ಸ್ಯಾಂಡಲ್‌ವುಡ್ ಕರ್ಪೂರದ ಗೊಂಬೆ ಶ್ವೇತಾ ಕುರಿತು ನಿಮಗೆ ಗೊತ್ತಿಲ್ಲದ ಕುತೂಹಲಕಾರಿ ವಿಷಯಗಳಿವು!

ಶ್ವೇತಾ ಅವರ ಹುಟ್ಟು ಹೆಸರು ಲಕ್ಷ್ಮೀ. ಕನ್ನಡ ಚಿತ್ರರಂಗದಲ್ಲಿ ಅವರು ಶ್ವೇತಾ ಅಂತಲೇ ಖ್ಯಾತಿ ಪಡೆದುಕೊಂಡಿದ್ದಾರೆ. ಇನ್ನೂ ತಮಿಳು ಚಿತ್ರರಂಗದಲ್ಲಿ ಅವರು 'ವಿನೋದಿನಿ' ಹೆಸರಿನಿಂದ ಜನಪ್ರಿಯತೆ ಪಡೆದುಕೊಂಡಿದ್ದಾರೆ. ಶ್ವೇತಾ ಅವರ ಮನೆಯವರು ಪ್ರೀತಿಯಿಂದ ಅವರನ್ನು 'ಮಿಂಟಾ' ಅಂತ ಕರೆಯುತ್ತಾರಂತೆ. 

ನಟಿ ಶ್ವೇತಾ ಹುಟ್ಟಿ ಬೆಳೆದಿದೆಲ್ಲಾ ಚೈನೈನಲ್ಲಿಯೇ. ಇವರ ತಂದೆ ರಾಜಸ್ಥಾನ ಮೂಲದವರು. ತಾಯಿ ತಂಜಾವೂರು ಮೂಲದವರು. ಬಾಲಕಲಾವಿದೆಯಾದ ಇವರು ೩ನೇ ಕ್ಲಾಸ್‌ನಿಂದಲೇ ನಟನೆ ಆರಂಭಿಸಿದರು. ಇವರು ದೂರ ಶಿಕ್ಷಣದ ಮೂಲಕ ಪಿಯುಸಿವರೆಗೆ ಓದಿದ್ದಾರೆ. 

ಬಾಲನಟಿಯಾಗಿ ತಮಿಳು ಸಿನಿಮಾರಂಗಕ್ಕೆ ಎಂಟ್ರಿ ಕೊಟ್ಟಿದ್ದ ವಿನೋದಿನಿ, ಸ್ಯಾಂಡಲ್‌ವುಡ್‌ಗೆ ಬಂದಿದ್ದು ಕ್ಯಾಮರಾಮಾನ್ ಪಿಕೆಹೆಚ್ ದಾಸ್ ಅವರ ಮೂಲಕ. 'ಚೈತ್ರದ ಪ್ರೇಮಾಂಜಲಿ' ಸಿನಿಮಾಗಾಗಿ ಚಂದನವನ ಪ್ರವೇಶಿಸಿದ ಅವರಿಗೆ 'ಶ್ವೇತಾ' ಅಂತ ಹೆಸರು ಇಟ್ಟಿದ್ದು ನಿರ್ದೇಶಕ ಎಸ್ ನಾರಾಯಣ್. ಇದಕ್ಕೂ ಮುನ್ನ ಕಾಲಿವುಡ್‌ನಲ್ಲಿ ವಿನೋದಿನಿ ಅಂತಲೇ ಫೇಮಸ್ ಆಗಿದ್ದರು. 

'ಚೈತ್ರದ ಪ್ರೇಮಾಂಜಲಿ' ಮೂಲಕ ಚಂದನವನಕ್ಕೆ ಕಾಲಿಟ್ಟ ಈ ನಟಿ ನಂತರ ಕರ್ಪೂರದ ಗೊಂಬೆ, ಕೋಟಿಗೊಬ್ಬ, ಹೆತ್ತವರು, ಮುದ್ದಿನ ಅಳಿಯ, ಅಗ್ನಿಸಾಕ್ಷಿ, ಗೆಜ್ಜೆನಾದ, ಮಿನುಗುತಾರೆ, ಲಕ್ಷ್ಮೀ ಮಹಾಲಕ್ಷ್ಮೀ ಸೇರಿದಂತೆ ಅನೇಕ ಸಿನಿಮಾಗಳಲ್ಲಿ ಮಿಂಚಿದ್ದರು.

