ಮಳೆಯ ಮಧುರ ಅನುಭೂತಿಯನ್ನು ಹಿತವಾಗಿಸುವ ಈ ಕನ್ನಡ ಹಾಡುಗಳನ್ನು ನೀವು ಕೇಳಲೇಬೇಕು!

ಮಳೆ ಅಂದಾಕ್ಷಣ 1990ರಲ್ಲಿ ಬಿಡುಗಡೆಯಾದ ಬಣ್ಣದ ಗೆಜ್ಜೆ ಚಿತ್ರದ 'ಸ್ವಾತಿ ಮುತ್ತಿನ ಮಳೆ ಹನಿಯೇ' ಹಾಡು ಥಟ್ ಅಂತ ನೆನಪಾಗುತ್ತದೆ. ಈ ಹಾಡಿಗೆ ರವಿಚಂದ್ರನ್ ಹಾಗೂ ಅಮಲಾ ಪೌಲ್ ಹೆಜ್ಜೆ ಹಾಕಿದ್ದರು. ಎಸ್‌.ಪಿ.ಬಾಲಸುಬ್ರಮಣ್ಯಂ ಕಂಠದಲ್ಲಿ ಮೂಡಿಬಂದ ಈ ಹಾಡಿಗೆ  ಹಂಸಲೇಖ ಸಂಗೀತ ನೀಡಿದ್ದರು. 

ಕನ್ನಡ ಚಿತ್ರರಂಗದಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿದ ಸಿನಿಮಾ ಯೋಗರಾಜ್ ಭಟ್ ನಿರ್ದೇಶನದ ಮುಂಗಾರು ಮಳೆ. ಈ ಸಿನಿಮಾದಲ್ಲಿ ಮಳೆಯೇ ಹೈಲೈಟ್ ಅಂದರೆ ತಪ್ಪಾಗಲಾರದು. ಚಿತ್ರದಲ್ಲಿ ಮಳೆ ಕೂಡ ಒಂದು ಪಾತ್ರವಾಗಿ ಸೆಳೆಯುತ್ತದೆ. ಚಿತ್ರದಲ್ಲಿ ಮೊದಲ ಬಾರಿ ನಾಯಕಿಯನ್ನು ನೋಡತ್ತಿದ್ದಂತೆ ನಾಯಕ ಆಕೆಯ ಪ್ರೀತಿಯಲ್ಲಿ ಬೀಳುತ್ತಾನೆ. ಈ ವೇಳೆ ಮಳೆ ಸುರಿಯುತ್ತದೆ. ಆಗ ನಾಯಕ 'ಮುಂಗಾರು ಮಳೆಯೇ...ಏನು ನಿನ್ನ ಹನಿಗಳ ಲೀಲೆ' ಎನ್ನುತ್ತಾ ಮಳೆಯ ಗುಣಗಾನ ಮಾಡುತ್ತಾನೆ. 

ನಮ್ಮೂರ ಮುಂದಾರ ಹೂವೇ ಸಿನಿಮಾದ 'ಮುತ್ತು ಮುತ್ತು ನೀರಾ ಹನಿಯಾ' ಹಾಡಿಗೆ ಮನಸೋಲದವರೇ ಇಲ್ಲ. ಈ ಹಾಡಿಗೆ ಜೋರಾಗಿ ಸುರಿಯುವ ಮಳೆಯಲ್ಲಿ ಶಿವರಾಜ್‌ಕುಮಾರ್, ಪ್ರೇಮಾ ಹಾಗೂ ರಮೇಶ್ ಅರವಿಂದ್ ಕುಣಿದು ಕುಪ್ಪಳಿಸಿದ್ದರು. ಈ ಹಾಡಿಗೆ ಇಳಿಯರಾಜ ಸಂಗೀತ ನೀಡಿದ್ದು,  ಎಸ್‌.ಪಿ.ಬಾಲಸುಬ್ರಮಣ್ಯಂ ಹಾಗೂ ಚಿತ್ರಾ ಧ್ವನಿಯಾಗಿದ್ದರು.  

