ಅತಿಹೆಚ್ಚು ರಿಮೇಕ್ ಸಿನಿಮಾಗಳನ್ನು ಮಾಡಿರುವ ಟಾಪ್ 10 ಸೌತ್ ಸೂಪರ್ ಸ್ಟಾರ್‌ಗಳ ಪಟ್ಟಿ

ಅತಿಹೆಚ್ಚು ರಿಮೇಕ್ ಸಿನಿಮಾಗಳಲ್ಲಿ ನಟಿಸಿರುವ ದಕ್ಷಿಣ ಭಾರತದ ನಟರ ಪೈಕಿ ತಮಿಳು ನಟ ಕಮಲ್ ಹಾಸನ್ ಮೊದಲನೇ ಸ್ಥಾನದಲ್ಲಿದ್ದಾರೆ. ಕಮಲ್ ಹಾಸನ್ ವಿವಿಧ ಭಾಷೆಯ 60ಕ್ಕೂ ಹೆಚ್ಚು ರಿಮೇಕ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಕಮಲ್ ಹಾಸನ್ ಅವರು ಈವರೆಗೂ 230ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದು, ಈ ಪೈಕಿ 60ಕ್ಕೂ ಹೆಚ್ಚು ರಿಮೇಕ್ ಸಿನಿಮಾಗಳಿವೆ. ಕಳತ್ತೂರ್ ಕಣ್ಣಮ್ಮ, ಪಾರುವ ಕಾಲಂ, ಪಣತುಕ್ಕಾಗ, ಸಿನಿಮಾ ಪೈಥಿಯಂ ರಾಸಲೀಲಾ, ಮತ್ತೋರು ಸೀತಾ ಅವರ ಜನಪ್ರಿಯ ರಿಮೇಕ್ ಸಿನಿಮಾಗಳು.  ಸದ್ಯ ಕಮಲ್ ಹಾಸನ್ ಇಂಡಿಯನ್ 2 ಮತ್ತು ಕೆಹೆಚ್234 ಸಿನಿಮಾಗಳ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ.  

ಕಾಲಿವುಡ್ ಸೂಪರ್ ಸ್ಟಾರ್ ರಜನಿಕಾಂತ್ ವಿವಿಧ ಭಾಷೆಯ 60 ರಿಮೇಕ್ ಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ಅಂತುಲೆನಿ ಕಥೆ, ಮೂರು ಮುಡಿಚು, ಬಾಳು ಜೇನು, ಚಿಲಕಮ್ಮ ಚೆಪ್ಪಿದ್ದಿ, ಕುಂಕುಮ ರಕ್ಷಣೆ, ಗಲಾಟೆ ಸಂಸಾರ, ಶಂಕರ್ ಸಲೀಮ್ ಸೈಮನ್, ಅನ್ನದಮ್ಮುಲ ಸವಾಲ್ ಅವರ ಪ್ರಮುಖ ರಿಮೇಕ್ ಚಿತ್ರಗಳು. ಪ್ರಸ್ತುತ ಅವರು ನೆಲ್ಸನ್ ಅವರ ನಿರ್ದೇಶನದ 'ಜೈಲರ್' ಚಿತ್ರದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಬಹುತಾರಾಗಣ ಹೊಂದಿರುವ ಈ ಸಿನಿಮಾ 2023ರ ಕೊನೆಯಲ್ಲಿ ಬಿಡುಗಡೆಯಾಗುವ ನಿರೀಕ್ಷೆಯಿದೆ. ಈ ಸಿನಿಮಾದಲ್ಲಿ ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಕೂಡ ಅಭಿನಯಿಸಿದ್ದಾರೆ.  

ಟಾಲಿವುಡ್ ಮೆಗಾಸ್ಟಾರ್ ಚಿರಂಜೀವಿ ಅವರು 1978ರಲ್ಲಿ 'ಪುನದಿರಲ್ಲು' ಚಿತ್ರದ ಮೂಲಕ ನಟನೆಗೆ ಪಾದಾರ್ಪಣೆ ಮಾಡಿದರು. ಈವರೆಗೆ 150ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಾಯಕನಾಗಿ ನಟಿಸಿರುವ ಚಿರಂಜೀವಿ ಅವರು, ಮೆಗಾಸ್ಟಾರ್ ಆಗಿ ಗುರುತಿಸಿಕೊಂಡಿದ್ದಾರೆ. ಚಿರಂಜೀವಿ 38 ರಿಮೇಕ್ ಸಿನಿಮಾಗಳಲ್ಲಿ ಅಭಿನಯಿಸಿದ್ದು, ಇತರ ಭಾಷಾ ಸಿನಿಮಾಗಳಲ್ಲೂ ಬಣ್ಣ ಹಚ್ಚಿದ್ದಾರೆ. ಮನ ವೂರಿ ಪಾಂಡವುಲು, ಇದಿ ಕಥಾ ಕಾಡು, ಪುನ್ನಮಿ ನಾಗು, ಪ್ರೇಮ ತರಂಗಲು, ಚಟ್ಟನಿಕಿ ಕಲ್ಲು ಲೇವು, ಪಟ್ನಮ್ ವಚ್ಚಿನ ಪತಿವ್ರತಾಲು ಅವರ ಪ್ರಮುಖ ರಿಮೇಕ್ ಸಿನಿಮಾಗಳು. ಮೆಗಾಸ್ಟಾರ್ ಸದ್ಯ ತಮ್ಮ 155ನೇ ಸಿನಿಮಾ 'ಭೋಲಾ ಶಂಕರ್' ಸಿನಿಮಾ ಶೂಟಿಂಗ್ ನಲ್ಲಿ ನಿರತರಾಗಿದ್ದಾರೆ. ಇದು ತಮಿಳಿನ 'ವೇದಾಲಂ'ನ ರಿಮೇಕ್ ಆಗಿದೆ.  

ಮಲಯಾಳಂ ಸೂಪರ್ ಸ್ಟಾರ್  ಮೋಹನ್ ಲಾಲ್ ಈವರೆಗೂ 350ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ಮೋಹನ್ ಲಾಲ್ 30 ರಿಮೇಕ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಗುರು ದಕ್ಷಿಣ, ಚಕ್ರವಾಲಂ ಚುವನ್ನಪ್ಪೋಲ್, ಪಥಮುದಯಂ, ಬೋಯಿಂಗ್ ಬೋಯಿಂಗ್, ಪರಾಯನುಮವಯ್ಯಾ ಅವರ ಜನಪ್ರಿಯ ರಿಮೇಕ್ ಸಿನಿಮಾಗಳು. ಸದ್ಯ ಅವರು ರಜನೀಕಾಂತ್ ಅವರ 'ಜೈಲರ್' ಸಿನಿಮಾ ಚಿತ್ರೀಕರಣದಲ್ಲಿ ನಿರತರಾಗಿದ್ದಾರೆ.  

ತೆಲುಗು ಸೂಪರ್ ಸ್ಟಾರ್ ವೆಂಕಟೇಶ್ ದಗ್ಗುಬಾಟಿ ಈವರೆಗೂ ತೆಲುಗು ಮತ್ತು ಹಿಂದಿ ಭಾಷೆಗಳ 70ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಇವರು 32 ರಿಮೇಕ್ ಚಿತ್ರಗಳಲ್ಲಿ ಬಣ್ಣ ಹಚ್ಚಿದ್ದಾರೆ. ವೆಂಕಟೇಶ್ ದಗ್ಗುಬಾಟಿ ಅವರ ಹೆಚ್ಚಿನ ಚಿತ್ರಗಳು ಬೇರೆ ಭಾಷೆಯ ಸಿನಿಮಾಗಳ ರಿಮೇಕ್ ಆಗಿವೆ. ಅರ್ಜುನುಡು, ತ್ರಿಮೂರ್ತಿಗಳು, ರಕ್ತ ತಿಲಕಂ, ಬ್ರಹ್ಮಪುತ್ರುಡು, ವಾರಸುಡೋಚಡು, ಟು ಟೌನ್ ರೌಡಿ, ಚಂಟಿ ಅವರ ಪ್ರಮುಖ ರಿಮೇಕ್ ಸಿನಿಮಾಗಳು. ವೆಂಕಟೇಶ್ ದಗ್ಗುಬಾಟಿ ಸದ್ಯ ಹಿಂದಿ ಸಿನಿಮಾ 'ಕಿಸಿ ಕಾ ಭಾಯ್, ಕಿಸಿ ಕಿ ಜಾನ್' ಶೂಟಿಂಗ್ ನಲ್ಲಿ ಬ್ಯುಸಿಯಾಗಿದ್ದಾರೆ. 

35 ವರ್ಷಗಳ ವೃತ್ತಿಜೀವನದಲ್ಲಿ ನಾಯಕನಾಗಿ ನೂರಕ್ಕೂ ಹೆಚ್ಚು ಸಿನಿಮಾಗಳನ್ನು ಮಾಡಿದ ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್, 28 ರಿಮೇಕ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಶಿವ ಮೆಚ್ಚಿದ ಕಣ್ಣಪ್ಪ, ಆಸೆಗೊಬ್ಬ, ಮೀಸೆಗೊಬ್ಬ, ಅರಳಿದ ಹೂವುಗಳು, ಮೋಡದ ಮರೆಯಲ್ಲಿ, ಮುತ್ತಣ್ಣ, ಗಂಗಾ ಯಮುನಾ, ಮುದ್ದಿನ ಕಣ್ಮಣಿ ಅವರ ಜನಪ್ರಿಯ ರಿಮೇಕ್ ಸಿನಿಮಾಗಳು. ಶಿವಣ್ಣ ಸದ್ಯ ಹಲವು ಸಿನಿಮಾಗಳಲ್ಲಿ ಬ್ಯುಸಿಯಾಗಿದ್ದು, ರಜನೀಕಾಂತ್ ಅಭಿನಯದ ಜೈಲರ್ ಚಿತ್ರದಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿದ್ದಾರೆ. 

