ಹ್ಯಾಪಿ ಬರ್ತಡೇ: ರಾಘವೇಂದ್ರ ರಾಜ್‌ಕುಮಾರ್‌ ಅಭಿನಯದ ಟಾಪ್ 10 ಕನ್ನಡ ಸಿನಿಮಾಗಳ ಪಟ್ಟಿ ಇಲ್ಲಿದೆ.

ರಾಘವೇಂದ್ರ ರಾಜ್‌ಕುಮಾರ್ ಚಿರಂಜೀವಿ ಸುಧಾಕರ್ ಸಿನಿಮಾ ಮೂಲಕ ನಾಯಕನಾಗಿ ಚಿತ್ರರಂಗಕ್ಕೆ ಪಾದಾರ್ಪಣೆ ಮಾಡಿದರು. ಸಿಂಗೀತಂ ಶ್ರೀನಿವಾಸ ರಾವ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಈ ಚಿತ್ರದಲ್ಲಿ ಮಲಯಾಳಿ ನಟಿ ಮೋನಿಷಾ ನಾಯಕಿಯಾಗಿ ನಟಿಸಿದ್ದರು. ಸಿನಿಮಾದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಮತ್ತು ಮಂಜುಳಾ ಗುರುರಾಜ್ ಕಂಠದಲ್ಲಿ ಮೂಡಿಬಂದಿದ್ದ `ವಸಂತ ಮಾಸ ಶೃಂಗಾರ ಮಾಸ' ಗೀತೆ ತುಂಬಾ ಪ್ರಸಿದ್ಧಿಯಾಗಿತ್ತು.  ಚಿರಂಜೀವಿ ಸುಧಾಕರ್ ಚಿತ್ರದ ಮೂಲಕ ಶಶಿಕುಮಾರ್ ಖಳನಟನಾಗಿ ಸ್ಯಾಂಡಲ್‌ವುಡ್‌ಗೆ ಎಂಟ್ರಿಕೊಟ್ಟಿದ್ದರು. 

1989ರ ಬಿಗ್ ಬ್ಲಾಕ್‌ಬ್ಲಸ್ಟರ್ ಚಿತ್ರ ನಂಜುಂಡಿ ಕಲ್ಯಾಣ. ಈ ಸಿನಿಮಾದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಹಾಗೂ ಮಾಲಾಶ್ರೀ ನಟಿಸಿದ್ದರು. ರಾಘವೇಂದ್ರ ರಾಜ್‌ಕುಮಾರ್ ಚೊಚ್ಚಲ ಸಿನಿಮಾಗೆ ನಾಯಕಿಯ ಹುಡುಕಾಟದಲ್ಲಿರುವಾಗ, ಜನಪ್ರಿಯ ಗೀತಾ ರಚನೆಕಾರ ಚಿ.ಉದಯ್ ಶಂಕರ್ ಮಾಲಾಶ್ರೀ ಅವರನ್ನು ರಾಜ್‌ ಕುಟುಂಬಕ್ಕೆ ಪರಿಚಯಿಸಿದರು. ಬಳಿಕ ಇವರಿಬ್ಬರು ನಂಜುಂಡಿ ಕಲ್ಯಾಣ ಸಿನಿಮಾದಲ್ಲಿ ಒಟ್ಟಿಗೆ ನಟಿಸಿದರು. ಈ ಚಿತ್ರ ಸೂಪರ್ ಹಿಟ್ ಆಯಿತು. ಇಬ್ಬರಿಗೂ ಒಳ್ಳೆಯ ಹೆಸರು ತಂದುಕೊಟ್ಟಿತು.