ಒಂದು ಕಾಲದಲ್ಲಿ ಇವರು ಬಹು ಬೇಡಿಕೆಯ ನಟಿಯಾಗಿ ಮಿಂಚಿದ್ದರು. ಶ್ವೇತಾ ನಟನೆಯ ಬಹುತೇಕ ಸಿನಿಮಾಗಳು ೧೦೦ ದಿನಗಳ ಕಾಲ ಪ್ರದರ್ಶನ ಕಂಡಿದ್ದವು. ಹೀಗಾಗಿ, ಅವರಿಗೆ ಕನ್ನಡ ಚಿತ್ರರಂಗದಲ್ಲಿ 'ಲಕ್ಕಿ ಸ್ಟಾರ್' ಎಂಬ ಹೆಸರು ಬಂತು. ಇವರು ಕೋಟಿಗೊಬ್ಬ ಸಿನಿಮಾದಲ್ಲಿ ವಿಷ್ಣುವರ್ಧನ್ ತಂಗಿಯಾಗಿ ಅಭಿನಯಿಸಿದ್ದರು. ಈ ಚಿತ್ರಕ್ಕೆ ಕ್ಲ್ಯಾಪ್ ಮಾಡಿದವರು ಇವರೇ. ನಿರ್ಮಾಪಕ ಸೂರಪ್ಪ ಬಾಬು ''ನೀವು ಲಕ್ಕಿ ಸ್ಟಾರ್. ನೀವೇ ಕ್ಲ್ಯಾಪ್ ಮಾಡಿ'' ಅಂತ ಹೇಳಿದ್ದರಂತೆ. 

ನಟಿ ಶ್ವೇತಾ ಅವರು 2009ರ ಫೆಬ್ರವರಿ 22ರಂದು ಚೈನೈನ ದೇವಸ್ಥಾನದಲ್ಲಿ ಮೈಸೂರು ಮೂಲದ ಶ್ರೀಧರ್ ಎಂಬುವವರನ್ನು ಮದುವೆಯಾದರು. ಇವರ ಪತಿ ಬಿಲ್ಡರ್ ಆಗಿದ್ದು, ಹೋಮ್ ಕನ್ಸಟ್ರಕ್ಷನ್ ವೃತ್ತಿಯಲ್ಲಿದ್ದಾರೆ. ಇವರಿಬ್ಬರದ್ದು ಆರೆಂಜ್ಡ್ ಮ್ಯಾರೇಜ್. ಕೆಲ ವರ್ಷಗಳ ಹಿಂದೆ ಶ್ರೀಧರ್ ಅಪಘಾತಕ್ಕೊಳಗಾಗಿದ್ದರು. ಇದರಿಂದ ವ್ಹೀಲ್ ಚೇರ್ ಮೇಲಿರಬೇಕಾಗಿತ್ತು. ಶ್ವೇತಾ ಹಾಗೂ ಶ್ರೀಧರ್ ದಂಪತಿಗೆ ಇಬ್ಬರು ಮಕ್ಕಳಿದ್ದಾರೆ. 

ಸದ್ಯ ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ 'ಲಕ್ಷ್ಮೀ ನಿವಾಸ' ಧಾರಾವಾಹಿ ಮೂಲಕ  ನಟಿ ಶ್ವೇತಾ ಕನ್ನಡ ಕಿರುತೆರೆಗೆ ಕಾಲಿಟ್ಟಿದ್ದಾರೆ. ಈ ಸೀರಿಯಲ್‌ನಲ್ಲಿ 'ಲಕ್ಷ್ಮೀ' ಪಾತ್ರದ ಮೂಲಕ ಸಾಕಷ್ಟು ಮೆಚ್ಚುಗೆ ಗಳಿಸುತ್ತಿದ್ದಾರೆ. ಟಿಆರ್‌ಪಿ ರೇಟಿಂಗ್‌ನಲ್ಲೂ ಈ ಧಾರಾವಾಹಿ ಮೊದಲ ಸ್ಥಾನದಲ್ಲಿದೆ.