ರಿಯಲ್ ಸ್ಟಾರ್ ಉಪೇಂದ್ರ ಅವರು ನಟ ಮಾತ್ರವಲ್ಲದೆ, ನಿರ್ದೇಶಕನಾಗಿಯೂ ಯಶಸ್ಸು ಗಳಿಸಿದ್ದಾರೆ. ಉಪೇಂದ್ರ ಅವರು 27 ರಿಮೇಕ್ ಸಿನಿಮಾಗಳಲ್ಲಿ ಅಭಿನಯಿಸಿದ್ದಾರೆ. ಓಂಕಾರ, ಪ್ರೀತ್ಸೆ, ಸೂಪರ್ ಸ್ಟಾರ್, ಐ ಲವ್ ಯೂ, ಉಪೇಂದ್ರ ಮತ್ತೆ ಬಾ ಅವರ ಪ್ರಮುಖ ರಿಮೇಕ್ ಸಿನಿಮಾಗಳು. ಸದ್ಯ ಉಪೇಂದ್ರ ಅವರು ಕಬ್ಜ ಸಿನಿಮಾದ ಪ್ರಚಾರ ಕಾರ್ಯದಲ್ಲಿ ತೊಡಗಿದ್ದಾರೆ. ಇದೊಂದು ಬಹುತಾರಾಗಣವಿರುವ ಪ್ಯಾನ್ ಇಂಡಿಯಾ ಸಿನಿಮಾವಾಗಿದ್ದು, ಮಾರ್ಚ್ 17ರಂದು ಏಳು ಭಾಷೆಗಳಲ್ಲಿ ರಿಲೀಸ್ ಆಗಲಿದೆ.  

ಮಲಯಾಳಂ ನಟ ಮುಮ್ಮಟಿ ಇದುವರೆಗೆ 400ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ವಿವಿಧ ಪಾತ್ರಗಳಲ್ಲಿ ನಟಿಸಿದ್ದಾರೆ. ಇವರು 26 ರಿಮೇಕ್ ಸಿನಿಮಾಗಳಲ್ಲಿ ನಟಿಸಿದ್ದಾರೆ. ಮುನ್ನೆಟ್ಟಂ, ಸಿಂಧೂರ ಸಂಧ್ಯಕ್ಕು ಮೌನಂ, ಒರು ತಿರ ಪಿನ್ನೆಯುಮ್ ತಿರಾ, ಜಾನ್ ಜಾಫರ್ ಜನಾರ್ಧನನ್, ಚಕ್ರವಾಲಂ ಚುವನ್ನಪ್ಪೋಲ್, ಗುರು ದಕ್ಷಿಣ ಇವರ ಪ್ರಮುಖ ರಿಮೇಕ್ ಸಿನಿಮಾಗಳು. 

ತೆಲುಗು ನಟ ಅಕ್ಕಿನೇನಿ ನಾಗಾರ್ಜುನ ಈವರೆಗೂ 100ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ಇವರು ತಮ್ಮ ವೃತ್ತಿಜೀವನದಲ್ಲಿ 20ಕ್ಕೂ ಹೆಚ್ಚು ರಿಮೇಕ್ ಸಿನಿಮಾಗಳಿಗೆ ಬಣ್ಣ ಹಚ್ಚಿದ್ದಾರೆ. ವಿಕ್ರಮ್, ಕಿರಾಯಿ ದಾದಾ, ಜಾನಕಿ ರಾಮುಡು, ನೇತಿ ಸಿದ್ಧಾರ್ಥ, ನಿರ್ಣಯ ಇವರ ಪ್ರಮುಖ ರಿಮೇಕ್ ಸಿನಿಮಾಗಳು. 

ತೆಲುಗು ಚಿತ್ರರಂಗದಲ್ಲಿ ೧೦೦ಕ್ಕೂ ಹೆಚ್ಚು ಸಿನಿಮಾಗಳಲ್ಲಿ ಪ್ರಮುಖ ಪಾತ್ರಗಳಲ್ಲಿ ನಟಿಸಿರುವ ನಂದಮೂರಿ ಬಾಲಕೃಷ್ಣ ಅವರು ಈವರೆಗೆ 17 ರಿಮೇಕ್  ಸಿನಿಮಾಗಳಿಗೆ ಬಣ್ಣ ಹಚ್ಚಿದ್ದಾರೆ. ಡಿಸ್ಕೊ ಕಿಂಗ್, ಮಂಗಮ್ಮಗಾರಿ ಮಾನವಾಡು, ಆತ್ಮಬಲಂ , ಬಾಬಾಯಿ ಅಬ್ಬಾಯಿ, ನಿಪ್ಪುಲಂತಿ ಮನೀಷಿ, ರಾಮು, ಮುದ್ದುಲ ಮಾವಯ್ಯ ಅವರ ಪ್ರಮುಖ ರಿಮೇಕ್ ಸಿನಿಮಾಗಳು.