿ ಶಿವಗಣ, ಫಾರ್ಟಿಫೈವ್, ಭೈರವನ ಕೊನೆ ಪಾಠ, ಉತ್ತರಕಾಂಡ, ಶಿವಣ್ಣ 131,  A for ಆನಂದ್, ಎಸ್‌ಅರ್‌ಕೆ, ಆರ್‌ಡಿಎಕ್ಸ್, ನೀ ಸಿಗೋವರೆಗೂ, ಕಬ್ಜ ಚಾಪ್ಟರ್ 2 ಹಾಗೂ ಅಶ್ವತ್ಥಾಮ ಸೇರಿದಂತೆ ಬರೋಬ್ಬರಿ 11 ಸಿನಿಮಾಗಳಿವೆ. ಇದಲ್ಲದೇ ಪರಭಾಷಾ ಸಿನಿಮಾಗಳಲ್ಲಿಯೂ ಶಿವರಾಜ್‌ಕುಮಾರ್ ನಟಿಸುತ್ತಿದ್ದಾರೆ.

2024ರಲ್ಲಿ ಗೋಲ್ಡನ್ ಸ್ಟಾರ್ ಗಣೇಶ್ ಅಭಿನಯದ 'ಕಷ್ಣಂ ಪ್ರಣಯ ಸಖಿ' ಬಿಡುಗಡೆಯಾಗಿ ಸೂಪರ್ ಹಿಟ್ ಆಗಿತ್ತು. ಸದ್ಯ ಗಣೇಶ್ ಕೈಯಲ್ಲಿ ಮೂರು ಸಿನಿಮಾಗಳಿವೆ. ವಿಖ್ಯಾತ್ ಎ ಆರ್ ನಿರ್ದೇಶನದ ಯುವರ್ಸ್ ಸಿನ್ಸಿಯರ್ಲಿ ರಾಮ್, ಸಿಂಪಲ್ ಸುನಿ ನಿರ್ದೇಶನದ ದಿ ಸ್ಟೋರಿ ಆಫ್ ರಾಯಗಡ ಹಾಗೂ ಶಿವಗಣ ಸಿನಿಮಾಗಳಲ್ಲಿ ಗಣೇಶ್ ನಟಿಸುತ್ತಿದ್ದಾರೆ.

2022ರಲ್ಲಿ ರಿಷಬ್ ಶೆಟ್ಟಿ ನಿರ್ದೇಶಿಸಿ, ನಟಿಸಿದ್ದ ಕಾಂತಾರ ಸಿನಿಮಾ ವಿಶ್ವದಾದ್ಯಂತ ಸದ್ದು ಮಾಡಿತ್ತು. ಜೊತೆಗೆ ರಿಷಬ್ ಅವರನ್ನು ಪ್ಯಾನ್ ಇಂಡಿಯಾ ಸ್ಟಾರ್‌ರನ್ನಾಗಿ ಮಾಡಿತ್ತು. ಹೀಗಾಗಿ, ಇವರ ಮುಂದಿನ ಸಿನಿಮಾಗಳ ಮೇಲೆ ಸಾಕಷ್ಟು ನಿರೀಕ್ಷೆಯಿದೆ. ಸದ್ಯ ರಿಷಬ್ ಶೆಟ್ಟಿ ಕಾಂತಾರ 2, ರುದ್ರಪ್ರಯಾಗ, ಬೆಲ್‌ ಬಾಟಮ್ 2, ನಾಥೂರಾಮ್, ಅಂಟಗೋನಿ ಶೆಟ್ಟಿ ದಿ ಪ್ರೈಡ್ ಆಫ್ ಛತ್ರಪತಿ ಶಿವಾಜಿ ಮಹಾರಾಜ್ ಸಿನಿಮಾಗಳಲ್ಲಿ ನಟಿಸುತ್ತಿದ್ದಾರೆ.

ಪ್ರತಿ ಸಿನಿಮಾಗೂ ವಿಭಿನ್ನ ಪಾತ್ರ ಆಯ್ಕೆ ಮಾಡಿಕೊಳ್ಳುವ ಡಾಲಿ ಧನಂಜಯ್ ಸದ್ಯ ಐದು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದಾರೆ. ಟಿ ಎಸ್ ನಾಗಾಭರಣ ನಿರ್ದೇಶನದ ನಾಡಪ್ರಭು ಕೆಂಪೇಗೌಡ, ಶಶಾಂಕ್ ಸೊಘಲ್ ನಿರ್ದೇಶನದ ಜಿಂಗೋ, ಶಂಕರ್ ಗುರು ಆಕ್ಷನ್ ಕಟ್ ಹೇಳುತ್ತಿರುವ ಅಣ್ಣ From Mexico, ರೋಹಿತ್ ಪದಕಿಯವರ ಉತ್ತರಕಾಂಡ ಹಾಗೂ ಡಾಲಿ ಸಿನಿಮಾಗಳಲ್ಲಿ ಧನಂಜಯ್ ಬ್ಯುಸಿಯಾಗಿದ್ದಾರೆ.