ಎಂ.ಎಸ್.ರಾಜಶೇಖರ್ ನಿರ್ದೇಶನದಲ್ಲಿ ಮೂಡಿಬಂದ ಗಜಪತಿ ಗರ್ವಭಂಗ ಸಿನಿಮಾದಲ್ಲಿ ಮತ್ತೆ ಮಾಲಾಶ್ರೀ ಹಾಗೂ ರಾಘವೇಂದ್ರ ರಾಜ್‌ಕುಮಾರ್ ಒಟ್ಟಿಗೆ ನಟಿಸಿದರು. ಬಹುತೇಕ ನಂಜುಂಡಿ ಕಲ್ಯಾಣ ಚಿತ್ರದ ಕಲಾವಿದರನ್ನು ಹೊಂದಿದ್ದ ಈ ಚಿತ್ರ ಕೂಡ ಚಿತ್ರಮಂದಿರಗಳಲ್ಲಿ ಒಂದು ವರ್ಷ ಪ್ರದರ್ಶನ ಕಂಡಿತು. ಧೀರೇಂದ್ರ ಗೋಪಾಲ್ ಗಜಪತಿ ಪಾತ್ರದಲ್ಲಿ ಅದ್ಭುತ ಅಭಿನಯ ನೀಡಿದ್ದರು.

ವಿ ಗೋವಿಂದರಾಜ್ ನಿರ್ದೇಶನದಲ್ಲಿ ಮೂಡಿಬಂದಿದ್ದ ಕಲ್ಯಾಣ ಮಂಟಪ ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಜೊತೆ ಮಲಯಾಳಂ ನಟಿ ಮೋಹಿನಿ ಜೊತೆಯಾಗಿ ನಟಿಸಿದ್ದರು. ರಾಘವೇಂದ್ರ ರಾಜ್‌ಕುಮಾರ್ ಈ ಚಿತ್ರದಲ್ಲಿ ಬೆಂಗಳೂರಿನ ತಮ್ಮ ಬಾಡಿಗೆ ಮನೆಯನ್ನು ಕಲ್ಯಾಣ ಮಂಟಪವನ್ನಾಗಿ ಮಾಡಬೇಕೆನ್ನುವ ತಮ್ಮ ತಾತನ ಆಸೆಯನ್ನು ಪೂರೈಸುವ ತೀರ್ಥಹಳ್ಳಿಯ ಮರಿ ಸಾಹುಕಾರನಾಗಿ ಕಾಣಿಸಿಕೊಂಡಿದದ್ದರು. 

ಎಂ.ಎಸ್.ರಾಜಶೇಖರ್ ನಿರ್ದೇಶನದಲ್ಲಿ ಮೂಡಿಬಂದ ಸೂತ್ರಧಾರ ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಜೊತೆ ನಿವೇದಿತಾ ಜೈನ್ ನಾಯಕಿಯಾಗಿ ನಟಿಸಿದ್ದರು. ಅನಾಥನಾಗಿ ಬೆಳೆಯುವ ನಾಯಕನಿಗೆ ನಂತರ ತನ್ನ ಶ್ರೀಮಂತ ಹಿನ್ನಲೆ ಬಗ್ಗೆ ತಿಳಿದಾಗ, ತನ್ನ ತಾತನಿಗೆ ಹೇಗೆ ನೆರವಾಗುತ್ತಾನೆ ಎಂಬುದು ಚಿತ್ರದ ಕಥೆಯಯಾಗಿತ್ತು.

ಎಸ್ ನಾರಾಯಣ್ ನಿರ್ದೇಶನದಲ್ಲಿ ಮೂಡಿಬಂದ ಅನುರಾಗದ ಅಲೆಗಳು ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ಜೊತೆ ಮಮತಾಶ್ರೀ ನಾಯಕಿಯಾಗಿ ನಟಿಸಿದ್ದರು. ಚಿತ್ರದಲ್ಲಿ ವಿನಯ್ ರಾಜ್‌ಕುಮಾರ್ ಕೂಡ ಬಾಲಕಲಾವಿದನಾಗಿ ನಟಿಸಿದ್ದರು. ಚಿತ್ರದ ಒಂದು ಹಾಡನ್ನು ಡಾ.ರಾಜ್‌ಕುಮಾರ್ ಹಾಡಿದ್ದರೆ, ಉಳಿದ ಹಾಡುಗಳನ್ನು ರಾಘವೇಂದ್ರ ರಾಜ್‌ಕುಮಾರ್ ಮತ್ತು ಮಂಜುಳಾ ಗುರುರಾಜ್ ಹಾಡಿದ್ದರು. 

