ರಾಕಿಭಾಯ್ ಟು ಚಾರ್ಲಿ: ಭಾರತೀಯ ಚಿತ್ರರಂಗದ ಜನಪ್ರಿಯ ಸಿನಿಮಾ ಕ್ಯಾರೆಕ್ಟರ್‌ಗಳಿವು!

Author Sowmya Bairappa | Updated: Thursday, February 27, 2025, 10:23 AM [IST]

ಕೆಲ ವರ್ಷಗಳ ಹಿಂದೆ ಹಾಲಿವುಡ್ ಸಿನಿಮಾಗಳು ಮಾತ್ರ ನೂರಾರು ಕೋಟಿ ಕಲೆಕ್ಷನ್ ಮಾಡುತ್ತಿದ್ದವು. ಆದ್ರೀಗ ಭಾರತೀಯ ಸಿನಿಮಾಗಳು ಕೂಡ ಹಾಲಿವುಡ್ ಸಿನಿಮಾಗಳಿಗೆ ಪೈಪೋಟಿ ನೀಡಿ, ಸಾವಿರಾರು ಕೋಟಿ ಗಳಿಕೆ ಮಾಡುತ್ತಿವೆ. ಭಾರತ ಚಿತ್ರರಂಗದ ಅನೇಕ ನಟರು ಈಗಾಗಲೇ ವಿಭಿನ್ನ ಪಾತ್ರಗಳಲ್ಲಿ ನಟಿಸುವ ಮೂಲಕ ತಮ್ಮ ವಿಶಿಷ್ಟ ಪ್ರತಿಭೆಯನ್ನು ತೋರಿಸಿದ್ದಾರೆ. ಇನ್ನೂ ಕೆಲ ನಟರು ಅಂತಹ ಪಾತ್ರಗಳ ಹುಡುಕಾಟದಲ್ಲಿದ್ದಾರೆ. ಅವರು ನೂರಾರು ವಿಭಿನ್ನ ಪಾತ್ರಗಳಲ್ಲಿ ನಟಿಸಿ ನಮ್ಮನ್ನು ರಂಜಿಸಿದರೂ, ಕೆಲವು ಪಾತ್ರಗಳು ಮಾತ್ರ ಅವರ ಸಂಪೂರ್ಣ ಸಿನಿಜೀವನದ ವ್ಯಾಖ್ಯಾನದಂತಿರುತ್ತವೆ. ಇಲ್ಲಿ ಭಾರತೀಯ ಚಿತ್ರರಂಗದ ಜನಪ್ರಿಯ ಸಿನಿಮಾ ಕ್ಯಾರೆಕ್ಟರ್‌ಗಳ ಪಟ್ಟಿ ಇಲ್ಲಿದೆ.

Table of content

ಮಾಲಿವುಡ್ ಮಾತ್ರವಲ್ಲದೇ, ಪರಭಾಷೆಯಲ್ಲೂ ಸಿಕ್ಕಾಪಟ್ಟೆ ಅಭಿಮಾನಿಗಳನ್ನು ಹೊಂದಿರುವ ದುಲ್ಕರ್ ಸಲ್ಮಾನ್, ಚಾರ್ಲಿ ಸಿನಿಮಾ ಮೂಲಕ ಮತ್ತಷ್ಟು ಜನಪ್ರಿಯತೆ ಗಳಿಸಿದರು. 2015ರಲ್ಲಿ ಬಿಡುಗಡೆಯಾದ 'ಚಾಲಿ' ಚಿತ್ರದಲ್ಲಿ ದುಲ್ಕರ್‌ಗೆ ಜೋಡಿಯಾಗಿ ಪಾರ್ವತಿ ಮೆನನ್ ಕಾಣಿಸಿಕೊಂಡಿದ್ದರು. ಈ ಸಿನಿಮಾದಲ್ಲಿ ಬೇರೆಯವರಿಗೆ ಸಹಾಯ ಮಾಡಿ ಖುಷಿ ಪಡುವ, ಯಾವುದಕ್ಕೂ ಹೆಚ್ಚು ಆಸೆ ಪಡದ ದುಲ್ಕರ್ ಅವರ 'ಚಾಲಿ' ಕ್ಯಾರೆಕ್ಟರ್ ಪ್ರೇಕ್ಷಕರಿಗೆ ಸಿಕ್ಕಾಪಟ್ಟೆ ಇಷ್ಟವಾಗಿತ್ತು.

ಕೆಜಿಎಫ್ ಸ್ಯಾಂಡಲ್‌ವುಡ್‌ನಲ್ಲಿ ಮಾತ್ರವಲ್ಲದೇ, ಇಡೀ ಭಾರತೀಯ ಸಿನಿಮಾರಂಗದಲ್ಲೇ ಹೊಸ ಅಲೆ ಸೃಷ್ಟಿಸಿದ ಸಿನಿಮಾ. ಕೆಜಿಎಫ್ ಮೂಲಕ ಇಡೀ ಭಾರತೀಯ ಚಿತ್ರರಂಗವೇ ಕನ್ನಡ ಚಿತ್ರರಂಗದತ್ತ ತಿರುಗಿ ನೋಡುವಂತಾಗಿದೆ. ಈ ಸಿನಿಮಾದ ರಾಕಿಭಾಯ್ ಪಾತ್ರ, ಡೈಲಾಗ್, ಹಾಡುಗಳು ಎಲ್ಲವೂ ಪ್ರೇಕ್ಷಕರಿಗೆ ಸಖತ್ ಇಷ್ಟವಾಗಿತ್ತು. ರಾಕಿಂಗ್ ಸ್ಟಾರ್ ಯಶ್ ಅವರಿಗೆ ಅಪಾರ ಜನಪ್ರಿಯತೆ ತಂದುಕೊಟ್ಟ ಪಾತ್ರ ರಾಕಿಭಾಯ್. ಯಶ್ ಎಲ್ಲೇ ಹೋದರೂ ಎಲ್ಲರೂ ಅವರನ್ನು 'ರಾಕಿಭಾಯ್' ಅಂತಲೇ ಕರೆಯುತ್ತಾರೆ. ಅಷ್ಟರಮಟ್ಟಿಗೆ ಈ ಪಾತ್ರ ಜನರ ಮನದಲ್ಲಿ ಅಚ್ಚಳಿಯದೇ ಉಳಿದಿದೆ.

ಟಾಲಿವುಡ್ ಸ್ಟೈಲಿಶ್ ಸ್ಟಾರ್ ಅಲ್ಲು ಅರ್ಜುನ್ ಹಾಗೂ ಸುಕುಮಾರನ್ ಕಾಂಬಿನೇಷನ್‌ನ ನಟನೆಯ 'ಪುಷ್ಪ' ಸಿನಿಮಾಗೆ ಕೂಡ ದೊಡ್ಡ ಅಭಿಮಾನಿ ಬಳಗವಿದೆ. ಸ್ಮಗ್ಲಿಂಗ್ ಹಿನ್ನೆಲೆಯುಳ್ಳ ಈ ಸಿನಿಮಾದಲ್ಲಿ ಅಲ್ಲು ಅರ್ಜುನ್ ಅವರ 'ಪುಷ್ಪರಾಜ್' ಪಾತ್ರ ಸಿಕ್ಕಾಪಟ್ಟೆ ಖ್ಯಾತಿ ಗಳಿಸಿದೆ. ಅದರಲ್ಲೂ ಪುಷ್ಪ..ಪುಷ್ಪರಾಜ್...ತಗ್ಗೆದೆಲೆ ಎಂಬ ಅಲ್ಲು ಅವರ ಸ್ಟೈಲ್ ಅಂತೂ ಸಿಕ್ಕಾಪಟ್ಟೆ ವೈರಲ್ ಆಗಿತ್ತು.

ಎಸ್‌.ಎಸ್ ರಾಜಮೌಳಿ ನಿರ್ದೇಶನದಲ್ಲಿ ಮೂಡಿಬಂದ 'ಬಾಹುಬಲಿ' ಸಿನಿಮಾ ದೊಡ್ಡ ಯಶಸ್ಸು ಗಳಿಸಿತ್ತು. ರಾಜಮೌಳಿ ಅವರು ಬಾಹುಬಲಿ 1 ಮತ್ತು ಬಾಹುಬಲಿ 2 ಸಿನಿಮಾಗಳ ಮೂಲಕ ಭಾರತೀಯ ಸಿನಿಮಾ ಇತಿಹಾಸದಲ್ಲೇ ಹೊಸ ದಾಖಲೆ ಸೃಷ್ಟಿಸಿದ್ದರು. ಈ ಸಿನಿಮಾದಿಂದಲೇ ಪ್ಯಾನ್ ಇಂಡಿಯಾ ಕಾನ್ಸೆಪ್ಟ್ ಆರಂಭವಾಯಿತು. ಈ ಸಿನಿಮಾದ ಡಾರ್ಲಿಂಗ್ ಪ್ರಭಾಸ್ ಅವರ 'ಬಾಹುಬಲಿ' ಕ್ಯಾರೆಕ್ಟರ್ ಕೂಡ ಭಾರತೀಯ ಚಿತ್ರರಂಗದಲ್ಲಿ ಸಿಕ್ಕಾಪಟ್ಟೆ ಖ್ಯಾತಿ ಗಳಿಸಿದೆ.

ಬಾಲಿವುಡ್‌ನ ಅತ್ಯಂತ ಸೂಪರ್ ಹೀರೋ ಸರಣಿಗಳ ಪೈಕಿ 'ಕ್ರಿಶ್' ಕೂಡ ಒಂದು. ರಾಕೇಶ್ ರೋಷನ್ ನಿರ್ದೇಶನದಲ್ಲಿ ಮೂಡಿಬಂದ 'ಕ್ರಿಶ್' ಸಿನಿಮಾದಲ್ಲಿ ಹೃತಿಕ್ ರೋಷನ್ ಸೂಪರ್ ಹೀರೋ ಆಗಿ ಕಾಣಿಸಿಕೊಂಡಿದ್ದರು. ೨೦೦೬ರಲ್ಲಿ ತೆರೆಕಂಡ ಈ ಸಿನಿಮಾ ಬ್ಲಾಕ್‌ಬಸ್ಟರ್ ಆಗಿತ್ತು. ನಂತರದಲ್ಲಿ ಬಂದ 2 ಮತ್ತು 3ನೇ ಸರಣಿಗಳು ಅಷ್ಟೇ ಹಿಟ್ ಆಗಿದ್ದವು. ಈ ಚಿತ್ರದ ಕ್ರಿಶ್ ಪಾತ್ರವನ್ನು ಪ್ರೇಕ್ಷಕರು ಇನ್ನೂ ಮರೆತಿಲ್ಲ.

2010ರಲ್ಲಿ ಬಿಡುಗಡೆಯಾದ ಎಸ್ ಶಂಕರ್ ನಿರ್ದೇಶನದ 'ಎಂದಿರಾನ್' ಸಿನಿಮಾದಲ್ಲಿ ಕಾಲಿವುಡ್ ಸೂಪರ್ ಸ್ಟಾರ್ ರಜಿನಿಕಾಂತ್ ವಿಜ್ಞಾನಿ ಡಾ.ವಸೀಗರನ್ ಹಾಗೂ ರೋಬೋಟ್ ಚಿಟ್ಟಿಯಾಗಿ ದ್ವಿಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಇದರಲ್ಲಿ ಚಿಟ್ಟಿ ಪಾತ್ರ ಸಿಕ್ಕಾಪಟ್ಟೆ ಗಮನ ಸೆಳೆದಿತ್ತು.