ಕರುನಾಡ ಚಕ್ರವರ್ತಿಯ 'ಘೋಸ್ಟ್' ಸಿನಿಮಾ ಮೊದಲ ದಿನದ ಕಲೆಕ್ಷನ್ ರಿಪೋರ್ಟ್ ಇಲ್ಲಿದೆ.

ಹ್ಯಾಟ್ರಿಕ್ ಹೀರೋ ಶಿವರಾಜ್‌ಕುಮಾರ್ ಅಭಿನಯದ ಬಹುನಿರೀಕ್ಷಿತ 'ಘೋಸ್ಟ್' ಸಿನಿಮಾ ಮೊದಲ ದಿನ 2 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಇನ್ನೂ ಎರಡನೇ ದಿನ (ಅಕ್ಟೋಬರ್ 20)ರಂದು 1.5 ಕೋಟಿ ರೂ. ಗಳಿಸಲಿದೆ ಎಂದು ಬಾಕ್ಸಾಫೀಸ್‌ ಪಂಡಿತರು ಲೆಕ್ಕ ಅಭಿಪ್ರಾಯಪಟ್ಟಿದ್ದಾರೆ. ಜೊತೆಗೆ ಸಾಲು-ಸಾಲು ರಜೆಗಳಿರುವುದರಿಂದ ಮುಂದಿನ ದಿನಗಳಲ್ಲಿ ಇನ್ನೂ ಹೆಚ್ಚಿನ ಕಲೆಕ್ಷನ್ ಮಾಡುವುದಾಗಿ ತಿಳಿಸಿದ್ದಾರೆ. 

'ಘೋಸ್ಟ್‌' ಸಿನಿಮಾದಲ್ಲಿ ಒಂದು ಜೈಲ್ ಹೈಜಾಕ್ ಮಾಡುವ ಕಥೆಯನ್ನು ಹೆಣೆಯಲಾಗಿದೆ. ಆ ಹೈಜಾಕ್ ಮಾಡೋದು ಶಿವಣ್ಣ. ಶಿವರಾಜ್‌ಕುಮಾರ್ ಹಾಗೂ ಜಯರಾಮ್ ನಡುವಿನ ಜಿದ್ದಾಜಿದ್ದಿ ಈ ಚಿತ್ರದ ಹೈಲೈಟ್. ಸಿನಿಮಾದಲ್ಲಿ ಹ್ಯಾಟ್ರಿಕ್ ಹೀರೋ ಏಳೆಂಟು ಖೈದಿಗಳನ್ನು ಬಳಸಿ ಜೈಲಿನ ಸಿಬ್ಬಂದಿಯನ್ನೇ ಯಾಮಾರಿಸುತ್ತಾರೆ. ಶಿವಣ್ಣ ಕೊನೆವರೆಗೂ ತಾನ್ಯಾರು ಮತ್ತು ತನ್ನ ಹಿಂದೆ ಇರೋದ್ಯಾರು ಅನ್ನೋದನ್ನು ಬಿಟ್ಟುಕೊಡಲ್ಲ. ಈ ನಡುವೆ ಜೈಲಿನ ಮುಖ್ಯ ಅಧಿಕಾರಿಯಾಗಿ ಮಲಯಾಳಂ ನಟ ಜಯರಾಮ್ ಎಂಟ್ರಿ ಕೊಡ್ತಾರೆ. ಹೈಜಾಕ್ ಆದ ಜೈಲನ್ನು ಮತ್ತೆ ತಮ್ಮ ಅಧೀನಕ್ಕೆ ಪಡೆಯುವ ಹೊಣೆಹೊತ್ತು ಬರುವ ಜಯರಾಮ್ ಹಾಗೂ ಶಿವಣ್ಣ ನಡುವೆ ಸಾಕಷ್ಟು ಜಿದ್ದಾಜಿದ್ದಿ ನಡೆಯಲಿದ್ದು, ಸಖತ್ ಇಂಟರೆಸ್ಟಿಂಗ್ ಆಗಿದೆ. 

ಜೈಲರ್ ಬಳಿಕ ಶಿವರಾಜ್‌ಕುಮಾರ್ ಮತ್ತೊಂದು ಜೈಲಿನ ಕಥೆಯಲ್ಲಿ ನಟಿಸಿರೋದು ಕಾಕತಾಳೀಯವೇನೋ? ಆದರೆ, ಈ ಸತ್ಯವನ್ನು ನಂಬಲೇಬೇಕು. ಶಿವಣ್ಣನ ಗ್ಯಾಂಗ್‌ಸ್ಟರ್ ಲುಕ್ ಪ್ರೇಕ್ಷಕರಿಗಂತೂ ಸಖತ್ ಕಿಕ್ ಕೊಡುತ್ತೆ. ಇಡೀ ಸಿನಿಮಾದಲ್ಲಿ ಶಿವಣ್ಣನ ಆಂಗ್ರಿ ಯಂಗ್ ಮ್ಯಾನ್ ಲುಕ್ ಇಷ್ಟವಾಗುತ್ತೆ. ಇದರೊಂದಿಗೆ ಪಟ-ಪಟನೇ ಸಾಗುವ ಸ್ಕ್ರೀನ್ ಪ್ಲೇ ಪ್ರೇಕ್ಷಕರನ್ನು ಎಂಗೇಜಿಂಗ್ ಆಗಿ ಇಡುತ್ತದೆ. ಚಿತ್ರದಲ್ಲಿ ಶಿವರಾಜ್‌ಕುಮಾರ್ ಲುಕ್, ಮ್ಯಾನರಿಸಂ ಹಾಗೂ ಡೈಲಾಗ್ ಡಿಲೇವರಿ ಫ್ಯಾನ್ಸ್‌ಗಂತೂ ಸಖತ್ ಕಿಕ್ ಕೊಡುತ್ತೆ. ಜೊತೆಗೆ ಅರ್ಜುನ್ ಜನ್ಯ ಸಂಗೀತ ಘೋಸ್ಟ್‌ನಲ್ಲಿ ಹೀರೋ ಎನ್ನಬಹುದು. ಚಿತ್ರದ ಪ್ರಮುಖ ಘಟ್ಟಗಳಲ್ಲಿ ಪ್ರೇಕ್ಷಕರಿಗೆ ಒಂದೊಳ್ಳೆ ಅನುಭವ ಕೊಡುವುದಕ್ಕೆ ಜನ್ಯ ಸಾಕಷ್ಟು ಶ್ರಮಿಸಿದ್ದಾರೆ. 

