ಕನ್ನಡ ಚಿತ್ರರಂಗದ ಆನ್‌ಸ್ಕ್ರೀನ್ 'ಕುಚುಕು'ಗಳಿವರು: ನಿಮ್ಮಿಷ್ಟದ ಜೋಡಿ ಯಾವುದು?

2014ರಲ್ಲಿ ಬಿಡುಗಡೆಯಾದ 'ಅಧ್ಯಕ್ಷ' ಸಿನಿಮಾದಲ್ಲಿ ನಟ ಶರಣ್ ಹಾಗೂ ಚಿಕ್ಕಣ್ಣ ಕುಚುಕು ಗೆಳೆಯರಾಗಿ ಕಾಣಿಸಿಕೊಂಡಿದ್ದರು. ಈ ಚಿತ್ರದಲ್ಲಿ ಅಧ್ಯಕ್ಷ (ಶರಣ್) ಮತ್ತು ಉಪಾಧ್ಯಕ್ಷರ (ಚಿಕ್ಕಣ್ಣ) ಕಾಂಬಿನೇಷನ್ ಹಾಸ್ಯದ ಕಚಗುಳಿ ಇಟ್ಟಿತ್ತು.  ಇಂದೊಂದು ಅಪ್ಪಟ ಮನೋರಂಜನಾತ್ಮಕ ಸಿನಿಮಾವಾಗಿದ್ದು, ಚಿಕ್ಕಣ್ಣ ಹಾಗೂ ಶರಣಧ್ ಜೋಡಿ ಪ್ರೇಕ್ಷಕರಿಗೆ ಸಿಕ್ಕಾಪಟ್ಟೆ ಮೋಡಿ ಮಾಡಿತ್ತು. ಅಂದ್ಹಾಗೆ ಇದು ತಮಿಳು ಚಿತ್ರದ ರಿಮೇಕ್ ಆಗಿತ್ತು. 

ತಮಿಳಿನ ಪಿತಾಮಗನ್ ಚಿತ್ರದ ರೀಮೆಕ್ ಆದ 'ಅನಾಥರು' ಚಿತ್ರದಲ್ಲಿ ಚಿಯಾನ್ ವಿಕ್ರಂ ಹಾಗೂ ಸೂರ್ಯ ಮಾಡಿದ್ದ ಪಾತ್ರಗಳನ್ನು ಕನ್ನಡದಲ್ಲಿ ಉಪೇಂದ್ರ ಹಾಗೂ ದರ್ಶನ್ ನಿಭಾಯಿಸಿದ್ದರು. ಇಬ್ಬರ ಅಭಿನಯಕ್ಕೆ ಕನ್ನಡ ಸಿನಿರಸಿಕರು ಫಿದಾ ಆಗಿ ಹೋಗಿದ್ದರು. ರುದ್ರ ಆಗಿ ಉಪೇಂದ್ರ, ಸತ್ಯ ಪ್ರಕಾಶ್ ಆಗಿ ದರ್ಶನ್ ಇಬ್ಬರು ಪೈಪೋಟಿಗೆ ಬಿದ್ದು ನಟಿಸಿದ್ದರು.  

ಯೋಗರಾಜ್ ಭಟ್ ನಿರ್ದೇಶನದ 'ಗಾಳಿಪಟ' ಸಿನಿಮಾದ ಗಣಿ, ದಿಗ್ಗಿ, ಕಿಟ್ಟಿ ಪಾತ್ರಗಳು ಯುವಕರ ಫೆವರಿಟ್ ಅಂದರೆ ತಪ್ಪಾಗಲ್ಲ. ಇತ್ತೀಚಿಗಂತೂ ಈ ಸಿನಿಮಾದ ಡೈಲಾಗ್‌ಗಳು ಸೋಶಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡುತ್ತಿವೆ.  ಗಣೇಶ್, ದಿಗಂತ್ ಹಾಗೂ ರಾಜೇಶ್ ಕೃಷ್ಣನ್ ಮೂವರ ಸಂಗಮದಲ್ಲಿ ಬಂದಿದ್ದ 'ಗಾಳಿಪಟ' ಚಿತ್ರವು 2008ರಲ್ಲಿ ಹೊಸ ಟ್ರೆಂಡ್ ಸೃಷ್ಟಿಸಿತ್ತು. ಕಥೆ ಮತ್ತು ಸೊಗಸಾದ ಹಾಡುಗಳಿಂದಾಗಿ ಸಿನಿಮಾ ಸೂಪರ್ ಹಿಟ್ ಆಗಿತ್ತು.

ಸ್ಯಾಂಡಲ್‌ವುಡ್‌ನ ಎವರ್ ಗ್ರೀನ್ ಸಿನಿಮಾಗಳಲ್ಲಿ ದಿಗ್ಗಜರು ಕೂಡ ಒಂದು.  ವಿಷ್ಣುವರ್ಧನ್ (ಚಿಕ್ಕಯ್ಯ) ಮತ್ತು ಅಂಬರೀಶ್ (ಒಡೆಯರ್) ಮುಖ್ಯಪಾತ್ರದಲ್ಲಿ ನಟಿಸಿದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಇದು ತಮಿಳಿನ ನತ್ಪುಕ್ಕಾಗ ಸಿನಿಮಾದ ರಿಮೇಕ್ ಆಗಿದ್ದರೂ ಕೂಡ ವಿಷ್ಣು ದಾದಾ ಹಾಗೂ ಅಂಬಿ ಅಭಿನಯಕ್ಕೆ ಪ್ರೇಕ್ಷಕರು ಫಿದಾ ಆಗಿದ್ದರು. ಡಿ ರಾಜೇಂದ್ರ ಬಾಬು ಅವರ ನಿರ್ದೇಶನದಲ್ಲಿ ಮೂಡಿಬಂದ ಈ ಸಿನಿಮಾದ 'ಕುಚಿಕು ಕುಚಿಕು' ಹಾಡಿಗೆ ಸಿನಿರಸಿಕರು ಫಿದಾ ಆಗಿದ್ದರು.  

2014ರಲ್ಲಿ ಬಿಡುಗಡೆಯಾದ ಪ್ರಶಾಂತ್ ನೀಲ್ ನಿರ್ದೇಶನದ 'ಉಗ್ರಂ' ಸಿನಿಮಾ ಯಾರಿಗೆ ಗೊತ್ತಿಲ್ಲ ಹೇಳಿ. ರೋರಿಂಗ್ ಸ್ಟಾರ್ ಶ್ರೀಮುರುಳಿ ಅವರಿಗೆ ಜೀವಕೊಟ್ಟ ದೊಡ್ಡ ಹಿಟ್ ಸಿನಿಮಾ. ಉಗ್ರಂನಲ್ಲಿ ಬಾಲ್ಯ ಗೆಳೆಯರಾದ ಅಗಸ್ತ್ಯ (ಶ್ರೀಮುರಳಿ) ಮತ್ತು ಬಾಲ (ತಿಲಕ್) ಸ್ನೇಹ ಕಂಡು ಮರಳಾಗದವರಿಲ್ಲ. ಇವ್, ಸೆಂಟಿಮೆಂಟ್, ಸಾಹಸ ಎಲ್ಲಾ ದೃಶ್ಯಗಳನ್ನು ಬೆರೆಸಿ ಸುಂದರವಾಗಿ ತೆರೆಮೇಲೆ ಬಂದಿದ್ದ ಈ ಸಿನಿಮಾ ಅದ್ಭುತ ಯಶಸ್ಸು ಕಂಡಿತ್ತು.

ದುನಿಯಾ ಸೂರಿ ನಿರ್ದೇಶನದ 'ಟಗರು' ಸಿನಿಮಾದಲ್ಲಿ ಡಾಲಿಯಾಗಿ ಧನಂಜಯ್ ಹಾಗೂ ಚಿಟ್ಟೆಯಾಗಿ  ವಸಿಷ್ಠ ಸಿಂಹ ಬಣ್ಣಹಚ್ಚಿದ್ದರು. ಪೊಲೀಸ್ ಹಾಗೂ ರೌಡಿಗಳ ನಡುವೆ ನಡೆಯುವ ಸಮರವನ್ನು ತೋರಿಸಿದ್ದ ಈ ಚಿತ್ರದಲ್ಲಿ ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ನಾಯಕನಾಗಿ ನಟಿಸಿದ್ದರು.  ಸಿನಿಮಾದಲ್ಲಿ  ಡಾಲಿ ಹಾಗೂ ಚಿಟ್ಟೆ ಖಡಕ್ ವಿಲನ್‌ಗಳಾಗಿ ಕಾಣಿಸಿಕೊಂಡಿದ್ದು, ತಮ್ಮ ಪಾತ್ರದ ಮೂಲಕ ಸಿಕ್ಕಾಪಟ್ಟೆ ಸದ್ದು ಮಾಡಿದ್ದರು.

2021ರಲ್ಲಿ ರಿಲೀಸ್ ಆದ 'ಗರುಡ ಗಮನ ವೃಷಭ ವಾಹನ' ಸಿನಿಮಾದಲ್ಲಿ ಶಿವ ಮತ್ತು ಹರಿ ಪಾತ್ರಗಳು ಸಿಕ್ಕಾಪಟ್ಟೆ ಗಮನ ಸೆಳೆದಿದ್ದವು. ರಿಷಭ್ ಶೆಟ್ಟಿ ಈ ಚಿತ್ರದಲ್ಲಿ ಹರಿಯಾಗಿ ತುಂಬಾ ಕಡೆ ಮುಗ್ಧರಾಗಿ ಕಾಣಿಸಿಕೊಂಡಿದ್ದರೆ, ರಾಜ್‌ ಬಿ ಶೆಟ್ಟಿ ಶಿವನ ಪಾತ್ರದಲ್ಲಿ  ನೆಗೆಟಿವ್ ಶೇಡ್‌ನಲ್ಲಿ ಅಬ್ಬರಿಸಿದ್ದರು. ಈ ಸಿನಿಮಾದಲ್ಲಿ ನಾಯಕಿ, ಲವ್, ಡ್ಯುಯೆಟ್ ಸಾಂಗ್ ಯಾವುದು ಇರಲಿಲ್ಲ. ಇದೊಂದು ಮಂಗಳೂರು ಹಿನ್ನಲೆಯಲ್ಲಿ ನೆಡೆಯುವ ಗ್ಯಾಂಗ್‌ಸ್ಟರ್ ಚಿತ್ರವಾಗಿತ್ತು. 

ಹುಡುಗರು ಚಿತ್ರದಲ್ಲಿ ಪುನೀತ್ ರಾಜ್‌ಕುಮಾರ್ ಪ್ರಭುವಾಗಿ, ಲೂಸ್ ಮಾದ ಯೋಗೇಶ್ ಸಿದ್ದೇಶ್ ಆಗಿ ಹಾಗೂ ಶ್ರೀನಗರ ಕಿಟ್ಟಿ ಚಂದ್ರು ಆಗಿ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಒಂದೇ ಮನಸ್ಥಿತಿಯುಳ್ಳ ಮೂವರು ಹುಡುಗರ ಕಥೆ ಹೊಂದಿದ್ದ ಈ ಸಿನಿಮಾ ಸೂಪರ್ ಹಿಟ್ ಆಗಿತ್ತು. ಅಷ್ಟೇ ಅಲ್ಲದೇ, ಚಿತ್ರಮಂದಿರಗಳಲ್ಲಿ 15 ವಾರಗಳ ಕಾಲ ಓಡಿತ್ತು.