ಗಣೇಶ್ ಮತ್ತು ಯುವಿಕಾ ಅಭಿನಯದ 'ಮಳೆಯಲಿ ಜೊತೆಯಲಿ' ಸಿನಿಮಾದ ಹಾಡು ಕೂಡ ಸಖತ್ ಫೇಮಸ್. ಚಿತ್ರದ 'ಮಳೆಯಲಿ ಜೊತೆಯಲಿ ದಿನವಿಡೀ ನೆನೆಯಲು' ಹಾಡು ನೋಡಿದರೆ ಪ್ರೇಮಿಗಳು ಬೇರೆ ಲೋಕಕ್ಕೆ ಹೋಗುತ್ತಾರೆ. ಈ ಹಾಡಿಗೆ ಜಯಂತ್ ಕಾಯ್ಕಿಣಿ ಸಾಹಿತ್ಯ ಬರೆದಿದ್ದು, ವಿ ಹರಿಕೃಷ್ಣ ಸಂಗೀತ ನೀಡಿದ್ದರು.  ಸೋನು ನಿಗಮ್ ಕಂಠ ಸಿರಿಯಲ್ಲಿ ಈ ಹಾಡು ಮೂಡಿಬಂದಿತ್ತು. 

ಮೈನಾ ಸಿನಿಮಾದ 'ಮೊದಲ ಮಳೆಯಂತೆ' ಹಾಡು ಕೂಡ ಮಳೆಯ ಅನುಭೂತಿಯನ್ನು ಹಿತವಾಗಿಸುತ್ತದೆ. ಈ ಚಿತ್ರದಲ್ಲಿ ನಿತ್ಯಾ ಮೆನನ್ ಹಾಗೂ ಚೇತನ್ ಕುಮಾರ್ ನಟಿಸಿದ್ದರು. ಈ ಹಾಡಿಗೆ ಕವಿರಾಜ್ ಸಾಹಿತ್ಯ ಬರೆದಿದ್ದು, ಸೋನು ನಿಗಮ್ ಹಾಗೂ  ಶ್ರೇಯಾ ಘೋಷಾಲ್ ಧ್ವನಿಯಾಗಿದ್ದರು. 

ಮೊಗ್ಗಿನ ಮನಸ್ಸು ಸಿನಿಮಾ 'ಮಳೆ ಬರುವ ಹಾಗಿದೆ' ಹಾಡಿನಲ್ಲಿ ರಾಧಿಕಾ ಪಂಡಿತ್ ಕಾಣಿಸಿಕೊಂಡಿದ್ದರು. ಇದು ಕೂಡ ಪ್ರೇಮಿಗಳಿಗೆ ಪ್ರಿಯವಾದ ಹಾಡು. ಈ ಹಾಡಿಗೆ ಜಯಂತ್ ಕಾಯ್ಕಿಣಿ ಬರೆದಿದ್ದು, ಮನೋಮೂರ್ತಿ ಸಂಗೀತ ನೀಡಿದ್ದರು. 

ಮನಸಾರೆ ಸಿನಿಮಾದ 'ಎಲ್ಲೋ ಮಳೆಯಾಗಿದೆ ಇಂದು' ಹಾಡು ಕೂಡ ಮಳೆಗಾಲದಲ್ಲಿ ನೆನಪಾಗುವ ಹಾಡು. ಈ ಹಾಡಿನಲ್ಲಿ ದಿಗಂತ್ ಕಾಣಿಸಿಕೊಂಡಿದ್ದರು. ಈ ಹಾಡಿಗೆ ಜಯಂತ್ ಕಾಯ್ಕಿಣಿ ಸಾಹಿತ್ಯ, ಮನೋ ಮೂರ್ತಿ ಸಂಗೀತ ನೀಡಿದ್ದರು.   ಸೋನು ನಿಗಮ್ ಕಂಠ ಸಿರಿಯಲ್ಲಿ ಈ ಹಾಡು ಮೂಡಿಬಂದಿತ್ತು.