ಘೋಸ್ಟ್ ಸಿನಿಮಾದಲ್ಲಿ ಡಿ ಏಜಿಂಗ್ ಎಂಬ ವಿಶೇಷ ಟೆಕ್ನಿಕ್‌ವೊಂದು ಬಳಕೆ ಮಾಡಲಾಗಿದೆ. ಇದರಿಂದ ಸಿನಿಮಾದಲ್ಲಿ ಶಿವರಾಜ್‌ಕುಮಾರ್ ಅವರ ಯಂಗ್ ಲುಕ್‌ ಕಾಣಬಹುದು. ಘೋಸ್ಟ್‌ನಲ್ಲಿ ಶಿವಣ್ಣ ಮೂರ್ನಾಲ್ಕು ಲುಕ್‌ನಲ್ಲಿ ಕಾಣಿಸಿಕೊಳ್ಳಲಿದ್ದು, ಸಿನಿರಸಿರಿಗೆ ಇದು ಹೊಸದೊಂದು ಅನುಭವ ನೀಡಲಿದೆ. ಚಿತ್ರದ ಕಥೆಯಲ್ಲಿ ಗ್ಯಾಂಗ್‌ಸ್ಟರ್ ಕಥೆ ಬರಲಿದ್ದು, ಪ್ಲ್ಯಾಶ್ ಬ್ಯಾಕ್ ಸ್ಟೋರಿ ಕೂಡ ಇದೆ. ಹೀಗಾಗಿ, ಹ್ಯಾಟ್ರಿಕ್ ಹೀರೋಗೆ ಡಿ ಏಜಿಂಗ್ ಟೆಕ್ನಿಕ್ ಬಳಸಿ ಯಂಗ್ ಲುಕ್ ನೀಡಲಾಗಿದೆ. ಇದರಿಂದ ಆರಂಭದಲ್ಲಿದ್ದ ಶಿವಣ್ಣನ ಲುಕ್‌ನ್ನು ನೀವು ಈಗಲೂ ಕಣ್ತುಂಬಿಕೊಳ್ಳಬಹುದು. ಘೋಸ್ಟ್ ಸಿನಿಮಾಗೆ ಇರಾನ್ ವಿಎಫ್‌ಎಕ್ಸ್ ತಂಡ ಕೆಲಸ ಮಾಡಿದೆ. ಈ ಹಿಂದೆ ಈ ಟೀಮ್ ತೆಲುಗಿನ ಆರ್‌ಆರ್ಆರ್ ಚಿತ್ರದಲ್ಲಿ ಕೆಲಸ ಮಾಡಿತ್ತು. ಜೊತೆಗೆ ಮಣಿರತ್ನಂ ಅವರ ಪೊನ್ನಿಯಲ್ ಸೆಲ್ವನ್ ಸಿನಿಮಾಗೂ ಕೆಲಸ ಮಾಡಿದೆ. ಇದೀಗ ಈ ತಂಡವನ್ನು ಕನ್ನಡಕ್ಕೆ ಕರೆತರಲಾಗಿದ್ದು, ನಿರ್ದೇಶಕರು ಹೊಸ ಅದ್ಭುತವನ್ನೇ ಸೃಷ್ಟಿಸಿದ್ದಾರೆ. 

ಕರ್ನಾಟಕದಲ್ಲಿ 'ಲಿಯೋ' ಅಕ್ಟೋಬರ್ ೧೯ರ ಬೆಳಗ್ಗೆ 4 ಗಂಟೆಯಿಂದಲೇ ಪ್ರದರ್ಶನ ಕಂಡಿತ್ತು. ಈ ಚಿತ್ರಕ್ಕೆ ಕರ್ನಾಟಕದಲ್ಲಿ 'ಘೋಸ್ಟ್'ಗಿಂತಲೂ ಹೆಚ್ಚಿನ ಶೋಗಳನ್ನು ನೀಡಲಾಗಿತ್ತು. ಸುಮಾರು 1000ಕ್ಕೂ ಅಧಿಕ ಶೋ ನೀಡಲಾಗಿದೆ ಎಂದು ವರದಿಯಾಗಿತ್ತು. ಅಲ್ಲದೆ ಟಿಕೆಟ್ ಬೆಲೆ ಕೂಡ ದುಬಾರಿ ಇತ್ತು. ಇದೆಲ್ಲವನ್ನೂ ಲೆಕ್ಕ ಹಾಕಿ ಟ್ರೇಡ್ ಎಕ್ಸ್‌ಪರ್ಟ್ಸ್ ನೀಡಿರುವ ವರದಿ ಪ್ರಕಾರ, ಕರ್ನಾಟಕದಲ್ಲಿ ಮೊದಲ ದಿನವೇ 14 ಕೋಟಿ ರೂಪಾಯಿ ಕಲೆಕ್ಷನ್ ಮಾಡಿದೆ. ಇದು 'ಘೋಸ್ಟ್'ಗಿಂತ ಹೆಚ್ಚು ಕಲೆಕ್ಷನ್ ಮಾಡಿದೆ ಎಂದು ಹೇಳಲಾಗುತ್ತಿದೆ.