ಕರ್ನಾಟಕದ ಮಾಜಿ ಮುಖ್ಯಮಂತ್ರಿ ಎಂ ವೀರಪ್ಪ ಮೊಯ್ಲಿ ಕಾದಂಬರಿ ಆಧಾರಿತ ಸಾಗರ ದೀಪ ಚಿತ್ರವನ್ನು ಟಿ.ಎಸ್.ನಾಗಾಭರಣ ನಿರ್ದೇಶಿಸಿದ್ದರು. ಚಿತ್ರದಲ್ಲಿ ಮೀನುಗಾರಿಕೆಯಲ್ಲಿ ಮಧ್ಯವರ್ತಿಗಳಿಂದ ಮೀನುಗಾರರಿಗೆ ಆಗುವ ನಷ್ಟವನ್ನು ಹೋಗಲಾಡಿಸಲು ಹೋರಾಡುವ ಯುವಕನ ಪಾತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ನಟಿಸಿದ್ದರು. ವಜ್ರಮುನಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದರು.

ಸಿಂಗೀತಂ ಶ್ರೀನಿವಾಸರಾವ್ ನಿರ್ದೇಶನದ ಟುವ್ವಿ ಟುವ್ವಿ ಟುವ್ವಿ ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಮಾರ್ ನೌಕಾಧಿಕಾರಿ ಪಾತ್ರದಲ್ಲಿ ನಟಿಸಿದ್ದರು. ಇದು ಹಿಂದಿಯ ತುಮ್ ಹಸೀಂ ಮೈ ಜವಾನ್ ಚಿತ್ರದ ಮೇಲೆ ಆಧಾರವಾಗಿತ್ತು. 

ಪಾರ್ವತಮ್ಮ ರಾಜ್‌ಕುಮಾರ್ ನಿರ್ಮಾಣ ಮತ್ತು ಉಪೇಂದ್ರ ನಿರ್ದೇಶನದಲ್ಲಿ ಮೂಡಿಬಂದ ಸ್ವಸ್ತಿಕ್ ಚಿತ್ರದಲ್ಲಿ ರಾಘವೇಂದ್ರ ರಾಜ್‌ಕುಮಾರ್ ರಗಡ್ ಲುಕ್‌ನಲ್ಲಿ ಕಾಣಿಸಿಕೊಂಡಿದ್ದರು. ಇದೇ ಚಿತ್ರದ ಎಳೆಯಲ್ಲಿ ಮುಂದೆ ಕಮಲ್ ಹಾಸನ್ ವಿಶ್ವರೂಪಂ ಚಿತ್ರ ಮೂಡಿಬಂದಿತ್ತು.  

ಸ್ವಸ್ತಿಕ್ ಬಳಿಕ ನಟನೆಯಿಂದ ದೂರ ಉಳಿದಿದ್ದ ನಟ ರಾಘವೇಂದ್ರ ರಾಜ್‌ಕುಮಾರ್ ೨೦೧೯ರಲ್ಲಿ ಅಮ್ಮನ ಮನೆ ಚಿತ್ರದ ಮೂಲಕ ಕಮ್‌ಬ್ಯಾಕ್ ಮಾಡಿದ್ದರು.  ಈ ಸಿನಿಮಾದಲ್ಲಿ ಜನ್ಮಜಾತ ಅಂಗವೈಕಲ್ಯದಿಂದ ಬಳಲುವ ಪಾತ್ರದಲ್ಲಿನ ಅದ್ಭುತ ಅಭಿನಯಕ್ಕೆ ಕರ್ನಾಟಕ ರಾಜ್ಯ ಅತ್ಯುತ್ತಮ ನಟ ಪ್ರಶಸ್ತಿ ಪಡೆದರು. ಸದ್ಯ ಫೋಷಕ ಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ.